4. аджитасуттам̣

116. атха кхо аджито парибба̄джако йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо аджито парибба̄джако бхагавантам̣ етадавоча –

‘‘амха̄кам̣, бхо готама, пан̣д̣ито на̄ма сабрахмача̄рӣ. тена пан̃чаматта̄ни читтат̣т̣ха̄насата̄ни чинтита̄ни, йехи ан̃н̃атиттхийа̄ упа̄раддха̄ва джа̄нанти [упа̄раддха̄ паджа̄нанти (сӣ.)] упа̄раддхасма̄’’ти [упа̄раддхамха̄ти (сӣ. пӣ.)].

атха кхо бхагава̄ бхиккхӯ а̄мантеси – ‘‘дха̄ретха но тумхе, бхиккхаве, пан̣д̣итаваттхӯнӣ’’ти? ‘‘етасса, бхагава̄, ка̄ло етасса, сугата, ка̄ло йам̣ бхагава̄ бха̄сеййа, бхагавато сутва̄ бхиккхӯ дха̄рессантӣ’’ти.

‘‘тена хи, бхиккхаве, сун̣а̄тха, са̄дхукам̣ манаси каротха; бха̄сисса̄мӣ’’ти. ‘‘евам̣, бханте’’ти кхо те бхиккхӯ бхагавато паччассосум̣. бхагава̄ етадавоча –

‘‘идха, бхиккхаве, екаччо адхаммикена ва̄дена адхаммикам̣ ва̄дам̣ абхинигган̣ха̄ти абхиниппӣл̣ети, тена ча адхаммикам̣ парисам̣ ран̃джети. тена са̄ адхаммика̄ париса̄ учча̄саддамаха̄садда̄ хоти – ‘пан̣д̣ито вата, бхо, пан̣д̣ито вата, бхо’ти.

‘‘идха пана, бхиккхаве, екаччо адхаммикена ва̄дена дхаммикам̣ ва̄дам̣ абхинигган̣ха̄ти абхиниппӣл̣ети, тена ча адхаммикам̣ парисам̣ ран̃джети. тена са̄ адхаммика̄ париса̄ учча̄саддамаха̄садда̄ хоти – ‘пан̣д̣ито вата, бхо, пан̣д̣ито вата, бхо’ти.

‘‘идха пана, бхиккхаве, екаччо адхаммикена ва̄дена дхаммикан̃ча ва̄дам̣ адхаммикан̃ча ва̄дам̣ абхинигган̣ха̄ти абхиниппӣл̣ети, тена ча адхаммикам̣ парисам̣ ран̃джети. тена са̄ адхаммика̄ париса̄ учча̄саддамаха̄садда̄ хоти – ‘пан̣д̣ито вата, бхо, пан̣д̣ито вата, бхо’ти.

‘‘адхаммо ча, бхиккхаве, ведитаббо дхаммо ча; анаттхо ча ведитаббо аттхо ча. адхамман̃ча видитва̄ дхамман̃ча, анаттхан̃ча видитва̄ аттхан̃ча йатха̄ дхаммо йатха̄ аттхо татха̄ пат̣ипаджджитаббам̣.

‘‘катамо ча, бхиккхаве, адхаммо, катамо ча дхаммо, катамо ча анаттхо, катамо ча аттхо? миччха̄дит̣т̣хи, бхиккхаве, адхаммо; самма̄дит̣т̣хи дхаммо; йе ча миччха̄дит̣т̣хипаччайа̄ анеке па̄пака̄ акусала̄ дхамма̄ самбхаванти, айам̣ анаттхо; самма̄дит̣т̣хипаччайа̄ ча анеке кусала̄ дхамма̄ бха̄вана̄па̄рипӯрим̣ гаччханти, айам̣ аттхо.

‘‘миччха̄сан̇каппо, бхиккхаве, адхаммо; самма̄сан̇каппо дхаммо… миччха̄ва̄ча̄, бхиккхаве, адхаммо; самма̄ва̄ча̄ дхаммо… миччха̄камманто, бхиккхаве, адхаммо; самма̄камманто дхаммо… миччха̄а̄джӣво, бхиккхаве, адхаммо; самма̄а̄джӣво дхаммо … миччха̄ва̄йа̄мо, бхиккхаве, адхаммо; самма̄ва̄йа̄мо дхаммо… миччха̄сати, бхиккхаве, адхаммо; самма̄сати дхаммо… миччха̄сама̄дхи, бхиккхаве адхаммо; самма̄сама̄дхи дхаммо… миччха̄н̃а̄н̣ам̣, бхиккхаве, адхаммо; самма̄н̃а̄н̣ам̣ дхаммо.

‘‘миччха̄вимутти, бхиккхаве, адхаммо; самма̄вимутти дхаммо; йе ча миччха̄вимуттипаччайа̄ анеке па̄пака̄ акусала̄ дхамма̄ самбхаванти, айам̣ анаттхо; самма̄вимуттипаччайа̄ ча анеке кусала̄ дхамма̄ бха̄вана̄па̄рипӯрим̣ гаччханти, айам̣ аттхо.

‘‘‘адхаммо ча, бхиккхаве, ведитаббо дхаммо ча; анаттхо ча ведитаббо аттхо ча. адхамман̃ча видитва̄ дхамман̃ча, анаттхан̃ча видитва̄ аттхан̃ча йатха̄ дхаммо йатха̄ аттхо татха̄ пат̣ипаджджитабба’нти, ити йам̣ там̣ вуттам̣, идаметам̣ пат̣ичча вутта’’нти. чатуттхам̣.