8. алаббханӣйат̣ха̄насуттам̣

48. ‘‘пан̃чима̄ни, бхиккхаве, алаббханӣйа̄ни т̣ха̄на̄ни саман̣ена ва̄ бра̄хман̣ена ва̄ девена ва̄ ма̄рена ва̄ брахмуна̄ ва̄ кеначи ва̄ локасмим̣. катама̄ни пан̃ча? ‘джара̄дхаммам̣ ма̄ джӣрӣ’ти алаббханӣйам̣ т̣ха̄нам̣ саман̣ена ва̄ бра̄хман̣ена ва̄ девена ва̄ ма̄рена ва̄ брахмуна̄ ва̄ кеначи ва̄ локасмим̣. ‘бйа̄дхидхаммам̣ ма̄ бйа̄дхӣйӣ’ти [вйа̄дхидхаммам̣ ‘‘ма̄ вйа̄дхӣйӣ’’ти (сӣ. пӣ.)] …пе… ‘маран̣адхаммам̣ ма̄ мӣйӣ’ти… ‘кхайадхаммам̣ ма̄ кхӣйӣ’ти… ‘нассанадхаммам̣ ма̄ нассӣ’ти алаббханӣйам̣ т̣ха̄нам̣ саман̣ена ва̄ бра̄хман̣ена ва̄ девена ва̄ ма̄рена ва̄ брахмуна̄ ва̄ кеначи ва̄ локасмим̣.

‘‘ассутавато, бхиккхаве, путхуджджанасса джара̄дхаммам̣ джӣрати. со джара̄дхамме джин̣н̣е на ити пат̣исан̃чиккхати – ‘на кхо майхевекасса [майхамевекасса (сӣ.)] джара̄дхаммам̣ джӣрати, атха кхо йа̄вата̄ сатта̄нам̣ а̄гати гати чути упапатти саббесам̣ сатта̄нам̣ джара̄дхаммам̣ джӣрати. ахан̃чева [ахан̃че (?)] кхо пана джара̄дхамме джин̣н̣е сочеййам̣ киламеййам̣ паридевеййам̣, уратта̄л̣им̣ кандеййам̣, саммохам̣ а̄паджджеййам̣, бхаттампи ме наччха̄деййа, ка̄йепи дуббан̣н̣ийам̣ оккамеййа, камманта̄пи наппаваттеййум̣ [каммантопи наппаваттеййа (ка.)], амитта̄пи аттамана̄ ассу, митта̄пи думмана̄ ассӯ’ти. со джара̄дхамме джин̣н̣е сочати киламати паридевати, уратта̄л̣им̣ кандати, саммохам̣ а̄паджджати. айам̣ вуччати, бхиккхаве – ‘ассутава̄ путхуджджано виддхо сависена сокасаллена атта̄нам̣йева парита̄пети’’’.

‘‘пуна чапарам̣, бхиккхаве, ассутавато путхуджджанасса бйа̄дхидхаммам̣ бйа̄дхӣйати…пе… маран̣адхаммам̣ мӣйати… кхайадхаммам̣ кхӣйати… нассанадхаммам̣ нассати. со нассанадхамме нат̣т̣хе на ити пат̣исан̃чиккхати – ‘на кхо майхевекасса нассанадхаммам̣ нассати, атха кхо йа̄вата̄ сатта̄нам̣ а̄гати гати чути упапатти саббесам̣ сатта̄нам̣ нассанадхаммам̣ нассати. ахан̃чева кхо пана нассанадхамме нат̣т̣хе сочеййам̣ киламеййам̣ паридевеййам̣, уратта̄л̣им̣ кандеййам̣, саммохам̣ а̄паджджеййам̣, бхаттампи ме наччха̄деййа, ка̄йепи дуббан̣н̣ийам̣ оккамеййа, камманта̄пи наппаваттеййум̣, амитта̄пи аттамана̄ ассу, митта̄пи думмана̄ ассӯ’ти. со нассанадхамме нат̣т̣хе сочати киламати паридевати, уратта̄л̣им̣ кандати, саммохам̣ а̄паджджати. айам̣ вуччати, бхиккхаве – ‘ассутава̄ путхуджджано виддхо сависена сокасаллена атта̄нам̣йева парита̄пети’’’.

