10. тапуссасуттам̣

41. екам̣ самайам̣ бхагава̄ маллесу вихарати урувелакаппам̣ на̄ма малла̄нам̣ нигамо. атха кхо бхагава̄ пуббан̣хасамайам̣ нива̄сетва̄ паттачӣварама̄да̄йа урувелакаппам̣ пин̣д̣а̄йа па̄виси. урувелакаппе пин̣д̣а̄йа чаритва̄ паччха̄бхаттам̣ пин̣д̣апа̄тапат̣икканто а̄йасмантам̣ а̄нандам̣ а̄мантеси – ‘‘идхева та̄ва твам̣, а̄нанда, хохи, йа̄ва̄хам̣ маха̄ванам̣ аджджхога̄ха̄ми дива̄виха̄ра̄йа̄’’ти. ‘‘евам̣, бханте’’ти кхо а̄йасма̄ а̄нандо бхагавато паччассоси. атха кхо бхагава̄ маха̄ванам̣ аджджхога̄хетва̄ ан̃н̃атарасмим̣ руккхамӯле дива̄виха̄рам̣ нисӣди.

атха кхо тапуссо гахапати йена̄йасма̄ а̄нандо тенупасан̇ками; упасан̇камитва̄ а̄йасмантам̣ а̄нандам̣ абхива̄детва̄ екамантам̣ нисӣди. екамантам̣ нисинно кхо тапуссо гахапати а̄йасмантам̣ а̄нандам̣ етадавоча –

‘‘майам̣, бханте а̄нанда, гихӣ ка̄мабхогино ка̄ма̄ра̄ма̄ ка̄марата̄ ка̄масаммудита̄. тесам̣ но, бханте, амха̄кам̣ гихӣнам̣ ка̄мабхогӣнам̣ ка̄ма̄ра̄ма̄нам̣ ка̄марата̄нам̣ ка̄масаммудита̄нам̣ папа̄то вийа кха̄йати, йадидам̣ неккхаммам̣. сутам̣ метам̣, бханте, ‘имасмим̣ дхаммавинайе дахара̄нам̣ дахара̄нам̣ бхиккхӯнам̣ неккхамме читтам̣ паккхандати пасӣдати сантит̣т̣хати вимуччати етам̣ сантанти пассато’ [пассатам̣ (?)]. тайидам̣, бханте, имасмим̣ дхаммавинайе бхиккхӯнам̣ бахуна̄ джанена висабха̄го, йадидам̣ неккхамма’’нти.

‘‘аттхи кхо етам̣, гахапати, катха̄па̄бхатам̣ бхагавантам̣ дассана̄йа. а̄йа̄ма, гахапати, йена бхагава̄ тенупасан̇камисса̄ма; упасан̇камитва̄ бхагавато етаматтхам̣ а̄рочесса̄ма. йатха̄ но бхагава̄ бйа̄кариссати татха̄ нам̣ дха̄ресса̄ма̄’’ти.

‘‘евам̣, бханте’’ти кхо тапуссо гахапати а̄йасмато а̄нандасса паччассоси. атха кхо а̄йасма̄ а̄нандо тапуссена гахапатина̄ саддхим̣ йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо а̄йасма̄ а̄нандо бхагавантам̣ етадавоча –

‘‘айам̣, бханте, тапуссо гахапати евама̄ха – ‘майам̣, бханте а̄нанда, гихӣ ка̄мабхогино ка̄ма̄ра̄ма̄ ка̄марата̄ ка̄масаммудита̄, тесам̣ но бханте, амха̄кам̣ гихӣнам̣ ка̄мабхогӣнам̣ ка̄ма̄ра̄ма̄нам̣ ка̄марата̄нам̣ ка̄масаммудита̄нам̣ папа̄то вийа кха̄йати, йадидам̣ неккхаммам̣’. сутам̣ метам̣, бханте, ‘имасмим̣ дхаммавинайе дахара̄нам̣ дахара̄нам̣ бхиккхӯнам̣ неккхамме читтам̣ паккхандати пасӣдати сантит̣т̣хати вимуччати етам̣ сантанти пассато. тайидам̣, бханте, имасмим̣ дхаммавинайе бхиккхӯнам̣ бахуна̄ джанена висабха̄го йадидам̣ неккхамма’’’нти.

