(10) 5. асуравагго

1. асурасуттам̣

91. ‘‘чатта̄роме, бхиккхаве, пуггала̄ санто сам̣виджджама̄на̄ локасмим̣. катаме чатта̄ро? асуро асурапарива̄ро, асуро девапарива̄ро, дево асурапарива̄ро, дево девапарива̄ро.

‘‘катхан̃ча, бхиккхаве, пуггало асуро хоти асурапарива̄ро? идха, бхиккхаве, екаччо пуггало дуссӣло хоти па̄падхаммо, париса̄писса хоти дуссӣла̄ па̄падхамма̄. евам̣ кхо, бхиккхаве, пуггало асуро хоти асурапарива̄ро.

‘‘катхан̃ча, бхиккхаве, пуггало асуро хоти девапарива̄ро? идха, бхиккхаве, екаччо пуггало дуссӣло хоти па̄падхаммо, париса̄ ча кхвасса хоти сӣлаватӣ калйа̄н̣адхамма̄. евам̣ кхо, бхиккхаве, пуггало асуро хоти девапарива̄ро.

‘‘катхан̃ча, бхиккхаве, пуггало дево хоти асурапарива̄ро? идха, бхиккхаве, екаччо пуггало сӣлава̄ хоти калйа̄н̣адхаммо, париса̄ ча кхвасса хоти дуссӣла̄ па̄падхамма̄. евам̣ кхо, бхиккхаве, пуггало дево хоти асурапарива̄ро.

‘‘катхан̃ча, бхиккхаве, пуггало дево хоти девапарива̄ро? идха, бхиккхаве, екаччо пуггало сӣлава̄ хоти калйа̄н̣адхаммо, париса̄писса хоти сӣлаватӣ калйа̄н̣адхамма̄. евам̣ кхо, бхиккхаве, пуггало дево хоти, девапарива̄ро. име кхо, бхиккхаве, чатта̄ро пуггала̄ санто сам̣виджджама̄на̄ локасми’’нти. пат̣хамам̣.

2. пат̣хамасама̄дхисуттам̣

92. ‘‘чатта̄роме, бхиккхаве, пуггала̄ санто сам̣виджджама̄на̄ локасмим̣. катаме чатта̄ро? идха, бхиккхаве, екаччо пуггало ла̄бхӣ хоти аджджхаттам̣ четосаматхасса, на ла̄бхӣ адхипан̃н̃а̄дхаммавипассана̄йа. идха пана, бхиккхаве, екаччо пуггало ла̄бхӣ хоти адхипан̃н̃а̄дхаммавипассана̄йа, на ла̄бхӣ аджджхаттам̣ четосаматхасса. идха пана, бхиккхаве, екаччо пуггало на чева ла̄бхӣ хоти аджджхаттам̣ четосаматхасса на ча ла̄бхӣ адхипан̃н̃а̄дхаммавипассана̄йа. идха пана, бхиккхаве, екаччо пуггало ла̄бхӣ чева хоти аджджхаттам̣ четосаматхасса ла̄бхӣ ча адхипан̃н̃а̄дхаммавипассана̄йа. име кхо, бхиккхаве, чатта̄ро пуггала̄ санто сам̣виджджама̄на̄ локасми’’нти. дутийам̣.

3. дутийасама̄дхисуттам̣

93. ‘‘чатта̄роме, бхиккхаве, пуггала̄ санто сам̣виджджама̄на̄ локасмим̣. катаме чатта̄ро? идха, бхиккхаве, екаччо пуггало ла̄бхӣ хоти аджджхаттам̣ четосаматхасса, на ла̄бхӣ адхипан̃н̃а̄дхаммавипассана̄йа. идха пана, бхиккхаве, екаччо пуггало ла̄бхӣ хоти адхипан̃н̃а̄дхаммавипассана̄йа, на ла̄бхӣ аджджхаттам̣ четосаматхасса. идха пана, бхиккхаве, екаччо пуггало на чева ла̄бхӣ хоти аджджхаттам̣ четосаматхасса на ча ла̄бхӣ адхипан̃н̃а̄дхаммавипассана̄йа. идха пана, бхиккхаве, екаччо пуггало ла̄бхӣ чева хоти аджджхаттам̣ четосаматхасса ла̄бхӣ ча адхипан̃н̃а̄дхаммавипассана̄йа.

‘‘татра, бхиккхаве, йва̄йам̣ пуггало ла̄бхӣ хоти аджджхаттам̣ четосаматхасса на ла̄бхӣ адхипан̃н̃а̄дхаммавипассана̄йа, тена, бхиккхаве, пуггалена аджджхаттам̣ четосаматхе патит̣т̣ха̄йа адхипан̃н̃а̄дхаммавипассана̄йа його каран̣ӣйо. со апарена самайена ла̄бхӣ чева хоти аджджхаттам̣ четосаматхасса ла̄бхӣ ча адхипан̃н̃а̄дхаммавипассана̄йа.

