4. ка̄л̣ака̄ра̄масуттам̣

24. екам̣ самайам̣ бхагава̄ са̄кете вихарати ка̄л̣ака̄ра̄ме [кол̣ика̄ра̄ме (ка.)]. татра кхо бхагава̄ бхиккхӯ а̄мантеси – ‘‘бхиккхаво’’ти. ‘‘бхаданте’’ти те бхиккхӯ бхагавато паччассосум̣. бхагава̄ етадавоча –

‘‘йам̣, бхиккхаве, садевакасса локасса сама̄ракасса сабрахмакасса сассаман̣абра̄хман̣ийа̄ паджа̄йа садеваманусса̄йа дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄, тамахам̣ джа̄на̄ми.

‘‘йам̣, бхиккхаве, садевакасса локасса сама̄ракасса сабрахмакасса сассаман̣абра̄хман̣ийа̄ паджа̄йа садеваманусса̄йа дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄, тамахам̣ аббхан̃н̃а̄сим̣. там̣ татха̄гатасса видитам̣, там̣ татха̄гато на упат̣т̣ха̄си.

‘‘йам̣, бхиккхаве, садевакасса локасса сама̄ракасса сабрахмакасса сассаман̣абра̄хман̣ийа̄ паджа̄йа садеваманусса̄йа дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄, тамахам̣ на джа̄на̄мӣти вадеййам̣, там̣ мамасса муса̄.

‘‘йам̣, бхиккхаве…пе… тамахам̣ джа̄на̄ми ча на ча джа̄на̄мӣти вадеййам̣, там̣пасса [там̣ писса (сйа̄. кам̣.), там̣ мамасса (ка.)] та̄дисамева.

‘‘йам̣, бхиккхаве…пе… тамахам̣ нева джа̄на̄ми на на джа̄на̄мӣти вадеййам̣, там̣ мамасса кали.

‘‘ити кхо, бхиккхаве, татха̄гато дат̣т̣ха̄ дат̣т̣хаббам̣, дит̣т̣хам̣ на ман̃н̃ати, адит̣т̣хам̣ на ман̃н̃ати, дат̣т̣хаббам̣ на ман̃н̃ати, дат̣т̣ха̄рам̣ на ман̃н̃ати; сутва̄ сотаббам̣, сутам̣ на ман̃н̃ати, асутам̣ на ман̃н̃ати, сотаббам̣ на ман̃н̃ати, сота̄рам̣ на ман̃н̃ати; мутва̄ мотаббам̣, мутам̣ на ман̃н̃ати, амутам̣ на ман̃н̃ати, мотаббам̣ на ман̃н̃ати, мота̄рам̣ на ман̃н̃ати; вин̃н̃атва̄ вин̃н̃а̄таббам̣, вин̃н̃а̄там̣ на ман̃н̃ати, авин̃н̃а̄там̣ на ман̃н̃ати, вин̃н̃а̄таббам̣ на ман̃н̃ати, вин̃н̃а̄та̄рам̣ на ман̃н̃ати. ити кхо, бхиккхаве, татха̄гато дит̣т̣хасутамутавин̃н̃а̄таббесу дхаммесу та̄дӣйева та̄дӣ [та̄дисова та̄дӣ (сйа̄. кам̣.), та̄дисе йева та̄дӣ (пӣ.), та̄дӣйева та̄дӣйевека̄ (ка.)]. тамха̄ ча пана та̄димха̄ [та̄дитамха̄ (сӣ. пӣ.)] ан̃н̃о та̄дӣ уттаритаро ва̄ пан̣ӣтатаро ва̄ наттхӣти вада̄мӣ’’ти.

‘‘йам̣ кин̃чи дит̣т̣хам̣ва сутам̣ мутам̣ ва̄,

аджджхоситам̣ саччамутам̣ паресам̣;

на тесу та̄дӣ сайасам̣вутесу,

саччам̣ муса̄ ва̄пи парам̣ дахеййа.

‘‘етан̃ча саллам̣ пат̣икачча [пат̣игачча (сӣ. пӣ.)] дисва̄,

аджджхосита̄ йаттха паджа̄ висатта̄;

джа̄на̄ми пасса̄ми татхева етам̣,

аджджхоситам̣ наттхи татха̄гата̄на’’нти. чатуттхам̣;