‘‘еваметам̣, а̄нанда, еваметам̣, а̄нанда! майхампи кхо, а̄нанда, пуббева самбодха̄ анабхисамбуддхасса бодхисаттассева сато етадахоси – ‘са̄дху неккхаммам̣, са̄дху павивеко’ти. тасса майхам̣, а̄нанда, неккхамме читтам̣ на паккхандати наппасӣдати на сантит̣т̣хати на вимуччати етам̣ сантанти пассато. тасса майхам̣, а̄нанда, етадахоси – ‘ко ну кхо хету ко паччайо, йена ме неккхамме читтам̣ на паккхандати наппасӣдати на сантит̣т̣хати на вимуччати етам̣ сантанти пассато’? тасса майхам̣, а̄нанда, етадахоси – ‘ка̄месу кхо ме а̄дӣнаво адит̣т̣хо, со ча ме абахулӣкато, неккхамме ча а̄нисам̣со анадхигато, со ча ме ана̄севито. тасма̄ ме неккхамме читтам̣ на паккхандати наппасӣдати на сантит̣т̣хати на вимуччати етам̣ сантанти пассато’. тасса майхам̣, а̄нанда, етадахоси – ‘саче кхо ахам̣ ка̄месу а̄дӣнавам̣ дисва̄ там̣ бахулам̣ кареййам̣ [бахулӣкареййам̣ (сӣ. сйа̄. пӣ.)], неккхамме а̄нисам̣сам̣ адхигамма тама̄севеййам̣, т̣ха̄нам̣ кхо панетам̣ виджджати йам̣ ме неккхамме читтам̣ паккхандеййа пасӣдеййа сантит̣т̣хеййа вимуччеййа етам̣ сантанти пассато’. со кхо ахам̣, а̄нанда, апарена самайена ка̄месу а̄дӣнавам̣ дисва̄ там̣ бахуламака̄сим̣, неккхамме а̄нисам̣сам̣ адхигамма тама̄севим̣. тасса майхам̣, а̄нанда, неккхамме читтам̣ паккхандати пасӣдати сантит̣т̣хати вимуччати етам̣ сантанти пассато. со кхо ахам̣, а̄нанда, вивиччева ка̄мехи вивичча акусалехи дхаммехи савитаккам̣ савича̄рам̣ вивекаджам̣ пӣтисукхам̣ пат̣хамам̣ джха̄нам̣ упасампаджджа вихара̄ми. тасса майхам̣, а̄нанда, имина̄ виха̄рена вихарато ка̄масахагата̄ сан̃н̃а̄манасика̄ра̄ самуда̄чаранти. свасса ме хоти а̄ба̄дхо. сеййатха̄пи, а̄нанда, сукхино дуккхам̣ уппаджджеййа йа̄вадева а̄ба̄дха̄йа; евамевасса ме ка̄масахагата̄ сан̃н̃а̄манасика̄ра̄ самуда̄чаранти. свасса ме хоти а̄ба̄дхо.

