9. дхаммападасуттам̣

29. ‘‘чатта̄рима̄ни, бхиккхаве, дхаммапада̄ни агган̃н̃а̄ни раттан̃н̃а̄ни вам̣сан̃н̃а̄ни пора̄н̣а̄ни асам̣кин̣н̣а̄ни асам̣кин̣н̣апубба̄ни, на сам̣кӣйанти на сам̣кӣйиссанти, аппат̣икут̣т̣ха̄ни саман̣ехи бра̄хман̣ехи вин̃н̃ӯхи. катама̄ни чатта̄ри? анабхиджджха̄, бхиккхаве, дхаммападам̣ агган̃н̃ам̣ раттан̃н̃ам̣ вам̣сан̃н̃ам̣ пора̄н̣ам̣ асам̣кин̣н̣ам̣ асам̣кин̣н̣апуббам̣, на сам̣кӣйати на сам̣кӣйиссати, аппат̣икут̣т̣хам̣ саман̣ехи бра̄хман̣ехи вин̃н̃ӯхи.

‘‘абйа̄па̄до, бхиккхаве, дхаммападам̣ агган̃н̃ам̣ раттан̃н̃ам̣ вам̣сан̃н̃ам̣ пора̄н̣ам̣ асам̣кин̣н̣ам̣ асам̣кин̣н̣апуббам̣, на сам̣кӣйати на сам̣кӣйиссати, аппат̣икут̣т̣хам̣ саман̣ехи бра̄хман̣ехи вин̃н̃ӯхи.

‘‘самма̄сати, бхиккхаве, дхаммападам̣ агган̃н̃ам̣ раттан̃н̃ам̣ вам̣сан̃н̃ам̣ пора̄н̣ам̣ асам̣кин̣н̣ам̣ асам̣кин̣н̣апуббам̣, на сам̣кӣйати на сам̣кӣйиссати, аппат̣икут̣т̣хам̣ саман̣ехи бра̄хман̣ехи вин̃н̃ӯхи.

‘‘самма̄сама̄дхи, бхиккхаве, дхаммападам̣ агган̃н̃ам̣ раттан̃н̃ам̣ вам̣сан̃н̃ам̣ пора̄н̣ам̣ асам̣кин̣н̣ам̣ асам̣кин̣н̣апуббам̣, на сам̣кӣйати на сам̣кӣйиссати, аппат̣икут̣т̣хам̣ саман̣ехи бра̄хман̣ехи вин̃н̃ӯхи. има̄ни кхо, бхиккхаве, чатта̄ри дхаммапада̄ни агган̃н̃а̄ни раттан̃н̃а̄ни вам̣сан̃н̃а̄ни пора̄н̣а̄ни асам̣кин̣н̣а̄ни асам̣кин̣н̣апубба̄ни, на сам̣кӣйанти на сам̣кӣйиссанти, аппат̣икут̣т̣ха̄ни саман̣ехи бра̄хман̣ехи вин̃н̃ӯхӣ’’ти.

‘‘анабхиджджха̄лу вихареййа, абйа̄паннена четаса̄;

сато екаггачиттасса [екаггачитта̄йам̣ (ка.)], аджджхаттам̣ сусама̄хито’’ти. навамам̣;