9. меттасуттам̣

62. [итиву. 22 итивуттакепи] ‘‘ма̄, бхиккхаве, пун̃н̃а̄нам̣ бха̄йиттха. сукхассетам̣, бхиккхаве, адхивачанам̣ йадидам̣ пун̃н̃а̄ни [йадидам̣ пун̃н̃анти (сӣ.), йадидам̣ пун̃н̃а̄ни (ка.)]. абхиджа̄на̄ми кхо пана̄хам̣ [бхиккхаве дӣгхараттам̣ ит̣т̣хам̣ (сйа̄.), бхиккхаве дӣгхараттам̣ пун̃н̃а̄нам̣ ит̣т̣хам̣ (?)], бхиккхаве, дӣгхараттам̣ ката̄нам̣ пун̃н̃а̄нам̣ дӣгхараттам̣ ит̣т̣хам̣ [бхиккхаве дӣгхараттам̣ ит̣т̣хам̣ (сйа̄.), бхиккхаве дӣгхараттам̣ пун̃н̃а̄нам̣ ит̣т̣хам̣ (?)] кантам̣ мана̄пам̣ випа̄кам̣ паччанубхӯтам̣. сатта васса̄ни меттам̣ читтам̣ бха̄весим̣. сатта васса̄ни меттам̣ читтам̣ бха̄ветва̄ сатта сам̣ват̣т̣авиват̣т̣акаппе найимам̣ локам̣ пуна̄гама̄сим̣. сам̣ват̣т̣ама̄не суда̄хам̣ [сам̣ват̣т̣ама̄нассуда̄хам̣ (ка.)], бхиккхаве, локе а̄бхассарӯпаго хоми, виват̣т̣ама̄не локе сун̃н̃ам̣ брахмавима̄нам̣ упападжджа̄ми.

‘‘татра судам̣, бхиккхаве, брахма̄ хоми маха̄брахма̄ абхибхӯ анабхибхӯто ан̃н̃адаттхудасо васаваттӣ. чхаттим̣саккхаттум̣ кхо пана̄хам̣, бхиккхаве, сакко ахосим̣ дева̄наминдо; анекасатаккхаттум̣ ра̄джа̄ ахосим̣ чаккаваттӣ дхаммико дхаммара̄джа̄ ча̄туранто виджита̄вӣ джанападаттха̄варийаппатто саттаратанасаманна̄гато. тасса майхам̣, бхиккхаве, има̄ни сатта ратана̄ни ахесум̣, сеййатхидам̣ – чаккаратанам̣, хаттхиратанам̣, ассаратанам̣, ман̣иратанам̣, иттхиратанам̣, гахапатиратанам̣, парин̣а̄йакаратанамева саттамам̣. паросахассам̣ кхо пана ме, бхиккхаве, путта̄ ахесум̣ сӯра̄ вӣран̇гарӯпа̄ парасенаппамаддана̄. со имам̣ патхавим̣ са̄гарапарийантам̣ адан̣д̣ена асаттхена дхаммена абхивиджийа аджджха̄васи’’нти [аджджха̄васанти (сйа̄.) аджджха̄васати (сӣ. ка.)].

‘‘пасса пун̃н̃а̄нам̣ випа̄кам̣, кусала̄нам̣ сукхесино [сукхесинам̣ (сӣ.)];

меттам̣ читтам̣ вибха̄ветва̄, сатта васса̄ни бхиккхаво [бхиккхаве (ка.)];

саттасам̣ват̣т̣авиват̣т̣акаппе, найимам̣ локам̣ пуна̄гамим̣ [пуна̄гамам̣ (сйа̄.)].

‘‘сам̣ват̣т̣ама̄не локамхи, хоми а̄бхассарӯпаго;

виват̣т̣ама̄не локасмим̣, сун̃н̃абрахмӯпаго ахум̣.

‘‘саттаккхаттум̣ маха̄брахма̄, васаваттӣ тада̄ ахум̣;

чхаттим̣саккхаттум̣ девиндо, девараджджамака̄райим̣.

‘‘чаккаваттӣ ахум̣ ра̄джа̄, джамбуман̣д̣асса [джамбудӣпасса (сӣ.), джамбусан̣д̣асса (сйа̄.)] иссаро;

муддха̄васитто [муддха̄бхиситто (ка.)] кхаттийо, манусса̄дхипатӣ ахум̣.

‘‘адан̣д̣ена асаттхена, виджеййа патхавим̣ имам̣;

аса̄хасена каммена [дхаммена (сӣ. сйа̄.)], самена ануса̄си там̣.

‘‘дхаммена раджджам̣ ка̄ретва̄, асмим̣ патхавиман̣д̣але;

махаддхане маха̄бхоге, ад̣д̣хе аджа̄йихам̣ куле.

‘‘саббака̄мехи сампанне [сампун̣н̣е (ка.)], ратанехи ча саттахи;

буддха̄ сан̇га̄хака̄ локе, техи етам̣ судеситам̣.

‘‘есо хету махантасса, патхабйо ме на випаджджати [еса хету махантасса, путхабйо йена вуччати (сӣ. сйа̄.)];

пахӯтавиттӯпакаран̣о, ра̄джа̄ хоти [хоми (сӣ. сйа̄.)] пата̄пава̄.

‘‘иддхима̄ йасава̄ хоти [хоми (сӣ. сйа̄.)], джамбуман̣д̣асса [джамбусан̣д̣асса (сӣ. сйа̄.)] иссаро;

ко сутва̄ наппасӣдеййа, апи кан̣ха̄бхиджа̄тийо.

‘‘тасма̄ хи аттака̄мена [аттхака̄мена (сйа̄. ка.)], махаттамабхикан̇кхата̄;

саддхаммо гарука̄таббо, сарам̣ буддха̄наса̄сана’’нти. навамам̣;