10. упаккилесасуттам̣

50. ‘‘чатта̄роме, бхиккхаве [чӯл̣ава. 447], чандимасӯрийа̄нам̣ упаккилеса̄, йехи упаккилесехи упаккилит̣т̣ха̄ чандимасӯрийа̄ на тапанти на бха̄санти на вирочанти. катаме чатта̄ро? аббха̄, бхиккхаве, чандимасӯрийа̄нам̣ упаккилеса̄, йена упаккилесена упаккилит̣т̣ха̄ чандимасӯрийа̄ на тапанти на бха̄санти на вирочанти.

‘‘махика̄, бхиккхаве, чандимасӯрийа̄нам̣ упаккилеса̄, йена упаккилесена упаккилит̣т̣ха̄ чандимасӯрийа̄ на тапанти на бха̄санти на вирочанти.

‘‘дхӯмо раджо, бхиккхаве, чандимасӯрийа̄нам̣ упаккилесо, йена упаккилесена упаккилит̣т̣ха̄ чандимасӯрийа̄ на тапанти на бха̄санти на вирочанти.

‘‘ра̄ху, бхиккхаве, асуриндо чандимасӯрийа̄нам̣ упаккилесо, йена упаккилесена упаккилит̣т̣ха̄ чандимасӯрийа̄ на тапанти на бха̄санти на вирочанти. име кхо, бхиккхаве, чатта̄ро чандимасӯрийа̄нам̣ упаккилеса̄, йехи упаккилесехи упаккилит̣т̣ха̄ чандимасӯрийа̄ на тапанти на бха̄санти на вирочанти.

‘‘евамевам̣ кхо, бхиккхаве, чатта̄роме саман̣абра̄хман̣а̄нам̣ упаккилеса̄, йехи упаккилесехи упаккилит̣т̣ха̄ еке саман̣абра̄хман̣а̄ на тапанти на бха̄санти на вирочанти. катаме чатта̄ро? санти, бхиккхаве, еке саман̣абра̄хман̣а̄ сурам̣ пиванти мерайам̣, сура̄мерайапа̄на̄ аппат̣ивирата̄. айам̣, бхиккхаве, пат̣хамо саман̣абра̄хман̣а̄нам̣ упаккилесо, йена упаккилесена упаккилит̣т̣ха̄ еке саман̣абра̄хман̣а̄ на тапанти на бха̄санти на вирочанти.

‘‘санти, бхиккхаве, еке саман̣абра̄хман̣а̄ метхунам̣ дхаммам̣ пат̣исеванти, метхунасма̄ дхамма̄ аппат̣ивирата̄. айам̣, бхиккхаве, дутийо саман̣абра̄хман̣а̄нам̣ упаккилесо, йена упаккилесена упаккилит̣т̣ха̄ еке саман̣абра̄хман̣а̄ на тапанти на бха̄санти на вирочанти.

‘‘санти, бхиккхаве, еке саман̣абра̄хман̣а̄ джа̄тарӯпараджатам̣ са̄дийанти, джа̄тарӯпараджатапат̣иггахан̣а̄ аппат̣ивирата̄. айам̣, бхиккхаве, татийо саман̣абра̄хман̣а̄нам̣ упаккилесо, йена упаккилесена упаккилит̣т̣ха̄ еке саман̣абра̄хман̣а̄ на тапанти на бха̄санти на вирочанти.

‘‘санти, бхиккхаве, еке саман̣абра̄хман̣а̄ миччха̄джӣвена джӣванти, миччха̄джӣва̄ аппат̣ивирата̄. айам̣, бхиккхаве, чатуттхо саман̣абра̄хман̣а̄нам̣ упаккилесо, йена упаккилесена упаккилит̣т̣ха̄ еке саман̣абра̄хман̣а̄ на тапанти на бха̄санти на вирочанти. име кхо, бхиккхаве, чатта̄ро саман̣абра̄хман̣а̄нам̣ упаккилеса̄, йехи упаккилесехи упаккилит̣т̣ха̄ еке саман̣абра̄хман̣а̄ на тапанти на бха̄санти на вирочантӣ’’ти.

‘‘ра̄гадосапариккит̣т̣ха̄, еке саман̣абра̄хман̣а̄;

авиджджа̄нивута̄ поса̄, пийарӯпа̄бхинандино.

‘‘сурам̣ пиванти мерайам̣, пат̣исеванти метхунам̣;

раджатам̣ джа̄тарӯпан̃ча, са̄дийанти авиддасӯ;

миччха̄джӣвена джӣванти, еке саман̣абра̄хман̣а̄.

‘‘ете упаккилеса̄ вутта̄, буддхена̄диччабандхуна̄;

йехи упаккилесехи [упаккилит̣т̣ха̄ (сӣ. пӣ.)], еке саман̣абра̄хман̣а̄;

на тапанти на бха̄санти, асуддха̄ сараджа̄ мага̄.

‘‘андхака̄рена онаддха̄, тан̣ха̄да̄са̄ санеттика̄;

вад̣д̣хенти кат̣асим̣ гхорам̣, а̄дийанти пунаббхава’’нти. дасамам̣;

рохитассавагго пан̃чамо.