4. абхайасуттам̣

184. атха кхо джа̄н̣уссон̣и бра̄хман̣о йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо джа̄н̣уссон̣и бра̄хман̣о бхагавантам̣ етадавоча –

‘‘ахан̃хи, бхо готама, евам̣ва̄дӣ евам̣дит̣т̣хи – ‘наттхи йо маран̣адхаммо сама̄но на бха̄йати, на санта̄сам̣ а̄паджджати маран̣асса̄’’’ти. ‘‘аттхи, бра̄хман̣а, маран̣адхаммо сама̄но бха̄йати, санта̄сам̣ а̄паджджати маран̣асса; аттхи пана, бра̄хман̣а, маран̣адхаммо сама̄но на бха̄йати, на санта̄сам̣ а̄паджджати маран̣асса.

‘‘катамо ча, бра̄хман̣а, маран̣адхаммо сама̄но бха̄йати, санта̄сам̣ а̄паджджати маран̣асса? идха, бра̄хман̣а, екаччо ка̄месу авӣтара̄го хоти авигатаччхандо авигатапемо авигатапипа̄со авигатапарил̣а̄хо авигататан̣хо. таменам̣ ан̃н̃атаро га̄л̣хо рога̄тан̇ко пхусати. тасса ан̃н̃атарена га̄л̣хена рога̄тан̇кена пхут̣т̣хасса евам̣ хоти – ‘пийа̄ вата мам̣ ка̄ма̄ джахиссанти, пийе ча̄хам̣ ка̄ме джахисса̄мӣ’ти. со сочати киламати паридевати, уратта̄л̣им̣ кандати, саммохам̣ а̄паджджати. айам̣ кхо, бра̄хман̣а, маран̣адхаммо сама̄но бха̄йати, санта̄сам̣ а̄паджджати маран̣асса.

‘‘пуна чапарам̣, бра̄хман̣а, идхекаччо ка̄йе авӣтара̄го хоти авигатаччхандо авигатапемо авигатапипа̄со авигатапарил̣а̄хо авигататан̣хо. таменам̣ ан̃н̃атаро га̄л̣хо рога̄тан̇ко пхусати. тасса ан̃н̃атарена га̄л̣хена рога̄тан̇кена пхут̣т̣хасса евам̣ хоти – ‘пийо вата мам̣ ка̄йо джахиссати, пийан̃ча̄хам̣ ка̄йам̣ джахисса̄мӣ’ти. со сочати киламати паридевати, уратта̄л̣им̣ кандати, саммохам̣ а̄паджджати. айампи кхо, бра̄хман̣а, маран̣адхаммо сама̄но бха̄йати, санта̄сам̣ а̄паджджати маран̣асса.

‘‘пуна чапарам̣, бра̄хман̣а, идхекаччо акатакалйа̄н̣о хоти акатакусало акатабхӣрутта̄н̣о катапа̄по каталуддо катакиббисо. таменам̣ ан̃н̃атаро га̄л̣хо рога̄тан̇ко пхусати. тасса ан̃н̃атарена га̄л̣хена рога̄тан̇кена пхут̣т̣хасса евам̣ хоти – ‘акатам̣ вата ме калйа̄н̣ам̣, акатам̣ кусалам̣, акатам̣ бхӣрутта̄н̣ам̣; катам̣ па̄пам̣, катам̣ луддам̣, катам̣ киббисам̣. йа̄вата̄, бхо, акатакалйа̄н̣а̄нам̣ акатакусала̄нам̣ акатабхӣрутта̄н̣а̄нам̣ катапа̄па̄нам̣ каталудда̄нам̣ катакиббиса̄нам̣ гати там̣ гатим̣ печча гаччха̄мӣ’ти. со сочати киламати паридевати, уратта̄л̣им̣ кандати, саммохам̣ а̄паджджати. айампи кхо, бра̄хман̣а, маран̣адхаммо сама̄но бха̄йати, санта̄сам̣ а̄паджджати маран̣асса.

‘‘пуна чапарам̣, бра̄хман̣а, идхекаччо кан̇кхӣ хоти вичикиччхӣ анит̣т̣хан̇гато саддхамме. таменам̣ ан̃н̃атаро га̄л̣хо рога̄тан̇ко пхусати. тасса ан̃н̃атарена га̄л̣хена рога̄тан̇кена пхут̣т̣хасса евам̣ хоти – ‘кан̇кхӣ ватамхи вичикиччхӣ анит̣т̣хан̇гато саддхамме’ти. со сочати киламати паридевати, уратта̄л̣им̣ кандати, саммохам̣ а̄паджджати. айампи кхо, бра̄хман̣а, маран̣адхаммо сама̄но бха̄йати, санта̄сам̣ а̄паджджати маран̣асса. име кхо, бра̄хман̣а, чатта̄ро маран̣адхамма̄ сама̄на̄ бха̄йанти, санта̄сам̣ а̄паджджанти маран̣асса.

