1. аппама̄дага̄равасуттам̣

32. атха кхо ан̃н̃атара̄ девата̄ абхикканта̄йа раттийа̄ абхиккантаван̣н̣а̄ кевалакаппам̣ джетаванам̣ обха̄сетва̄ йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ ат̣т̣ха̄си. екамантам̣ т̣хита̄ кхо са̄ девата̄ бхагавантам̣ етадавоча –

‘‘саттиме, бханте, дхамма̄ бхиккхуно апариха̄на̄йа сам̣ваттанти. катаме сатта? саттхуга̄равата̄, дхаммага̄равата̄, сан̇гхага̄равата̄, сиккха̄га̄равата̄, сама̄дхига̄равата̄, аппама̄дага̄равата̄, пат̣исантха̄рага̄равата̄. име кхо, бханте, сатта дхамма̄ бхиккхуно апариха̄на̄йа сам̣ваттантӣ’’ти. идамавоча са̄ девата̄. саманун̃н̃о саттха̄ ахоси. атха кхо са̄ девата̄ ‘‘саманун̃н̃о ме саттха̄’’ти бхагавантам̣ абхива̄детва̄ падаккхин̣ам̣ катва̄ таттхевантарадха̄йи.

атха кхо бхагава̄ тасса̄ раттийа̄ аччайена бхиккхӯ а̄мантеси – ‘‘имам̣, бхиккхаве, раттим̣ ан̃н̃атара̄ девата̄ абхикканта̄йа раттийа̄ абхиккантаван̣н̣а̄ кевалакаппам̣ джетаванам̣ обха̄сетва̄ йена̄хам̣ тенупасан̇ками; упасан̇камитва̄ мам̣ абхива̄детва̄ екамантам̣ ат̣т̣ха̄си. екамантам̣ т̣хита̄ кхо, бхиккхаве, са̄ девата̄ мам̣ етадавоча – ‘саттиме, бханте, дхамма̄ бхиккхуно апариха̄на̄йа сам̣ваттанти. катаме сатта? саттхуга̄равата̄, дхаммага̄равата̄, сан̇гхага̄равата̄, сиккха̄га̄равата̄, сама̄дхига̄равата̄, аппама̄дага̄равата̄, пат̣исантха̄рага̄равата̄ – име кхо, бханте, сатта дхамма̄ бхиккхуно апариха̄на̄йа сам̣ваттантӣ’ти. идамавоча, бхиккхаве, са̄ девата̄. идам̣ ватва̄ мам̣ абхива̄детва̄ падаккхин̣ам̣ катва̄ таттхевантарадха̄йӣ’’ти.

‘‘саттхугару дхаммагару, сан̇гхе ча тиббага̄раво;

сама̄дхигару а̄та̄пӣ [сама̄дхига̄равата̄пи ча (ка.)], сиккха̄йа тиббага̄раво.

‘‘аппама̄дагару бхиккху, пат̣исантха̄рага̄раво;

абхаббо париха̄на̄йа, нибба̄нассева сантике’’ти. пат̣хамам̣;