10. поталийасуттам̣

100. атха кхо поталийо парибба̄джако йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисиннам̣ кхо поталийам̣ парибба̄джакам̣ бхагава̄ етадавоча –

‘‘чатта̄роме, поталийа, пуггала̄ санто сам̣виджджама̄на̄ локасмим̣. катаме чатта̄ро? идха, поталийа, екаччо пуггало [пу. па. 165] аван̣н̣а̄рахасса аван̣н̣ам̣ бха̄сита̄ хоти бхӯтам̣ таччхам̣ ка̄лена, но ча кхо ван̣н̣а̄рахасса ван̣н̣ам̣ бха̄сита̄ хоти бхӯтам̣ таччхам̣ ка̄лена. идха пана, поталийа, екаччо пуггало ван̣н̣а̄рахасса ван̣н̣ам̣ бха̄сита̄ хоти бхӯтам̣ таччхам̣ ка̄лена, но ча кхо аван̣н̣а̄рахасса аван̣н̣ам̣ бха̄сита̄ хоти бхӯтам̣ таччхам̣ ка̄лена. идха пана, поталийа, екаччо пуггало нева аван̣н̣а̄рахасса аван̣н̣ам̣ бха̄сита̄ хоти бхӯтам̣ таччхам̣ ка̄лена, но ча ван̣н̣а̄рахасса ван̣н̣ам̣ бха̄сита̄ хоти бхӯтам̣ таччхам̣ ка̄лена. идха пана, поталийа, екаччо пуггало аван̣н̣а̄рахасса ча аван̣н̣ам̣ бха̄сита̄ хоти бхӯтам̣ таччхам̣ ка̄лена, ван̣н̣а̄рахасса ча ван̣н̣ам̣ бха̄сита̄ хоти бхӯтам̣ таччхам̣ ка̄лена. име кхо, поталийа, чатта̄ро пуггала̄ санто сам̣виджджама̄на̄ локасмим̣. имесам̣ кхо, поталийа, чатуннам̣ пуггала̄нам̣ катамо те пуггало кхамати абхиккантатаро ча пан̣ӣтатаро ча̄’’ти?

‘‘чатта̄роме, бхо готама, пуггала̄ санто сам̣виджджама̄на̄ локасмим̣. катаме чатта̄ро? идха, бхо готама, екаччо пуггало аван̣н̣а̄рахасса аван̣н̣ам̣ бха̄сита̄ хоти бхӯтам̣ таччхам̣ ка̄лена, но ча кхо ван̣н̣а̄рахасса ван̣н̣ам̣ бха̄сита̄ хоти бхӯтам̣ таччхам̣ ка̄лена. идха пана, бхо готама, екаччо пуггало ван̣н̣а̄рахасса ван̣н̣ам̣ бха̄сита̄ хоти бхӯтам̣ таччхам̣ ка̄лена, но ча кхо аван̣н̣а̄рахасса аван̣н̣ам̣ бха̄сита̄ хоти бхӯтам̣ таччхам̣ ка̄лена. идха пана, бхо готама, екаччо пуггало нева аван̣н̣а̄рахасса аван̣н̣ам̣ бха̄сита̄ хоти бхӯтам̣ таччхам̣ ка̄лена, но ча ван̣н̣а̄рахасса ван̣н̣ам̣ бха̄сита̄ хоти бхӯтам̣ таччхам̣ ка̄лена. идха пана, бхо готама, екаччо пуггало аван̣н̣а̄рахасса ча аван̣н̣ам̣ бха̄сита̄ хоти бхӯтам̣ таччхам̣ ка̄лена, ван̣н̣а̄рахасса ча ван̣н̣ам̣ бха̄сита̄ хоти бхӯтам̣ таччхам̣ ка̄лена. име кхо, бхо готама, чатта̄ро пуггала̄ санто сам̣виджджама̄на̄ локасмим̣. имесам̣, бхо готама, чатуннам̣ пуггала̄нам̣ йва̄йам̣ пуггало нева аван̣н̣а̄рахасса аван̣н̣ам̣ бха̄сита̄ хоти бхӯтам̣ таччхам̣ ка̄лена, но ча ван̣н̣а̄рахасса ван̣н̣ам̣ бха̄сита̄ хоти бхӯтам̣ таччхам̣ ка̄лена; айам̣ ме пуггало кхамати имесам̣ чатуннам̣ пуггала̄нам̣ абхиккантатаро ча пан̣ӣтатаро ча. там̣ кисса хету? абхикканта̄ [абхиккантатара̄ (ка.)] хеса̄, бхо готама, йадидам̣ упеккха̄’’ти.

‘‘чатта̄роме, поталийа, пуггала̄ санто сам̣виджджама̄на̄ локасмим̣. катаме чатта̄ро…пе… име кхо, поталийа, чатта̄ро пуггала̄ санто сам̣виджджама̄на̄ локасмим̣. имесам̣ кхо, поталийа, чатуннам̣ пуггала̄нам̣ йва̄йам̣ пуггало аван̣н̣а̄рахасса ча аван̣н̣ам̣ бха̄сита̄ хоти бхӯтам̣ таччхам̣ ка̄лена, ван̣н̣а̄рахасса ча ван̣н̣ам̣ бха̄сита̄ хоти бхӯтам̣ таччхам̣ ка̄лена; айам̣ имесам̣ чатуннам̣ пуггала̄нам̣ абхиккантатаро ча пан̣ӣтатаро ча. там̣ кисса хету? абхикканта̄ хеса̄, поталийа, йадидам̣ таттха таттха ка̄лан̃н̃ута̄’’ти.

‘‘чатта̄роме, бхо готама, пуггала̄ санто сам̣виджджама̄на̄ локасмим̣. катаме чатта̄ро…пе… име кхо, бхо готама, чатта̄ро пуггала̄ санто сам̣виджджама̄на̄ локасмим̣. имесам̣, бхо готама, чатуннам̣ пуггала̄нам̣ йва̄йам̣ пуггало аван̣н̣а̄рахасса ча аван̣н̣ам̣ бха̄сита̄ бхӯтам̣ таччхам̣ ка̄лена, ван̣н̣а̄рахасса ча ван̣н̣ам̣ бха̄сита̄ бхӯтам̣ таччхам̣ ка̄лена; айам̣ ме пуггало кхамати имесам̣ чатуннам̣ пуггала̄нам̣ абхиккантатаро ча пан̣ӣтатаро ча. там̣ кисса хету? абхикканта̄ хеса̄, бхо готама, йадидам̣ таттха таттха ка̄лан̃н̃ута̄.

‘‘абхиккантам̣, бхо готама, абхиккантам̣, бхо готама! сеййатха̄пи, бхо готама, никкуджджитам̣ ва̄ уккуджджеййа, пат̣иччханнам̣ ва̄ вивареййа, мӯл̣хасса ва̄ маггам̣ а̄чиккхеййа, андхака̄ре ва̄ телападжджотам̣ дха̄реййа – чаккхуманто рӯпа̄ни даккхантӣти, евамевам̣ бхота̄ готамена анекапарийа̄йена дхаммо пака̄сито. еса̄хам̣ бхавантам̣ готамам̣ саран̣ам̣ гаччха̄ми дхамман̃ча бхиккхусан̇гхан̃ча. упа̄сакам̣ мам̣ бхавам̣ готамо дха̄рету аджджатагге па̄н̣упетам̣ саран̣ам̣ гата’’нти. дасамам̣.

асуравагго пан̃чамо.