‘‘татра, бхиккхаве, йва̄йам̣ пуггало ла̄бхӣ адхипан̃н̃а̄дхаммавипассана̄йа на ла̄бхӣ аджджхаттам̣ четосаматхасса, тена, бхиккхаве, пуггалена адхипан̃н̃а̄дхаммавипассана̄йа патит̣т̣ха̄йа аджджхаттам̣ четосаматхе його каран̣ӣйо. со апарена самайена ла̄бхӣ чева хоти адхипан̃н̃а̄дхаммавипассана̄йа ла̄бхӣ ча аджджхаттам̣ четосаматхасса.

‘‘татра, бхиккхаве, йва̄йам̣ пуггало на чева ла̄бхӣ аджджхаттам̣ четосаматхасса на ча ла̄бхӣ адхипан̃н̃а̄дхаммавипассана̄йа, тена, бхиккхаве, пуггалена тесам̣йева кусала̄нам̣ дхамма̄нам̣ пат̣ила̄бха̄йа адхиматто чхандо ча ва̄йа̄мо ча усса̄хо ча уссол̣хӣ ча аппат̣ива̄нӣ ча сати ча сампаджан̃н̃ан̃ча каран̣ӣйам̣. сеййатха̄пи, бхиккхаве, а̄диттачело ва̄ а̄диттасӣсо ва̄ тассева [тасса тассева (сӣ. сйа̄. кам̣.)] челасса ва̄ сӣсасса ва̄ нибба̄пана̄йа адхиматтам̣ чхандан̃ча ва̄йа̄ман̃ча усса̄хан̃ча уссол̣хин̃ча аппат̣ива̄нин̃ча сатин̃ча сампаджан̃н̃ан̃ча кареййа; евамевам̣ кхо, бхиккхаве, тена пуггалена тесам̣йева кусала̄нам̣ дхамма̄нам̣ пат̣ила̄бха̄йа адхиматто чхандо ча ва̄йа̄мо ча усса̄хо ча уссол̣хӣ ча аппат̣ива̄нӣ ча сати ча сампаджан̃н̃ан̃ча каран̣ӣйам̣. со апарена самайена ла̄бхӣ чева хоти аджджхаттам̣ четосаматхасса ла̄бхӣ ча адхипан̃н̃а̄дхаммавипассана̄йа.

‘‘татра, бхиккхаве, йва̄йам̣ пуггало ла̄бхӣ чева хоти аджджхаттам̣ четосаматхасса ла̄бхӣ ча адхипан̃н̃а̄дхаммавипассана̄йа, тена, бхиккхаве, пуггалена тесуйева кусалесу дхаммесу патит̣т̣ха̄йа уттари [уттарим̣ (сӣ. сйа̄. кам̣. пӣ.)] а̄сава̄нам̣ кхайа̄йа його каран̣ӣйо. име кхо, бхиккхаве, чатта̄ро пуггала̄ санто сам̣виджджама̄на̄ локасми’’нти. татийам̣.

4. татийасама̄дхисуттам̣

94. ‘‘чатта̄роме, бхиккхаве, пуггала̄ санто сам̣виджджама̄на̄ локасмим̣. катаме чатта̄ро? идха, бхиккхаве, екаччо пуггало ла̄бхӣ хоти аджджхаттам̣ четосаматхасса, на ла̄бхӣ адхипан̃н̃а̄дхаммавипассана̄йа. идха пана, бхиккхаве, екаччо пуггало ла̄бхӣ хоти адхипан̃н̃а̄дхаммавипассана̄йа, на ла̄бхӣ аджджхаттам̣ четосаматхасса. идха пана, бхиккхаве, екаччо пуггало на чева ла̄бхӣ хоти аджджхаттам̣ четосаматхасса на ча ла̄бхӣ адхипан̃н̃а̄дхаммавипассана̄йа. идха пана, бхиккхаве, екаччо пуггало ла̄бхӣ чева хоти аджджхаттам̣ четосаматхасса ла̄бхӣ ча адхипан̃н̃а̄дхаммавипассана̄йа.

‘‘татра, бхиккхаве, йва̄йам̣ пуггало ла̄бхӣ аджджхаттам̣ четосаматхасса на ла̄бхӣ адхипан̃н̃а̄дхаммавипассана̄йа, тена, бхиккхаве, пуггалена йва̄йам̣ пуггало ла̄бхӣ адхипан̃н̃а̄дхаммавипассана̄йа со упасан̇камитва̄ евамасса вачанӣйо – ‘катхам̣ ну кхо, а̄вусо, сан̇кха̄ра̄ дат̣т̣хабба̄? катхам̣ сан̇кха̄ра̄ саммаситабба̄? катхам̣ сан̇кха̄ра̄ випасситабба̄’ [пасситабба̄ (ка.)] ти? тасса со йатха̄дит̣т̣хам̣ йатха̄видитам̣ бйа̄кароти – ‘евам̣ кхо, а̄вусо, сан̇кха̄ра̄ дат̣т̣хабба̄, евам̣ сан̇кха̄ра̄ саммаситабба̄, евам̣ сан̇кха̄ра̄ випасситабба̄’ти. со апарена самайена ла̄бхӣ чева хоти аджджхаттам̣ четосаматхасса ла̄бхӣ ча адхипан̃н̃а̄дхаммавипассана̄йа.

