9. паббатара̄джасуттам̣

49. ‘‘химавантам̣, бхиккхаве, паббатара̄джам̣ нисса̄йа маха̄са̄ла̄ тӣхи вад̣д̣хӣхи вад̣д̣ханти. катама̄хи тӣхи? са̄кха̄паттапала̄сена вад̣д̣ханти, тачапапат̣ика̄йа вад̣д̣ханти, пхеггуса̄рена вад̣д̣ханти. химавантам̣, бхиккхаве, паббатара̄джам̣ нисса̄йа маха̄са̄ла̄ има̄хи тӣхи вад̣д̣хӣхи вад̣д̣ханти.

‘‘евамевам̣ кхо, бхиккхаве, саддхам̣ кулапатим̣ нисса̄йа анто джано тӣхи вад̣д̣хӣхи вад̣д̣хати. катама̄хи тӣхи? саддха̄йа вад̣д̣хати, сӣлена вад̣д̣хати, пан̃н̃а̄йа вад̣д̣хати. саддхам̣, бхиккхаве, кулапатим̣ нисса̄йа анто джано има̄хи тӣхи вад̣д̣хӣхи вад̣д̣хатӣ’’ти.

‘‘йатха̄пи паббато село, аран̃н̃асмим̣ браха̄ване;

там̣ руккха̄ упанисса̄йа, вад̣д̣ханте те ванаппатӣ.

‘‘татхева сӣласампаннам̣, саддхам̣ кулапатим̣ идха;

упанисса̄йа вад̣д̣ханти, путтада̄ра̄ ча бандхава̄;

амачча̄ н̃а̄тисан̇гха̄ ча, йе часса ануджӣвино.

‘‘тйа̄сса сӣлавато сӣлам̣, ча̄гам̣ сучарита̄ни ча;

пассама̄на̄нукуббанти, аттаматтхам̣ [йе бхаванти (сӣ. сйа̄. кам̣. пӣ.)] вичаккхан̣а̄.

‘‘идха дхаммам̣ чаритва̄на, маггам̣ сугатига̄минам̣;

нандино девалокасмим̣, моданти ка̄мака̄мино’’ти. навамам̣;