9. андхасуттам̣

29. ‘‘тайоме, бхиккхаве, пуггала̄ санто сам̣виджджама̄на̄ локасмим̣. катаме тайо? андхо, екачаккху, двичаккху. катамо ча, бхиккхаве, пуггало андхо? идха, бхиккхаве, екаччасса пуггаласса татха̄рӯпам̣ чаккху на хоти йатха̄рӯпена чаккхуна̄ анадхигатам̣ ва̄ бхогам̣ адхигаччхеййа адхигатам̣ ва̄ бхогам̣ пха̄тим̣ кареййа [пха̄тикареййа (сӣ.)]; татха̄рӯпамписса чаккху на хоти йатха̄рӯпена чаккхуна̄ кусала̄кусале дхамме джа̄неййа, са̄ваджджа̄навадждже дхамме джа̄неййа, хӣнаппан̣ӣте дхамме джа̄неййа, кан̣хасуккасаппат̣ибха̄ге дхамме джа̄неййа. айам̣ вуччати, бхиккхаве, пуггало андхо.

‘‘катамо ча, бхиккхаве, пуггало екачаккху? идха, бхиккхаве, екаччасса пуггаласса татха̄рӯпам̣ чаккху хоти йатха̄рӯпена чаккхуна̄ анадхигатам̣ ва̄ бхогам̣ адхигаччхеййа адхигатам̣ ва̄ бхогам̣ пха̄тим̣ кареййа; татха̄рӯпам̣ панасса [татха̄рӯпамписса (сйа̄. кам̣. пӣ. ка.)] чаккху на хоти йатха̄рӯпена чаккхуна̄ кусала̄кусале дхамме джа̄неййа, са̄ваджджа̄навадждже дхамме джа̄неййа, хӣнаппан̣ӣте дхамме джа̄неййа, кан̣хасуккасаппат̣ибха̄ге дхамме джа̄неййа. айам̣ вуччати, бхиккхаве, пуггало екачаккху.

‘‘катамо ча, бхиккхаве, пуггало двичаккху? идха, бхиккхаве, екаччасса пуггаласса татха̄рӯпам̣ чаккху хоти йатха̄рӯпена чаккхуна̄ анадхигатам̣ ва̄ бхогам̣ адхигаччхеййа, адхигатам̣ ва̄ бхогам̣ пха̄тим̣ кареййа; татха̄рӯпамписса чаккху хоти йатха̄рӯпена чаккхуна̄ кусала̄кусале дхамме джа̄неййа; са̄ваджджа̄навадждже дхамме джа̄неййа, хӣнаппан̣ӣте дхамме джа̄неййа, кан̣хасуккасаппат̣ибха̄ге дхамме джа̄неййа. айам̣ вуччати, бхиккхаве, пуггало двичаккху. ‘име кхо, бхиккхаве, тайо пуггала̄ санто сам̣виджджама̄на̄ локасми’’’нти.

‘‘на чева бхога̄ татха̄рӯпа̄, на ча пун̃н̃а̄ни куббати;

убхайаттха калигга̄хо, андхасса хатачаккхуно.

‘‘атха̄пара̄йам̣ аккха̄то, екачаккху ча пуггало;

дхамма̄дхаммена сат̣хосо [сам̣сат̣т̣хо (сӣ. сйа̄. кам̣. пӣ.), сат̣хоти (ка.)], бхога̄ни парийесати.

‘‘тхеййена кӯт̣акаммена, муса̄ва̄дена чӯбхайам̣;

кусало хоти сан̇гха̄тум̣ [сам̣ха̄тум̣ (сйа̄.)], ка̄мабхогӣ ча ма̄наво;

ито со нирайам̣ гантва̄, екачаккху вихан̃н̃ати.

‘‘двичаккху пана аккха̄то, сет̣т̣хо пурисапуггало;

дхаммаладдхехи бхогехи, ут̣т̣ха̄на̄дхигатам̣ дханам̣.

‘‘дада̄ти сет̣т̣хасан̇каппо, абйаггама̄насо наро;

упети бхаддакам̣ т̣ха̄нам̣, йаттха гантва̄ на сочати.

‘‘андхан̃ча екачаккхун̃ча, а̄рака̄ париваджджайе;

двичаккхум̣ пана севетха, сет̣т̣хам̣ пурисапуггала’’нти. навамам̣;