2. пурисагатисуттам̣

55. ‘‘сатта ча [сатта (сӣ.), сатта ча кхо (ка.)], бхиккхаве, пурисагатийо десесса̄ми анупа̄да̄ ча паринибба̄нам̣ [паринибба̄н̣ам̣ (сӣ.)]. там̣ сун̣а̄тха, са̄дхукам̣ манаси каротха; бха̄сисса̄мӣ’’ти. ‘‘евам̣, бханте’’ти кхо те бхиккхӯ бхагавато паччассосум̣. бхагава̄ етадавоча – ‘‘катама̄ ча, бхиккхаве, сатта пурисагатийо?

‘‘идха, бхиккхаве, бхиккху евам̣ пат̣ипанно хоти – ‘но часса но ча ме сийа̄, на бхависсати на ме бхависсати, йадаттхи йам̣ бхӯтам̣ там̣ паджаха̄мӣ’ти упеккхам̣ пат̣илабхати. со бхаве на раджджати, самбхаве на раджджати, аттхуттари падам̣ сантам̣ саммаппан̃н̃а̄йа пассати. тан̃ча кхвасса падам̣ на саббена саббам̣ саччхикатам̣ хоти, тасса на саббена саббам̣ ма̄на̄нусайо пахӣно хоти, на саббена саббам̣ бхавара̄га̄нусайо пахӣно хоти, на саббена саббам̣ авиджджа̄нусайо пахӣно хоти. со пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ антара̄паринибба̄йӣ хоти. сеййатха̄пи, бхиккхаве, дивасам̣сантатте [дивасасантатте (сӣ. сйа̄.) ма. ни. 2.154] айокапа̄ле хан̃н̃ама̄не папат̣ика̄ ниббаттитва̄ нибба̄йеййа. евамевам̣ кхо, бхиккхаве, бхиккху евам̣ пат̣ипанно хоти – ‘но часса но ча ме сийа̄, на бхависсати на ме бхависсати, йадаттхи йам̣ бхӯтам̣ там̣ паджаха̄мӣ’ти упеккхам̣ пат̣илабхати. со бхаве на раджджати, самбхаве на раджджати, аттхуттари падам̣ сантам̣ саммаппан̃н̃а̄йа пассати. тан̃ча кхвасса падам̣ на саббена саббам̣ саччхикатам̣ хоти, тасса на саббена саббам̣ ма̄на̄нусайо пахӣно хоти, на саббена саббам̣ бхавара̄га̄нусайо пахӣно хоти, на саббена саббам̣ авиджджа̄нусайо пахӣно хоти. со пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ антара̄паринибба̄йӣ хоти.

‘‘идха пана, бхиккхаве, бхиккху евам̣ пат̣ипанно хоти – но часса но ча ме сийа̄…пе… со пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ антара̄паринибба̄йӣ хоти. сеййатха̄пи, бхиккхаве, дивасам̣сантатте айокапа̄ле хан̃н̃ама̄не папат̣ика̄ ниббаттитва̄ уппатитва̄ анупахачча талам̣ нибба̄йеййа. евамевам̣ кхо, бхиккхаве, бхиккху евам̣ пат̣ипанно хоти – но часса но ча ме сийа̄…пе… со пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ антара̄паринибба̄йӣ хоти.

‘‘идха пана, бхиккхаве, бхиккху евам̣ пат̣ипанно хоти – но часса но ча ме сийа̄…пе… со пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ упахаччапаринибба̄йӣ хоти. сеййатха̄пи, бхиккхаве, дивасам̣сантатте айокапа̄ле хан̃н̃ама̄не папат̣ика̄ ниббаттитва̄ уппатитва̄ упахачча талам̣ нибба̄йеййа. евамевам̣ кхо, бхиккхаве, бхиккху евам̣ пат̣ипанно хоти – но часса но ча ме сийа̄…пе… со пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ упахаччапаринибба̄йӣ хоти.

‘‘идха пана, бхиккхаве, бхиккху евам̣ пат̣ипанно хоти – но часса но ча ме сийа̄…пе… со пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ асан̇кха̄рапаринибба̄йӣ хоти. сеййатха̄пи, бхиккхаве, дивасам̣сантатте айокапа̄ле хан̃н̃ама̄не папат̣ика̄ ниббаттитва̄ уппатитва̄ паритте тин̣апун̃дже ва̄ кат̣т̣хапун̃дже ва̄ нипатеййа. са̄ таттха аггимпи джанеййа, дхӯмампи джанеййа, аггимпи джанетва̄ дхӯмампи джанетва̄ тамева париттам̣ тин̣апун̃джам̣ ва̄ кат̣т̣хапун̃джам̣ ва̄ парийа̄дийитва̄ ана̄ха̄ра̄ нибба̄йеййа. евамевам̣ кхо, бхиккхаве, бхиккху евам̣ пат̣ипанно хоти – но часса но ча ме сийа̄…пе… со пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ асан̇кха̄рапаринибба̄йӣ хоти.

