7. вассака̄расуттам̣

187. екам̣ самайам̣ бхагава̄ ра̄джагахе вихарати вел̣уване каландаканива̄пе. атха кхо вассака̄ро бра̄хман̣о магадхамаха̄матто йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо вассака̄ро бра̄хман̣о магадхамаха̄матто бхагавантам̣ етадавоча –

‘‘джа̄неййа ну кхо, бхо готама, асаппурисо асаппурисам̣ – ‘асаппурисо айам̣ бхава’’’нти? ‘‘ат̣т̣ха̄нам̣ кхо етам̣, бра̄хман̣а, анавака̄со йам̣ асаппурисо асаппурисам̣ джа̄неййа – ‘асаппурисо айам̣ бхава’’’нти. ‘‘джа̄неййа пана, бхо готама, асаппурисо саппурисам̣ – ‘саппурисо айам̣ бхава’’’нти? ‘‘етампи кхо, бра̄хман̣а, ат̣т̣ха̄нам̣ анавака̄со йам̣ асаппурисо саппурисам̣ джа̄неййа – ‘саппурисо айам̣ бхава’’’нти. ‘‘джа̄неййа ну кхо, бхо готама, саппурисо саппурисам̣ – ‘саппурисо айам̣ бхава’’’нти? ‘‘т̣ха̄нам̣ кхо етам̣, бра̄хман̣а, виджджати йам̣ саппурисо саппурисам̣ джа̄неййа – ‘саппурисо айам̣ бхава’’’нти. ‘‘джа̄неййа пана, бхо готама, саппурисо асаппурисам̣ – ‘асаппурисо айам̣ бхава’’’нти? ‘‘етампи кхо, бра̄хман̣а, т̣ха̄нам̣ виджджати йам̣ саппурисо асаппурисам̣ джа̄неййа – ‘асаппурисо айам̣ бхава’’’нти.

‘‘аччхарийам̣, бхо готама, аббхутам̣, бхо готама! йа̄ва субха̄ситам̣ чидам̣, бхота̄ готамена – ‘ат̣т̣ха̄нам̣ кхо етам̣, бра̄хман̣а, анавака̄со йам̣ асаппурисо асаппурисам̣ джа̄неййа – асаппурисо айам̣ бхаванти. етампи кхо, бра̄хман̣а, ат̣т̣ха̄нам̣ анавака̄со йам̣ асаппурисо саппурисам̣ джа̄неййа – саппурисо айам̣ бхаванти. т̣ха̄нам̣ кхо етам̣, бра̄хман̣а, виджджати йам̣ саппурисо саппурисам̣ джа̄неййа – саппурисо айам̣ бхаванти. етампи кхо, бра̄хман̣а, т̣ха̄нам̣ виджджати йам̣ саппурисо асаппурисам̣ джа̄неййа – асаппурисо айам̣ бхава’’’нти.

‘‘екамидам̣, бхо готама, самайам̣ тодеййасса бра̄хман̣асса парисати парӯпа̄рамбхам̣ ваттенти – ‘ба̄ло айам̣ ра̄джа̄ ел̣еййо саман̣е ра̄мапутте абхиппасанно, саман̣е ча пана ра̄мапутте еварӯпам̣ параманипаччака̄рам̣ кароти, йадидам̣ абхива̄данам̣ паччут̣т̣ха̄нам̣ ан̃джаликаммам̣ са̄мӣчикамма’нти. имепи ран̃н̃о ел̣еййасса париха̄рака̄ ба̄ла̄ – йамако моггалло [пуггало (ка.)] угго на̄виндакӣ гандхаббо аггивессо, йе саман̣е ра̄мапутте абхиппасанна̄, саман̣е ча пана ра̄мапутте еварӯпам̣ параманипаччака̄рам̣ каронти, йадидам̣ абхива̄данам̣ паччут̣т̣ха̄нам̣ ан̃джаликаммам̣ са̄мӣчикамманти. тйа̄ссудам̣ тодеййо бра̄хман̣о имина̄ найена нети. там̣ ким̣ ман̃н̃анти, бхонто, пан̣д̣ито ра̄джа̄ ел̣еййо каран̣ӣйа̄дхикаран̣ӣйесу вачанӣйа̄дхивачанӣйесу аламаттхадасатарехи аламаттхадасатаро’ти? ‘евам̣, бхо, пан̣д̣ито ра̄джа̄ ел̣еййо каран̣ӣйа̄дхикаран̣ӣйесу вачанӣйа̄дхивачанӣйесу аламаттхадасатарехи аламаттхадасатаро’’’ти.