‘‘тасса майхам̣, а̄нанда, етадахоси – ‘йам̣нӯна̄хам̣ витаккавича̄ра̄нам̣ вӯпасама̄…пе… дутийам̣ джха̄нам̣ упасампаджджа вихареййа’нти. тасса майхам̣, а̄нанда, авитакке читтам̣ на паккхандати наппасӣдати на сантит̣т̣хати на вимуччати етам̣ сантанти пассато. тасса майхам̣, а̄нанда, етадахоси – ‘ко ну кхо хету ко паччайо, йена ме авитакке читтам̣ на паккхандати наппасӣдати на сантит̣т̣хати на вимуччати етам̣ сантанти пассато’? тасса майхам̣, а̄нанда, етадахоси – ‘витаккесу кхо ме а̄дӣнаво адит̣т̣хо, со ча ме абахулӣкато, авитакке ча а̄нисам̣со анадхигато, со ча ме ана̄севито. тасма̄ ме авитакке читтам̣ на паккхандати наппасӣдати на сантит̣т̣хати на вимуччати етам̣ сантанти пассато’. тасса майхам̣, а̄нанда, етадахоси – ‘саче кхо ахам̣ витаккесу а̄дӣнавам̣ дисва̄ там̣ бахулам̣ кареййам̣, авитакке а̄нисам̣сам̣ адхигамма тама̄севеййам̣, т̣ха̄нам̣ кхо панетам̣ виджджати йам̣ ме авитакке читтам̣ паккхандеййа пасӣдеййа сантит̣т̣хеййа вимуччеййа етам̣ сантанти пассато’. со кхо ахам̣, а̄нанда, апарена самайена витаккесу а̄дӣнавам̣ дисва̄ там̣ бахуламака̄сим̣, авитакке а̄нисам̣сам̣ адхигамма тама̄севим̣. тасса майхам̣, а̄нанда, авитакке читтам̣ паккхандати пасӣдати сантит̣т̣хати вимуччати етам̣ сантанти пассато. со кхо ахам̣, а̄нанда, витаккавича̄ра̄нам̣ вӯпасама̄…пе… дутийам̣ джха̄нам̣ упасампаджджа вихара̄ми. тасса майхам̣, а̄нанда, имина̄ виха̄рена вихарато витаккасахагата̄ сан̃н̃а̄манасика̄ра̄ самуда̄чаранти. свасса ме хоти а̄ба̄дхо. сеййатха̄пи, а̄нанда, сукхино дуккхам̣ уппаджджеййа йа̄вадева а̄ба̄дха̄йа; евамевасса ме витаккасахагата̄ сан̃н̃а̄манасика̄ра̄ самуда̄чаранти. свасса ме хоти а̄ба̄дхо.

‘‘тасса майхам̣, а̄нанда, етадахоси – ‘йам̣нӯна̄хам̣ пӣтийа̄ ча вира̄га̄ упеккхако ча вихареййам̣ сато ча сампаджа̄но сукхан̃ча ка̄йена пат̣исам̣ведеййам̣ йам̣ там̣ арийа̄ а̄чиккханти – упеккхако сатима̄ сукхавиха̄рӣти татийам̣ джха̄нам̣ упасампаджджа вихареййа’нти. тасса майхам̣, а̄нанда, ниппӣтике читтам̣ на паккхандати наппасӣдати на сантит̣т̣хати на вимуччати етам̣ сантанти пассато. тасса майхам̣, а̄нанда, етадахоси – ‘ко ну кхо хету ко паччайо, йена ме ниппӣтике читтам̣ на паккхандати наппасӣдати на сантит̣т̣хати на вимуччати етам̣ сантанти пассато’? тасса майхам̣, а̄нанда, етадахоси – ‘пӣтийа̄ кхо ме а̄дӣнаво адит̣т̣хо, со ча ме абахулӣкато, ниппӣтике ча а̄нисам̣со анадхигато, со ча ме ана̄севито. тасма̄ ме ниппӣтике читтам̣ на паккхандати наппасӣдати на сантит̣т̣хати на вимуччати етам̣ сантанти пассато’. тасса майхам̣, а̄нанда, етадахоси – ‘саче кхо ахам̣ пӣтийа̄ а̄дӣнавам̣ дисва̄ там̣ бахулам̣ кареййам̣, ниппӣтике а̄нисам̣сам̣ адхигамма тама̄севеййам̣, т̣ха̄нам̣ кхо панетам̣ виджджати йам̣ ме ниппӣтике читтам̣ паккхандеййа пасӣдеййа сантит̣т̣хеййа вимуччеййа етам̣ сантанти пассато’. со кхо ахам̣, а̄нанда, апарена самайена пӣтийа̄ а̄дӣнавам̣ дисва̄ там̣ бахуламака̄сим̣, ниппӣтике а̄нисам̣сам̣ адхигамма тама̄севим̣. тасса майхам̣, а̄нанда, ниппӣтике читтам̣ паккхандати пасӣдати сантит̣т̣хати вимуччати етам̣ сантанти пассато. со кхо ахам̣, а̄нанда, пӣтийа̄ ча вира̄га̄…пе… татийам̣ джха̄нам̣ упасампаджджа вихара̄ми. тасса майхам̣, а̄нанда, имина̄ виха̄рена вихарато пӣтисахагата̄ сан̃н̃а̄манасика̄ра̄ самуда̄чаранти. свасса ме хоти а̄ба̄дхо. сеййатха̄пи, а̄нанда, сукхино дуккхам̣ уппаджджеййа йа̄вадева а̄ба̄дха̄йа; евамевасса ме пӣтисахагата̄ сан̃н̃а̄манасика̄ра̄ самуда̄чаранти. свасса ме хоти а̄ба̄дхо.