‘‘катамо ча, бра̄хман̣а, маран̣адхаммо сама̄но на бха̄йати, на санта̄сам̣ а̄паджджати маран̣асса? идха, бра̄хман̣а, екаччо ка̄месу вӣтара̄го хоти вигатаччхандо вигатапемо вигатапипа̄со вигатапарил̣а̄хо вигататан̣хо. таменам̣ ан̃н̃атаро га̄л̣хо рога̄тан̇ко пхусати. тасса ан̃н̃атарена га̄л̣хена рога̄тан̇кена пхут̣т̣хасса на евам̣ хоти – ‘пийа̄ вата мам̣ ка̄ма̄ джахиссанти, пийе ча̄хам̣ ка̄ме джахисса̄мӣ’ти. со на сочати на киламати на паридевати, на уратта̄л̣им̣ кандати, на саммохам̣ а̄паджджати. айам̣ кхо, бра̄хман̣а, маран̣адхаммо сама̄но на бха̄йати, на санта̄сам̣ а̄паджджати маран̣асса.

‘‘пуна чапарам̣, бра̄хман̣а, идхекаччо ка̄йе вӣтара̄го хоти вигатаччхандо вигатапемо вигатапипа̄со вигатапарил̣а̄хо вигататан̣хо. таменам̣ ан̃н̃атаро га̄л̣хо рога̄тан̇ко пхусати. тасса ан̃н̃атарена га̄л̣хена рога̄тан̇кена пхут̣т̣хасса на евам̣ хоти – ‘пийо вата мам̣ ка̄йо джахиссати, пийан̃ча̄хам̣ ка̄йам̣ джахисса̄мӣ’ти. со на сочати на киламати на паридевати, на уратта̄л̣им̣ кандати, на саммохам̣ а̄паджджати. айампи кхо, бра̄хман̣а, маран̣адхаммо сама̄но на бха̄йати, на санта̄сам̣ а̄паджджати маран̣асса.

‘‘пуна чапарам̣, бра̄хман̣а, идхекаччо акатапа̄по хоти акаталуддо акатакиббисо катакалйа̄н̣о катакусало катабхӣрутта̄н̣о. таменам̣ ан̃н̃атаро га̄л̣хо рога̄тан̇ко пхусати. тасса ан̃н̃атарена га̄л̣хена рога̄тан̇кена пхут̣т̣хасса евам̣ хоти – ‘акатам̣ вата ме па̄пам̣, акатам̣ луддам̣, акатам̣ киббисам̣; катам̣ калйа̄н̣ам̣, катам̣ кусалам̣, катам̣ бхӣрутта̄н̣ам̣. йа̄вата̄, бхо, акатапа̄па̄нам̣ акаталудда̄нам̣ акатакиббиса̄нам̣ катакалйа̄н̣а̄нам̣ катакусала̄нам̣ катабхӣрутта̄н̣а̄нам̣ гати там̣ гатим̣ печча гаччха̄мӣ’ти. со на сочати на киламати на паридевати, на уратта̄л̣им̣ кандати, на саммохам̣ а̄паджджати. айампи кхо, бра̄хман̣а, маран̣адхаммо сама̄но на бха̄йати, на санта̄сам̣ а̄паджджати маран̣асса.

‘‘пуна чапарам̣, бра̄хман̣а, идхекаччо акан̇кхӣ хоти авичикиччхӣ нит̣т̣хан̇гато саддхамме. таменам̣ ан̃н̃атаро га̄л̣хо рога̄тан̇ко пхусати. тасса ан̃н̃атарена га̄л̣хена рога̄тан̇кена пхут̣т̣хасса евам̣ хоти – ‘акан̇кхӣ ватамхи авичикиччхӣ нит̣т̣хан̇гато саддхамме’ти. со на сочати на киламати на паридевати, на уратта̄л̣им̣ кандати, на саммохам̣ а̄паджджати. айампи кхо, бра̄хман̣а, маран̣адхаммо сама̄но на бха̄йати, на санта̄сам̣ а̄паджджати маран̣асса. име кхо, бра̄хман̣а, чатта̄ро маран̣адхамма̄ сама̄на̄ на бха̄йанти, на санта̄сам̣ а̄паджджанти маран̣асса̄’’ти.

‘‘абхиккантам̣, бхо готама, абхиккантам̣, бхо готама…пе… упа̄сакам̣ мам̣ бхавам̣ готамо дха̄рету аджджатагге па̄н̣упетам̣ саран̣ам̣ гата’’нти. чатуттхам̣.