7. татийаа̄джа̄нӣйасуттам̣

99. ‘‘тӣхи, бхиккхаве, ан̇гехи саманна̄гато ран̃н̃о бхадро асса̄джа̄нӣйо ра̄джа̄рахо хоти ра̄джабхогго, ран̃н̃о ан̇гантева сан̇кхайам̣ гаччхати. катамехи тӣхи? идха, бхиккхаве, ран̃н̃о бхадро асса̄джа̄нӣйо ван̣н̣асампанно ча хоти баласампанно ча джавасампанно ча. имехи кхо, бхиккхаве, тӣхи ан̇гехи саманна̄гато ран̃н̃о бхадро асса̄джа̄нӣйо ра̄джа̄рахо хоти ра̄джабхогго, ран̃н̃о ан̇гантева сан̇кхйам̣ гаччхати. евамевам̣ кхо, бхиккхаве, тӣхи дхаммехи саманна̄гато бхиккху а̄хунеййо хоти па̄хунеййо даккхин̣еййо ан̃джаликаран̣ӣйо ануттарам̣ пун̃н̃аккхеттам̣ локасса. катамехи тӣхи? идха, бхиккхаве, бхиккху ван̣н̣асампанно ча хоти баласампанно ча джавасампанно ча.

‘‘катхан̃ча, бхиккхаве, бхиккху ван̣н̣асампанно хоти? идха, бхиккхаве, бхиккху сӣлава̄ хоти, па̄тимоккхасам̣варасам̣вуто вихарати а̄ча̄рагочарасампанно ан̣уматтесу ваджджесу бхайадасса̄вӣ, сама̄да̄йа сиккхати сиккха̄падесу. евам̣ кхо, бхиккхаве, бхиккху ван̣н̣асампанно хоти.

‘‘катхан̃ча, бхиккхаве, бхиккху баласампанно хоти? идха, бхиккхаве, бхиккху а̄раддхавӣрийо вихарати акусала̄нам̣ дхамма̄нам̣ паха̄на̄йа кусала̄нам̣ дхамма̄нам̣ упасампада̄йа тха̄мава̄ дал̣хапараккамо аниккхиттадхуро кусалесу дхаммесу. евам̣ кхо, бхиккхаве, бхиккху баласампанно хоти.

‘‘катхан̃ча, бхиккхаве, бхиккху джавасампанно хоти? идха, бхиккхаве, бхиккху а̄сава̄нам̣ кхайа̄ ана̄савам̣ четовимуттим̣ пан̃н̃а̄вимуттим̣ дит̣т̣хева дхамме сайам̣ абхин̃н̃а̄ саччхикатва̄ упасампаджджа вихарати. евам̣ кхо, бхиккхаве, бхиккху джавасампанно хоти. имехи кхо, бхиккхаве, тӣхи дхаммехи саманна̄гато бхиккху а̄хунеййо хоти…пе… ануттарам̣ пун̃н̃аккхеттам̣ локасса̄’’ти. саттамам̣.