4. нида̄насуттам̣

34. ‘‘тӣн̣има̄ни, бхиккхаве, нида̄на̄ни камма̄нам̣ самудайа̄йа. катама̄ни тӣн̣и? лобхо нида̄нам̣ камма̄нам̣ самудайа̄йа, досо нида̄нам̣ камма̄нам̣ самудайа̄йа, мохо нида̄нам̣ камма̄нам̣ самудайа̄йа.

‘‘йам̣, бхиккхаве, лобхапакатам̣ каммам̣ лобхаджам̣ лобханида̄нам̣ лобхасамудайам̣, йаттхасса аттабха̄во ниббаттати таттха там̣ каммам̣ випаччати. йаттха там̣ каммам̣ випаччати таттха тасса каммасса випа̄кам̣ пат̣исам̣ведети, дит̣т̣хе ва̄ дхамме упападжджа ва̄ [упападждже ва̄ (сӣ. сйа̄. кам̣.) упападжджитва̄ти ма. ни. 3.303 па̄л̣ийа̄ сам̣ван̣н̣ана̄] апаре ва̄ [апара̄паре ва̄ (ка.)] парийа̄йе.

‘‘йам̣, бхиккхаве, досапакатам̣ каммам̣ досаджам̣ досанида̄нам̣ досасамудайам̣, йаттхасса аттабха̄во ниббаттати таттха там̣ каммам̣ випаччати. йаттха там̣ каммам̣ випаччати таттха тасса каммасса випа̄кам̣ пат̣исам̣ведети, дит̣т̣хе ва̄ дхамме упападжджа ва̄ апаре ва̄ парийа̄йе.

‘‘йам̣, бхиккхаве, мохапакатам̣ каммам̣ мохаджам̣ моханида̄нам̣ мохасамудайам̣, йаттхасса аттабха̄во ниббаттати таттха там̣ каммам̣ випаччати. йаттха там̣ каммам̣ випаччати таттха тасса каммасса випа̄кам̣ пат̣исам̣ведети, дит̣т̣хе ва̄ дхамме упападжджа ва̄ апаре ва̄ парийа̄йе.

‘‘сеййатха̄пи, бхиккхаве, бӣджа̄ни акхан̣д̣а̄ни апӯтӣни ава̄та̄тапахата̄ни са̄ра̄да̄ни сукхасайита̄ни сукхетте супарикаммаката̄йа бхӯмийа̄ никкхитта̄ни. дево ча самма̄дха̄рам̣ ануппавеччхеййа. евассу та̄ни, бхиккхаве, бӣджа̄ни вуддхим̣ вирул̣хим̣ вепуллам̣ а̄паджджеййум̣. евамевам̣ кхо, бхиккхаве, йам̣ лобхапакатам̣ каммам̣ лобхаджам̣ лобханида̄нам̣ лобхасамудайам̣, йаттхасса аттабха̄во ниббаттати таттха там̣ каммам̣ випаччати. йаттха там̣ каммам̣ випаччати таттха тасса каммасса випа̄кам̣ пат̣исам̣ведети, дит̣т̣хе ва̄ дхамме упападжджа ва̄ апаре ва̄ парийа̄йе.

‘‘йам̣ досапакатам̣ каммам̣…пе… йам̣ мохапакатам̣ каммам̣ мохаджам̣ моханида̄нам̣ мохасамудайам̣, йаттхасса аттабха̄во ниббаттати таттха там̣ каммам̣ випаччати. йаттха там̣ каммам̣ випаччати таттха тасса каммасса випа̄кам̣ пат̣исам̣ведети, дит̣т̣хе ва̄ дхамме упападжджа ва̄ апаре ва̄ парийа̄йе. има̄ни кхо, бхиккхаве, тӣн̣и нида̄на̄ни камма̄нам̣ самудайа̄йа.

