3. готамакачетийасуттам̣

126. екам̣ самайам̣ бхагава̄ веса̄лийам̣ вихарати готамаке четийе. татра кхо бхагава̄ бхиккхӯ а̄мантеси – ‘‘бхиккхаво’’ти. ‘‘бхаданте’’ти те бхиккхӯ бхагавато паччассосум̣. бхагава̄ етадавоча –

‘‘абхин̃н̃а̄йа̄хам̣, бхиккхаве, дхаммам̣ десеми, но анабхин̃н̃а̄йа. санида̄на̄хам̣, бхиккхаве, дхаммам̣ десеми, но анида̄нам̣. саппа̄т̣иха̄рийа̄хам̣, бхиккхаве, дхаммам̣ десеми, но аппа̄т̣иха̄рийам̣. тасса майхам̣, бхиккхаве, абхин̃н̃а̄йа дхаммам̣ десайато но анабхин̃н̃а̄йа, санида̄нам̣ дхаммам̣ десайато но анида̄нам̣, саппа̄т̣иха̄рийам̣ дхаммам̣ десайато но аппа̄т̣иха̄рийам̣, каран̣ӣйо ова̄до, каран̣ӣйа̄ ануса̄санӣ. алан̃ча пана во, бхиккхаве, тут̣т̣хийа̄, алам̣ аттаманата̄йа, алам̣ соманасса̄йа – ‘самма̄самбуддхо бхагава̄, сва̄ккха̄то дхаммо, суппат̣ипанно сан̇гхо’’’ти.

идамавоча бхагава̄. аттамана̄ те бхиккхӯ бхагавато бха̄ситам̣ абхинандунти. имасмин̃ча пана веййа̄каран̣асмим̣ бхан̃н̃ама̄не сахассӣ локадха̄ту акампиттха̄ти. татийам̣.