12. дутийаниддасасуттам̣

43. евам̣ ме сутам̣ – екам̣ самайам̣ бхагава̄ косамбийам̣ вихарати гхосита̄ра̄ме. атха кхо а̄йасма̄ а̄нандо пуббан̣хасамайам̣ нива̄сетва̄ паттачӣварама̄да̄йа косамбим̣ пин̣д̣а̄йа па̄виси. атха кхо а̄йасмато а̄нандасса етадахоси – ‘‘атиппаго кхо та̄ва косамбийам̣ пин̣д̣а̄йа чаритум̣. йам̣нӯна̄хам̣ йена ан̃н̃атиттхийа̄нам̣ парибба̄джака̄нам̣ а̄ра̄мо тенупасан̇камеййа’’нти. атха кхо а̄йасма̄ а̄нандо йена ан̃н̃атиттхийа̄нам̣ парибба̄джака̄нам̣ а̄ра̄мо тенупасан̇ками; упасан̇камитва̄ техи ан̃н̃атиттхийехи парибба̄джакехи саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди.

тена кхо пана самайена тесам̣ ан̃н̃атиттхийа̄нам̣ парибба̄джака̄нам̣ саннисинна̄нам̣ саннипатита̄нам̣ айамантара̄катха̄ удапа̄ди – ‘‘йо хи кочи, а̄вусо, два̄даса васса̄ни парипун̣н̣ам̣ парисуддхам̣ брахмачарийам̣ чарати, ‘ниддасо бхиккхӯ’ти алам̣ вачана̄йа̄’’ти.

атха кхо а̄йасма̄ а̄нандо тесам̣ ан̃н̃атиттхийа̄нам̣ парибба̄джака̄нам̣ бха̄ситам̣ нева абхинанди наппат̣иккоси. анабхинандитва̄ аппат̣иккоситва̄ ут̣т̣ха̄йа̄сана̄ пакка̄ми – ‘‘бхагавато сантике етасса бха̄ситасса аттхам̣ а̄джа̄нисса̄мӣ’’ти. атха кхо а̄йасма̄ а̄нандо косамбийам̣ пин̣д̣а̄йа чаритва̄ паччха̄бхаттам̣ пин̣д̣апа̄тапат̣икканто йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо а̄йасма̄ а̄нандо бхагавантам̣ етадавоча –

‘‘идха̄хам̣, бханте, пуббан̣хасамайам̣ нива̄сетва̄ паттачӣварама̄да̄йа косамбим̣ пин̣д̣а̄йа па̄висим̣. тасса майхам̣, бханте, етадахоси – ‘атиппаго кхо та̄ва косамбийам̣ пин̣д̣а̄йа чаритум̣. йам̣нӯна̄хам̣ йена ан̃н̃атиттхийа̄нам̣ парибба̄джака̄нам̣ а̄ра̄мо тенупасан̇камеййа’нти…пе… техи саддхим̣ саммодим̣. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣдим̣.

‘‘тена кхо пана, бханте, самайена тесам̣ ан̃н̃атиттхийа̄нам̣ парибба̄джака̄нам̣ саннисинна̄нам̣ саннипатита̄нам̣ айамантара̄катха̄ удапа̄ди – ‘йо хи кочи, а̄вусо, два̄дасавасса̄ни парипун̣н̣ам̣ парисуддхам̣ брахмачарийам̣ чарати, ниддасо бхиккхӯти алам̣ вачана̄йа̄’ти. атха кхва̄хам̣, бханте, тесам̣ ан̃н̃атиттхийа̄нам̣ парибба̄джака̄нам̣ бха̄ситам̣ нева абхинандим̣ наппат̣иккосим̣. анабхинандитва̄, аппат̣иккоситва̄ ут̣т̣ха̄йа̄сана̄ паккамим̣ – ‘бхагавато сантике етасса бха̄ситасса аттхам̣ а̄джа̄нисса̄мӣ’ти. сакка̄ ну кхо, бханте, имасмим̣ дхаммавинайе кевалам̣ вассаган̣анаматтена ниддасо бхиккху пан̃н̃а̄пету’’нти?

‘‘на кхо, а̄нанда, сакка̄ имасмим̣ дхаммавинайе кевалам̣ вассаган̣анаматтена ниддасо бхиккху пан̃н̃а̄петум̣. сатта кхо има̄ни, а̄нанда, ниддасаваттхӯни майа̄ сайам̣ абхин̃н̃а̄ саччхикатва̄ паведита̄ни.

‘‘катама̄ни сатта? идха̄нанда, бхиккху, саддхо хоти, хирӣма̄ хоти, оттаппӣ хоти, бахуссуто хоти, а̄раддхавӣрийо хоти, сатима̄ хоти, пан̃н̃ава̄ хоти. има̄ни кхо, а̄нанда, сатта ниддасаваттхӯни майа̄ сайам̣ абхин̃н̃а̄ саччхикатва̄ паведита̄ни. имехи кхо, а̄нанда, саттахи ниддасаваттхӯхи саманна̄гато бхиккху два̄даса чепи васса̄ни парипун̣н̣ам̣ парисуддхам̣ брахмачарийам̣ чарати, ‘ниддасо бхиккхӯ’ти алам̣ вачана̄йа; чатуббӣсати чепи васса̄ни парипун̣н̣ам̣ парисуддхам̣ брахмачарийам̣ чарати, ‘ниддасо бхиккхӯ’ти алам̣ вачана̄йа; чхаттим̣сати чепи васса̄ни парипун̣н̣ам̣ парисуддхам̣ брахмачарийам̣ чарати, ‘ниддасо бхиккхӯ’ти алам̣ вачана̄йа, ат̣т̣хачатта̄рӣсам̣ чепи васса̄ни парипун̣н̣ам̣ парисуддхам̣ брахмачарийам̣ чарати, ‘ниддасо бхиккхӯ’ти алам̣ вачана̄йа̄’’ти. два̄дасамам̣.

девата̄вагго чатуттхо.