4. дутийасовачассата̄суттам̣

35. ‘‘имам̣, бхиккхаве, раттим̣ ан̃н̃атара̄ девата̄ абхикканта̄йа раттийа̄ абхиккантаван̣н̣а̄…пе… ‘саттиме, бханте, дхамма̄ бхиккхуно апариха̄на̄йа сам̣ваттанти. катаме сатта? саттхуга̄равата̄, дхаммага̄равата̄, сан̇гхага̄равата̄, сиккха̄га̄равата̄, сама̄дхига̄равата̄, совачассата̄, калйа̄н̣амиттата̄. име кхо, бханте, сатта дхамма̄ бхиккхуно апариха̄на̄йа сам̣ваттантӣ’ти. идамавоча, бхиккхаве, са̄ девата̄. идам̣ ватва̄ мам̣ абхива̄детва̄ падаккхин̣ам̣ катва̄ таттхевантарадха̄йӣ’’ти.

евам̣ вутте а̄йасма̄ са̄рипутто бхагавантам̣ етадавоча – ‘‘имасса кхо ахам̣, бханте, бхагавата̄ сам̣кхиттена бха̄ситасса евам̣ виттха̄рена аттхам̣ а̄джа̄на̄ми. идха, бханте, бхиккху аттана̄ ча саттхуга̄раво хоти, саттхуга̄равата̄йа ча ван̣н̣ава̄дӣ. йе чан̃н̃е бхиккхӯ на саттхуга̄рава̄ те ча саттхуга̄равата̄йа сама̄дапети. йе чан̃н̃е бхиккхӯ саттхуга̄рава̄ тесан̃ча ван̣н̣ам̣ бхан̣ати бхӯтам̣ таччхам̣ ка̄лена. аттана̄ ча дхаммага̄раво хоти…пе… сан̇гхага̄раво хоти… сиккха̄га̄раво хоти… сама̄дхига̄раво хоти… сувачо хоти… калйа̄н̣амитто хоти, калйа̄н̣амиттата̄йа ча ван̣н̣ава̄дӣ. йе чан̃н̃е бхиккхӯ на калйа̄н̣амитта̄ те ча калйа̄н̣амиттата̄йа сама̄дапети. йе чан̃н̃е бхиккхӯ калйа̄н̣амитта̄ тесан̃ча ван̣н̣ам̣ бхан̣ати бхӯтам̣ таччхам̣ ка̄лена̄ти. имасса кхо ахам̣, бханте, бхагавата̄ сам̣кхиттена бха̄ситасса евам̣ виттха̄рена аттхам̣ а̄джа̄на̄мӣ’’ти.

‘‘са̄дху са̄дху, са̄рипутта! са̄дху кхо твам̣, са̄рипутта, имасса майа̄ сам̣кхиттена бха̄ситасса евам̣ виттха̄рена аттхам̣ а̄джа̄на̄си. идха, са̄рипутта, бхиккху аттана̄ ча саттхуга̄раво хоти, саттхуга̄равата̄йа ча ван̣н̣ава̄дӣ. йе чан̃н̃е бхиккхӯ на саттхуга̄рава̄ те ча саттхуга̄равата̄йа сама̄дапети. йе чан̃н̃е бхиккхӯ саттхуга̄рава̄ тесан̃ча ван̣н̣ам̣ бхан̣ати бхӯтам̣ таччхам̣ ка̄лена. аттана̄ ча дхаммага̄раво хоти…пе… сан̇гхага̄раво хоти… сиккха̄га̄раво хоти… сама̄дхига̄раво хоти… сувачо хоти… калйа̄н̣амитто хоти, калйа̄н̣амиттата̄йа ча ван̣н̣ава̄дӣ. йе чан̃н̃е бхиккхӯ на калйа̄н̣амитта̄ те ча калйа̄н̣амиттата̄йа сама̄дапети. йе чан̃н̃е бхиккхӯ калйа̄н̣амитта̄ тесан̃ча ван̣н̣ам̣ бхан̣ати бхӯтам̣ таччхам̣ ка̄лена̄ти. имасса кхо, са̄рипутта, майа̄ сам̣кхиттена бха̄ситасса евам̣ виттха̄рена аттхо дат̣т̣хаббо’’ти. чатуттхам̣.