2. хирӣга̄равасуттам̣

33. ‘‘имам̣, бхиккхаве, раттим̣ ан̃н̃атара̄ девата̄ абхикканта̄йа раттийа̄ абхиккантаван̣н̣а̄ кевалакаппам̣ джетаванам̣ обха̄сетва̄ йена̄хам̣ тенупасан̇ками; упасан̇камитва̄ мам̣ абхива̄детва̄ екамантам̣ ат̣т̣ха̄си. екамантам̣ т̣хита̄ кхо, бхиккхаве, са̄ девата̄ мам̣ етадавоча – ‘саттиме, бханте, дхамма̄ бхиккхуно апариха̄на̄йа сам̣ваттанти. катаме сатта? саттхуга̄равата̄, дхаммага̄равата̄, сан̇гхага̄равата̄, сиккха̄га̄равата̄, сама̄дхига̄равата̄, хирига̄равата̄, оттаппага̄равата̄. име кхо, бханте, сатта дхамма̄ бхиккхуно апариха̄на̄йа сам̣ваттантӣ’ти. идамавоча, бхиккхаве, са̄ девата̄. идам̣ ватва̄ мам̣ абхива̄детва̄ падаккхин̣ам̣ катва̄ таттхевантарадха̄йӣ’’ти.

‘‘саттхугару дхаммагару, сан̇гхе ча тиббага̄раво;

сама̄дхигару а̄та̄пӣ, сиккха̄йа тиббага̄раво.

‘‘хири оттаппасампанно, саппатиссо сага̄раво;

абхаббо париха̄на̄йа, нибба̄нассева сантике’’ти. дутийам̣;