‘‘тасса майхам̣, а̄нанда, етадахоси – ‘йам̣нӯна̄хам̣ сукхасса ча паха̄на̄ дуккхасса ча паха̄на̄ пуббева соманассадоманасса̄нам̣ аттхан̇гама̄ адуккхамасукхам̣ упеккха̄сатипа̄рисуддхим̣ чатуттхам̣ джха̄нам̣ упасампаджджа вихареййа’нти. тасса майхам̣, а̄нанда, адуккхамасукхе читтам̣ на паккхандати наппасӣдати на сантит̣т̣хати на вимуччати етам̣ сантанти пассато. тасса майхам̣, а̄нанда, етадахоси – ‘ко ну кхо хету ко паччайо, йена ме адуккхамасукхе читтам̣ на паккхандати наппасӣдати на сантит̣т̣хати на вимуччати етам̣ сантанти пассато’? тасса майхам̣, а̄нанда, етадахоси – ‘упеккха̄сукхе кхо ме а̄дӣнаво адит̣т̣хо, со ча ме абахулӣкато, адуккхамасукхе ча а̄нисам̣со анадхигато, со ча ме ана̄севито. тасма̄ ме адуккхамасукхе читтам̣ на паккхандати наппасӣдати на сантит̣т̣хати на вимуччати етам̣ сантанти пассато’. тасса майхам̣, а̄нанда, етадахоси – ‘саче кхо ахам̣ упеккха̄сукхе а̄дӣнавам̣ дисва̄ там̣ бахулам̣ кареййам̣, адуккхамасукхе а̄нисам̣сам̣ адхигамма тама̄севеййам̣, т̣ха̄нам̣ кхо панетам̣ виджджати йам̣ ме адуккхамасукхе читтам̣ паккхандеййа пасӣдеййа сантит̣т̣хеййа вимуччеййа етам̣ сантанти пассато’. со кхо ахам̣, а̄нанда, апарена самайена упеккха̄сукхе а̄дӣнавам̣ дисва̄ там̣ бахуламака̄сим̣ адуккхамасукхе а̄нисам̣сам̣ адхигамма тама̄севим̣. тасса майхам̣, а̄нанда, адуккхамасукхе читтам̣ паккхандати пасӣдати сантит̣т̣хати вимуччати етам̣ сантанти пассато. со кхо ахам̣, а̄нанда, сукхасса ча паха̄на̄…пе… чатуттхам̣ джха̄нам̣ упасампаджджа вихара̄ми. тасса майхам̣, а̄нанда, имина̄ виха̄рена вихарато упеккха̄сахагата̄ сан̃н̃а̄манасика̄ра̄ самуда̄чаранти. свасса ме хоти а̄ба̄дхо. сеййатха̄пи, а̄нанда, сукхино дуккхам̣ уппаджджеййа йа̄вадева а̄ба̄дха̄йа; евамевасса ме упеккха̄сахагата̄ сан̃н̃а̄манасика̄ра̄ самуда̄чаранти. свасса ме хоти а̄ба̄дхо.

