4. дхамман̃н̃ӯсуттам̣

68. ‘‘саттахи, бхиккхаве, дхаммехи саманна̄гато бхиккху а̄хунеййо хоти …пе… ануттарам̣ пун̃н̃аккхеттам̣ локасса. катамехи саттахи? идха, бхиккхаве, бхиккху дхамман̃н̃ӯ ча хоти аттхан̃н̃ӯ ча аттан̃н̃ӯ ча маттан̃н̃ӯ ча ка̄лан̃н̃ӯ ча парисан̃н̃ӯ ча пуггалапаропаран̃н̃ӯ ча.

‘‘катхан̃ча, бхиккхаве, бхиккху дхамман̃н̃ӯ хоти? идха, бхиккхаве, бхиккху дхаммам̣ джа̄на̄ти – суттам̣ геййам̣ веййа̄каран̣ам̣ га̄тхам̣ уда̄нам̣ итивуттакам̣ джа̄такам̣ аббхутадхаммам̣ ведаллам̣. но че, бхиккхаве, бхиккху дхаммам̣ джа̄неййа – суттам̣ геййам̣…пе… аббхутадхаммам̣ ведаллам̣, найидха ‘дхамман̃н̃ӯ’ти вуччеййа. йасма̄ ча кхо, бхиккхаве, бхиккху дхаммам̣ джа̄на̄ти – суттам̣ геййам̣…пе… аббхутадхаммам̣ ведаллам̣, тасма̄ ‘дхамман̃н̃ӯ’ти вуччати. ити дхамман̃н̃ӯ.

‘‘аттхан̃н̃ӯ ча катхам̣ хоти? идха, бхиккхаве, бхиккху тасса тассева бха̄ситасса аттхам̣ джа̄на̄ти – ‘айам̣ имасса бха̄ситасса аттхо, айам̣ имасса бха̄ситасса аттхо’ти. но че, бхиккхаве, бхиккху тасса тассева бха̄ситасса аттхам̣ джа̄неййа – ‘айам̣ имасса бха̄ситасса аттхо, айам̣ имасса бха̄ситасса аттхо’ти, найидха ‘аттхан̃н̃ӯ’ти вуччеййа. йасма̄ ча кхо, бхиккхаве, бхиккху тасса тассева бха̄ситасса аттхам̣ джа̄на̄ти – ‘айам̣ имасса бха̄ситасса аттхо, айам̣ имасса бха̄ситасса аттхо’ти, тасма̄ ‘аттхан̃н̃ӯ’ти вуччати. ити дхамман̃н̃ӯ, аттхан̃н̃ӯ.

‘‘аттан̃н̃ӯ ча катхам̣ хоти? идха, бхиккхаве, бхиккху атта̄нам̣ джа̄на̄ти – ‘еттакомхи саддха̄йа сӣлена сутена ча̄гена пан̃н̃а̄йа пат̣ибха̄нена̄’ти. но че, бхиккхаве, бхиккху атта̄нам̣ джа̄неййа – ‘еттакомхи саддха̄йа сӣлена сутена ча̄гена пан̃н̃а̄йа пат̣ибха̄нена̄’ти, найидха ‘аттан̃н̃ӯ’ти вуччеййа. йасма̄ ча, бхиккхаве, бхиккху атта̄нам̣ джа̄на̄ти – ‘еттакомхи саддха̄йа сӣлена сутена ча̄гена пан̃н̃а̄йа пат̣ибха̄нена̄’ти, тасма̄ ‘аттан̃н̃ӯ’ти вуччати. ити дхамман̃н̃ӯ, аттхан̃н̃ӯ, аттан̃н̃ӯ.

‘‘маттан̃н̃ӯ ча катхам̣ хоти? идха, бхиккхаве, бхиккху маттам̣ джа̄на̄ти чӣварапин̣д̣апа̄тасена̄санагила̄наппаччайабхесаджджапариккха̄ра̄нам̣ пат̣иггахан̣а̄йа. но че, бхиккхаве, бхиккху маттам̣ джа̄неййа чӣварапин̣д̣апа̄тасена̄санагила̄наппаччайабхесаджджапариккха̄ра̄нам̣ пат̣иггахан̣а̄йа, найидха ‘маттан̃н̃ӯ’ти вуччеййа. йасма̄ ча кхо, бхиккхаве, бхиккху маттам̣ джа̄на̄ти чӣварапин̣д̣апа̄тасена̄санагила̄наппаччайабхесаджджапариккха̄ра̄нам̣ пат̣иггахан̣а̄йа, тасма̄ ‘маттан̃н̃ӯ’ти вуччати. ити дхамман̃н̃ӯ, аттхан̃н̃ӯ, аттан̃н̃ӯ, маттан̃н̃ӯ.