‘‘татра, бхиккхаве, йва̄йам̣ пуггало ла̄бхӣ адхипан̃н̃а̄дхаммавипассана̄йа на ла̄бхӣ аджджхаттам̣ четосаматхасса, тена, бхиккхаве, пуггалена йва̄йам̣ пуггало ла̄бхӣ аджджхаттам̣ четосаматхасса со упасан̇камитва̄ евамасса вачанӣйо – ‘катхам̣ ну кхо, а̄вусо, читтам̣ сан̣т̣хапетаббам̣? катхам̣ читтам̣ санниса̄детаббам̣? катхам̣ читтам̣ екоди ка̄таббам̣? катхам̣ читтам̣ сама̄даха̄табба’нти? тасса со йатха̄дит̣т̣хам̣ йатха̄видитам̣ бйа̄кароти – ‘евам̣ кхо, а̄вусо, читтам̣ сан̣т̣хапетаббам̣, евам̣ читтам̣ санниса̄детаббам̣, евам̣ читтам̣ екоди ка̄таббам̣ [екоди каттаббам̣ (пӣ.)], евам̣ читтам̣ сама̄даха̄табба’нти. со апарена самайе ла̄бхӣ чева хоти адхипан̃н̃а̄дхаммавипассана̄йа ла̄бхӣ ча аджджхаттам̣ четосаматхасса.

‘‘татра, бхиккхаве, йва̄йам̣ пуггало на чева ла̄бхӣ аджджхаттам̣ четосаматхасса на ча ла̄бхӣ адхипан̃н̃а̄дхаммавипассана̄йа, тена, бхиккхаве, пуггалена йва̄йам̣ пуггало ла̄бхӣ чева аджджхаттам̣ четосаматхасса ла̄бхӣ ча адхипан̃н̃а̄дхаммавипассана̄йа со упасан̇камитва̄ евамасса вачанӣйо – ‘катхам̣ ну кхо, а̄вусо, читтам̣ сан̣т̣хапетаббам̣? катхам̣ читтам̣ санниса̄детаббам̣? катхам̣ читтам̣ екоди ка̄таббам̣? катхам̣ читтам̣ сама̄даха̄таббам̣? катхам̣ сан̇кха̄ра̄ дат̣т̣хабба̄? катхам̣ сан̇кха̄ра̄ саммаситабба̄? катхам̣ сан̇кха̄ра̄ випасситабба̄’ти? тасса со йатха̄дит̣т̣хам̣ йатха̄видитам̣ бйа̄кароти – ‘евам̣ кхо, а̄вусо, читтам̣ сан̣т̣хапетаббам̣, евам̣ читтам̣ санниса̄детаббам̣, евам̣ читтам̣ екоди ка̄таббам̣, евам̣ читтам̣ сама̄даха̄таббам̣, евам̣ сан̇кха̄ра̄ дат̣т̣хабба̄, евам̣ сан̇кха̄ра̄ саммаситабба̄, евам̣ сан̇кха̄ра̄ випасситабба̄’ти. со апарена самайена ла̄бхӣ чева хоти аджджхаттам̣ четосаматхасса ла̄бхӣ ча адхипан̃н̃а̄дхаммавипассана̄йа.

‘‘татра, бхиккхаве, йва̄йам̣ пуггало ла̄бхӣ чева хоти аджджхаттам̣ четосаматхасса ла̄бхӣ адхипан̃н̃а̄дхаммавипассана̄йа, тена, бхиккхаве, пуггалена тесу чева кусалесу дхаммесу патит̣т̣ха̄йа уттари а̄сава̄нам̣ кхайа̄йа його каран̣ӣйо. име кхо, бхиккхаве, чатта̄ро пуггала̄ санто сам̣виджджама̄на̄ локасми’’нти. чатуттхам̣.

5. чхава̄ла̄тасуттам̣

95. ‘‘чатта̄роме, бхиккхаве, пуггала̄ санто сам̣виджджама̄на̄ локасмим̣. катаме чатта̄ро? неваттахита̄йа пат̣ипанно но парахита̄йа, парахита̄йа пат̣ипанно но аттахита̄йа, аттахита̄йа пат̣ипанно но парахита̄йа, аттахита̄йа чева [аттахита̄йа ча (сӣ. сйа̄. кам̣. пӣ.)] пат̣ипанно парахита̄йа ча.

