10. авакуджджасуттам̣

30. ‘‘тайоме, бхиккхаве [пу. па. 107-108], пуггала̄ санто сам̣виджджама̄на̄ локасмим̣. катаме тайо? авакуджджапан̃н̃о пуггало, уччхан̇гапан̃н̃о пуггало, путхупан̃н̃о пуггало. катамо ча, бхиккхаве, авакуджджапан̃н̃о пуггало? идха, бхиккхаве, екаччо пуггало а̄ра̄мам̣ ганта̄ хоти абхиккхан̣ам̣ бхиккхӯнам̣ сантике дхаммассавана̄йа. тасса бхиккхӯ дхаммам̣ десенти а̄дикалйа̄н̣ам̣ маджджхекалйа̄н̣ам̣ парийоса̄накалйа̄н̣ам̣ са̄ттхам̣ сабйан̃джанам̣, кевалапарипун̣н̣ам̣ парисуддхам̣ брахмачарийам̣ пака̄сенти. со тасмим̣ а̄сане нисинно тасса̄ катха̄йа нева а̄дим̣ манаси кароти, на маджджхам̣ манаси кароти, на парийоса̄нам̣ манаси кароти; вут̣т̣хитопи тамха̄ а̄сана̄ тасса̄ катха̄йа нева а̄дим̣ манаси кароти, на маджджхам̣ манаси кароти, на парийоса̄нам̣ манаси кароти. сеййатха̄пи, бхиккхаве, кумбхо никкуджджо [никкуджджо (сӣ. пӣ.)] татра удакам̣ а̄ситтам̣ виват̣т̣ати, но сан̣т̣ха̄ти; евамевам̣ кхо, бхиккхаве, идхекаччо пуггало а̄ра̄мам̣ ганта̄ хоти абхиккхан̣ам̣ бхиккхӯнам̣ сантике дхаммассавана̄йа. тасса бхиккхӯ дхаммам̣ десенти а̄дикалйа̄н̣ам̣ маджджхекалйа̄н̣ам̣ парийоса̄накалйа̄н̣ам̣ са̄ттхам̣ сабйан̃джанам̣, кевалапарипун̣н̣ам̣ парисуддхам̣ брахмачарийам̣ пака̄сенти. со тасмим̣ а̄сане нисинно тасса̄ катха̄йа нева а̄дим̣ манаси кароти, на маджджхам̣ манаси кароти, на парийоса̄нам̣ манаси кароти; вут̣т̣хитопи тамха̄ а̄сана̄ тасса̄ катха̄йа нева̄дим̣ манаси кароти, на маджджхам̣ манаси кароти, на парийоса̄нам̣ манаси кароти. айам̣ вуччати, бхиккхаве, авакуджджапан̃н̃о пуггало.

‘‘катамо ча, бхиккхаве, уччхан̇гапан̃н̃о пуггало? идха, бхиккхаве, екаччо пуггало а̄ра̄мам̣ ганта̄ хоти абхиккхан̣ам̣ бхиккхӯнам̣ сантике дхаммассавана̄йа. тасса бхиккхӯ дхаммам̣ десенти а̄дикалйа̄н̣ам̣ маджджхекалйа̄н̣ам̣ парийоса̄накалйа̄н̣ам̣ са̄ттхам̣ сабйан̃джанам̣, кевалапарипун̣н̣ам̣ парисуддхам̣ брахмачарийам̣ пака̄сенти. со тасмим̣ а̄сане нисинно тасса̄ катха̄йа а̄димпи манаси кароти, маджджхампи манаси кароти, парийоса̄нампи манаси кароти; вут̣т̣хито ча кхо тамха̄ а̄сана̄ тасса̄ катха̄йа нева̄дим̣ манаси кароти, на маджджхам̣ манаси кароти, на парийоса̄нам̣ манаси кароти. сеййатха̄пи, бхиккхаве, пурисасса уччхан̇ге на̄на̄кхаджджака̄ни а̄кин̣н̣а̄ни – тила̄ тан̣д̣ула̄ модака̄ бадара̄. со тамха̄ а̄сана̄ вут̣т̣хаханто сатисаммоса̄ пакиреййа. евамевам̣ кхо, бхиккхаве, идхекаччо пуггало а̄ра̄мам̣ ганта̄ хоти абхиккхан̣ам̣ бхиккхӯнам̣ сантике дхаммассавана̄йа. тасса бхиккхӯ дхаммам̣ десенти а̄дикалйа̄н̣ам̣ маджджхекалйа̄н̣ам̣ парийоса̄накалйа̄н̣ам̣ са̄ттхам̣ сабйан̃джанам̣, кевалапарипун̣н̣ам̣ парисуддхам̣ брахмачарийам̣ пака̄сенти. со тасмим̣ а̄сане нисинно тасса̄ катха̄йа а̄димпи манаси кароти, маджджхампи манаси кароти, парийоса̄нампи манаси кароти; вут̣т̣хито ча кхо тамха̄ а̄сана̄ тасса̄ катха̄йа нева а̄дим̣ манаси кароти, на маджджхам̣ манаси кароти, на парийоса̄нам̣ манаси кароти. айам̣ вуччати, бхиккхаве, уччхан̇гапан̃н̃о пуггало.

