6. девадӯтасуттам̣

36. ‘‘тӣн̣има̄ни, бхиккхаве, девадӯта̄ни. катама̄ни тӣн̣и? идха, бхиккхаве, екаччо ка̄йена дуччаритам̣ чарати, ва̄ча̄йа дуччаритам̣ чарати, манаса̄ дуччаритам̣ чарати. со ка̄йена дуччаритам̣ чаритва̄, ва̄ча̄йа дуччаритам̣ чаритва̄, манаса̄ дуччаритам̣ чаритва̄ ка̄йасса бхеда̄ парам̣ маран̣а̄ апа̄йам̣ дуггатим̣ винипа̄там̣ нирайам̣ упападжджати. таменам̣, бхиккхаве, нирайапа̄ла̄ на̄на̄ба̄ха̄су гахетва̄ йамасса ран̃н̃о дассенти – ‘айам̣, дева, пурисо аматтеййо апеттеййо аса̄ман̃н̃о абрахман̃н̃о, на куле джет̣т̣ха̄пача̄йӣ. имасса дево дан̣д̣ам̣ пан̣етӯ’’’ти.

‘‘таменам̣, бхиккхаве, йамо ра̄джа̄ пат̣хамам̣ девадӯтам̣ самануйун̃джати самануга̄хати саманубха̄сати – ‘амбхо, пуриса, на твам̣ аддаса мануссесу пат̣хамам̣ девадӯтам̣ па̄тубхӯта’нти? со евама̄ха – ‘на̄ддасам̣, бханте’’’ти.

‘‘таменам̣, бхиккхаве, йамо ра̄джа̄ евама̄ха – ‘амбхо пуриса, на твам̣ аддаса мануссесу иттхим̣ ва̄ пурисам̣ ва̄ а̄сӣтикам̣ ва̄ на̄вутикам̣ ва̄ вассасатикам̣ ва̄ [пасса ма. ни. 3.263] джа̄тийа̄ джин̣н̣ам̣ гопа̄насиван̇кам̣ бхоггам̣ дан̣д̣апара̄йан̣ам̣ [дан̣д̣апара̄йанам̣ (сйа̄. кам̣. пӣ.)] паведхама̄нам̣ гаччхантам̣ а̄турам̣ гатайоббанам̣ кхан̣д̣адантам̣ палитакесам̣ вилӯнам̣ кхаллитасирам̣ [кхалитам̣ сиро (сӣ. пӣ.), кхалитасирам̣ (сйа̄. кам̣.) ма. ни. 3.263] валитам̣ тилака̄хатагатта’нти? со евама̄ха – ‘аддасам̣, бханте’’’ти.

‘‘таменам̣, бхиккхаве, йамо ра̄джа̄ евама̄ха – ‘амбхо, пуриса, тасса те вин̃н̃усса сато махаллакасса на етадахоси – ахампи кхомхи джара̄дхаммо джарам̣ анатӣто, ханда̄хам̣ калйа̄н̣ам̣ кароми, ка̄йена ва̄ча̄йа манаса̄’ти? со евама̄ха – ‘на̄саккхиссам̣, бханте. пама̄дассам̣, бханте’’’ти.

‘‘таменам̣, бхиккхаве, йамо ра̄джа̄ евама̄ха – ‘амбхо, пуриса, пама̄дата̄йа [пама̄давата̄йа (сӣ. сйа̄. кам̣. пӣ.) ма. ни. 3.262] на калйа̄н̣амака̄си ка̄йена ва̄ча̄йа манаса̄. таггха твам̣ [там̣ (ка.)], амбхо пуриса, татха̄ кариссанти йатха̄ там̣ [те (ка.)] паматтам̣. там̣ кхо пана те етам̣ [там̣ кхо панетам̣ (сӣ. сйа̄. кам̣. пӣ.)] па̄пакаммам̣ [па̄пам̣ каммам̣ (сӣ.)] нева ма̄тара̄ катам̣, на питара̄ катам̣, на бха̄тара̄ катам̣, на бхагинийа̄ катам̣, на митта̄маччехи катам̣, на н̃а̄тиса̄лохитехи катам̣, на девата̄хи катам̣, на саман̣абра̄хман̣ехи катам̣; атха кхо тайа̄ветам̣ па̄пакаммам̣ катам̣, тван̃н̃еветасса випа̄кам̣ пат̣исам̣ведиссасӣ’’’ти.