‘‘сеййатха̄пи, бхиккхаве, чхава̄ла̄там̣ убхато падиттам̣ [а̄диттам̣ (ка.)], маджджхе гӯтхагатам̣, нева га̄ме кат̣т̣хаттхам̣ пхарати на аран̃н̃е ( ) [(кат̣т̣хаттхам̣ пхарати) каттхачи]; татхӯпама̄хам̣, бхиккхаве, имам̣ пуггалам̣ вада̄ми йва̄йам̣ пуггало неваттахита̄йа пат̣ипанно но парахита̄йа.

‘‘татра, бхиккхаве, йва̄йам̣ пуггало парахита̄йа пат̣ипанно но аттахита̄йа, айам̣ имесам̣ двиннам̣ пуггала̄нам̣ абхиккантатаро ча пан̣ӣтатаро ча. татра, бхиккхаве, йва̄йам̣ пуггало аттахита̄йа пат̣ипанно но парахита̄йа, айам̣ имесам̣ тин̣н̣ам̣ пуггала̄нам̣ абхиккантатаро ча пан̣ӣтатаро ча. татра, бхиккхаве, йва̄йам̣ пуггало аттахита̄йа чева пат̣ипанно парахита̄йа ча, айам̣ имесам̣ чатуннам̣ пуггала̄нам̣ агго ча сет̣т̣хо ча па̄моккхо [моккхо (пӣ.) сам̣. ни. 3.662-663; а. ни. 5.181] ча уттамо ча паваро ча.

‘‘сеййатха̄пи, бхиккхаве, гава̄ кхӣрам̣, кхӣрамха̄ дадхи, дадхимха̄ наванӣтам̣, наванӣтамха̄ саппи, саппимха̄ саппиман̣д̣о, саппиман̣д̣о [саппимха̄ саппиман̣д̣о (ка.)] таттха [татра (сам̣. ни. 3.662-662)] аггамаккха̄йати; евамевам̣ кхо, бхиккхаве, йва̄йам̣ пуггало аттахита̄йа чева пат̣ипанно парахита̄йа ча, айам̣ имесам̣ чатуннам̣ пуггала̄нам̣ агго ча сет̣т̣хо ча па̄моккхо ча уттамо ча паваро ча. име кхо, бхиккхаве, чатта̄ро пуггала̄ санто сам̣виджджама̄на̄ локасми’’нти. пан̃чамам̣.

6. ра̄гавинайасуттам̣

96. ‘‘чатта̄роме, бхиккхаве, пуггала̄ санто сам̣виджджама̄на̄ локасмим̣. катаме чатта̄ро? аттахита̄йа пат̣ипанно но парахита̄йа, парахита̄йа пат̣ипанно но аттахита̄йа, неваттахита̄йа пат̣ипанно но парахита̄йа, аттахита̄йа чева пат̣ипанно парахита̄йа ча.

‘‘катхан̃ча, бхиккхаве, пуггало аттахита̄йа пат̣ипанно хоти но парахита̄йа? идха, бхиккхаве, екаччо пуггало аттана̄ ра̄гавинайа̄йа пат̣ипанно хоти, но парам̣ ра̄гавинайа̄йа сама̄дапети; аттана̄ досавинайа̄йа пат̣ипанно хоти, но парам̣ досавинайа̄йа сама̄дапети; аттана̄ мохавинайа̄йа пат̣ипанно хоти, но парам̣ мохавинайа̄йа сама̄дапети. евам̣ кхо, бхиккхаве, пуггало аттахита̄йа пат̣ипанно хоти, но парахита̄йа.

‘‘катхан̃ча, бхиккхаве, пуггало парахита̄йа пат̣ипанно хоти, но аттахита̄йа? идха, бхиккхаве, екаччо пуггало аттана̄ на ра̄гавинайа̄йа пат̣ипанно хоти, парам̣ ра̄гавинайа̄йа сама̄дапети; аттана̄ на досавинайа̄йа пат̣ипанно хоти, парам̣ досавинайа̄йа сама̄дапети; аттана̄ на мохавинайа̄йа пат̣ипанно хоти, парам̣ мохавинайа̄йа сама̄дапети. евам̣ кхо, бхиккхаве, пуггало парахита̄йа пат̣ипанно хоти, но аттахита̄йа.

‘‘катхан̃ча, бхиккхаве, пуггало неваттахита̄йа пат̣ипанно хоти, но парахита̄йа? идха, бхиккхаве, екаччо пуггало аттана̄ на ра̄гавинайа̄йа пат̣ипанно хоти, но парам̣ ра̄гавинайа̄йа сама̄дапети; аттана̄ на досавинайа̄йа пат̣ипанно хоти, но парам̣ досавинайа̄йа сама̄дапети; аттана̄ на мохавинайа̄йа пат̣ипанно хоти, но парам̣ мохавинайа̄йа сама̄дапети. евам̣ кхо, бхиккхаве, пуггало неваттахита̄йа пат̣ипанно хоти, но парахита̄йа.

