9. уда̄йӣсуттам̣

29. атха кхо бхагава̄ а̄йасмантам̣ уда̄йим̣ а̄мантеси – ‘‘кати ну кхо, уда̄йи, ануссатит̣т̣ха̄на̄нӣ’’ти? евам̣ вутте а̄йасма̄ уда̄йӣ тун̣хӣ ахоси. дутийампи кхо бхагава̄ а̄йасмантам̣ уда̄йим̣ а̄мантеси – ‘‘кати ну кхо, уда̄йи, ануссатит̣т̣ха̄на̄нӣ’’ти? дутийампи кхо а̄йасма̄ уда̄йӣ тун̣хӣ ахоси. татийампи кхо бхагава̄ а̄йасмантам̣ уда̄йим̣ а̄мантеси – ‘‘кати ну кхо, уда̄йи, ануссатит̣т̣ха̄на̄нӣ’’ти? татийампи кхо а̄йасма̄ уда̄йӣ тун̣хӣ ахоси.

атха кхо а̄йасма̄ а̄нандо а̄йасмантам̣ уда̄йим̣ етадавоча – ‘‘саттха̄ там̣, а̄вусо уда̄йи, а̄мантесӣ’’ти. ‘‘сун̣омахам̣, а̄вусо а̄нанда, бхагавато. идха, бханте, бхиккху анекавихитам̣ пуббенива̄сам̣ ануссарати – сеййатхидам̣ екампи джа̄тим̣ двепи джа̄тийо…пе…. ити са̄ка̄рам̣ сауддесам̣ анекавихитам̣ пуббенива̄сам̣ ануссарати. идам̣, бханте, ануссатит̣т̣ха̄на’’нти.

атха кхо бхагава̄ а̄йасмантам̣ а̄нандам̣ а̄мантеси – ‘‘ан̃н̃а̄сим̣ кхо ахам̣, а̄нанда – ‘нева̄йам̣ уда̄йӣ могхапурисо адхичиттам̣ ануйутто вихаратӣ’ти. кати ну кхо, а̄нанда, ануссатит̣т̣ха̄на̄нӣ’’ти?

‘‘пан̃ча, бханте, ануссатит̣т̣ха̄на̄ни. катама̄ни пан̃ча? идха, бханте, бхиккху вивиччева ка̄мехи…пе… татийам̣ джха̄нам̣ упасампаджджа вихарати. идам̣, бханте, ануссатит̣т̣ха̄нам̣ евам̣ бха̄витам̣ евам̣ бахулӣкатам̣ дит̣т̣хадхаммасукхавиха̄ра̄йа сам̣ваттати.

‘‘пуна чапарам̣, бханте, бхиккху а̄локасан̃н̃ам̣ манаси кароти, дива̄ сан̃н̃ам̣ адхит̣т̣ха̄ти, йатха̄ дива̄ татха̄ раттим̣, йатха̄ раттим̣ татха̄ дива̄; ити виват̣ена четаса̄ апарийонаддхена саппабха̄сам̣ читтам̣ бха̄вети. идам̣, бханте, ануссатит̣т̣ха̄нам̣ евам̣ бха̄витам̣ евам̣ бахулӣкатам̣ н̃а̄н̣адассанаппат̣ила̄бха̄йа сам̣ваттати.

‘‘пуна чапарам̣, бханте, бхиккху имамева ка̄йам̣ уддхам̣ па̄датала̄ адхо кесаматтхака̄ тачапарийантам̣ пӯрам̣ на̄наппака̄расса асучино паччавеккхати – ‘аттхи имасмим̣ ка̄йе кеса̄ лома̄ накха̄ данта̄ тачо мам̣сам̣ нха̄ру [наха̄ру (сӣ. пӣ.) дӣ. ни. 2.377; ма. ни. 1.110] ат̣т̣хи ат̣т̣химин̃джам̣ ваккам̣ хадайам̣ йаканам̣ киломакам̣ пихакам̣ паппха̄сам̣ антам̣ антагун̣ам̣ ударийам̣ карӣсам̣ питтам̣ семхам̣ пуббо лохитам̣ седо медо ассу васа̄ кхел̣о син̇гха̄н̣ика̄ ласика̄ мутта’нти. идам̣, бханте, ануссатит̣т̣ха̄нам̣ евам̣ бха̄витам̣ евам̣ бахулӣкатам̣ ка̄мара̄гаппаха̄на̄йа сам̣ваттати.

‘‘пуна чапарам̣, бханте, бхиккху сеййатха̄пи пассеййа сарӣрам̣ сӣватхика̄йа чхад̣д̣итам̣ [чхад̣д̣итам̣ (сӣ. сйа̄. пӣ.)] ека̄хаматам̣ ва̄ двӣхаматам̣ ва̄ тӣхаматам̣ ва̄ уддхума̄такам̣ винӣлакам̣ випуббакаджа̄там̣. со имамева ка̄йам̣ евам̣ [еванти идам̣ сатипат̣т̣ха̄насутта̄дӣсу наттхи] упасам̣харати – ‘айампи кхо ка̄йо евам̣дхаммо евам̣бха̄вӣ евам̣анатӣто’’’ти [етам̣ анатӣтоти (сӣ.)].