‘‘тасса майхам̣, а̄нанда, етадахоси – ‘йам̣нӯна̄хам̣ саббасо рӯпасан̃н̃а̄нам̣ саматиккама̄ пат̣игхасан̃н̃а̄нам̣ аттхан̇гама̄ на̄наттасан̃н̃а̄нам̣ аманасика̄ра̄ ‘‘ананто а̄ка̄со’’ти а̄ка̄са̄нан̃ча̄йатанам̣ упасампаджджа вихареййа’нти. тасса майхам̣, а̄нанда, а̄ка̄са̄нан̃ча̄йатане читтам̣ на паккхандати наппасӣдати на сантит̣т̣хати на вимуччати етам̣ сантанти пассато. тасса майхам̣, а̄нанда, етадахоси – ‘ко ну кхо хету ко паччайо, йена ме а̄ка̄са̄нан̃ча̄йатане читтам̣ на паккхандати наппасӣдати на сантит̣т̣хати на вимуччати етам̣ сантанти пассато’? тасса майхам̣, а̄нанда, етадахоси – ‘рӯпесу кхо ме а̄дӣнаво адит̣т̣хо, со ча абахулӣкато, а̄ка̄са̄нан̃ча̄йатане ча а̄нисам̣со анадхигато, со ча ме ана̄севито. тасма̄ ме а̄ка̄са̄нан̃ча̄йатане читтам̣ на паккхандати наппасӣдати на сантит̣т̣хати на вимуччати етам̣ сантанти пассато’. тасса майхам̣, а̄нанда, етадахоси – ‘саче кхо ахам̣ рӯпесу а̄дӣнавам̣ дисва̄ там̣ бахулам̣ кареййам̣, а̄ка̄са̄нан̃ча̄йатане а̄нисам̣сам̣ адхигамма тама̄севеййам̣, т̣ха̄нам̣ кхо панетам̣ виджджати йам̣ ме а̄ка̄са̄нан̃ча̄йатане читтам̣ паккхандеййа пасӣдеййа сантит̣т̣хеййа вимуччеййа етам̣ сантанти пассато’. со кхо ахам̣, а̄нанда, апарена самайена рӯпесу а̄дӣнавам̣ дисва̄ там̣ бахуламака̄сим̣, а̄ка̄са̄нан̃ча̄йатане а̄нисам̣сам̣ адхигамма тама̄севим̣. тасса майхам̣, а̄нанда, а̄ка̄са̄нан̃ча̄йатане читтам̣ паккхандати пасӣдати сантит̣т̣хати вимуччати етам̣ сантанти пассато. со кхо ахам̣, а̄нанда, саббасо рӯпасан̃н̃а̄нам̣ саматиккама̄ пат̣игхасан̃н̃а̄нам̣ аттхан̇гама̄ на̄наттасан̃н̃а̄нам̣ аманасика̄ра̄ ‘ананто а̄ка̄со’ти а̄ка̄са̄нан̃ча̄йатанам̣ упасампаджджа вихара̄ми. тасса майхам̣, а̄нанда, имина̄ виха̄рена вихарато рӯпасахагата̄ сан̃н̃а̄манасика̄ра̄ самуда̄чаранти. свасса ме хоти а̄ба̄дхо. сеййатха̄пи, а̄нанда, сукхино дуккхам̣ уппаджджеййа йа̄вадева а̄ба̄дха̄йа; евамевасса ме рӯпасахагата̄ сан̃н̃а̄манасика̄ра̄ самуда̄чаранти. свасса ме хоти а̄ба̄дхо.

‘‘тасса майхам̣, а̄нанда, етадахоси – ‘йам̣нӯна̄хам̣ саббасо а̄ка̄са̄нан̃ча̄йатанам̣ саматиккамма ‘‘анантам̣ вин̃н̃а̄н̣а’’нти вин̃н̃а̄н̣ан̃ча̄йатанам̣ упасампаджджа вихареййа’нти. тасса майхам̣, а̄нанда, вин̃н̃а̄н̣ан̃ча̄йатане читтам̣ на паккхандати наппасӣдати на сантит̣т̣хати на вимуччати етам̣ сантанти пассато. тасса майхам̣, а̄нанда, етадахоси – ‘ко ну кхо хету ко паччайо, йена ме вин̃н̃а̄н̣ан̃ча̄йатане читтам̣ на паккхандати наппасӣдати на сантит̣т̣хати на вимуччати етам̣ сантанти пассато’? тасса майхам̣, а̄нанда, етадахоси – ‘а̄ка̄са̄нан̃ча̄йатане кхо ме а̄дӣнаво адит̣т̣хо, со ча абахулӣкато, вин̃н̃а̄н̣ан̃ча̄йатане ча а̄нисам̣со анадхигато, со ча ме ана̄севито. тасма̄ ме вин̃н̃а̄н̣ан̃ча̄йатане читтам̣ на паккхандати наппасӣдати на сантит̣т̣хати на вимуччати етам̣ сантанти пассато’. тасса майхам̣, а̄нанда, етадахоси – ‘саче кхо ахам̣ а̄ка̄са̄нан̃ча̄йатане а̄дӣнавам̣ дисва̄ там̣ бахулам̣ кареййам̣, вин̃н̃а̄н̣ан̃ча̄йатане а̄нисам̣сам̣ адхигамма тама̄севеййам̣, т̣ха̄нам̣ кхо панетам̣ виджджати йам̣ ме вин̃н̃а̄н̣ан̃ча̄йатане читтам̣ паккхандеййа пасӣдеййа сантит̣т̣хеййа вимуччеййа етам̣ сантанти пассато’. со кхо ахам̣, а̄нанда, апарена самайена а̄ка̄са̄нан̃ча̄йатане а̄дӣнавам̣ дисва̄ там̣ бахуламака̄сим̣, вин̃н̃а̄н̣ан̃ча̄йатане а̄нисам̣сам̣ адхигамма тама̄севим̣. тасса майхам̣, а̄нанда, вин̃н̃а̄н̣ан̃ча̄йатане читтам̣ паккхандати пасӣдати сантит̣т̣хати вимуччати етам̣ сантанти пассато. со кхо ахам̣, а̄нанда, саббасо а̄ка̄са̄нан̃ча̄йатанам̣ саматиккамма ‘анантам̣ вин̃н̃а̄н̣а’нти вин̃н̃а̄н̣ан̃ча̄йатанам̣ упасампаджджа вихара̄ми. тасса майхам̣, а̄нанда, имина̄ виха̄рена вихарато а̄ка̄са̄нан̃ча̄йатанасахагата̄ сан̃н̃а̄манасика̄ра̄ самуда̄чаранти. свасса ме хоти а̄ба̄дхо. сеййатха̄пи, а̄нанда, сукхино дуккхам̣ уппаджджеййа йа̄вадева а̄ба̄дха̄йа; евамевасса ме а̄ка̄са̄нан̃ча̄йатанасахагата̄ сан̃н̃а̄манасика̄ра̄ самуда̄чаранти. свасса ме хоти а̄ба̄дхо.