‘‘ка̄лан̃н̃ӯ ча катхам̣ хоти? идха, бхиккхаве, бхиккху, ка̄лам̣ джа̄на̄ти – ‘айам̣ ка̄ло уддесасса, айам̣ ка̄ло парипуччха̄йа, айам̣ ка̄ло йогасса, айам̣ ка̄ло пат̣исалла̄насса̄’ти. но че, бхиккхаве, бхиккху ка̄лам̣ джа̄неййа – ‘айам̣ ка̄ло уддесасса, айам̣ ка̄ло парипуччха̄йа, айам̣ ка̄ло йогасса, айам̣ ка̄ло пат̣исалла̄насса̄’ти, найидха ‘ка̄лан̃н̃ӯ’ти вуччеййа. йасма̄ ча кхо, бхиккхаве, бхиккху ка̄лам̣ джа̄на̄ти – ‘айам̣ ка̄ло уддесасса, айам̣ ка̄ло парипуччха̄йа, айам̣ ка̄ло йогасса, айам̣ ка̄ло пат̣исалла̄насса̄’ти, тасма̄ ‘ка̄лан̃н̃ӯ’ти вуччати. ити дхамман̃н̃ӯ, аттхан̃н̃ӯ, аттан̃н̃ӯ, маттан̃н̃ӯ, ка̄лан̃н̃ӯ.

‘‘парисан̃н̃ӯ ча катхам̣ хоти? идха, бхиккхаве, бхиккху парисам̣ джа̄на̄ти – ‘айам̣ кхаттийапариса̄, айам̣ бра̄хман̣апариса̄, айам̣ гахапатипариса̄, айам̣ саман̣апариса̄. таттха евам̣ упасан̇камитаббам̣, евам̣ т̣ха̄таббам̣, евам̣ каттаббам̣, евам̣ нисӣдитаббам̣, евам̣ бха̄ситаббам̣, евам̣ тун̣хӣ бхавитабба’нти. но че, бхиккхаве, бхиккху парисам̣ джа̄неййа – ‘айам̣ кхаттийапариса̄…пе… евам̣ тун̣хӣ бхавитабба’нти, найидха ‘парисан̃н̃ӯ’ти вуччеййа. йасма̄ ча кхо, бхиккхаве, бхиккху парисам̣ джа̄на̄ти – ‘айам̣ кхаттийапариса̄, айам̣ бра̄хман̣апариса̄, айам̣ гахапатипариса̄, айам̣ саман̣апариса̄. таттха евам̣ упасан̇камитаббам̣, евам̣ т̣ха̄таббам̣, евам̣ каттаббам̣, евам̣ нисӣдитаббам̣, евам̣ бха̄ситаббам̣, евам̣ тун̣хӣ бхавитабба’нти, тасма̄ ‘парисан̃н̃ӯ’ти вуччати. ити дхамман̃н̃ӯ, аттхан̃н̃ӯ, аттан̃н̃ӯ, маттан̃н̃ӯ, ка̄лан̃н̃ӯ, парисан̃н̃ӯ.

‘‘пуггалапаропаран̃н̃ӯ ча катхам̣ хоти? идха, бхиккхаве, бхиккхуно [саббаттхапи идха а̄рамбхе ‘‘бхиккхуно’’ твева диссати] двайена пуггала̄ видита̄ хонти. две пуггала̄ – еко арийа̄нам̣ дассанака̄мо, еко арийа̄нам̣ на дассанака̄мо. йва̄йам̣ пуггало арийа̄нам̣ на дассанака̄мо, евам̣ со тенан̇гена га̄райхо. йва̄йам̣ пуггало арийа̄нам̣ дассанака̄мо, евам̣ со тенан̇гена па̄сам̣со.