‘‘катамо ча, бхиккхаве, путхупан̃н̃о пуггало? идха, бхиккхаве, екаччо пуггало а̄ра̄мам̣ ганта̄ хоти абхиккхан̣ам̣ бхиккхӯнам̣ сантике дхаммассавана̄йа. тасса бхиккхӯ дхаммам̣ десенти а̄дикалйа̄н̣ам̣ маджджхекалйа̄н̣ам̣ парийоса̄накалйа̄н̣ам̣ са̄ттхам̣ сабйан̃джанам̣, кевалапарипун̣н̣ам̣ парисуддхам̣ брахмачарийам̣ пака̄сенти. со тасмим̣ а̄сане нисинно тасса̄ катха̄йа а̄димпи манаси кароти, маджджхампи манаси кароти, парийоса̄нампи манаси кароти; вут̣т̣хитопи тамха̄ а̄сана̄ тасса̄ катха̄йа а̄димпи манаси кароти, маджджхампи манаси кароти, парийоса̄нампи манаси кароти. сеййатха̄пи, бхиккхаве, кумбхо уккуджджо татра удакам̣ а̄ситтам̣ сан̣т̣ха̄ти но виват̣т̣ати; евамевам̣ кхо, бхиккхаве, идхекаччо пуггало а̄ра̄мам̣ ганта̄ хоти абхиккхан̣ам̣ бхиккхӯнам̣ сантике дхаммассавана̄йа. тасса бхиккхӯ дхаммам̣ десенти а̄дикалйа̄н̣ам̣ маджджхекалйа̄н̣ам̣ парийоса̄накалйа̄н̣ам̣ са̄ттхам̣ сабйан̃джанам̣, кевалапарипун̣н̣ам̣ парисуддхам̣ брахмачарийам̣ пака̄сенти. со тасмим̣ а̄сане нисинно тасса̄ катха̄йа а̄димпи манаси кароти, маджджхампи манаси кароти, парийоса̄нампи манаси кароти; вут̣т̣хитопи тамха̄ а̄сана̄ тасса̄ катха̄йа а̄димпи манаси кароти, маджджхампи манаси кароти, парийоса̄нампи манаси кароти. айам̣ вуччати, бхиккхаве, путхупан̃н̃о пуггало. ‘име кхо, бхиккхаве, тайо пуггала̄ санто сам̣виджджама̄на̄ локасми’’’нти.

‘‘авакуджджапан̃н̃о пурисо, думмедхо авичаккхан̣о;

абхиккхан̣ампи че хоти, ганта̄ бхиккхӯна сантике.

‘‘а̄дим̣ катха̄йа маджджхан̃ча, парийоса̄нан̃ча та̄дисо;

уггахетум̣ на саккоти, пан̃н̃а̄ хисса на виджджати.

‘‘уччхан̇гапан̃н̃о пурисо, сеййо етена вуччати;

абхиккхан̣ампи че хоти, ганта̄ бхиккхӯна сантике.

‘‘а̄дим̣ катха̄йа маджджхан̃ча, парийоса̄нан̃ча та̄дисо;

нисинно а̄сане тасмим̣, уггахетва̄на бйан̃джанам̣;

вут̣т̣хито наппаджа̄на̄ти, гахитам̣ хисса [гахитамписса (ка.)] муссати.

‘‘путхупан̃н̃о ча пурисо, сеййо етехи [етена (ка.)] вуччати;

абхиккхан̣ампи че хоти, ганта̄ бхиккхӯна сантике.

‘‘а̄дим̣ катха̄йа маджджхан̃ча, парийоса̄нан̃ча та̄дисо;

нисинно а̄сане тасмим̣, уггахетва̄на бйан̃джанам̣.

‘‘дха̄рети сет̣т̣хасан̇каппо, абйаггама̄насо наро;

дхамма̄нудхаммаппат̣ипанно, дуккхассантакаро сийа̄’’ти. дасамам̣;

пуггалавагго татийо.