‘‘тӣн̣има̄ни, бхиккхаве, нида̄на̄ни камма̄нам̣ самудайа̄йа. катама̄ни тӣн̣и? алобхо нида̄нам̣ камма̄нам̣ самудайа̄йа, адосо нида̄нам̣ камма̄нам̣ самудайа̄йа, амохо нида̄нам̣ камма̄нам̣ самудайа̄йа.

‘‘йам̣, бхиккхаве, алобхапакатам̣ каммам̣ алобхаджам̣ алобханида̄нам̣ алобхасамудайам̣, лобхе вигате евам̣ там̣ каммам̣ пахӣнам̣ хоти уччхиннамӯлам̣ та̄ла̄ваттхукатам̣ анабха̄ван̇катам̣ а̄йатим̣ ануппа̄дадхаммам̣.

‘‘йам̣, бхиккхаве, адосапакатам̣ каммам̣ адосаджам̣ адосанида̄нам̣ адосасамудайам̣, досе вигате евам̣ там̣ каммам̣ пахӣнам̣ хоти уччхиннамӯлам̣ та̄ла̄ваттхукатам̣ анабха̄ван̇катам̣ а̄йатим̣ ануппа̄дадхаммам̣.

‘‘йам̣, бхиккхаве, амохапакатам̣ каммам̣ амохаджам̣ амоханида̄нам̣ амохасамудайам̣, мохе вигате евам̣ там̣ каммам̣ пахӣнам̣ хоти уччхиннамӯлам̣ та̄ла̄ваттхукатам̣ анабха̄ван̇катам̣ а̄йатим̣ ануппа̄дадхаммам̣.

‘‘сеййатха̄пи, бхиккхаве, бӣджа̄ни акхан̣д̣а̄ни апӯтӣни ава̄та̄тапахата̄ни са̄ра̄да̄ни сукхасайита̄ни. та̄ни пурисо аггина̄ д̣ахеййа. аггина̄ д̣ахитва̄ масим̣ кареййа. масим̣ каритва̄ маха̄ва̄те ва̄ опхун̣еййа [опунеййа (сӣ. пӣ.)] надийа̄ ва̄ сӣгхасота̄йа пава̄хеййа. евассу та̄ни, бхиккхаве, бӣджа̄ни уччхиннамӯла̄ни та̄ла̄ваттхуката̄ни анабха̄ван̇ката̄ни [анабха̄ваката̄ни (сӣ. пӣ.)] а̄йатим̣ ануппа̄дадхамма̄ни. евамевам̣ кхо, бхиккхаве, йам̣ алобхапакатам̣ каммам̣ алобхаджам̣ алобханида̄нам̣ алобхасамудайам̣, лобхе вигате евам̣ там̣ каммам̣ пахӣнам̣ хоти уччхиннамӯлам̣ та̄ла̄ваттхукатам̣ анабха̄ван̇катам̣ а̄йатим̣ ануппа̄дадхаммам̣.

‘‘йам̣ адосапакатам̣ каммам̣…пе… йам̣ амохапакатам̣ каммам̣ амохаджам̣ амоханида̄нам̣ амохасамудайам̣, мохе вигате евам̣ там̣ каммам̣ пахӣнам̣ хоти…пе… а̄йатим̣ ануппа̄дадхаммам̣. има̄ни кхо, бхиккхаве, тӣн̣и нида̄на̄ни камма̄нам̣ самудайа̄йа̄’’ти.

‘‘лобхаджам̣ досаджан̃чева [досаджам̣ каммам̣ (ка.)], мохаджан̃ча̄павиддасу;

йам̣ тена пакатам̣ каммам̣, аппам̣ ва̄ йади ва̄ бахум̣;

идхева там̣ веданийам̣, ваттху ан̃н̃ам̣ на виджджати.

‘‘тасма̄ лобхан̃ча досан̃ча, мохаджан̃ча̄пи виддасу;

виджджам̣ уппа̄дайам̣ бхиккху, сабба̄ дуггатийо джахе’’ти. чатуттхам̣;