‘‘таменам̣, бхиккхаве, йамо ра̄джа̄ пат̣хамам̣ девадӯтам̣ самануйун̃джитва̄ самануга̄хитва̄ саманубха̄ситва̄, дутийам̣ девадӯтам̣ самануйун̃джати самануга̄хати саманубха̄сати – ‘амбхо пуриса, на твам̣ аддаса мануссесу дутийам̣ девадӯтам̣ па̄тубхӯта’нти? со евама̄ха – ‘на̄ддасам̣, бханте’ти. ‘‘таменам̣, бхиккхаве, йамо ра̄джа̄ евама̄ха – ‘амбхо пуриса, на твам̣ аддаса мануссесу иттхим̣ ва̄ пурисам̣ ва̄ а̄ба̄дхикам̣ дуккхитам̣ ба̄л̣хагила̄нам̣, саке муттакарӣсе палипаннам̣ сема̄нам̣, ан̃н̃ехи вут̣т̣ха̄пийама̄нам̣, ан̃н̃ехи сам̣весийама̄на’нти? со евама̄ха – ‘аддасам̣, бханте’’’ти.

‘‘таменам̣, бхиккхаве, йамо ра̄джа̄ евама̄ха – ‘амбхо пуриса, тасса те вин̃н̃усса сато махаллакасса на етадахоси – ахампи кхомхи бйа̄дхидхаммо бйа̄дхим̣ анатӣто, ханда̄хам̣ калйа̄н̣ам̣ кароми ка̄йена ва̄ча̄йа манаса̄’ти? со евама̄ха – ‘на̄саккхиссам̣, бханте. пама̄дассам̣, бханте’’’ти.

‘‘таменам̣, бхиккхаве, йамо ра̄джа̄ евама̄ха – ‘амбхо пуриса, пама̄дата̄йа на калйа̄н̣амака̄си ка̄йена ва̄ча̄йа манаса̄. таггха твам̣, амбхо пуриса, татха̄ кариссанти йатха̄ там̣ паматтам̣. там̣ кхо пана те етам̣ па̄пакаммам̣ нева ма̄тара̄ катам̣, на питара̄ катам̣, на бха̄тара̄ катам̣, на бхагинийа̄ катам̣, на митта̄маччехи катам̣, на н̃а̄тиса̄лохитехи катам̣, на девата̄хи катам̣, на саман̣абра̄хман̣ехи катам̣; атха кхо тайа̄ветам̣ па̄пакаммам̣ катам̣. тван̃н̃еветасса випа̄кам̣ пат̣исам̣ведиссасӣ’’’ти.

‘‘таменам̣, бхиккхаве, йамо ра̄джа̄ дутийам̣ девадӯтам̣ самануйун̃джитва̄ самануга̄хитва̄ саманубха̄ситва̄, татийам̣ девадӯтам̣ самануйун̃джати самануга̄хати саманубха̄сати – ‘амбхо пуриса, на твам̣ аддаса мануссесу татийам̣ девадӯтам̣ па̄тубхӯта’нти? со евама̄ха – ‘на̄ддасам̣, бханте’’’ти.

‘‘таменам̣, бхиккхаве, йамо ра̄джа̄ евама̄ха – ‘амбхо пуриса, на твам̣ аддаса мануссесу иттхим̣ ва̄ пурисам̣ ва̄ ека̄хаматам̣ ва̄ двӣхаматам̣ ва̄ тӣхаматам̣ ва̄ уддхума̄такам̣ винӣлакам̣ випуббакаджа̄та’нти? со евама̄ха – ‘аддасам̣, бханте’’’ти.

‘‘таменам̣, бхиккхаве, йамо ра̄джа̄ евама̄ха – ‘амбхо пуриса, тасса те вин̃н̃усса сато махаллакасса на етадахоси – ахампи кхомхи маран̣адхаммо маран̣ам̣ анатӣто, ханда̄хам̣ калйа̄н̣ам̣ кароми ка̄йена ва̄ча̄йа манаса̄’ти? со евама̄ха – ‘на̄саккхиссам̣, бханте. пама̄дассам̣, бханте’’’ти.

‘‘таменам̣, бхиккхаве, йамо ра̄джа̄ татийам̣ девадӯтам̣ самануйун̃джитва̄ самануга̄хитва̄ саманубха̄ситва̄ тун̣хӣ хоти. таменам̣, бхиккхаве, нирайапа̄ла̄ пан̃чавидхабандханам̣ на̄ма ка̄ран̣ам̣ каронти. таттам̣ айокхилам̣ хаттхе гаменти. таттам̣ айокхилам̣ дутийасмим̣ хаттхе гаменти. таттам̣ айокхилам̣ па̄де гаменти. таттам̣ айокхилам̣ дутийасмим̣ па̄де гаменти. таттам̣ айокхилам̣ маджджхе урасмим̣ гаменти. со таттха дуккха̄ тибба̄ [типпа̄ (сӣ.)] кхара̄ кат̣ука̄ ведана̄ ведийати, на ча та̄ва ка̄лан̇кароти йа̄ва на там̣ па̄пакаммам̣ бйантӣхоти.