‘‘катхан̃ча, бхиккхаве, пуггало аттахита̄йа чева пат̣ипанно хоти парахита̄йа ча? идха, бхиккхаве, екаччо пуггало аттана̄ ча ра̄гавинайа̄йа пат̣ипанно хоти, паран̃ча ра̄гавинайа̄йа сама̄дапети; аттана̄ ча досавинайа̄йа пат̣ипанно хоти, паран̃ча досавинайа̄йа сама̄дапети; аттана̄ ча мохавинайа̄йа пат̣ипанно хоти, паран̃ча мохавинайа̄йа сама̄дапети. евам̣ кхо, бхиккхаве, пуггало аттахита̄йа чева пат̣ипанно хоти парахита̄йа ча. име кхо, бхиккхаве, чатта̄ро пуггала̄ санто сам̣виджджама̄на̄ локасми’’нти. чхат̣т̣хам̣.

7. кхиппанисантисуттам̣

97. ‘‘чатта̄роме, бхиккхаве, пуггала̄ санто сам̣виджджама̄на̄ локасмим̣. катаме чатта̄ро? аттахита̄йа пат̣ипанно но парахита̄йа, парахита̄йа пат̣ипанно но аттахита̄йа, неваттахита̄йа пат̣ипанно но парахита̄йа, аттахита̄йа чева пат̣ипанно парахита̄йа ча.

‘‘катхан̃ча, бхиккхаве, пуггало аттахита̄йа пат̣ипанно хоти, но парахита̄йа? идха, бхиккхаве, екаччо пуггало кхиппанисантӣ ча хоти кусалесу дхаммесу, сута̄нан̃ча дхамма̄нам̣ дха̄ракаджа̄тико [дха̄ран̣аджа̄тико (ка.)] хоти, дха̄та̄нан̃ча [дхата̄нан̃ча (сӣ. сйа̄. кам̣. пӣ.)] дхамма̄нам̣ аттхӯпапариккхӣ хоти аттхаман̃н̃а̄йа дхаммаман̃н̃а̄йа, дхамма̄нудхаммаппат̣ипанно хоти; но ча калйа̄н̣ава̄чо хоти калйа̄н̣ава̄ккаран̣о порийа̄ ва̄ча̄йа саманна̄гато виссат̣т̣ха̄йа анелагала̄йа аттхасса вин̃н̃а̄панийа̄, но ча сандассако хоти сама̄дапако [сама̄да̄пако (?)] самуттеджако сампахам̣сако сабрахмача̄рӣнам̣. евам̣ кхо, бхиккхаве, пуггало аттахита̄йа пат̣ипанно хоти, но парахита̄йа.

‘‘катхан̃ча, бхиккхаве, пуггало парахита̄йа пат̣ипанно хоти, но аттахита̄йа? идха, бхиккхаве, екаччо пуггало на хева кхо кхиппанисантӣ хоти кусалесу дхаммесу, но ча сута̄нам̣ дхамма̄нам̣ дха̄ракаджа̄тико хоти, но ча дха̄та̄нам̣ дхамма̄нам̣ аттхӯпапариккхӣ хоти, но ча аттхаман̃н̃а̄йа дхаммаман̃н̃а̄йа дхамма̄нудхаммаппат̣ипанно хоти; калйа̄н̣ава̄чо ча хоти калйа̄н̣ава̄ккаран̣о порийа̄ ва̄ча̄йа саманна̄гато виссат̣т̣ха̄йа анелагала̄йа аттхасса вин̃н̃а̄панийа̄, сандассако ча хоти сама̄дапако самуттеджако сампахам̣сако сабрахмача̄рӣнам̣. евам̣ кхо, бхиккхаве, пуггало парахита̄йа пат̣ипанно хоти, но аттахита̄йа.

‘‘катхан̃ча, бхиккхаве, пуггало неваттахита̄йа пат̣ипанно хоти, но парахита̄йа? идха, бхиккхаве, екаччо пуггало на хева кхо кхиппанисантӣ хоти кусалесу дхаммесу, но ча сута̄нам̣ дхамма̄нам̣ дха̄ракаджа̄тико хоти, но ча дха̄та̄нам̣ дхамма̄нам̣ аттхӯпапариккхӣ хоти, но ча аттхаман̃н̃а̄йа дхаммаман̃н̃а̄йа дхамма̄нудхаммаппат̣ипанно хоти; но ча калйа̄н̣ава̄чо хоти калйа̄н̣ава̄ккаран̣о порийа̄ ва̄ча̄йа саманна̄гато виссат̣т̣ха̄йа анелагала̄йа аттхасса вин̃н̃а̄панийа̄, но ча сандассако хоти сама̄дапако самуттеджако сампахам̣сако сабрахмача̄рӣнам̣. евам̣ кхо, бхиккхаве, пуггало неваттахита̄йа пат̣ипанно хоти, но парахита̄йа.

