7. араккхитасуттам̣

110. атха кхо ана̄тхапин̣д̣ико гахапати йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисиннам̣ кхо ана̄тхапин̣д̣икам̣ гахапатим̣ бхагава̄ етадавоча – ‘‘читте, гахапати, араккхите ка̄йакаммампи араккхитам̣ хоти, вачӣкаммампи араккхитам̣ хоти, манокаммампи араккхитам̣ хоти. тасса араккхитака̄йакаммантасса араккхитавачӣкаммантасса араккхитаманокаммантасса ка̄йакаммампи авассутам̣ хоти, вачӣкаммампи авассутам̣ хоти, манокаммампи авассутам̣ хоти. тасса авассутака̄йакаммантасса авассутавачӣкаммантасса авассутаманокаммантасса ка̄йакаммампи пӯтикам̣ хоти, вачӣкаммампи пӯтикам̣ хоти, манокаммампи пӯтикам̣ хоти. тасса пӯтика̄йакаммантасса пӯтивачӣкаммантасса пӯтиманокаммантасса на бхаддакам̣ маран̣ам̣ хоти, на бхаддика̄ ка̄лан̇кирийа̄.

‘‘сеййатха̄пи, гахапати, кӯт̣а̄га̄ре дуччханне кӯт̣ампи араккхитам̣ хоти, гопа̄насийопи араккхита̄ хонти, бхиттипи араккхита̄ хоти; кӯт̣ампи авассутам̣ хоти, гопа̄насийопи авассута̄ хонти, бхиттипи авассута̄ хоти; кӯт̣ампи пӯтикам̣ хоти, гопа̄насийопи пӯтика̄ хонти, бхиттипи пӯтика̄ хоти.

‘‘евамевам̣ кхо, гахапати, читте араккхите ка̄йакаммампи араккхитам̣ хоти, вачӣкаммампи араккхитам̣ хоти, манокаммампи араккхитам̣ хоти. тасса араккхитака̄йакаммантасса араккхитавачӣкаммантасса араккхитаманокаммантасса ка̄йакаммампи авассутам̣ хоти, вачӣкаммампи авассутам̣ хоти, манокаммампи авассутам̣ хоти. тасса авассутака̄йакаммантасса авассутавачӣкаммантасса авассутаманокаммантасса ка̄йакаммампи пӯтикам̣ хоти, вачӣкаммампи пӯтикам̣ хоти, манокаммампи пӯтикам̣ хоти. тасса пӯтика̄йакаммантасса пӯтивачӣкаммантасса пӯтиманокаммантасса на бхаддакам̣ маран̣ам̣ хоти, на бхаддика̄ ка̄лан̇кирийа̄.

‘‘читте, гахапати, раккхите ка̄йакаммампи раккхитам̣ хоти, вачӣкаммампи раккхитам̣ хоти, манокаммампи раккхитам̣ хоти. тасса раккхитака̄йакаммантасса раккхитавачӣкаммантасса раккхитаманокаммантасса ка̄йакаммампи анавассутам̣ хоти, вачӣкаммампи анавассутам̣ хоти, манокаммампи анавассутам̣ хоти. тасса анавассутака̄йакаммантасса анавассутавачӣкаммантасса анавассутаманокаммантасса ка̄йакаммампи апӯтикам̣ хоти, вачӣкаммампи апӯтикам̣ хоти, манокаммампи апӯтикам̣ хоти. тасса апӯтика̄йакаммантасса апӯтивачӣкаммантасса апӯтиманокаммантасса бхаддакам̣ маран̣ам̣ хоти, бхаддика̄ ка̄лан̇кирийа̄.

‘‘сеййатха̄пи, гахапати, кӯт̣а̄га̄ре суччханне кӯт̣ампи раккхитам̣ хоти, гопа̄насийопи раккхита̄ хонти, бхиттипи раккхита̄ хоти; кӯт̣ампи анавассутам̣ хоти, гопа̄насийопи анавассута̄ хонти, бхиттипи анавассута̄ хоти; кӯт̣ампи апӯтикам̣ хоти, гопа̄насийопи апӯтика̄ хонти, бхиттипи апӯтика̄ хоти.

евамевам̣ кхо, гахапати, читте раккхите ка̄йакаммампи раккхитам̣ хоти, вачӣкаммампи раккхитам̣ хоти, манокаммампи раккхитам̣ хоти. тасса раккхитака̄йакаммантасса раккхитавачӣкаммантасса раккхитаманокаммантасса ка̄йакаммампи анавассутам̣ хоти, вачӣкаммампи анавассутам̣ хоти, манокаммампи анавассутам̣ хоти. тасса анавассутака̄йакаммантасса анавассутавачӣкаммантасса анавассутаманокаммантасса ка̄йакаммампи апӯтикам̣ хоти, вачӣкаммампи апӯтикам̣ хоти, манокаммампи апӯтикам̣ хоти. тасса апӯтика̄йакаммантасса апӯтивачӣкаммантасса апӯтиманокаммантасса бхаддакам̣ маран̣ам̣ хоти, бхаддика̄ ка̄лан̇кирийа̄’’ти. саттамам̣.