6. уммаггасуттам̣

186. атха кхо ан̃н̃атаро бхиккху йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо со бхиккху бхагавантам̣ етадавоча – ‘‘кена ну кхо, бханте, локо нӣйати, кена локо парикассати, касса ча уппаннасса васам̣ гаччхатӣ’’ти?

‘‘са̄дху са̄дху, бхиккху! бхаддако кхо те, бхиккху, уммагго [умман̇го (сйа̄. ка.)], бхаддакам̣ пат̣ибха̄нам̣, калйа̄н̣ӣ [калйа̄н̣а̄ (ка.)] парипуччха̄. еван̃хи твам̣, бхиккху, пуччхаси – ‘кена ну кхо, бханте, локо нӣйати, кена локо парикассати, касса ча уппаннасса васам̣ гаччхатӣ’’’ти? ‘‘евам̣, бханте’’. ‘‘читтена кхо, бхиккху, локо нӣйати, читтена парикассати, читтасса уппаннасса васам̣ гаччхатӣ’’ти.

‘‘са̄дху, бханте’’ти кхо со бхиккху бхагавато бха̄ситам̣ абхинандитва̄ анумодитва̄ бхагавантам̣ уттари пан̃хам̣ апуччхи – ‘‘‘бахуссуто дхаммадхаро, бахуссуто дхаммадхаро’ти, бханте, вуччати. китта̄вата̄ ну кхо, бханте, бахуссуто дхаммадхаро хотӣ’’ти?

‘‘са̄дху са̄дху, бхиккху! бхаддако кхо те, бхиккху уммагго, бхаддакам̣ пат̣ибха̄нам̣, калйа̄н̣ӣ парипуччха̄. еван̃хи твам̣, бхиккху, пуччхаси – ‘бахуссуто дхаммадхаро, бахуссуто дхаммадхароти, бханте, вуччати. китта̄вата̄ ну кхо, бханте, бахуссуто дхаммадхаро хотӣ’’’ти? ‘‘евам̣, бханте’’. ‘‘бахӯ кхо, бхиккху, майа̄ дхамма̄ десита̄ [баху кхо бхиккху майа̄ дхаммо десито (ка.)] – суттам̣, геййам̣, веййа̄каран̣ам̣, га̄тха̄, уда̄нам̣, итивуттакам̣, джа̄такам̣, аббхутадхаммам̣, ведаллам̣. чатуппада̄йа чепи, бхиккху, га̄тха̄йа аттхаман̃н̃а̄йа дхаммаман̃н̃а̄йа дхамма̄нудхаммаппат̣ипанно хоти бахуссуто дхаммадхароти алам̣ вачана̄йа̄’’ти.

‘‘са̄дху, бханте’’ти кхо со бхиккху бхагавато бха̄ситам̣ абхинандитва̄ анумодитва̄ бхагавантам̣ уттари пан̃хам̣ апуччхи – ‘‘‘сутава̄ ниббедхикапан̃н̃о, сутава̄ ниббедхикапан̃н̃о’ти, бханте, вуччати. китта̄вата̄ ну кхо, бханте, сутава̄ ниббедхикапан̃н̃о хотӣ’’ти?

‘‘са̄дху са̄дху, бхиккху! бхаддако кхо те, бхиккху, уммагго, бхаддакам̣ пат̣ибха̄нам̣, калйа̄н̣ӣ парипуччха̄. еван̃хи твам̣, бхиккху, пуччхаси – ‘сутава̄ ниббедхикапан̃н̃о, сутава̄ ниббедхикапан̃н̃оти, бханте, вуччати. китта̄вата̄ ну кхо, бханте, сутава̄ ниббедхикапан̃н̃о хотӣ’’’ти? ‘‘евам̣, бханте’’. ‘‘идха, бхиккху, бхиккхуно ‘идам̣ дуккха’нти сутам̣ хоти, пан̃н̃а̄йа часса аттхам̣ ативиджджха пассати; ‘айам̣ дуккхасамудайо’ти сутам̣ хоти, пан̃н̃а̄йа часса аттхам̣ ативиджджха пассати; ‘айам̣ дуккханиродхо’ти сутам̣ хоти, пан̃н̃а̄йа часса аттхам̣ ативиджджха пассати; ‘айам̣ дуккханиродхага̄минӣ пат̣ипада̄’ти сутам̣ хоти, пан̃н̃а̄йа часса аттхам̣ ативиджджха пассати. евам̣ кхо, бхиккху, сутава̄ ниббедхикапан̃н̃о хотӣ’’ти.

‘‘са̄дху, бханте’’ти кхо со бхиккху бхагавато бха̄ситам̣ абхинандитва̄ анумодитва̄ бхагавантам̣ уттари пан̃хам̣ апуччхи – ‘‘‘пан̣д̣ито маха̄пан̃н̃о, пан̣д̣ито маха̄пан̃н̃о’ти, бханте, вуччати. китта̄вата̄ ну кхо, бханте, пан̣д̣ито маха̄пан̃н̃о хотӣ’’ти?

‘‘са̄дху са̄дху бхиккху! бхаддако кхо те, бхиккху, уммагго, бхаддакам̣ пат̣ибха̄нам̣, калйа̄н̣ӣ парипуччха̄. еван̃хи твам̣ бхиккху пуччхаси – ‘пан̣д̣ито маха̄пан̃н̃о, пан̣д̣ито маха̄пан̃н̃оти, бханте, вуччати. китта̄вата̄ ну кхо, бханте, пан̣д̣ито маха̄пан̃н̃о хотӣ’’’ти? ‘‘евам̣, бханте’’. ‘‘идха, бхиккху, пан̣д̣ито маха̄пан̃н̃о неваттабйа̄ба̄дха̄йа четети на парабйа̄ба̄дха̄йа четети на убхайабйа̄ба̄дха̄йа четети аттахитапарахитаубхайахитасаббалокахитамева чинтайама̄но чинтети. евам̣ кхо, бхиккху, пан̣д̣ито маха̄пан̃н̃о хотӣ’’ти. чхат̣т̣хам̣.