‘‘катхан̃ча, бхиккхаве, пуггало аттахита̄йа чева пат̣ипанно хоти парахита̄йа ча? идха, бхиккхаве, екаччо пуггало кхиппанисантӣ ча хоти кусалесу дхаммесу, сута̄нан̃ча дхамма̄нам̣ дха̄ракаджа̄тико хоти, дха̄та̄нан̃ча дхамма̄нам̣ аттхӯпапариккхӣ хоти аттхаман̃н̃а̄йа дхаммаман̃н̃а̄йа, дхамма̄нудхаммаппат̣ипанно хоти; калйа̄н̣ава̄чо ча хоти калйа̄н̣ава̄ккаран̣о порийа̄ ва̄ча̄йа саманна̄гато виссат̣т̣ха̄йа анелагала̄йа аттхасса вин̃н̃а̄панийа̄, сандассако ча хоти сама̄дапако самуттеджако сампахам̣сако сабрахмача̄рӣнам̣. евам̣ кхо, бхиккхаве, пуггало аттахита̄йа чева пат̣ипанно хоти парахита̄йа ча. име кхо, бхиккхаве, чатта̄ро пуггала̄ санто сам̣виджджама̄на̄ локасми’’нти. саттамам̣.

8. аттахитасуттам̣

98. ‘‘чатта̄роме, бхиккхаве, пуггала̄ санто сам̣виджджама̄на̄ локасмим̣. катаме чатта̄ро? аттахита̄йа пат̣ипанно но парахита̄йа, парахита̄йа пат̣ипанно но аттахита̄йа, неваттахита̄йа пат̣ипанно но парахита̄йа, аттахита̄йа чева пат̣ипанно парахита̄йа ча. име кхо, бхиккхаве, чатта̄ро пуггала̄ санто сам̣виджджама̄на̄ локасми’’нти. ат̣т̣хамам̣.

9. сиккха̄падасуттам̣

99. ‘‘чатта̄роме, бхиккхаве, пуггала̄ санто сам̣виджджама̄на̄ локасмим̣. катаме чатта̄ро? аттахита̄йа пат̣ипанно но парахита̄йа, парахита̄йа пат̣ипанно но аттахита̄йа, неваттахита̄йа пат̣ипанно но парахита̄йа, аттахита̄йа чева пат̣ипанно парахита̄йа ча.

‘‘катхан̃ча, бхиккхаве, пуггало аттахита̄йа пат̣ипанно хоти, но парахита̄йа? идха, бхиккхаве, екаччо пуггало аттана̄ па̄н̣а̄типа̄та̄ пат̣ивирато хоти, но парам̣ па̄н̣а̄типа̄та̄ вераман̣ийа̄ сама̄дапети; аттана̄ адинна̄да̄на̄ пат̣ивирато хоти, но парам̣ адинна̄да̄на̄ вераман̣ийа̄ сама̄дапети; аттана̄ ка̄месумиччха̄ча̄ра̄ пат̣ивирато хоти, но парам̣ ка̄месумиччха̄ча̄ра̄ вераман̣ийа̄ сама̄дапети; аттана̄ муса̄ва̄да̄ пат̣ивирато хоти, но парам̣ муса̄ва̄да̄ вераман̣ийа̄ сама̄дапети; аттана̄ сура̄мерайамаджджапама̄дат̣т̣ха̄на̄ пат̣ивирато хоти, но парам̣ сура̄мерайамаджджапама̄дат̣т̣ха̄на̄ вераман̣ийа̄ сама̄дапети. евам̣ кхо, бхиккхаве, пуггало аттахита̄йа пат̣ипанно хоти, но парахита̄йа.

‘‘катхан̃ча, бхиккхаве, пуггало парахита̄йа пат̣ипанно хоти, но аттахита̄йа? идха, бхиккхаве, екаччо пуггало аттана̄ па̄н̣а̄типа̄та̄ аппат̣ивирато хоти, парам̣ па̄н̣а̄типа̄та̄ вераман̣ийа̄ сама̄дапети; аттана̄ адинна̄да̄на̄ аппат̣ивирато хоти, парам̣ адинна̄да̄на̄ вераман̣ийа̄ сама̄дапети; аттана̄ ка̄месумиччха̄ча̄ра̄ аппат̣ивирато хоти, парам̣ ка̄месумиччха̄ча̄ра̄ вераман̣ийа̄ сама̄дапети; аттана̄ муса̄ва̄да̄ аппат̣ивирато хоти, парам̣ муса̄ва̄да̄ вераман̣ийа̄ сама̄дапети; аттана̄ сура̄мерайамаджджапама̄дат̣т̣ха̄на̄ аппат̣ивирато хоти, парам̣ сура̄мерайамаджджапама̄дат̣т̣ха̄на̄ вераман̣ийа̄ сама̄дапети. евам̣ кхо, бхиккхаве, пуггало парахита̄йа пат̣ипанно хоти, но аттахита̄йа.

