9. пат̣хамапа̄пан̣икасуттам̣

19. ‘‘тӣхи, бхиккхаве, ан̇гехи саманна̄гато па̄пан̣ико абхаббо анадхигатам̣ ва̄ бхогам̣ адхигантум̣, адхигатам̣ ва̄ бхогам̣ пха̄тим̣ ка̄тум̣. катамехи тӣхи? идха, бхиккхаве, па̄пан̣ико пуббан̣хасамайам̣ [маджджхантикасамайам̣ (сӣ. сйа̄. кам̣. пӣ.)] на саккаччам̣ каммантам̣ адхит̣т̣ха̄ти, маджджханхикасамайам̣ на саккаччам̣ каммантам̣ адхит̣т̣ха̄ти, са̄йанхасамайам̣ на саккаччам̣ каммантам̣ адхит̣т̣ха̄ти. имехи кхо, бхиккхаве, тӣхи ан̇гехи саманна̄гато па̄пан̣ико абхаббо анадхигатам̣ ва̄ бхогам̣ адхигантум̣, адхигатам̣ ва̄ бхогам̣ пха̄тим̣ ка̄тум̣ [пха̄тикаттум̣ (сӣ.), пха̄тика̄тум̣ (сйа̄. кам̣. пӣ.)].

‘‘евамевам̣ кхо, бхиккхаве, тӣхи дхаммехи саманна̄гато бхиккху абхаббо анадхигатам̣ ва̄ кусалам̣ дхаммам̣ адхигантум̣, адхигатам̣ ва̄ кусалам̣ дхаммам̣ пха̄тим̣ ка̄тум̣. катамехи тӣхи? идха, бхиккхаве, бхиккху пуббан̣хасамайам̣ на саккаччам̣ сама̄дхинимиттам̣ адхит̣т̣ха̄ти, маджджханхикасамайам̣ на саккаччам̣ сама̄дхинимиттам̣ адхит̣т̣ха̄ти, са̄йанхасамайам̣ на саккаччам̣ сама̄дхинимиттам̣ адхит̣т̣ха̄ти. имехи кхо, бхиккхаве, тӣхи дхаммехи саманна̄гато бхиккху абхаббо анадхигатам̣ ва̄ кусалам̣ дхаммам̣ адхигантум̣, адхигатам̣ ва̄ кусалам̣ дхаммам̣ пха̄тим̣ ка̄тум̣.

‘‘тӣхи, бхиккхаве, ан̇гехи саманна̄гато па̄пан̣ико бхаббо анадхигатам̣ ва̄ бхогам̣ адхигантум̣, адхигатам̣ ва̄ бхогам̣ пха̄тим̣ ка̄тум̣. катамехи тӣхи? идха, бхиккхаве, па̄пан̣ико пуббан̣хасамайам̣ саккаччам̣ каммантам̣ адхит̣т̣ха̄ти, маджджханхикасамайам̣…пе… са̄йанхасамайам̣ саккаччам̣ каммантам̣ адхит̣т̣ха̄ти. имехи кхо, бхиккхаве, тӣхи ан̇гехи саманна̄гато па̄пан̣ико бхаббо анадхигатам̣ ва̄ бхогам̣ адхигантум̣, адхигатам̣ ва̄ бхогам̣ пха̄тим̣ ка̄тум̣.

‘‘евамевам̣ кхо, бхиккхаве, тӣхи дхаммехи саманна̄гато бхиккху бхаббо анадхигатам̣ ва̄ кусалам̣ дхаммам̣ адхигантум̣, адхигатам̣ ва̄ кусалам̣ дхаммам̣ пха̄тим̣ ка̄тум̣. катамехи тӣхи? идха, бхиккхаве, бхиккху пуббан̣хасамайам̣ саккаччам̣ сама̄дхинимиттам̣ адхит̣т̣ха̄ти, маджджханхикасамайам̣…пе… са̄йанхасамайам̣ саккаччам̣ сама̄дхинимиттам̣ адхит̣т̣ха̄ти. имехи кхо, бхиккхаве, тӣхи дхаммехи саманна̄гато бхиккху бхаббо анадхигатам̣ ва̄ кусалам̣ дхаммам̣ адхигантум̣, адхигатам̣ ва̄ кусалам̣ дхаммам̣ пха̄тим̣ ка̄ту’’нти. навамам̣.