5. сан̇га̄равасуттам̣

117. [а. ни. 10.169] атха кхо сан̇га̄раво бра̄хман̣о йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо сан̇га̄раво бра̄хман̣о бхагавантам̣ етадавоча – ‘‘ким̣ ну кхо, бхо готама, оримам̣ тӣрам̣, ким̣ па̄римам̣ тӣра’’нти? ‘‘миччха̄дит̣т̣хи кхо, бра̄хман̣а, оримам̣ тӣрам̣, самма̄дит̣т̣хи па̄римам̣ тӣрам̣; миччха̄сан̇каппо оримам̣ тӣрам̣, самма̄сан̇каппо па̄римам̣ тӣрам̣; миччха̄ва̄ча̄ оримам̣ тӣрам̣, самма̄ва̄ча̄ па̄римам̣ тӣрам̣; миччха̄камманто оримам̣ тӣрам̣, самма̄камманто па̄римам̣ тӣрам̣; миччха̄а̄джӣво оримам̣ тӣрам̣, самма̄а̄джӣво па̄римам̣ тӣрам̣; миччха̄ва̄йа̄мо оримам̣ тӣрам̣, самма̄ва̄йа̄мо па̄римам̣ тӣрам̣; миччха̄сати оримам̣ тӣрам̣, самма̄сати па̄римам̣ тӣрам̣; миччха̄сама̄дхи оримам̣ тӣрам̣, самма̄сама̄дхи па̄римам̣ тӣрам̣; миччха̄н̃а̄н̣ам̣ оримам̣ тӣрам̣, самма̄н̃а̄н̣ам̣ па̄римам̣ тӣрам̣; миччха̄вимутти оримам̣ тӣрам̣, самма̄вимутти па̄римам̣ тӣранти. идам̣ кхо, бра̄хман̣а, оримам̣ тӣрам̣, идам̣ па̄римам̣ тӣранти.

‘‘аппака̄ те мануссесу, йе джана̄ па̄рага̄мино;

атха̄йам̣ итара̄ паджа̄, тӣрамева̄нудха̄вати.

‘‘йе ча кхо саммадаккха̄те, дхамме дхамма̄нуваттино;

те джана̄ па̄рамессанти, маччудхеййам̣ судуттарам̣.

‘‘кан̣хам̣ дхаммам̣ виппаха̄йа, суккам̣ бха̄ветха пан̣д̣ито;

ока̄ анокама̄гамма, вивеке йаттха дӯрамам̣.

‘‘татра̄бхиратимиччхеййа, хитва̄ ка̄ме акин̃чано;

парийодапеййа атта̄нам̣, читтаклесехи пан̣д̣ито.

‘‘йесам̣ самбодхийан̇гесу, самма̄ читтам̣ субха̄витам̣;

а̄да̄напат̣иниссагге, анупа̄да̄йа йе рата̄;

кхӣн̣а̄сава̄ джутиманто [джутӣманто (сӣ.)], те локе париниббута̄’’ти. пан̃чамам̣;