5. да̄рукаммикасуттам̣

59. евам̣ ме сутам̣ – екам̣ самайам̣ бхагава̄ на̄тике вихарати гин̃джака̄васатхе. атха кхо да̄рукаммико гахапати йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисиннам̣ кхо да̄рукаммикам̣ гахапатим̣ бхагава̄ етадавоча – ‘‘апи ну те, гахапати, куле да̄нам̣ дӣйатӣ’’ти? ‘‘дӣйати ме, бханте, куле да̄нам̣. тан̃ча кхо йе те бхиккхӯ а̄ран̃н̃ика̄ пин̣д̣апа̄тика̄ пам̣сукӯлика̄ араханто ва̄ арахаттамаггам̣ ва̄ сама̄панна̄, татха̄рӯпесу ме, бханте, бхиккхӯсу да̄нам̣ дӣйатӣ’’ти.

‘‘дуджджа̄нам̣ кхо етам̣, гахапати, тайа̄ гихина̄ ка̄мабхогина̄ путтасамба̄дхасайанам̣ аджджха̄васантена, ка̄сикачанданам̣ паччанубхонтена, ма̄ла̄гандхавилепанам̣ дха̄райантена, джа̄тарӯпараджатам̣ са̄дийантена име ва̄ араханто име ва̄ арахаттамаггам̣ сама̄панна̄ти.

‘‘а̄ран̃н̃ико чепи, гахапати, бхиккху хоти уддхато уннал̣о чапало мукхаро викин̣н̣ава̄чо мут̣т̣хассати асампаджа̄но асама̄хито виббхантачитто па̄катиндрийо. евам̣ со тенан̇гена га̄райхо. а̄ран̃н̃ико чепи, гахапати, бхиккху хоти ануддхато ануннал̣о ачапало амукхаро авикин̣н̣ава̄чо упат̣т̣хитассати сампаджа̄но сама̄хито екаггачитто сам̣вутиндрийо. евам̣ со тенан̇гена па̄сам̣со.

‘‘га̄мантавиха̄рӣ чепи, гахапати, бхиккху хоти уддхато…пе… евам̣ со тенан̇гена га̄райхо. га̄мантавиха̄рӣ чепи, гахапати, бхиккху хоти ануддхато…пе… евам̣ со тенан̇гена па̄сам̣со.

‘‘пин̣д̣апа̄тико чепи, гахапати, бхиккху хоти уддхато…пе… евам̣ со тенан̇гена га̄райхо. пин̣д̣апа̄тико чепи, гахапати, бхиккху хоти ануддхато…пе… евам̣ со тенан̇гена па̄сам̣со.

‘‘немантанико чепи, гахапати, бхиккху хоти уддхато…пе… евам̣ со тенан̇гена га̄райхо. немантанико чепи, гахапати, бхиккху хоти ануддхато…пе… евам̣ со тенан̇гена па̄сам̣со.

‘‘пам̣сукӯлико чепи, гахапати, бхиккху хоти уддхато…пе… евам̣ со тенан̇гена га̄райхо. пам̣сукӯлико чепи, гахапати, бхиккху хоти ануддхато…пе… евам̣ со тенан̇гена па̄сам̣со.

‘‘гахапатичӣварадхаро чепи, гахапати, бхиккху хоти уддхато уннал̣о чапало мукхаро викин̣н̣ава̄чо мут̣т̣хассати асампаджа̄но асама̄хито виббхантачитто па̄катиндрийо. евам̣ со тенан̇гена га̄райхо. гахапатичӣварадхаро чепи, гахапати, бхиккху хоти ануддхато ануннал̣о ачапало амукхаро авикин̣н̣ава̄чо упат̣т̣хитассати сампаджа̄но сама̄хито екаггачитто сам̣вутиндрийо. евам̣ со тенан̇гена па̄сам̣со.

‘‘ин̇гха твам̣, гахапати, сан̇гхе да̄нам̣ [да̄на̄ни (ка.)] дехи. сан̇гхе те да̄нам̣ дадато читтам̣ пасӣдиссати. со твам̣ пасанначитто ка̄йасса бхеда̄ парам̣ маран̣а̄ сугатим̣ саггам̣ локам̣ упападжджиссасӣ’’ти. ‘‘еса̄хам̣, бханте, аджджатагге сан̇гхе да̄нам̣ дасса̄мӣ’’ти. пан̃чамам̣.