‘‘катхан̃ча, бхиккхаве, пуггало неваттахита̄йа пат̣ипанно хоти но парахита̄йа? идха, бхиккхаве, екаччо пуггало аттана̄ па̄н̣а̄типа̄та̄ аппат̣ивирато хоти, но парам̣ па̄н̣а̄типа̄та̄ вераман̣ийа̄ сама̄дапети…пе… аттана̄ сура̄мерайамаджджапама̄дат̣т̣ха̄на̄ аппат̣ивирато хоти, но парам̣ сура̄мерайамаджджапама̄дат̣т̣ха̄на̄ вераман̣ийа̄ сама̄дапети. евам̣ кхо, бхиккхаве, пуггало неваттахита̄йа пат̣ипанно хоти, но парахита̄йа.

‘‘катхан̃ча, бхиккхаве, пуггало аттахита̄йа чева пат̣ипанно хоти парахита̄йа ча? идха, бхиккхаве, екаччо пуггало аттана̄ ча па̄н̣а̄типа̄та̄ пат̣ивирато хоти, паран̃ча па̄н̣а̄типа̄та̄ вераман̣ийа̄ сама̄дапети…пе… аттана̄ ча сура̄мерайамаджджапама̄дат̣т̣ха̄на̄ пат̣ивирато хоти, паран̃ча сура̄мерайамаджджапама̄дат̣т̣ха̄на̄ вераман̣ийа̄ сама̄дапети. евам̣ кхо, бхиккхаве, пуггало аттахита̄йа чева пат̣ипанно хоти парахита̄йа ча. име кхо, бхиккхаве, чатта̄ро пуггала̄ санто сам̣виджджама̄на̄ локасми’’нти. навамам̣.

10. поталийасуттам̣

100. атха кхо поталийо парибба̄джако йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисиннам̣ кхо поталийам̣ парибба̄джакам̣ бхагава̄ етадавоча –

‘‘чатта̄роме, поталийа, пуггала̄ санто сам̣виджджама̄на̄ локасмим̣. катаме чатта̄ро? идха, поталийа, екаччо пуггало [пу. па. 165] аван̣н̣а̄рахасса аван̣н̣ам̣ бха̄сита̄ хоти бхӯтам̣ таччхам̣ ка̄лена, но ча кхо ван̣н̣а̄рахасса ван̣н̣ам̣ бха̄сита̄ хоти бхӯтам̣ таччхам̣ ка̄лена. идха пана, поталийа, екаччо пуггало ван̣н̣а̄рахасса ван̣н̣ам̣ бха̄сита̄ хоти бхӯтам̣ таччхам̣ ка̄лена, но ча кхо аван̣н̣а̄рахасса аван̣н̣ам̣ бха̄сита̄ хоти бхӯтам̣ таччхам̣ ка̄лена. идха пана, поталийа, екаччо пуггало нева аван̣н̣а̄рахасса аван̣н̣ам̣ бха̄сита̄ хоти бхӯтам̣ таччхам̣ ка̄лена, но ча ван̣н̣а̄рахасса ван̣н̣ам̣ бха̄сита̄ хоти бхӯтам̣ таччхам̣ ка̄лена. идха пана, поталийа, екаччо пуггало аван̣н̣а̄рахасса ча аван̣н̣ам̣ бха̄сита̄ хоти бхӯтам̣ таччхам̣ ка̄лена, ван̣н̣а̄рахасса ча ван̣н̣ам̣ бха̄сита̄ хоти бхӯтам̣ таччхам̣ ка̄лена. име кхо, поталийа, чатта̄ро пуггала̄ санто сам̣виджджама̄на̄ локасмим̣. имесам̣ кхо, поталийа, чатуннам̣ пуггала̄нам̣ катамо те пуггало кхамати абхиккантатаро ча пан̣ӣтатаро ча̄’’ти?

