10. парибба̄джакасуттам̣

30. екам̣ самайам̣ бхагава̄ ра̄джагахе вихарати гиджджхакӯт̣е паббате. тена кхо пана самайена самбахула̄ абхин̃н̃а̄та̄ абхин̃н̃а̄та̄ парибба̄джака̄ сиппиника̄тӣре [саппинийа̄ тӣре (сӣ. пӣ.), сиппинийа̄ тӣре (сйа̄. кам̣.), сиппинийа̄ надийа̄ тӣре (ка.)] парибба̄джака̄ра̄ме пат̣ивасанти, сеййатхидам̣ аннабха̄ро варадхаро сакулуда̄йӣ ча парибба̄джако ан̃н̃е ча абхин̃н̃а̄та̄ абхин̃н̃а̄та̄ парибба̄джака̄. атха кхо бхагава̄ са̄йанхасамайам̣ пат̣исалла̄на̄ вут̣т̣хито йена сиппиника̄тӣрам̣ парибба̄джака̄ра̄мо тенупасан̇ками; упасан̇камитва̄ пан̃н̃атте а̄сане нисӣди. нисаджджа кхо бхагава̄ те парибба̄джаке етадавоча –

‘‘чатта̄рима̄ни, парибба̄джака̄, дхаммапада̄ни агган̃н̃а̄ни раттан̃н̃а̄ни вам̣сан̃н̃а̄ни пора̄н̣а̄ни асам̣кин̣н̣а̄ни асам̣кин̣н̣апубба̄ни, на сам̣кӣйанти на сам̣кӣйиссанти, аппат̣икут̣т̣ха̄ни саман̣ехи бра̄хман̣ехи вин̃н̃ӯхи. катама̄ни чатта̄ри? анабхиджджха̄, парибба̄джака̄, дхаммападам̣ агган̃н̃ам̣ раттан̃н̃ам̣ вам̣сан̃н̃ам̣ пора̄н̣ам̣ асам̣кин̣н̣ам̣ асам̣кин̣н̣апуббам̣, на сам̣кӣйати на сам̣кӣйиссати, аппат̣икут̣т̣хам̣ саман̣ехи бра̄хман̣ехи вин̃н̃ӯхи. абйа̄па̄до, парибба̄джака̄, дхаммападам̣…пе… самма̄сати, парибба̄джака̄, дхаммападам̣…пе… самма̄сама̄дхи, парибба̄джака̄, дхаммападам̣ агган̃н̃ам̣ раттан̃н̃ам̣ вам̣сан̃н̃ам̣ пора̄н̣ам̣ асам̣кин̣н̣ам̣ асам̣кин̣н̣апуббам̣, на сам̣кӣйати на сам̣кӣйиссати, аппат̣икут̣т̣хам̣ саман̣ехи бра̄хман̣ехи вин̃н̃ӯхи. има̄ни кхо, парибба̄джака̄, чатта̄ри дхаммапада̄ни агган̃н̃а̄ни раттан̃н̃а̄ни вам̣сан̃н̃а̄ни пора̄н̣а̄ни асам̣кин̣н̣а̄ни асам̣кин̣н̣апубба̄ни, на сам̣кӣйанти на сам̣кӣйиссанти, аппат̣икут̣т̣ха̄ни саман̣ехи бра̄хман̣ехи вин̃н̃ӯхи.

‘‘йо кхо, парибба̄джака̄, евам̣ вадеййа – ‘ахаметам̣ анабхиджджхам̣ дхаммападам̣ паччаккха̄йа абхиджджха̄лум̣ ка̄месу тиббаса̄ра̄гам̣ саман̣ам̣ ва̄ бра̄хман̣ам̣ ва̄ пан̃н̃а̄песса̄мӣ’ти, тамахам̣ таттха евам̣ вадеййам̣ – ‘ету вадату бйа̄харату пасса̄мисса̄нубха̄ва’нти. со вата, парибба̄джака̄, анабхиджджхам̣ дхаммападам̣ паччаккха̄йа абхиджджха̄лум̣ ка̄месу тиббаса̄ра̄гам̣ саман̣ам̣ ва̄ бра̄хман̣ам̣ ва̄ пан̃н̃а̄пессатӣти нетам̣ т̣ха̄нам̣ виджджати.

‘‘йо кхо, парибба̄джака̄, евам̣ вадеййа – ‘ахаметам̣ абйа̄па̄дам̣ дхаммападам̣ паччаккха̄йа бйа̄панначиттам̣ падут̣т̣хаманасан̇каппам̣ саман̣ам̣ ва̄ бра̄хман̣ам̣ ва̄ пан̃н̃а̄песса̄мӣ’ти, тамахам̣ таттха евам̣ вадеййам̣ – ‘ету вадату бйа̄харату пасса̄мисса̄нубха̄ва’нти. со вата, парибба̄джака̄, абйа̄па̄дам̣ дхаммападам̣ паччаккха̄йа бйа̄панначиттам̣ падут̣т̣хаманасан̇каппам̣ саман̣ам̣ ва̄ бра̄хман̣ам̣ ва̄ пан̃н̃а̄пессатӣти нетам̣ т̣ха̄нам̣ виджджати.

