2. дутийамаха̄на̄масуттам̣

12. екам̣ самайам̣ бхагава̄ саккесу вихарати капилаваттхусмим̣ нигродха̄ра̄ме. тена кхо пана самайена маха̄на̄мо сакко гила̄на̄ вут̣т̣хито хоти ачиравут̣т̣хито гелан̃н̃а̄. тена кхо пана самайена самбахула̄ бхиккхӯ бхагавато чӣваракаммам̣ каронти – ‘‘нит̣т̣хитачӣваро бхагава̄ тема̄саччайена ча̄рикам̣ паккамиссатӣ’’ти.

ассоси кхо маха̄на̄мо сакко – ‘‘самбахула̄ кира бхиккхӯ бхагавато чӣваракаммам̣ каронти – ‘нит̣т̣хитачӣваро бхагава̄ тема̄саччайена ча̄рикам̣ паккамиссатӣ’’’ти. атха кхо маха̄на̄мо сакко йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо маха̄на̄мо сакко бхагавантам̣ етадавоча – ‘‘сутам̣ метам̣, бханте – ‘самбахула̄ кира бхиккхӯ бхагавато чӣваракаммам̣ каронти – нит̣т̣хитачӣваро бхагава̄ тема̄саччайена ча̄рикам̣ паккамиссатӣ’ти. тесам̣ но, бханте, на̄на̄виха̄рехи вихаратам̣ кенасса виха̄рена виха̄табба’’нти?

‘‘са̄дху са̄дху, маха̄на̄ма! етам̣ кхо, маха̄на̄ма, тумха̄кам̣ патирӯпам̣ кулапутта̄нам̣ йам̣ тумхе татха̄гатам̣ упасан̇камитва̄ пуччхеййа̄тха – ‘тесам̣ но, бханте, на̄на̄виха̄рехи вихаратам̣ кенасса виха̄рена виха̄табба’нти? саддхо кхо, маха̄на̄ма, а̄ра̄дхако хоти, но ассаддхо; а̄раддхавӣрийо а̄ра̄дхако хоти, но кусӣто; упат̣т̣хитассати а̄ра̄дхако хоти, но мут̣т̣хассати; сама̄хито а̄ра̄дхако хоти, но асама̄хито; пан̃н̃ава̄ а̄ра̄дхако хоти, но дуппан̃н̃о. имесу кхо твам̣, маха̄на̄ма, пан̃часу дхаммесу патит̣т̣ха̄йа чха дхамме уттари бха̄веййа̄си.

[а. ни. 6.9] ‘‘идха твам̣, маха̄на̄ма, татха̄гатам̣ ануссареййа̄си – ‘итипи со бхагава̄…пе… саттха̄ деваманусса̄нам̣ буддхо бхагава̄’ти. йасмим̣, маха̄на̄ма, самайе арийаса̄вако татха̄гатам̣ ануссарати, невасса тасмим̣ самайе ра̄гапарийут̣т̣хитам̣ читтам̣ хоти, на досапарийут̣т̣хитам̣ читтам̣ хоти, на мохапарийут̣т̣хитам̣ читтам̣ хоти; уджугатамевасса тасмим̣ самайе читтам̣ хоти татха̄гатам̣ а̄раббха. уджугатачитто кхо пана, маха̄на̄ма, арийаса̄вако лабхати аттхаведам̣, лабхати дхаммаведам̣, лабхати дхаммӯпасам̣хитам̣ па̄моджджам̣. памудитасса пӣти джа̄йати, пӣтиманасса ка̄йо пассамбхати, пассаддхака̄йо сукхам̣ ведийати, сукхино читтам̣ сама̄дхийати. имам̣ кхо твам̣, маха̄на̄ма, буддха̄нуссатим̣ гаччхантопи бха̄веййа̄си, т̣хитопи бха̄веййа̄си, нисиннопи бха̄веййа̄си, сайа̄нопи бха̄веййа̄си, каммантам̣ адхит̣т̣хахантопи бха̄веййа̄си, путтасамба̄дхасайанам̣ аджджха̄васантопи бха̄веййа̄си.

‘‘пуна чапарам̣ твам̣, маха̄на̄ма, дхаммам̣ ануссареййа̄си…пе… сан̇гхам̣ ануссареййа̄си…пе… аттано сӣла̄ни ануссареййа̄си…пе… аттано ча̄гам̣ ануссареййа̄си…пе… девата̄ ануссареййа̄си – ‘санти дева̄ ча̄тумаха̄ра̄джика̄…пе… санти дева̄ татуттари. йатха̄рӯпа̄йа саддха̄йа саманна̄гата̄ та̄ девата̄ ито чута̄ таттхӯпапанна̄, майхампи татха̄рӯпа̄ саддха̄ сам̣виджджати. йатха̄рӯпена сӣлена… сутена… ча̄гена… пан̃н̃а̄йа саманна̄гата̄ та̄ девата̄ ито чута̄ таттхӯпапанна̄, майхампи татха̄рӯпа̄ пан̃н̃а̄ сам̣виджджатӣ’ти. йасмим̣, маха̄на̄ма, самайе арийаса̄вако аттано ча та̄сан̃ча девата̄нам̣ саддхан̃ча сӣлан̃ча сутан̃ча ча̄ган̃ча пан̃н̃ан̃ча ануссарати, невасса тасмим̣ самайе ра̄гапарийут̣т̣хитам̣ читтам̣ хоти, на досапарийут̣т̣хитам̣ читтам̣ хоти, на мохапарийут̣т̣хитам̣ читтам̣ хоти; уджугатамевасса тасмим̣ самайе читтам̣ хоти девата̄ а̄раббха. уджугатачитто кхо пана, маха̄на̄ма, арийаса̄вако лабхати аттхаведам̣, лабхати дхаммаведам̣, лабхати дхаммӯпасам̣хитам̣ па̄моджджам̣. памудитасса пӣти джа̄йати, пӣтиманасса ка̄йо пассамбхати, пассаддхака̄йо сукхам̣ ведийати, сукхино читтам̣ сама̄дхийати. имам̣ кхо твам̣, маха̄на̄ма, девата̄нуссатим̣ гаччхантопи бха̄веййа̄си, т̣хитопи бха̄веййа̄си, нисиннопи бха̄веййа̄си, сайа̄нопи бха̄веййа̄си, каммантам̣ адхит̣т̣хахантопи бха̄веййа̄си, путтасамба̄дхасайанам̣ аджджха̄васантопи бха̄веййа̄сӣ’’ти. дутийам̣.