9. сунеттасуттам̣

73. [а. ни. 6.54; 7.66] ‘‘бхӯтапуббам̣, бхиккхаве, сунетто на̄ма саттха̄ ахоси титтхакаро ка̄месу вӣтара̄го. сунеттасса кхо пана, бхиккхаве, саттхуно анека̄ни са̄вакасата̄ни ахесум̣. сунетто саттха̄ са̄вака̄нам̣ брахмалокасахабйата̄йа дхаммам̣ десеси. йе кхо пана, бхиккхаве [йе кхо бхиккхаве (сӣ. сйа̄.)], сунеттасса саттхуно брахмалокасахабйата̄йа дхаммам̣ десентасса читта̄ни наппаса̄десум̣ те ка̄йасса бхеда̄ парам̣ маран̣а̄ апа̄йам̣ дуггатим̣ винипа̄там̣ нирайам̣ упападжджим̣су. йе кхо пана, бхиккхаве, сунеттасса саттхуно брахмалокасахабйата̄йа дхаммам̣ десентасса читта̄ни паса̄десум̣ те ка̄йасса бхеда̄ парам̣ маран̣а̄ сугатим̣ саггам̣ локам̣ упападжджим̣су.

‘‘бхӯтапуббам̣, бхиккхаве, мӯгапаккхо на̄ма саттха̄ ахоси…пе… аранеми на̄ма саттха̄ ахоси…пе… кудда̄лако [кудда̄ло (сӣ. сйа̄.)] на̄ма саттха̄ ахоси…пе… хаттхипа̄ло на̄ма саттха̄ ахоси…пе… джотипа̄ло на̄ма саттха̄ ахоси…пе… арако на̄ма саттха̄ ахоси титтхакаро ка̄месу вӣтара̄го. аракасса кхо пана, бхиккхаве, саттхуно анека̄ни са̄вакасата̄ни ахесум̣. арако на̄ма саттха̄ са̄вака̄нам̣ брахмалокасахабйата̄йа дхаммам̣ десеси. йе кхо пана, бхиккхаве, аракасса саттхуно брахмалокасахабйата̄йа дхаммам̣ десентасса читта̄ни наппаса̄десум̣, те ка̄йасса бхеда̄ парам̣ маран̣а̄ апа̄йам̣ дуггатим̣ винипа̄там̣ нирайам̣ упападжджим̣су. йе кхо пана, бхиккхаве, аракасса саттхуно брахмалокасахабйата̄йа дхаммам̣ десентасса читта̄ни паса̄десум̣, те ка̄йасса бхеда̄ парам̣ маран̣а̄ сугатим̣ саггам̣ локам̣ упападжджим̣су.

‘‘там̣ ким̣ ман̃н̃атха, бхиккхаве, йо име сатта саттха̄ре титтхакаре ка̄месу вӣтара̄ге анекасатапарива̄ре саса̄вакасан̇гхе падут̣т̣хачитто аккосеййа парибха̄сеййа, бахум̣ со апун̃н̃ам̣ пасавеййа̄’’ти? ‘‘евам̣, бханте’’. ‘‘йо, бхиккхаве, име сатта саттха̄ре титтхакаре ка̄месу вӣтара̄ге анекасатапарива̄ре саса̄вакасан̇гхе падут̣т̣хачитто аккосеййа парибха̄сеййа, бахум̣ со апун̃н̃ам̣ пасавеййа. йо екам̣ дит̣т̣хисампаннам̣ пуггалам̣ падут̣т̣хачитто аккосати парибха̄сати, айам̣ тато бахутарам̣ апун̃н̃ам̣ пасавати. там̣ кисса хету? на̄хам̣, бхиккхаве, ито бахиддха̄ еварӯпим̣ кхантим̣ вада̄ми йатха̄мам̣ сабрахмача̄рӣсу’’.

‘‘тасма̄тиха, бхиккхаве, евам̣ сиккхитаббам̣ – ‘на но сабрахмача̄рӣсу [на твева амхам̣ сабрахмача̄рӣсу (сйа̄.) ан̇гуттараника̄йе ан̃н̃атха̄ диссати] читта̄ни падут̣т̣ха̄ни бхависсантӣ’ти. еван̃хи во, бхиккхаве, сиккхитабба’’нти. навамам̣.