5. адхигамасуттам̣

79. ‘‘чхахи, бхиккхаве, дхаммехи саманна̄гато бхиккху абхаббо анадхигатам̣ ва̄ кусалам̣ дхаммам̣ адхигантум̣, адхигатам̣ ва̄ кусалам̣ дхаммам̣ пха̄тим̣ ка̄тум̣ [пха̄тикаттум̣ (сӣ.), пха̄тика̄тум̣ (сйа̄. кам̣. пӣ.)]. катамехи чхахи? идха, бхиккхаве, бхиккху на а̄йакусало ча хоти, на апа̄йакусало ча хоти, на упа̄йакусало ча хоти, анадхигата̄нам̣ кусала̄нам̣ дхамма̄нам̣ адхигама̄йа на чхандам̣ джанети, адхигате кусале дхамме на а̄раккхати [са̄раккхати (сӣ. сйа̄. кам̣. пӣ)], са̄таччакирийа̄йа на сампа̄дети. имехи кхо, бхиккхаве, чхахи дхаммехи саманна̄гато бхиккху абхаббо анадхигатам̣ ва̄ кусалам̣ дхаммам̣ адхигантум̣, адхигатам̣ ва̄ кусалам̣ дхаммам̣ пха̄тим̣ ка̄тум̣.

‘‘чхахи, бхиккхаве, дхаммехи саманна̄гато бхиккху бхаббо анадхигатам̣ ва̄ кусалам̣ дхаммам̣ адхигантум̣, адхигатам̣ ва̄ кусалам̣ дхаммам̣ пха̄тим̣ ка̄тум̣. катамехи чхахи? идха, бхиккхаве, бхиккху а̄йакусало ча хоти, апа̄йакусало ча хоти, упа̄йакусало ча хоти, анадхигата̄нам̣ кусала̄нам̣ дхамма̄нам̣ адхигама̄йа чхандам̣ джанети, адхигате кусале дхамме а̄раккхати, са̄таччакирийа̄йа сампа̄дети. имехи кхо, бхиккхаве, чхахи дхаммехи саманна̄гато бхиккху бхаббо анадхигатам̣ ва̄ кусалам̣ дхаммам̣ адхигантум̣, адхигатам̣ ва̄ кусалам̣ дхаммам̣ пха̄тим̣ ка̄ту’’нти. пан̃чамам̣.