‘‘чатта̄роме, бхо готама, пуггала̄ санто сам̣виджджама̄на̄ локасмим̣. катаме чатта̄ро? идха, бхо готама, екаччо пуггало аван̣н̣а̄рахасса аван̣н̣ам̣ бха̄сита̄ хоти бхӯтам̣ таччхам̣ ка̄лена, но ча кхо ван̣н̣а̄рахасса ван̣н̣ам̣ бха̄сита̄ хоти бхӯтам̣ таччхам̣ ка̄лена. идха пана, бхо готама, екаччо пуггало ван̣н̣а̄рахасса ван̣н̣ам̣ бха̄сита̄ хоти бхӯтам̣ таччхам̣ ка̄лена, но ча кхо аван̣н̣а̄рахасса аван̣н̣ам̣ бха̄сита̄ хоти бхӯтам̣ таччхам̣ ка̄лена. идха пана, бхо готама, екаччо пуггало нева аван̣н̣а̄рахасса аван̣н̣ам̣ бха̄сита̄ хоти бхӯтам̣ таччхам̣ ка̄лена, но ча ван̣н̣а̄рахасса ван̣н̣ам̣ бха̄сита̄ хоти бхӯтам̣ таччхам̣ ка̄лена. идха пана, бхо готама, екаччо пуггало аван̣н̣а̄рахасса ча аван̣н̣ам̣ бха̄сита̄ хоти бхӯтам̣ таччхам̣ ка̄лена, ван̣н̣а̄рахасса ча ван̣н̣ам̣ бха̄сита̄ хоти бхӯтам̣ таччхам̣ ка̄лена. име кхо, бхо готама, чатта̄ро пуггала̄ санто сам̣виджджама̄на̄ локасмим̣. имесам̣, бхо готама, чатуннам̣ пуггала̄нам̣ йва̄йам̣ пуггало нева аван̣н̣а̄рахасса аван̣н̣ам̣ бха̄сита̄ хоти бхӯтам̣ таччхам̣ ка̄лена, но ча ван̣н̣а̄рахасса ван̣н̣ам̣ бха̄сита̄ хоти бхӯтам̣ таччхам̣ ка̄лена; айам̣ ме пуггало кхамати имесам̣ чатуннам̣ пуггала̄нам̣ абхиккантатаро ча пан̣ӣтатаро ча. там̣ кисса хету? абхикканта̄ [абхиккантатара̄ (ка.)] хеса̄, бхо готама, йадидам̣ упеккха̄’’ти.

‘‘чатта̄роме, поталийа, пуггала̄ санто сам̣виджджама̄на̄ локасмим̣. катаме чатта̄ро…пе… име кхо, поталийа, чатта̄ро пуггала̄ санто сам̣виджджама̄на̄ локасмим̣. имесам̣ кхо, поталийа, чатуннам̣ пуггала̄нам̣ йва̄йам̣ пуггало аван̣н̣а̄рахасса ча аван̣н̣ам̣ бха̄сита̄ хоти бхӯтам̣ таччхам̣ ка̄лена, ван̣н̣а̄рахасса ча ван̣н̣ам̣ бха̄сита̄ хоти бхӯтам̣ таччхам̣ ка̄лена; айам̣ имесам̣ чатуннам̣ пуггала̄нам̣ абхиккантатаро ча пан̣ӣтатаро ча. там̣ кисса хету? абхикканта̄ хеса̄, поталийа, йадидам̣ таттха таттха ка̄лан̃н̃ута̄’’ти.

‘‘чатта̄роме, бхо готама, пуггала̄ санто сам̣виджджама̄на̄ локасмим̣. катаме чатта̄ро…пе… име кхо, бхо готама, чатта̄ро пуггала̄ санто сам̣виджджама̄на̄ локасмим̣. имесам̣, бхо готама, чатуннам̣ пуггала̄нам̣ йва̄йам̣ пуггало аван̣н̣а̄рахасса ча аван̣н̣ам̣ бха̄сита̄ бхӯтам̣ таччхам̣ ка̄лена, ван̣н̣а̄рахасса ча ван̣н̣ам̣ бха̄сита̄ бхӯтам̣ таччхам̣ ка̄лена; айам̣ ме пуггало кхамати имесам̣ чатуннам̣ пуггала̄нам̣ абхиккантатаро ча пан̣ӣтатаро ча. там̣ кисса хету? абхикканта̄ хеса̄, бхо готама, йадидам̣ таттха таттха ка̄лан̃н̃ута̄.

‘‘абхиккантам̣, бхо готама, абхиккантам̣, бхо готама! сеййатха̄пи, бхо готама, никкуджджитам̣ ва̄ уккуджджеййа, пат̣иччханнам̣ ва̄ вивареййа, мӯл̣хасса ва̄ маггам̣ а̄чиккхеййа, андхака̄ре ва̄ телападжджотам̣ дха̄реййа – чаккхуманто рӯпа̄ни даккхантӣти, евамевам̣ бхота̄ готамена анекапарийа̄йена дхаммо пака̄сито. еса̄хам̣ бхавантам̣ готамам̣ саран̣ам̣ гаччха̄ми дхамман̃ча бхиккхусан̇гхан̃ча. упа̄сакам̣ мам̣ бхавам̣ готамо дха̄рету аджджатагге па̄н̣упетам̣ саран̣ам̣ гата’’нти. дасамам̣.

асуравагго пан̃чамо.