10. уда̄йӣсуттам̣

40. атха кхо уда̄йӣ [уда̄йи (саббаттха)] бра̄хман̣о йена бхагава̄ тенупасан̇ками; упасан̇камитва̄ бхагавата̄ …пе… екамантам̣ нисинно кхо уда̄йӣ бра̄хман̣о бхагавантам̣ етадавоча – ‘‘бхавампи но готамо йан̃н̃ам̣ ван̣н̣етӣ’’ти? ‘‘на кхо ахам̣, бра̄хман̣а, саббам̣ йан̃н̃ам̣ ван̣н̣еми; на пана̄хам̣, бра̄хман̣а, саббам̣ йан̃н̃ам̣ на ван̣н̣еми. йатха̄рӯпе кхо, бра̄хман̣а, йан̃н̃е га̄во хан̃н̃анти, аджел̣ака̄ хан̃н̃анти, куккут̣асӯкара̄ хан̃н̃анти, вивидха̄ па̄н̣а̄ сан̇гха̄там̣ а̄паджджанти; еварӯпам̣ кхо ахам̣, бра̄хман̣а, са̄рамбхам̣ йан̃н̃ам̣ на ван̣н̣еми. там̣ кисса хету? еварӯпан̃хи, бра̄хман̣а, са̄рамбхам̣ йан̃н̃ам̣ на упасан̇каманти араханто ва̄ арахаттамаггам̣ ва̄ сама̄панна̄.

‘‘йатха̄рӯпе ча кхо, бра̄хман̣а, йан̃н̃е нева га̄во хан̃н̃анти, на аджел̣ака̄ хан̃н̃анти, на куккут̣асӯкара̄ хан̃н̃анти, на вивидха̄ па̄н̣а̄ сан̇гха̄там̣ а̄паджджанти; еварӯпам̣ кхо ахам̣, бра̄хман̣а, нира̄рамбхам̣ йан̃н̃ам̣ ван̣н̣еми, йадидам̣ ниччада̄нам̣ анукулайан̃н̃ам̣. там̣ кисса хету? еварӯпан̃хи, бра̄хман̣а, нира̄рамбхам̣ йан̃н̃ам̣ упасан̇каманти араханто ва̄ арахаттамаггам̣ ва̄ сама̄панна̄’’ти.

‘‘абхисан̇кхатам̣ нира̄рамбхам̣, йан̃н̃ам̣ ка̄лена каппийам̣;

та̄дисам̣ упасам̣йанти, сан̃н̃ата̄ брахмача̄райо.

‘‘виват̣аччхада̄ [виваттаччхада̄ (сӣ. пӣ.), виват̣т̣аччхада̄ (ка.)] йе локе, вӣтиватта̄ кулам̣ гатим̣;

йан̃н̃аметам̣ пасам̣санти, буддха̄ йан̃н̃асса [пун̃н̃асса (сйа̄. кам̣. пӣ.)] ковида̄.

‘‘йан̃н̃е ва̄ йади ва̄ саддхе, хабйам̣ [хавйам̣ (сӣ. пӣ.), хун̃н̃ам̣ (сйа̄. кам̣.)] катва̄ йатха̄рахам̣;

пасанначитто йаджати [пасанначитта̄ йаджанти (ка.)], сукхетте брахмача̄рису.

‘‘сухутам̣ суйит̣т̣хам̣ суппаттам̣ [сампаттам̣ (сйа̄. кам̣. ка.)], даккхин̣еййесу йам̣ катам̣;

йан̃н̃о ча випуло хоти, пасӣданти ча девата̄.

‘‘евам̣ [етам̣ (ка.) а. ни. 6.37] йаджитва̄ медха̄вӣ, саддхо муттена четаса̄;

абйа̄баджджхам̣ сукхам̣ локам̣, пан̣д̣ито упападжджатӣ’’ти. дасамам̣;

чаккавагго чатуттхо.