4. ваджджипуттасуттам̣

85. екам̣ самайам̣ бхагава̄ веса̄лийам̣ вихарати маха̄ване кӯт̣а̄га̄раса̄ла̄йам̣. атха кхо ан̃н̃атаро ваджджипуттако бхиккху йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо со ваджджипуттако бхиккху бхагавантам̣ етадавоча – ‘‘са̄дхикамидам̣, бханте, дийад̣д̣хасиккха̄падасатам̣ [дийад̣д̣хам̣ сиккха̄падасатам̣ (сӣ.)] анваддхама̄сам̣ уддесам̣ а̄гаччхати. на̄хам̣, бханте, еттха саккоми сиккхиту’’нти. ‘‘саккхиссаси пана твам̣, бхиккху, тӣсу сиккха̄су сиккхитум̣ – адхисӣласиккха̄йа, адхичиттасиккха̄йа адхипан̃н̃а̄сиккха̄йа̄’’ти? ‘‘саккомахам̣, бханте, тӣсу сиккха̄су сиккхитум̣ – адхисӣласиккха̄йа, адхичиттасиккха̄йа, адхипан̃н̃а̄сиккха̄йа̄’’ти. ‘‘тасма̄тиха твам̣, бхиккху, тӣсу сиккха̄су сиккхассу – адхисӣласиккха̄йа, адхичиттасиккха̄йа, адхипан̃н̃а̄сиккха̄йа’’.

‘‘йато кхо твам̣, бхиккху, адхисӣлампи сиккхиссаси, адхичиттампи сиккхиссаси, адхипан̃н̃ампи сиккхиссаси, тасса туйхам̣ бхиккху адхисӣлампи сиккхато адхичиттампи сиккхато адхипан̃н̃ампи сиккхато ра̄го пахӣйиссати, досо пахӣйиссати, мохо пахӣйиссати. со твам̣ ра̄гасса паха̄на̄ досасса паха̄на̄ мохасса паха̄на̄ йам̣ акусалам̣ на там̣ кариссаси, йам̣ па̄пам̣ на там̣ севиссасӣ’’ти.

атха кхо со бхиккху апарена самайена адхисӣлампи сиккхи, адхичиттампи сиккхи, адхипан̃н̃ампи сиккхи. тасса адхисӣлампи сиккхато адхичиттампи сиккхато адхипан̃н̃ампи сиккхато ра̄го пахӣйи, досо пахӣйи, мохо пахӣйи. со ра̄гасса паха̄на̄ досасса паха̄на̄ мохасса паха̄на̄ йам̣ акусалам̣ там̣ на̄ка̄си, йам̣ па̄пам̣ там̣ на севӣти. чатуттхам̣.