‘‘идха пана, бхиккхаве, бхиккху евам̣ пат̣ипанно хоти – но часса но ча ме сийа̄…пе… со пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ сасан̇кха̄рапаринибба̄йӣ хоти. сеййатха̄пи, бхиккхаве, дивасам̣сантатте айокапа̄ле хан̃н̃ама̄не папат̣ика̄ ниббаттитва̄ уппатитва̄ випуле тин̣апун̃дже ва̄ кат̣т̣хапун̃дже ва̄ нипатеййа. са̄ таттха аггимпи джанеййа, дхӯмампи джанеййа, аггимпи джанетва̄ дхӯмампи джанетва̄ тамева випулам̣ тин̣апун̃джам̣ ва̄ кат̣т̣хапун̃джам̣ ва̄ парийа̄дийитва̄ ана̄ха̄ра̄ нибба̄йеййа. евамевам̣ кхо, бхиккхаве, бхиккху евам̣ пат̣ипанно хоти – но часса но ча ме сийа̄…пе… со пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ сасан̇кха̄рапаринибба̄йӣ хоти.

‘‘идха пана, бхиккхаве, бхиккху евам̣ пат̣ипанно хоти – ‘но часса но ча ме сийа̄, на бхависсати на ме бхависсати, йадаттхи йам̣ бхӯтам̣ там̣ паджаха̄мӣ’ти упеккхам̣ пат̣илабхати. со бхаве на раджджати, самбхаве на раджджати, аттхуттари падам̣ сантам̣ саммапан̃н̃а̄йа пассати. тан̃ча кхвасса падам̣ на саббена саббам̣ саччхикатам̣ хоти, тасса на саббена саббам̣ ма̄на̄нусайо пахӣно хоти, на саббена саббам̣ бхавара̄га̄нусайо пахӣно хоти, на саббена саббам̣ авиджджа̄нусайо пахӣно хоти. со пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ уддхам̣сото хоти аканит̣т̣хага̄мӣ. сеййатха̄пи, бхиккхаве, дивасам̣сантатте айокапа̄ле хан̃н̃ама̄не папат̣ика̄ ниббаттитва̄ уппатитва̄ маханте тин̣апун̃дже ва̄ кат̣т̣хапун̃дже ва̄ нипатеййа. са̄ таттха аггимпи джанеййа, дхӯмампи джанеййа, аггимпи джанетва̄ дхӯмампи джанетва̄ тамева махантам̣ тин̣апун̃джам̣ ва̄ кат̣т̣хапун̃джам̣ ва̄ парийа̄дийитва̄ гаччхампи дахеййа [д̣ахеййа (ан̃н̃аттха)], да̄йампи дахеййа, гаччхампи дахитва̄ да̄йампи дахитва̄ харитантам̣ ва̄ патхантам̣ ва̄ [пантхантам̣ ва̄ (сӣ.) сйа̄мапоттхаке идам̣ на диссати] селантам̣ ва̄ удакантам̣ ва̄ раман̣ӣйам̣ ва̄ бхӯмибха̄гам̣ а̄гамма ана̄ха̄ра̄ нибба̄йеййа. евамевам̣ кхо, бхиккхаве, бхиккху евам̣ пат̣ипанно хоти – но часса но ча ме сийа̄…пе… со пан̃чаннам̣ орамбха̄гийа̄нам̣ сам̣йоджана̄нам̣ париккхайа̄ уддхам̣сото хоти аканит̣т̣хага̄мӣ. има̄ кхо, бхиккхаве, сатта пурисагатийо.

‘‘катаман̃ча, бхиккхаве, анупа̄да̄паринибба̄нам̣? идха, бхиккхаве, бхиккху евам̣ пат̣ипанно хоти – ‘но часса но ча ме сийа̄, на бхависсати на ме бхависсати, йадаттхи йам̣ бхӯтам̣ там̣ паджаха̄мӣ’ти упеккхам̣ пат̣илабхати. со бхаве на раджджати, самбхаве на раджджати, аттхуттари падам̣ сантам̣ саммаппан̃н̃а̄йа пассати. тан̃ча кхвасса падам̣ саббена саббам̣ саччхикатам̣ хоти, тасса саббена саббам̣ ма̄на̄нусайо пахӣно хоти, саббена саббам̣ бхавара̄га̄нусайо пахӣно хоти, саббена саббам̣ авиджджа̄нусайо пахӣно хоти. со а̄сава̄нам̣ кхайа̄…пе… саччхикатва̄ упасампаджджа вихарати. идам̣ вуччати, бхиккхаве, анупа̄да̄паринибба̄нам̣. има̄ кхо, бхиккхаве, сатта пурисагатийо анупа̄да̄ ча паринибба̄на’’нти. дутийам̣.