‘‘сутавато ча кхо, бхиккхаве, арийаса̄вакасса джара̄дхаммам̣ джӣрати. со джара̄дхамме джин̣н̣е ити пат̣исан̃чиккхати – ‘на кхо майхевекасса джара̄дхаммам̣ джӣрати, атха кхо йа̄вата̄ сатта̄нам̣ а̄гати гати чути упапатти саббесам̣ сатта̄нам̣ джара̄дхаммам̣ джӣрати. ахан̃чева кхо пана джара̄дхамме джин̣н̣е сочеййам̣ киламеййам̣ паридевеййам̣, уратта̄л̣им̣ кандеййам̣, саммохам̣ а̄паджджеййам̣, бхаттампи ме наччха̄деййа, ка̄йепи дуббан̣н̣ийам̣ оккамеййа, камманта̄пи наппаваттеййум̣, амитта̄пи аттамана̄ ассу, митта̄пи думмана̄ ассӯ’ти. со джара̄дхамме джин̣н̣е на сочати на киламати на паридевати, на уратта̄л̣им̣ кандати, на саммохам̣ а̄паджджати. айам̣ вуччати, бхиккхаве – ‘сутава̄ арийаса̄вако аббухи [аббахи (сӣ.)] сависам̣ сокасаллам̣, йена виддхо ассутава̄ путхуджджано атта̄нам̣йева парита̄пети. асоко висалло арийаса̄вако атта̄нам̣йева паринибба̄пети’’’.

‘‘пуна чапарам̣, бхиккхаве, сутавато арийаса̄вакасса бйа̄дхидхаммам̣ бйа̄дхӣйати…пе… маран̣адхаммам̣ мӣйати… кхайадхаммам̣ кхӣйати… нассанадхаммам̣ нассати. со нассанадхамме нат̣т̣хе ити пат̣исан̃чиккхати – ‘на кхо майхевекасса нассанадхаммам̣ нассати, атха кхо йа̄вата̄ сатта̄нам̣ а̄гати гати чути упапатти саббесам̣ сатта̄нам̣ нассанадхаммам̣ нассати. ахан̃чева кхо пана нассанадхамме нат̣т̣хе сочеййам̣ киламеййам̣ паридевеййам̣, уратта̄л̣им̣ кандеййам̣, саммохам̣ а̄паджджеййам̣, бхаттампи ме наччха̄деййа, ка̄йепи дуббан̣н̣ийам̣ оккамеййа, камманта̄пи наппаваттеййум̣, амитта̄пи аттамана̄ ассу, митта̄пи думмана̄ ассӯ’ти. со нассанадхамме нат̣т̣хе на сочати на киламати на паридевати, на уратта̄л̣им̣ кандати, на саммохам̣ а̄паджджати. айам̣ вуччати, бхиккхаве – ‘сутава̄ арийаса̄вако аббухи сависам̣ сокасаллам̣, йена виддхо ассутава̄ путхуджджано атта̄нам̣йева парита̄пети. асоко висалло арийаса̄вако атта̄нам̣йева паринибба̄петӣ’’’ти.

‘‘има̄ни кхо, бхиккхаве, пан̃ча алаббханӣйа̄ни т̣ха̄на̄ни саман̣ена ва̄ бра̄хман̣ена ва̄ девена ва̄ ма̄рена ва̄ брахмуна̄ ва̄ кеначи ва̄ локасми’’нти.

[джа̄. 1.5.96 джа̄такепи] ‘‘на сочана̄йа паридевана̄йа,

аттходха лаббха̄ [аттхо идха лаббхати (сйа̄.), аттхо идха лаббха̄ (пӣ.)] апи аппакопи;

сочантаменам̣ дукхитам̣ видитва̄,

паччаттхика̄ аттамана̄ бхаванти.

‘‘йато ча кхо пан̣д̣ито а̄пада̄су,

на ведхатӣ аттхавиниччхайан̃н̃ӯ;

паччаттхика̄сса дукхита̄ бхаванти,

дисва̄ мукхам̣ авика̄рам̣ пура̄н̣ам̣.

‘‘джаппена мантена субха̄ситена,

ануппада̄нена павен̣ийа̄ ва̄;

йатха̄ йатха̄ йаттха [йатха̄ йатха̄ йаттха йаттха (ка.)] лабхетха аттхам̣,

татха̄ татха̄ таттха параккамеййа.

‘‘саче паджа̄неййа алаббханеййо,

майа̄ва [майа̄ ва̄ (сйа̄. кам̣. пӣ.)] ан̃н̃ена ва̄ еса аттхо;

асочама̄но адхива̄сайеййа,

каммам̣ дал̣хам̣ кинти кароми да̄нӣ’’ти. ат̣т̣хамам̣;