‘‘тасса майхам̣, а̄нанда, етадахоси – ‘йам̣нӯна̄хам̣ саббасо вин̃н̃а̄н̣ан̃ча̄йатанам̣ саматиккамма наттхи кин̃чӣти а̄кин̃чан̃н̃а̄йатанам̣ упасампаджджа вихареййа’нти. тасса майхам̣, а̄нанда, а̄кин̃чан̃н̃а̄йатане читтам̣ на паккхандати наппасӣдати на сантит̣т̣хати на вимуччати етам̣ сантанти пассато. тасса майхам̣, а̄нанда, етадахоси – ‘ко ну кхо хету ко паччайо, йена ме а̄кин̃чан̃н̃а̄йатане читтам̣ на паккхандати наппасӣдати на сантит̣т̣хати на вимуччати етам̣ сантанти пассато’? тасса майхам̣, а̄нанда, етадахоси – ‘вин̃н̃а̄н̣ан̃ча̄йатане кхо ме а̄дӣнаво адит̣т̣хо, со ча ме абахулӣкато, а̄кин̃чан̃н̃а̄йатане ча а̄нисам̣со анадхигато, со ча ме ана̄севито. тасма̄ ме а̄кин̃чан̃н̃а̄йатане читтам̣ на паккхандати наппасӣдати на сантит̣т̣хати на вимуччати етам̣ сантанти пассато’. тасса майхам̣, а̄нанда, етадахоси – ‘саче кхо ахам̣ вин̃н̃а̄н̣ан̃ча̄йатане а̄дӣнавам̣ дисва̄ там̣ бахулам̣ кареййам̣, а̄кин̃чан̃н̃а̄йатане а̄нисам̣сам̣ адхигамма тама̄севеййам̣, т̣ха̄нам̣ кхо панетам̣ виджджати йам̣ ме а̄кин̃чан̃н̃а̄йатане читтам̣ паккхандеййа пасӣдеййа сантит̣т̣хеййа вимуччеййа етам̣ сантанти пассато’. со кхо ахам̣, а̄нанда, апарена самайена вин̃н̃а̄н̣ан̃ча̄йатане а̄дӣнавам̣ дисва̄ там̣ бахуламака̄сим̣, а̄кин̃чан̃н̃а̄йатане а̄нисам̣сам̣ адхигамма тама̄севим̣. тасса майхам̣, а̄нанда, а̄кин̃чан̃н̃а̄йатане читтам̣ паккхандати пасӣдати сантит̣т̣хати вимуччати етам̣ сантанти пассато. со кхо ахам̣, а̄нанда, саббасо вин̃н̃а̄н̣ан̃ча̄йатанам̣ саматиккамма ‘наттхи кин̃чӣ’ти а̄кин̃чан̃н̃а̄йатанам̣ упасампаджджа вихара̄ми. тасса майхам̣, а̄нанда, имина̄ виха̄рена вихарато вин̃н̃а̄н̣ан̃ча̄йатанасахагата̄ сан̃н̃а̄манасика̄ра̄ самуда̄чаранти. свасса ме хоти а̄ба̄дхо. сеййатха̄пи, а̄нанда, сукхино дуккхам̣ уппаджджеййа йа̄вадева а̄ба̄дха̄йа; евамевасса ме вин̃н̃а̄н̣ан̃ча̄йатанасахагата̄ сан̃н̃а̄манасика̄ра̄ самуда̄чаранти. свасса ме хоти а̄ба̄дхо.

