10. упосатхасуттам̣

190. екам̣ самайам̣ бхагава̄ са̄ваттхийам̣ вихарати пубба̄ра̄ме мига̄рама̄тупа̄са̄де. тена кхо пана самайена бхагава̄ тадахупосатхе бхиккхусан̇гхапаривуто нисинно хоти. атха кхо бхагава̄ тун̣хӣбхӯтам̣ тун̣хӣбхӯтам̣ бхиккхусан̇гхам̣ анувилокетва̄ бхиккхӯ а̄мантеси –

‘‘апала̄па̄йам̣, бхиккхаве, париса̄ ниппала̄па̄йам̣, бхиккхаве, париса̄ суддха̄ са̄ре патит̣т̣хита̄. татха̄рӯпо айам̣, бхиккхаве, бхиккхусан̇гхо, татха̄рӯпа̄йам̣, бхиккхаве, париса̄. йатха̄рӯпа̄ париса̄ дуллабха̄ дассана̄йапи локасмим̣, татха̄рӯпо айам̣, бхиккхаве, бхиккхусан̇гхо, татха̄рӯпа̄йам̣, бхиккхаве, париса̄. йатха̄рӯпа̄ париса̄ а̄хунеййа̄ па̄хунеййа̄ даккхин̣еййа̄ ан̃джаликаран̣ӣйа̄ ануттарам̣ пун̃н̃аккхеттам̣ локасса, татха̄рӯпо айам̣, бхиккхаве, бхиккхусан̇гхо, татха̄рӯпа̄йам̣, бхиккхаве, париса̄. йатха̄рӯпа̄йа париса̄йа аппам̣ диннам̣ баху хоти баху диннам̣ бахутарам̣, татха̄рӯпо айам̣, бхиккхаве, бхиккхусан̇гхо, татха̄рӯпа̄йам̣, бхиккхаве, париса̄. йатха̄рӯпам̣ парисам̣ алам̣ йоджанаган̣ана̄нипи дассана̄йа гантум̣ апи пут̣осена̄пи, татха̄рӯпо айам̣, бхиккхаве, бхиккхусан̇гхо, (татха̄рӯпа̄йам̣, бхиккхаве, париса̄) [( ) сӣ. сйа̄. кам̣. пӣ. поттхакесу наттхи].

‘‘санти, бхиккхаве, бхиккхӯ имасмим̣ бхиккхусан̇гхе деваппатта̄ вихаранти; санти, бхиккхаве, бхиккхӯ имасмим̣ бхиккхусан̇гхе брахмаппатта̄ вихаранти; санти, бхиккхаве, бхиккхӯ имасмим̣ бхиккхусан̇гхе а̄нен̃джаппатта̄ вихаранти; санти, бхиккхаве, бхиккхӯ имасмим̣ бхиккхусан̇гхе арийаппатта̄ вихаранти.

‘‘катхан̃ча, бхиккхаве, бхиккху деваппатто хоти? идха, бхиккхаве, бхиккху вивиччева ка̄мехи…пе… пат̣хамам̣ джха̄нам̣ упасампаджджа вихарати; витаккавича̄ра̄нам̣ вӯпасама̄…пе… дутийам̣ джха̄нам̣…пе… татийам̣ джха̄нам̣…пе… чатуттхам̣ джха̄нам̣ упасампаджджа вихарати. евам̣ кхо, бхиккхаве, бхиккху деваппатто хоти.

‘‘катхан̃ча, бхиккхаве, бхиккху брахмаппатто хоти? идха, бхиккхаве, бхиккху метта̄сахагатена четаса̄ екам̣ дисам̣ пхаритва̄ вихарати, татха̄ дутийам̣ татха̄ татийам̣ татха̄ чатуттхам̣. ити уддхамадхо тирийам̣ саббадхи саббаттата̄йа сабба̄вантам̣ локам̣ метта̄сахагатена четаса̄ випулена махаггатена аппама̄н̣ена аверена абйа̄паджджена пхаритва̄ вихарати. карун̣а̄… мудита̄… упеккха̄сахагатена четаса̄ екам̣ дисам̣ пхаритва̄ вихарати, татха̄ дутийам̣ татха̄ татийам̣ татха̄ чатуттхам̣. ити уддхамадхо тирийам̣ саббадхи саббаттата̄йа сабба̄вантам̣ локам̣ упеккха̄сахагатена четаса̄ випулена махаггатена аппама̄н̣ена аверена абйа̄паджджена пхаритва̄ вихарати. евам̣ кхо, бхиккхаве, бхиккху брахмаппатто хоти.

‘‘катхан̃ча, бхиккхаве, бхиккху а̄нен̃джаппатто хоти? идха, бхиккхаве, бхиккху саббасо рӯпасан̃н̃а̄нам̣ саматиккама̄ пат̣игхасан̃н̃а̄нам̣ аттхан̇гама̄ на̄наттасан̃н̃а̄нам̣ аманасика̄ра̄ ‘ананто а̄ка̄со’ти а̄ка̄са̄нан̃ча̄йатанам̣ упасампаджджа вихарати. саббасо а̄ка̄са̄нан̃ча̄йатанам̣ саматиккамма ‘анантам̣ вин̃н̃а̄н̣а’нти вин̃н̃а̄н̣ан̃ча̄йатанам̣ упасампаджджа вихарати. саббасо вин̃н̃а̄н̣ан̃ча̄йатанам̣ саматиккамма ‘наттхи кин̃чӣ’ти а̄кин̃чан̃н̃а̄йатанам̣ упасампаджджа вихарати. саббасо а̄кин̃чан̃н̃а̄йатанам̣ саматиккамма невасан̃н̃а̄на̄сан̃н̃а̄йатанам̣ упасампаджджа вихарати. евам̣ кхо, бхиккхаве, бхиккху а̄нен̃джаппатто хоти.

‘‘катхан̃ча, бхиккхаве, бхиккху арийаппатто хоти? идха, бхиккхаве, бхиккху ‘идам̣ дуккха’нти йатха̄бхӯтам̣ паджа̄на̄ти…пе… ‘айам̣ дуккханиродхага̄минӣ пат̣ипада̄’ти йатха̄бхӯтам̣ паджа̄на̄ти. евам̣ кхо, бхиккхаве, бхиккху арийаппатто хотӣ’’ти. дасамам̣.

бра̄хман̣авагго [йодха̄джӣвавагго (сӣ. сйа̄. кам̣. пӣ.)] чатуттхо.