3. сутасуттам̣

183. екам̣ самайам̣ бхагава̄ ра̄джагахе вихарати вел̣уване каландаканива̄пе. атха кхо вассака̄ро бра̄хман̣о магадхамаха̄матто йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо вассака̄ро бра̄хман̣о магадхамаха̄матто бхагавантам̣ етадавоча –

‘‘ахан̃хи, бхо готама, евам̣ва̄дӣ евам̣дит̣т̣хи [евам̣дит̣т̣хӣ (саббаттха)] – ‘йо кочи дит̣т̣хам̣ бха̄сати – евам̣ ме дит̣т̣ханти, наттхи тато досо; йо кочи сутам̣ бха̄сати – евам̣ ме сутанти, наттхи тато досо; йо кочи мутам̣ бха̄сати – евам̣ ме мутанти, наттхи тато досо; йо кочи вин̃н̃а̄там̣ бха̄сати – евам̣ ме вин̃н̃а̄танти, наттхи тато досо’’’ти.

‘‘на̄хам̣, бра̄хман̣а, саббам̣ дит̣т̣хам̣ бха̄ситаббанти вада̄ми; на пана̄хам̣, бра̄хман̣а, саббам̣ дит̣т̣хам̣ на бха̄ситаббанти вада̄ми; на̄хам̣, бра̄хман̣а, саббам̣ сутам̣ бха̄ситаббанти вада̄ми; на пана̄хам̣, бра̄хман̣а, саббам̣ сутам̣ на бха̄ситаббанти вада̄ми; на̄хам̣, бра̄хман̣а, саббам̣ мутам̣ бха̄ситаббанти вада̄ми; на пана̄хам̣, бра̄хман̣а, саббам̣ мутам̣ на бха̄ситаббанти вада̄ми; на̄хам̣, бра̄хман̣а, саббам̣ вин̃н̃а̄там̣ бха̄ситаббанти вада̄ми; на пана̄хам̣, бра̄хман̣а, саббам̣ вин̃н̃а̄там̣ на бха̄ситаббанти вада̄ми.

‘‘йан̃хи, бра̄хман̣а, дит̣т̣хам̣ бха̄сато акусала̄ дхамма̄ абхивад̣д̣ханти, кусала̄ дхамма̄ париха̄йанти, еварӯпам̣ дит̣т̣хам̣ на бха̄ситаббанти вада̄ми. йан̃ча кхвасса, бра̄хман̣а, дит̣т̣хам̣ абха̄сато кусала̄ дхамма̄ париха̄йанти, акусала̄ дхамма̄ абхивад̣д̣ханти, еварӯпам̣ дит̣т̣хам̣ бха̄ситаббанти вада̄ми.

‘‘йан̃хи, бра̄хман̣а, сутам̣ бха̄сато акусала̄ дхамма̄ абхивад̣д̣ханти, кусала̄ дхамма̄ париха̄йанти, еварӯпам̣ сутам̣ на бха̄ситаббанти вада̄ми. йан̃ча кхвасса, бра̄хман̣а, сутам̣ абха̄сато кусала̄ дхамма̄ париха̄йанти, акусала̄ дхамма̄ абхивад̣д̣ханти, еварӯпам̣ сутам̣ бха̄ситаббанти вада̄ми.

‘‘йан̃хи, бра̄хман̣а, мутам̣ бха̄сато акусала̄ дхамма̄ абхивад̣д̣ханти, кусала̄ дхамма̄ париха̄йанти, еварӯпам̣ мутам̣ на бха̄ситаббанти вада̄ми. йан̃ча кхвасса, бра̄хман̣а, мутам̣ абха̄сато кусала̄ дхамма̄ париха̄йанти, акусала̄ дхамма̄ абхивад̣д̣ханти, еварӯпам̣ мутам̣ бха̄ситаббанти вада̄ми.

‘‘йан̃хи, бра̄хман̣а, вин̃н̃а̄там̣ бха̄сато акусала̄ дхамма̄ абхивад̣д̣ханти, кусала̄ дхамма̄ париха̄йанти, еварӯпам̣ вин̃н̃а̄там̣ на бха̄ситаббанти вада̄ми. йан̃ча кхвасса, бра̄хман̣а, вин̃н̃а̄там̣ абха̄сато кусала̄ дхамма̄ париха̄йанти, акусала̄ дхамма̄ абхивад̣д̣ханти, еварӯпам̣ вин̃н̃а̄там̣ бха̄ситаббанти вада̄мӣ’’ти.

атха кхо вассака̄ро бра̄хман̣о магадхамаха̄матто бхагавато бха̄ситам̣ абхинандитва̄ анумодитва̄ ут̣т̣ха̄йа̄сана̄ пакка̄мӣти. татийам̣.