‘‘две пуггала̄ арийа̄нам̣ дассанака̄ма̄ – еко саддхаммам̣ сотука̄мо, еко саддхаммам̣ на сотука̄мо. йва̄йам̣ пуггало саддхаммам̣ на сотука̄мо, евам̣ со тенан̇гена га̄райхо. йва̄йам̣ пуггало саддхаммам̣ сотука̄мо, евам̣ со тенан̇гена па̄сам̣со.

‘‘две пуггала̄ саддхаммам̣ сотука̄ма̄ – еко охитасото дхаммам̣ сун̣а̄ти, еко анохитасото дхаммам̣ сун̣а̄ти. йва̄йам̣ пуггало анохитасото дхаммам̣ сун̣а̄ти, евам̣ со тенан̇гена га̄райхо. йва̄йам̣ пуггало охитасото дхаммам̣ сун̣а̄ти, евам̣ со тенан̇гена па̄сам̣со.

‘‘две пуггала̄ охитасота̄ дхаммам̣ сун̣анти [сун̣анта̄ (ка.)] – еко сутва̄ дхаммам̣ дха̄рети, еко сутва̄ дхаммам̣ на дха̄рети. йва̄йам̣ пуггало сутва̄ на дхаммам̣ дха̄рети, евам̣ со тенан̇гена га̄райхо. йва̄йам̣ пуггало сутва̄ дхаммам̣ дха̄рети, евам̣ со тенан̇гена па̄сам̣со.

‘‘две пуггала̄ сутва̄ дхаммам̣ дха̄ренти [дха̄рента̄ (ка.)] – еко дха̄та̄нам̣ [дхата̄нам̣ (сӣ. сйа̄. кам̣. пӣ.)] дхамма̄нам̣ аттхам̣ упапариккхати, еко дха̄та̄нам̣ дхамма̄нам̣ аттхам̣ на упапариккхати. йва̄йам̣ пуггало дха̄та̄нам̣ дхамма̄нам̣ аттхам̣ на упапариккхати, евам̣ со тенан̇гена га̄райхо. йва̄йам̣ пуггало дха̄та̄нам̣ дхамма̄нам̣ аттхам̣ упапариккхати, евам̣ со тенан̇гена па̄сам̣со.

‘‘две пуггала̄ дха̄та̄нам̣ дхамма̄нам̣ аттхам̣ упапариккханти [упапариккханта̄ (ка.)] – еко аттхаман̃н̃а̄йа дхаммаман̃н̃а̄йа дхамма̄нудхаммаппат̣ипанно, еко аттхаман̃н̃а̄йа дхаммаман̃н̃а̄йа на дхамма̄нудхаммаппат̣ипанно. йва̄йам̣ пуггало аттхаман̃н̃а̄йа дхаммаман̃н̃а̄йа на дхамма̄нудхаммаппат̣ипанно, евам̣ со тенан̇гена га̄райхо. йва̄йам̣ пуггало аттхаман̃н̃а̄йа дхаммаман̃н̃а̄йа дхамма̄нудхаммаппат̣ипанно, евам̣ со тенан̇гена па̄сам̣со.

‘‘две пуггала̄ аттхаман̃н̃а̄йа дхаммаман̃н̃а̄йа дхамма̄нудхаммаппат̣ипанна̄ – еко аттахита̄йа пат̣ипанно но парахита̄йа, еко аттахита̄йа ча пат̣ипанно парахита̄йа ча. йва̄йам̣ пуггало аттахита̄йа пат̣ипанно но парахита̄йа, евам̣ со тенан̇гена га̄райхо. йва̄йам̣ пуггало аттхахита̄йа ча пат̣ипанно парахита̄йа ча, евам̣ со тенан̇гена па̄сам̣со. евам̣ кхо, бхиккхаве, бхиккхуно [бхиккхуна̄ (сӣ. сйа̄.)] двайена пуггала̄ видита̄ хонти. евам̣, бхиккхаве, бхиккху пуггалапаропаран̃н̃ӯ хоти. ‘‘имехи кхо, бхиккхаве, саттахи дхаммехи саманна̄гато бхиккху а̄хунеййо хоти па̄хунеййо…пе… ануттарам̣ пун̃н̃аккхеттам̣ локасса̄’’ти. чатуттхам̣.