8. арийавам̣сасуттам̣

28. ‘‘чатта̄роме, бхиккхаве, арийавам̣са̄ агган̃н̃а̄ раттан̃н̃а̄ вам̣сан̃н̃а̄ пора̄н̣а̄ асам̣кин̣н̣а̄ асам̣кин̣н̣апубба̄, на сам̣кӣйанти на сам̣кӣйиссанти, аппат̣икут̣т̣ха̄ саман̣ехи бра̄хман̣ехи вин̃н̃ӯхи. катаме чатта̄ро? идха, бхиккхаве, бхиккху сантут̣т̣хо хоти итарӣтарена чӣварена, итарӣтарачӣварасантут̣т̣хийа̄ ча ван̣н̣ава̄дӣ, на ча чӣварахету анесанам̣ аппатирӯпам̣ а̄паджджати, аладдха̄ ча чӣварам̣ на паритассати, ладдха̄ ча чӣварам̣ агадхито [агатхито (сӣ. пӣ.)] амуччхито анаджджхосанно а̄дӣнавадасса̄вӣ ниссаран̣апан̃н̃о парибхун̃джати; та̄йа ча пана итарӣтарачӣварасантут̣т̣хийа̄ неватта̄нуккам̣сети, но [на (дӣ. ни. 3.309)] парам̣ вамбхети. йо хи таттха даккхо аналасо сампаджа̄но патиссато, айам̣ вуччати, бхиккхаве, бхиккху пора̄н̣е агган̃н̃е арийавам̣се т̣хито.

‘‘пуна чапарам̣, бхиккхаве, бхиккху сантут̣т̣хо хоти итарӣтарена пин̣д̣апа̄тена, итарӣтарапин̣д̣апа̄тасантут̣т̣хийа̄ ча ван̣н̣ава̄дӣ, на ча пин̣д̣апа̄тахету анесанам̣ аппатирӯпам̣ а̄паджджати, аладдха̄ ча пин̣д̣апа̄там̣ на паритассати, ладдха̄ ча пин̣д̣апа̄там̣ агадхито амуччхито анаджджхосанно а̄дӣнавадасса̄вӣ ниссаран̣апан̃н̃о парибхун̃джати; та̄йа ча пана итарӣтарапин̣д̣апа̄тасантут̣т̣хийа̄ неватта̄нуккам̣сети, но парам̣ вамбхети. йо хи таттха даккхо аналасо сампаджа̄но патиссато, айам̣ вуччати, бхиккхаве, бхиккху пора̄н̣е агган̃н̃е арийавам̣се т̣хито.

‘‘пуна чапарам̣, бхиккхаве, бхиккху сантут̣т̣хо хоти итарӣтарена сена̄санена, итарӣтарасена̄санасантут̣т̣хийа̄ ча ван̣н̣ава̄дӣ, на ча сена̄санахету анесанам̣ аппатирӯпам̣ а̄паджджати, аладдха̄ ча сена̄санам̣ на паритассати, ладдха̄ ча сена̄санам̣ агадхито амуччхито анаджджхосанно а̄дӣнавадасса̄вӣ ниссаран̣апан̃н̃о парибхун̃джати; та̄йа ча пана итарӣтарасена̄санасантут̣т̣хийа̄ неватта̄нуккам̣сети, но парам̣ вамбхети. йо хи таттха даккхо аналасо сампаджа̄но патиссато, айам̣ вуччати, бхиккхаве, бхиккху пора̄н̣е агган̃н̃е арийавам̣се т̣хито.

‘‘пуна чапарам̣, бхиккхаве, бхиккху бха̄вана̄ра̄мо хоти бха̄вана̄рато, паха̄на̄ра̄мо хоти паха̄нарато; та̄йа ча пана бха̄вана̄ра̄мата̄йа бха̄вана̄ратийа̄ паха̄на̄ра̄мата̄йа паха̄наратийа̄ неватта̄нуккам̣сети, но парам̣ вамбхети. йо хи таттха даккхо аналасо сампаджа̄но патиссато, айам̣ вуччати, бхиккхаве, бхиккху пора̄н̣е агган̃н̃е арийавам̣се т̣хито. име кхо, бхиккхаве, чатта̄ро арийавам̣са̄ агган̃н̃а̄ раттан̃н̃а̄ вам̣сан̃н̃а̄ пора̄н̣а̄ асам̣кин̣н̣а̄ асам̣кин̣н̣апубба̄, на сам̣кӣйанти на сам̣кӣйиссанти, аппат̣икут̣т̣ха̄ саман̣ехи бра̄хман̣ехи вин̃н̃ӯхи.

‘‘имехи ча пана, бхиккхаве, чатӯхи арийавам̣сехи саманна̄гато бхиккху пураттхима̄йа чепи диса̄йа вихарати свева аратим̣ сахати, на там̣ арати сахати; паччхима̄йа чепи диса̄йа вихарати свева аратим̣ сахати, на там̣ арати сахати; уттара̄йа чепи диса̄йа вихарати свева аратим̣ сахати, на там̣ арати сахати; даккхин̣а̄йа чепи диса̄йа вихарати свева аратим̣ сахати, на там̣ арати сахати. там̣ кисса хету? аратиратисахо хи, бхиккхаве, дхӣро’’ти.

‘‘на̄рати сахати дхӣрам̣ [вӣрам̣ (сӣ.)], на̄рати дхӣрам̣ сахати;

дхӣрова аратим̣ сахати, дхӣро хи аратиссахо.

‘‘саббакаммавиха̄йӣнам̣, панун̣н̣ам̣ [пан̣уннам̣ (?)] ко нива̄райе;

неккхам̣ джамбонадассева, ко там̣ ниндитумарахати;

дева̄пи нам̣ пасам̣санти, брахмуна̄пи пасам̣сито’’ти. ат̣т̣хамам̣;