‘‘сеййатха̄пи ва̄ пана [сеййатха̄ ва̄ пана (сйа̄.)] пассеййа сарӣрам̣ сӣватхика̄йа чхад̣д̣итам̣ ка̄кехи ва̄ кхаджджама̄нам̣ кулалехи ва̄ кхаджджама̄нам̣ гиджджхехи ва̄ кхаджджама̄нам̣ сунакхехи ва̄ кхаджджама̄нам̣ син̇га̄лехи [сига̄лехи (сӣ.)] ва̄ кхаджджама̄нам̣ вивидхехи ва̄ па̄н̣акаджа̄техи кхаджджама̄нам̣. со имамева ка̄йам̣ евам̣ упасам̣харати – ‘айампи кхо ка̄йо евам̣дхаммо евам̣бха̄вӣ евам̣анатӣто’’’ти.

‘‘сеййатха̄пи ва̄ пана пассеййа сарӣрам̣ сӣватхика̄йа чхад̣д̣итам̣ ат̣т̣хикасан̇кхаликам̣ самам̣салохитам̣ нха̄русамбандхам̣…пе… ат̣т̣хикасан̇кхаликам̣ ниммам̣салохитамаккхитам̣ нха̄русамбандхам̣… ат̣т̣хикасан̇кхаликам̣ апагатамам̣салохитам̣ нха̄русамбандхам̣. ат̣т̣хика̄ни апагатасамбандха̄ни диса̄видиса̄виккхитта̄ни [диса̄видиса̄су виккхитта̄ни (сӣ.)], ан̃н̃ена хаттхат̣т̣хикам̣ ан̃н̃ена па̄дат̣т̣хикам̣ ан̃н̃ена джан̇гхат̣т̣хикам̣ ан̃н̃ена ӯрут̣т̣хикам̣ ан̃н̃ена кат̣ит̣т̣хикам̣ [кат̣ат̣т̣хикам̣ (сӣ.)] ан̃н̃ена [пит̣т̣хикан̣д̣акам̣ ан̃н̃ена сӣсакат̣а̄хам̣ (сӣ. пӣ.), пит̣т̣хикан̣д̣акат̣т̣хикам̣ ан̃н̃ена сӣсакат̣а̄хам̣ (сйа̄. кам̣.)] пха̄сукат̣т̣хикам̣ ан̃н̃ена пит̣т̣хикан̣т̣акат̣т̣хикам̣ ан̃н̃ена кхандхат̣т̣хикам̣ ан̃н̃ена гӣват̣т̣хикам̣ ан̃н̃ена ханукат̣т̣хикам̣ ан̃н̃ена дантакат̣т̣хикам̣ ан̃н̃ена сӣсакат̣а̄хам̣ [пит̣т̣хикан̣д̣акам̣ ан̃н̃ена сӣсакат̣а̄хам̣ (сӣ. пӣ.), пит̣т̣хикан̣д̣акат̣т̣хикам̣ ан̃н̃ена сӣсакат̣а̄хам̣ (сйа̄. кам̣.)], ат̣т̣хика̄ни сета̄ни сан̇кхаван̣н̣аппат̣ибха̄га̄ни [сан̇кхаван̣н̣ӯпанибха̄ни (сӣ. сйа̄. пӣ.)] ат̣т̣хика̄ни пун̃джакита̄ни [пун̃джаката̄ни (пӣ.)] теровассика̄ни ат̣т̣хика̄ни пӯтӣни чун̣н̣акаджа̄та̄ни. со имамева ка̄йам̣ евам̣ упасам̣харати – ‘айампи кхо ка̄йо евам̣дхаммо евам̣бха̄вӣ евам̣анатӣто’ти. идам̣, бханте, ануссатит̣т̣ха̄нам̣ евам̣ бха̄витам̣ евам̣ бахулӣкатам̣ асмима̄насамуггха̄та̄йа сам̣ваттати.

‘‘пуна чапарам̣, бханте, бхиккху сукхасса ча паха̄на̄…пе… чатуттхам̣ джха̄нам̣ упасампаджджа вихарати. идам̣, бханте, ануссатит̣т̣ха̄нам̣ евам̣ бха̄витам̣ евам̣ бахулӣкатам̣ анекадха̄тупат̣иведха̄йа сам̣ваттати. има̄ни кхо, бханте, пан̃ча ануссатит̣т̣ха̄на̄нӣ’’ти.

‘‘са̄дху, са̄дху, а̄нанда! тена хи твам̣, а̄нанда, идампи чхат̣т̣хам̣ ануссатит̣т̣ха̄нам̣ дха̄рехи. идха̄нанда, бхиккху сатова абхиккамати сатова пат̣иккамати сатова тит̣т̣хати сатова нисӣдати сатова сеййам̣ каппети сатова каммам̣ адхит̣т̣ха̄ти. идам̣, а̄нанда, ануссатит̣т̣ха̄нам̣ евам̣ бха̄витам̣ евам̣ бахулӣкатам̣ сатисампаджан̃н̃а̄йа сам̣ваттатӣ’’ти. навамам̣.