5. пат̣хамасандит̣т̣хикасуттам̣

47. атха кхо мол̣ийасӣвако [молийасӣвако (сӣ. пӣ.), мол̣исӣвако (ка.)] парибба̄джако йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо мол̣ийасӣвако парибба̄джако бхагавантам̣ етадавоча – ‘‘‘сандит̣т̣хико дхаммо, сандит̣т̣хико дхаммо’ти, бханте, вуччати. китта̄вата̄ ну кхо, бханте, сандит̣т̣хико дхаммо хоти ака̄лико ехипассико опанеййико паччаттам̣ ведитаббо вин̃н̃ӯхӣ’’ти?

‘‘тена хи, сӣвака, тан̃н̃еветтха пат̣ипуччха̄ми. йатха̄ те кхамеййа татха̄ нам̣ бйа̄кареййа̄си. там̣ ким̣ ман̃н̃аси, сӣвака, сантам̣ ва̄ аджджхаттам̣ лобхам̣ ‘аттхи ме аджджхаттам̣ лобхо’ти паджа̄на̄си, асантам̣ ва̄ аджджхаттам̣ лобхам̣ ‘наттхи ме аджджхаттам̣ лобхо’ти паджа̄на̄сӣ’’ти? ‘‘евам̣, бханте’’. ‘‘йам̣ кхо твам̣, сӣвака, сантам̣ ва̄ аджджхаттам̣ лобхам̣ ‘аттхи ме аджджхаттам̣ лобхо’ти паджа̄на̄си, асантам̣ ва̄ аджджхаттам̣ лобхам̣ ‘наттхи ме аджджхаттам̣ лобхо’ти паджа̄на̄си – евампи кхо, сӣвака, сандит̣т̣хико дхаммо хоти…пе….

‘‘там̣ ким̣ ман̃н̃аси, сӣвака, сантам̣ ва̄ аджджхаттам̣ досам̣…пе… сантам̣ ва̄ аджджхаттам̣ мохам̣…пе… сантам̣ ва̄ аджджхаттам̣ лобхадхаммам̣…пе… сантам̣ ва̄ аджджхаттам̣ досадхаммам̣…пе… сантам̣ ва̄ аджджхаттам̣ мохадхаммам̣ ‘аттхи ме аджджхаттам̣ мохадхаммо’ти паджа̄на̄си, асантам̣ ва̄ аджджхаттам̣ мохадхаммам̣ ‘наттхи ме аджджхаттам̣ мохадхаммо’ти паджа̄на̄сӣ’’ти? ‘‘евам̣, бханте’’. ‘‘йам̣ кхо твам̣, сӣвака, сантам̣ ва̄ аджджхаттам̣ мохадхаммам̣ ‘аттхи ме аджджхаттам̣ мохадхаммо’ти паджа̄на̄си, асантам̣ ва̄ аджджхаттам̣ мохадхаммам̣ ‘наттхи ме аджджхаттам̣ мохадхаммо’ти паджа̄на̄си – евам̣ кхо, сӣвака, сандит̣т̣хико дхаммо хоти ака̄лико ехипассико опанеййико паччаттам̣ ведитаббо вин̃н̃ӯхӣ’’ти.

‘‘абхиккантам̣, бханте, абхиккантам̣, бханте…пе… упа̄сакам̣ мам̣, бханте, бхагава̄ дха̄рету аджджатагге па̄н̣упетам̣ саран̣ам̣ гата’’нти. пан̃чамам̣.