‘‘тасса майхам̣, а̄нанда, етадахоси – ‘йам̣нӯна̄хам̣ саббасо а̄кин̃чан̃н̃а̄йатанам̣ саматиккамма невасан̃н̃а̄на̄сан̃н̃а̄йатанам̣ упасампаджджа вихареййа’нти. тасса майхам̣, а̄нанда, невасан̃н̃а̄на̄сан̃н̃а̄йатане читтам̣ на паккхандати наппасӣдати на сантит̣т̣хати на вимуччати етам̣ сантанти пассато. тасса майхам̣, а̄нанда, етадахоси – ‘ко ну кхо хету ко паччайо, йена ме невасан̃н̃а̄на̄сан̃н̃а̄йатане читтам̣ на паккхандати наппасӣдати на сантит̣т̣хати на вимуччати етам̣ сантанти пассато’? тасса майхам̣, а̄нанда, етадахоси – ‘а̄кин̃чан̃н̃а̄йатане кхо ме а̄дӣнаво адит̣т̣хо, со ча ме абахулӣкато, невасан̃н̃а̄на̄сан̃н̃а̄йатане ча а̄нисам̣со анадхигато, со ча ме ана̄севито. тасма̄ ме невасан̃н̃а̄на̄сан̃н̃а̄йатане читтам̣ на паккхандати наппасӣдати на сантит̣т̣хати на вимуччати етам̣ сантанти пассато’. тасса майхам̣, а̄нанда, етадахоси – ‘саче кхо ахам̣ а̄кин̃чан̃н̃а̄йатане а̄дӣнавам̣ дисва̄ там̣ бахулам̣ кареййам̣, невасан̃н̃а̄на̄сан̃н̃а̄йатане а̄нисам̣сам̣ адхигамма тама̄севеййам̣, т̣ха̄нам̣ кхо панетам̣ виджджати йам̣ ме невасан̃н̃а̄на̄сан̃н̃а̄йатане читтам̣ паккхандеййа пасӣдеййа сантит̣т̣хеййа вимуччеййа етам̣ сантанти пассато’. со кхо ахам̣, а̄нанда, апарена самайена а̄кин̃чан̃н̃а̄йатане а̄дӣнавам̣ дисва̄ там̣ бахуламака̄сим̣, невасан̃н̃а̄на̄сан̃н̃а̄йатане а̄нисам̣сам̣ адхигамма тама̄севим̣. тасса майхам̣, а̄нанда, невасан̃н̃а̄на̄сан̃н̃а̄йатане читтам̣ паккхандати пасӣдати сантит̣т̣хати вимуччати етам̣ сантанти пассато. со кхо ахам̣, а̄нанда, саббасо а̄кин̃чан̃н̃а̄йатанам̣ саматиккамма невасан̃н̃а̄на̄сан̃н̃а̄йатанам̣ упасампаджджа вихара̄ми. тасса майхам̣, а̄нанда, имина̄ виха̄рена вихарато а̄кин̃чан̃н̃а̄йатанасахагата̄ сан̃н̃а̄манасика̄ра̄ самуда̄чаранти. свасса ме хоти а̄ба̄дхо. сеййатха̄пи, а̄нанда, сукхино дуккхам̣ уппаджджеййа йа̄вадева а̄ба̄дха̄йа; евамевасса ме а̄кин̃чан̃н̃а̄йатанасахагата̄ сан̃н̃а̄манасика̄ра̄ самуда̄чаранти. свасса ме хоти а̄ба̄дхо.

