8. бйа̄паннасуттам̣

111. екамантам̣ нисиннам̣ кхо ана̄тхапин̣д̣икам̣ гахапатим̣ бхагава̄ етадавоча – ‘‘читте, гахапати, бйа̄панне ка̄йакаммампи бйа̄паннам̣ хоти, вачӣкаммампи бйа̄паннам̣ хоти, манокаммампи бйа̄паннам̣ хоти. тасса бйа̄паннака̄йакаммантасса бйа̄паннавачӣкаммантасса бйа̄паннаманокаммантасса на бхаддакам̣ маран̣ам̣ хоти, на бхаддика̄ ка̄лан̇кирийа̄. сеййатха̄пи, гахапати, кӯт̣а̄га̄ре дуччханне кӯт̣ампи бйа̄паннам̣ хоти, гопа̄насийопи бйа̄панна̄ хонти, бхиттипи бйа̄панна̄ хоти; евамевам̣ кхо, гахапати, читте бйа̄панне ка̄йакаммампи бйа̄паннам̣ хоти, вачӣкаммампи бйа̄паннам̣ хоти, манокаммампи бйа̄паннам̣ хоти. тасса бйа̄паннака̄йакаммантасса бйа̄паннавачӣкаммантасса бйа̄паннаманокаммантасса на бхаддакам̣ маран̣ам̣ хоти, на бхаддика̄ ка̄лан̇кирийа̄.

‘‘читте, гахапати, абйа̄панне ка̄йакаммампи абйа̄паннам̣ хоти, вачӣкаммампи абйа̄паннам̣ хоти, манокаммампи абйа̄паннам̣ хоти. тасса абйа̄паннака̄йакаммантасса абйа̄паннавачӣкаммантасса абйа̄паннаманокаммантасса бхаддакам̣ маран̣ам̣ хоти, бхаддика̄ ка̄лан̇кирийа̄. сеййатха̄пи, гахапати, кӯт̣а̄га̄ре суччханне кӯт̣ампи абйа̄паннам̣ хоти, гопа̄насийопи абйа̄панна̄ хонти, бхиттипи абйа̄панна̄ хоти; евамевам̣ кхо, гахапати, читте абйа̄панне ка̄йакаммампи абйа̄паннам̣ хоти, вачӣкаммампи абйа̄паннам̣ хоти, манокаммампи абйа̄паннам̣ хоти. тасса абйа̄паннака̄йакаммантасса…пе… абйа̄паннаманокаммантасса бхаддакам̣ маран̣ам̣ хоти, бхаддика̄ ка̄лан̇кирийа̄’’ти. ат̣т̣хамам̣.