8. девалокасуттам̣

18. ‘‘саче во, бхиккхаве, ан̃н̃атиттхийа̄ парибба̄джака̄ евам̣ пуччхеййум̣ – ‘девалокӯпапаттийа̄, а̄вусо, саман̣е готаме брахмачарийам̣ вуссатха̄’ти? нану тумхе, бхиккхаве, евам̣ пут̣т̣ха̄ ат̣т̣ӣйеййа̄тха хара̄йеййа̄тха джигуччхеййа̄тха̄’’ти? ‘‘евам̣, бханте’’. ‘‘ити кира тумхе, бхиккхаве, диббена а̄йуна̄ ат̣т̣ӣйатха хара̄йатха джигуччхатха, диббена ван̣н̣ена диббена сукхена диббена йасена диббена̄дхипатеййена ат̣т̣ӣйатха хара̄йатха джигуччхатха; пагева кхо пана, бхиккхаве, тумхехи ка̄йадуччаритена ат̣т̣ӣйитаббам̣ хара̄йитаббам̣ джигуччхитаббам̣, вачӣдуччаритена… манодуччаритена ат̣т̣ӣйитаббам̣ хара̄йитаббам̣ джигуччхитабба’’нти. ат̣т̣хамам̣.