‘‘йо кхо, парибба̄джака̄, евам̣ вадеййа – ‘ахаметам̣ самма̄сатим̣ дхаммападам̣ паччаккха̄йа мут̣т̣хассатим̣ асампаджа̄нам̣ саман̣ам̣ ва̄ бра̄хман̣ам̣ ва̄ пан̃н̃а̄песса̄мӣ’ти, тамахам̣ таттха евам̣ вадеййам̣ – ‘ету вадату бйа̄харату пасса̄мисса̄нубха̄ва’нти. со вата, парибба̄джака̄, самма̄сатим̣ дхаммападам̣ паччаккха̄йа мут̣т̣хассатим̣ асампаджа̄нам̣ саман̣ам̣ ва̄ бра̄хман̣ам̣ ва̄ пан̃н̃а̄пессатӣти нетам̣ т̣ха̄нам̣ виджджати.

‘‘йо кхо, парибба̄джака̄, евам̣ вадеййа – ‘ахаметам̣ самма̄сама̄дхим̣ дхаммападам̣ паччаккха̄йа асама̄хитам̣ виббхантачиттам̣ саман̣ам̣ ва̄ бра̄хман̣ам̣ ва̄ пан̃н̃а̄песса̄мӣ’ти, тамахам̣ таттха евам̣ вадеййам̣ – ‘ету вадату бйа̄харату пасса̄мисса̄нубха̄ва’нти. со вата, парибба̄джака̄, самма̄сама̄дхим̣ дхаммападам̣ паччаккха̄йа асама̄хитам̣ виббхантачиттам̣ саман̣ам̣ ва̄ бра̄хман̣ам̣ ва̄ пан̃н̃а̄пессатӣти нетам̣ т̣ха̄нам̣ виджджати.

‘‘йо кхо, парибба̄джака̄, има̄ни чатта̄ри дхаммапада̄ни гарахитаббам̣ пат̣иккоситаббам̣ ман̃н̃еййа, тасса дит̣т̣хева дхамме чатта̄ро сахадхаммика̄ ва̄да̄нупа̄та̄ га̄райха̄ т̣ха̄на̄ [ва̄да̄нува̄да̄ га̄райхам̣ т̣ха̄нам̣ (ма. ни. 3.8)] а̄гаччханти. катаме чатта̄ро? анабхиджджхам̣ че бхавам̣ дхаммападам̣ гарахати пат̣иккосати, йе ча хи [йе ча (ма. ни. 3.142-143)] абхиджджха̄лӯ ка̄месу тиббаса̄ра̄га̄ саман̣абра̄хман̣а̄ те бхото пуджджа̄ те бхото па̄сам̣са̄. абйа̄па̄дам̣ че бхавам̣ дхаммападам̣ гарахати пат̣иккосати, йе ча хи бйа̄панначитта̄ падут̣т̣хаманасан̇каппа̄ саман̣абра̄хман̣а̄ те бхото пуджджа̄ те бхото па̄сам̣са̄. самма̄сатим̣ че бхавам̣ дхаммападам̣ гарахати пат̣иккосати, йе ча хи мут̣т̣хассатӣ асампаджа̄на̄ саман̣абра̄хман̣а̄ те бхото пуджджа̄ те бхото па̄сам̣са̄. самма̄сама̄дхим̣ че бхавам̣ дхаммападам̣ гарахати пат̣иккосати, йе ча хи асама̄хита̄ виббхантачитта̄ саман̣абра̄хман̣а̄ те бхото пуджджа̄ те бхото па̄сам̣са̄.

‘‘йо кхо, парибба̄джака̄, има̄ни чатта̄ри дхаммапада̄ни гарахитаббам̣ пат̣иккоситаббам̣ ман̃н̃еййа, тасса дит̣т̣хева дхамме име чатта̄ро сахадхаммика̄ ва̄да̄нупа̄та̄ га̄райха̄ т̣ха̄на̄ а̄гаччханти. йепи те парибба̄джака̄ ахесум̣ уккала̄ вассабхан̃н̃а̄ [вассабхин̃н̃а̄ (ка.) сам̣. ни. 3.62 пасситаббам̣] ахетукава̄да̄ акирийава̄да̄ наттхикава̄да̄, тепи има̄ни чатта̄ри дхаммапада̄ни на гарахитаббам̣ на пат̣иккоситаббам̣ аман̃н̃им̣су. там̣ кисса хету? нинда̄бйа̄росанаупа̄рамбхабхайа̄’’ти [упава̄дабхайа̄ти (ка.) ма. ни. 3.150; сам̣. ни. 3.62 пасситаббам̣].

‘‘абйа̄панно сада̄ сато, аджджхаттам̣ сусама̄хито;

абхиджджха̄винайе сиккхам̣, аппаматтоти вуччатӣ’’ти. дасамам̣;

урувелавагго татийо.