‘‘йасма̄ ча кхо, бхо, саман̣о ра̄мапутто ран̃н̃а̄ ел̣еййена пан̣д̣итена пан̣д̣итатаро каран̣ӣйа̄дхикаран̣ӣйесу вачанӣйа̄дхивачанӣйесу аламаттхадасатарена аламаттхадасатаро, тасма̄ ра̄джа̄ ел̣еййо саман̣е ра̄мапутте абхиппасанно, саман̣е ча пана ра̄мапутте еварӯпам̣ параманипаччака̄рам̣ кароти, йадидам̣ абхива̄данам̣ паччут̣т̣ха̄нам̣ ан̃джаликаммам̣ са̄мӣчикаммам̣’’.

‘‘там̣ ким̣ ман̃н̃анти, бхонто, пан̣д̣ита̄ ран̃н̃о ел̣еййасса париха̄рака̄ – йамако моггалло угго на̄виндакӣ гандхаббо аггивессо, каран̣ӣйа̄дхикаран̣ӣйесу вачанӣйа̄дхивачанӣйесу аламаттхадасатарехи аламаттхадасатара̄ти? ‘евам̣, бхо, пан̣д̣ита̄ ран̃н̃о ел̣еййасса париха̄рака̄ – йамако моггалло угго на̄виндакӣ гандхаббо аггивессо, каран̣ӣйа̄дхикаран̣ӣйесу вачанӣйа̄дхивачанӣйесу аламаттхадасатарехи аламаттхадасатара̄’’’ти.

‘‘йасма̄ ча кхо, бхо, саман̣о ра̄мапутто ран̃н̃о ел̣еййасса париха̄ракехи пан̣д̣итехи пан̣д̣итатаро каран̣ӣйа̄дхикаран̣ӣйесу вачанӣйа̄дхивачанӣйесу аламаттхадасатарехи аламаттхадасатаро, тасма̄ ран̃н̃о ел̣еййасса париха̄рака̄ саман̣е ра̄мапутте абхиппасанна̄; саман̣е ча пана ра̄мапутте еварӯпам̣ параманипаччака̄рам̣ каронти, йадидам̣ абхива̄данам̣ паччут̣т̣ха̄нам̣ ан̃джаликаммам̣ са̄мӣчикамма’’нти.

‘‘аччхарийам̣, бхо, готама, аббхутам̣, бхо готама! йа̄ва субха̄ситам̣ чидам̣ бхота̄ готамена – ‘ат̣т̣ха̄нам̣ кхо етам̣, бра̄хман̣а, анавака̄со йам̣ асаппурисо асаппурисам̣ джа̄неййа – асаппурисо айам̣ бхаванти. етампи кхо, бра̄хман̣а, ат̣т̣ха̄нам̣ анавака̄со йам̣ асаппурисо саппурисам̣ джа̄неййа – саппурисо айам̣ бхаванти. т̣ха̄нам̣ кхо етам̣, бра̄хман̣а, виджджати йам̣ саппурисо саппурисам̣ джа̄неййа – саппурисо айам̣ бхаванти. етампи кхо, бра̄хман̣а, т̣ха̄нам̣ виджджати йам̣ саппурисо асаппурисам̣ джа̄неййа – асаппурисо айам̣ бхава’нти. ханда ча да̄ни майам̣, бхо готама, гаччха̄ма. бахукичча̄ майам̣ бахукаран̣ӣйа̄’’ти. ‘‘йассада̄ни твам̣, бра̄хман̣а, ка̄лам̣ ман̃н̃асӣ’’ти. атха кхо вассака̄ро бра̄хман̣о магадхамаха̄матто бхагавато бха̄ситам̣ абхинандитва̄ анумодитва̄ ут̣т̣ха̄йа̄сана̄ пакка̄мӣти. саттамам̣.