‘‘таменам̣, бхиккхаве, нирайапа̄ла̄ сам̣весетва̄ [сам̣кад̣д̣хитва̄ (ка.)] кудха̄рӣхи таччханти. со таттха дуккха̄ тибба̄ кхара̄ кат̣ука̄ ведана̄ ведийати, на ча та̄ва ка̄лан̇кароти йа̄ва на там̣ па̄пакаммам̣ бйантӣхоти.

‘‘таменам̣, бхиккхаве, нирайапа̄ла̄ уддхам̣па̄дам̣ адхосирам̣ гахетва̄ ва̄сӣхи таччханти…пе… таменам̣, бхиккхаве, нирайапа̄ла̄ ратхе йоджетва̄ а̄дитта̄йа бхӯмийа̄ сампаджджалита̄йа саджотибхӯта̄йа [сан̃джотибхӯта̄йа (сйа̄. кам̣.)] са̄рентипи пачча̄са̄рентипи…пе… таменам̣, бхиккхаве, нирайапа̄ла̄ махантам̣ ан̇га̄рапаббатам̣ а̄диттам̣ сампаджджалитам̣ саджотибхӯтам̣ а̄ропентипи оропентипи…пе… таменам̣, бхиккхаве, нирайапа̄ла̄ уддхам̣па̄дам̣ адхосирам̣ гахетва̄ татта̄йа лохакумбхийа̄ паккхипанти, а̄дитта̄йа сампаджджалита̄йа саджотибхӯта̄йа. со таттха пхен̣уддехакам̣ паччама̄но сакимпи уддхам̣ гаччхати, сакимпи адхо гаччхати, сакимпи тирийам̣ гаччхати. со таттха дуккха̄ тибба̄ кхара̄ кат̣ука̄ ведана̄ ведийати, на ча та̄ва ка̄лам̣ кароти йа̄ва на там̣ па̄пакаммам̣ бйантӣхоти. таменам̣, бхиккхаве, нирайапа̄ла̄ маха̄нирайе паккхипанти. со кхо пана, бхиккхаве, маха̄нирайо –

‘‘чатуккан̣н̣о чатудва̄ро, вибхатто бха̄гасо мито;

айопа̄ка̄рапарийанто, айаса̄ пат̣икуджджито.

‘‘тасса айомайа̄ бхӯми, джалита̄ теджаса̄ йута̄;

саманта̄ йоджанасатам̣, пхаритва̄ тит̣т̣хати саббада̄’’ти [пе. ва. 70-71, 240-241].

‘‘бхӯтапуббам̣, бхиккхаве, йамасса ран̃н̃о етадахоси – ‘йе кира, бхо, локе па̄пака̄ни камма̄ни каронти те еварӯпа̄ вивидха̄ каммака̄ран̣а̄ карӣйанти. ахо вата̄хам̣ мануссаттам̣ лабхеййам̣, татха̄гато ча локе уппаджджеййа арахам̣ самма̄самбуддхо, тан̃ча̄хам̣ бхагавантам̣ пайирупа̄сеййам̣. со ча ме бхагава̄ дхаммам̣ десеййа, тасса ча̄хам̣ бхагавато дхаммам̣ а̄джа̄неййа’нти. там̣ кхо пана̄хам̣, бхиккхаве, на ан̃н̃асса саман̣асса ва̄ бра̄хман̣асса ва̄ сутва̄ евам̣ вада̄ми, апи ча кхо, бхиккхаве, йадева ме са̄мам̣ н̃а̄там̣ са̄мам̣ дит̣т̣хам̣ са̄мам̣ видитам̣ тадева̄хам̣ вада̄мӣ’’ти.

‘‘чодита̄ девадӯтехи, йе памаджджанти ма̄н̣ава̄;

те дӣгхараттам̣ сочанти, хӣнака̄йӯпага̄ нара̄.

‘‘йе ча кхо девадӯтехи, санто саппуриса̄ идха;

чодита̄ наппамаджджанти, арийадхамме куда̄чанам̣.

‘‘упа̄да̄не бхайам̣ дисва̄, джа̄тимаран̣асамбхаве;

анупа̄да̄ вимуччанти, джа̄тимаран̣асан̇кхайе.

‘‘те аппаматта̄ [те кхоппаматта̄ (сӣ.), те кхемаппатта̄ (сйа̄. кам̣. пӣ.) ма. ни. 3.271] сукхино [сукхита̄ (сӣ. сйа̄.)], дит̣т̣хадхамма̄бхиниббута̄;

саббаверабхайа̄тӣта̄, саббадуккхам̣ упаччагу’’нти. чхат̣т̣хам̣;