8. упакасуттам̣

188. екам̣ самайам̣ бхагава̄ ра̄джагахе вихарати гиджджхакӯт̣е паббате. атха кхо упако ман̣д̣ика̄путто йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо упако ман̣д̣ика̄путто бхагавантам̣ етадавоча –

‘‘ахан̃хи, бханте, евам̣ва̄дӣ евам̣дит̣т̣хи – ‘йо кочи парӯпа̄рамбхам̣ ваттети, парӯпа̄рамбхам̣ ваттенто саббо со [саббасо (сӣ. пӣ.)] на упапа̄дети. анупапа̄денто га̄райхо хоти упаваджджо’’’ти. ‘‘парӯпа̄рамбхам̣ че, упака, ваттети парӯпа̄рамбхам̣ ваттенто на упапа̄дети, анупапа̄денто га̄райхо хоти упаваджджо. твам̣ кхо, упака, парӯпа̄рамбхам̣ ваттеси, парӯпа̄рамбхам̣ ваттенто на упапа̄деси, анупапа̄денто га̄райхо хоси упаваджджо’’ти. ‘‘сеййатха̄пи, бханте, уммуджджама̄накам̣йева махата̄ па̄сена бандхеййа; евамевам̣ кхо ахам̣, бханте, уммуджджама̄накойева бхагавата̄ махата̄ ва̄дапа̄сена [махата̄ па̄сена (ка.)] баддхо’’ти.

‘‘идам̣ акусаланти кхо, упака, майа̄ пан̃н̃аттам̣. таттха апарима̄н̣а̄ пада̄ апарима̄н̣а̄ бйан̃джана̄ апарима̄н̣а̄ татха̄гатасса дхаммадесана̄ – итипидам̣ акусаланти. там̣ кхо панидам̣ акусалам̣ паха̄таббанти кхо, упака, майа̄ пан̃н̃аттам̣. таттха апарима̄н̣а̄ пада̄ апарима̄н̣а̄ бйан̃джана̄ апарима̄н̣а̄ татха̄гатасса дхаммадесана̄ – итипидам̣ акусалам̣ паха̄таббанти.

‘‘идам̣ кусаланти кхо, упака, майа̄ пан̃н̃аттам̣. таттха апарима̄н̣а̄ пада̄ апарима̄н̣а̄ бйан̃джана̄ апарима̄н̣а̄ татха̄гатасса дхаммадесана̄ – итипидам̣ кусаланти. там̣ кхо панидам̣ кусалам̣ бха̄ветаббанти кхо, упака, майа̄ пан̃н̃аттам̣. таттха апарима̄н̣а̄ пада̄ апарима̄н̣а̄ бйан̃джана̄ апарима̄н̣а̄ татха̄гатасса дхаммадесана̄ – итипидам̣ кусалам̣ бха̄ветабба’’нти.

атха кхо упако ман̣д̣ика̄путто бхагавато бха̄ситам̣ абхинандитва̄ анумодитва̄ ут̣т̣ха̄йа̄сана̄ бхагавантам̣ абхива̄детва̄ падаккхин̣ам̣ катва̄ йена ра̄джа̄ ма̄гадхо аджа̄тасатту ведехипутто тенупасан̇ками; упасан̇камитва̄ йа̄ватако ахоси бхагавата̄ саддхим̣ катха̄салла̄по там̣ саббам̣ ран̃н̃о ма̄гадхасса аджа̄тасаттусса ведехипуттасса а̄рочеси.

евам̣ вутте ра̄джа̄ ма̄гадхо аджа̄тасатту ведехипутто купито анаттамано упакам̣ ман̣д̣ика̄путтам̣ етадавоча – ‘‘йа̄ва дхам̣сӣ вата̄йам̣ лон̣ака̄рада̄рако йа̄ва мукхаро йа̄ва пагаббо йатра хи на̄ма там̣ бхагавантам̣ арахантам̣ самма̄самбуддхам̣ а̄са̄детаббам̣ ман̃н̃иссати; апехи твам̣, упака, винасса, ма̄ там̣ аддаса’’нти. ат̣т̣хамам̣.