10. маха̄са̄лапуттасуттам̣

40. ‘‘химавантам̣, бхиккхаве, паббатара̄джам̣ нисса̄йа маха̄са̄ла̄ пан̃чахи вад̣д̣хӣхи вад̣д̣ханти. катама̄хи пан̃чахи? са̄кха̄паттапала̄сена вад̣д̣ханти; тачена вад̣д̣ханти; папат̣ика̄йа вад̣д̣ханти; пхеггуна̄ вад̣д̣ханти; са̄рена вад̣д̣ханти. химавантам̣, бхиккхаве, паббатара̄джам̣ нисса̄йа маха̄са̄ла̄ има̄хи пан̃чахи вад̣д̣хӣхи вад̣д̣ханти. евамевам̣ кхо, бхиккхаве, саддхам̣ кулапуттам̣ нисса̄йа антоджано пан̃чахи вад̣д̣хӣхи вад̣д̣хати. катама̄хи пан̃чахи? саддха̄йа вад̣д̣хати; сӣлена вад̣д̣хати; сутена вад̣д̣хати; ча̄гена вад̣д̣хати; пан̃н̃а̄йа вад̣д̣хати. саддхам̣, бхиккхаве, кулапуттам̣ нисса̄йа антоджано има̄хи пан̃чахи вад̣д̣хӣхи вад̣д̣хатӣ’’ти.

‘‘йатха̄ хи паббато село, аран̃н̃асмим̣ браха̄ване;

там̣ руккха̄ упанисса̄йа, вад̣д̣ханте те ванаппатӣ.

‘‘татхева сӣласампаннам̣, саддхам̣ кулапуттам̣ имам̣ [кулапатим̣ идха (сӣ.), кулапуттам̣ идха (сйа̄.)];

упанисса̄йа вад̣д̣ханти, путтада̄ра̄ ча бандхава̄;

амачча̄ н̃а̄тисан̇гха̄ ча, йе часса ануджӣвино.

‘‘тйасса сӣлавато сӣлам̣, ча̄гам̣ сучарита̄ни ча;

пассама̄на̄нукуббанти, йе бхаванти вичаккхан̣а̄.

‘‘имам̣ дхаммам̣ чаритва̄на, маггам̣ [саггам̣ (сйа̄. ка.)] сугатига̄минам̣;

нандино девалокасмим̣, моданти ка̄мака̄мино’’ти. дасамам̣;

суманавагго чатуттхо.