‘‘тасса майхам̣, а̄нанда, етадахоси – ‘йам̣нӯна̄хам̣ невасан̃н̃а̄на̄сан̃н̃а̄йатанам̣ саматиккамма сан̃н̃а̄ведайитаниродхам̣ упасампаджджа вихареййа’нти. тасса майхам̣, а̄нанда, сан̃н̃а̄ведайитаниродхе читтам̣ на паккхандати наппасӣдати на сантит̣т̣хати на вимуччати етам̣ сантанти пассато. тасса майхам̣, а̄нанда, етадахоси – ‘ко ну кхо хету, ко паччайо, йена ме сан̃н̃а̄ведайитаниродхе читтам̣ на паккхандати наппасӣдати на сантит̣т̣хати на вимуччати етам̣ сантанти пассато’? тасса майхам̣, а̄нанда, етадахоси – ‘невасан̃н̃а̄на̄сан̃н̃а̄йатане кхо ме а̄дӣнаво адит̣т̣хо, со ча ме абахулӣкато, сан̃н̃а̄ведайитаниродхе ча а̄нисам̣со анадхигато, со ча ме ана̄севито. тасма̄ ме сан̃н̃а̄ведайитаниродхе читтам̣ на паккхандати наппасӣдати на сантит̣т̣хати на вимуччати етам̣ сантанти пассато’. тасса майхам̣, а̄нанда, етадахоси – ‘саче кхо ахам̣ невасан̃н̃а̄на̄сан̃н̃а̄йатане а̄дӣнавам̣ дисва̄ там̣ бахулам̣ кареййам̣, сан̃н̃а̄ведайитаниродхе а̄нисам̣сам̣ адхигамма тама̄севеййам̣, т̣ха̄нам̣ кхо панетам̣ виджджати йам̣ ме сан̃н̃а̄ведайитаниродхе читтам̣ паккхандеййа пасӣдеййа сантит̣т̣хеййа вимуччеййа етам̣ сантанти пассато’. со кхо ахам̣, а̄нанда, апарена самайена невасан̃н̃а̄на̄сан̃н̃а̄йатане а̄дӣнавам̣ дисва̄ там̣ бахуламака̄сим̣, сан̃н̃а̄ведайитаниродхе а̄нисам̣сам̣ адхигамма тама̄севим̣. тасса майхам̣, а̄нанда, сан̃н̃а̄ведайитаниродхе читтам̣ паккхандати пасӣдати сантит̣т̣хати вимуччати етам̣ сантанти пассато. со кхо ахам̣, а̄нанда, саббасо невасан̃н̃а̄на̄сан̃н̃а̄йатанам̣ саматиккамма сан̃н̃а̄ведайитаниродхам̣ упасампаджджа вихара̄ми, пан̃н̃а̄йа ча ме дисва̄ а̄сава̄ париккхайам̣ агамам̣су.

‘‘йа̄вакӣван̃ча̄хам̣, а̄нанда, има̄ нава анупуббавиха̄расама̄паттийо на евам̣ ануломапат̣иломам̣ сама̄паджджимпи вут̣т̣хахимпи, нева та̄ва̄хам̣, а̄нанда, садеваке локе сама̄раке сабрахмаке сассаман̣абра̄хман̣ийа̄ паджа̄йа садеваманусса̄йа ‘ануттарам̣ самма̄самбодхим̣ абхисамбуддхо’ти паччан̃н̃а̄сим̣. йато ча кхо ахам̣, а̄нанда, има̄ нава анупуббавиха̄расама̄паттийо евам̣ ануломапат̣иломам̣ сама̄паджджимпи вут̣т̣хахимпи, атха̄хам̣, а̄нанда, садеваке локе сама̄раке сабрахмаке сассаман̣абра̄хман̣ийа̄ паджа̄йа садеваманусса̄йа ‘ануттарам̣ самма̄самбодхим̣ абхисамбуддхо’ти паччан̃н̃а̄сим̣. н̃а̄н̣ан̃ча пана ме дассанам̣ удапа̄ди – ‘акуппа̄ ме четовимутти [вимутти (ка. сӣ. ка.)], айамантима̄ джа̄ти, наттхи да̄ни пунаббхаво’’’ти. дасамам̣.

маха̄вагго чатуттхо.