3. ким̣дит̣т̣хикасуттам̣

93. екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. атха кхо ана̄тхапин̣д̣ико гахапати дива̄ дивасса са̄ваттхийа̄ никкхами бхагавантам̣ дассана̄йа. атха кхо ана̄тхапин̣д̣икасса гахапатисса етадахоси – ‘‘ака̄ло кхо та̄ва бхагавантам̣ дассана̄йа. пат̣исаллӣно бхагава̄. манобха̄ванӣйа̄нампи бхиккхӯнам̣ ака̄ло дассана̄йа. пат̣исаллӣна̄ манобха̄ванӣйа̄ бхиккхӯ. йам̣нӯна̄хам̣ йена ан̃н̃атиттхийа̄нам̣ парибба̄джака̄нам̣ а̄ра̄мо тенупасан̇камеййа’’нти.

атха кхо ана̄тхапин̣д̣ико гахапати йена ан̃н̃атиттхийа̄нам̣ парибба̄джака̄нам̣ а̄ра̄мо тенупасан̇ками. тена кхо пана самайена ан̃н̃атиттхийа̄ парибба̄джака̄ сан̇гамма сама̄гамма унна̄дино учча̄саддамаха̄садда̄ анекавихитам̣ тираччха̄накатхам̣ катхента̄ нисинна̄ хонти. аддасам̣су кхо те ан̃н̃атиттхийа̄ парибба̄джака̄ ана̄тхапин̣д̣икам̣ гахапатим̣ дӯратова а̄гаччхантам̣. дисва̄на ан̃н̃аман̃н̃ам̣ сан̣т̣ха̄песум̣ – ‘‘аппасадда̄ бхонто хонту, ма̄ бхонто саддамакаттха. айам̣ ана̄тхапин̣д̣ико гахапати а̄ра̄мам̣ а̄гаччхати саман̣асса готамасса са̄вако. йа̄вата̄ кхо пана саман̣асса готамасса са̄вака̄ гихӣ ода̄тавасана̄ са̄ваттхийам̣ пат̣ивасанти, айам̣ тесам̣ ан̃н̃атаро ана̄тхапин̣д̣ико гахапати. аппасаддака̄ма̄ кхо пана те а̄йасманто аппасаддавинӣта̄ аппасаддасса ван̣н̣ава̄дино. аппева на̄ма аппасаддам̣ парисам̣ видитва̄ упасан̇камитаббам̣ ман̃н̃еййа̄’’ти.

атха кхо те ан̃н̃атиттхийа̄ парибба̄джака̄ тун̣хӣ ахесум̣. атха кхо ана̄тхапин̣д̣ико гахапати йена те ан̃н̃атиттхийа̄ парибба̄джака̄ тенупасан̇ками; упасан̇камитва̄ техи ан̃н̃атиттхийехи парибба̄джакехи саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисиннам̣ кхо ана̄тхапин̣д̣икам̣ гахапатим̣ те ан̃н̃атиттхийа̄ парибба̄джака̄ етадавочум̣ – ‘‘вадехи, гахапати, ким̣дит̣т̣хико саман̣о готамо’’ти? ‘‘на кхо ахам̣, бханте, бхагавато саббам̣ дит̣т̣хим̣ джа̄на̄мӣ’’ти.

‘‘ити кира твам̣, гахапати, на саман̣асса готамасса саббам̣ дит̣т̣хим̣ джа̄на̄си; вадехи, гахапати, ким̣дит̣т̣хика̄ бхиккхӯ’’ти? ‘‘бхиккхӯнампи кхо ахам̣, бханте, на саббам̣ дит̣т̣хим̣ джа̄на̄мӣ’’ти.

‘‘ити кира твам̣, гахапати, на саман̣асса готамасса саббам̣ дит̣т̣хим̣ джа̄на̄си напи бхиккхӯнам̣ саббам̣ дит̣т̣хим̣ джа̄на̄си; вадехи, гахапати, ким̣дит̣т̣хикоси тува’’нти? ‘‘етам̣ кхо, бханте, амхехи на дуккарам̣ бйа̄ка̄тум̣ йам̣дит̣т̣хика̄ майам̣. ин̇гха та̄ва а̄йасманто йатха̄сака̄ни дит̣т̣хигата̄ни бйа̄каронту, паччха̄петам̣ амхехи на дуккарам̣ бхависсати бйа̄ка̄тум̣ йам̣дит̣т̣хика̄ майа’’нти.

евам̣ вутте ан̃н̃атаро парибба̄джако ана̄тхапин̣д̣икам̣ гахапатим̣ етадавоча – ‘‘сассато локо, идамева саччам̣ могхаман̃н̃анти – евам̣дит̣т̣хико ахам̣, гахапатӣ’’ти.

ан̃н̃атаропи кхо парибба̄джако ана̄тхапин̣д̣икам̣ гахапатим̣ етадавоча – ‘‘асассато локо, идамева саччам̣ могхаман̃н̃анти – евам̣дит̣т̣хико ахам̣, гахапатӣ’’ти.

ан̃н̃атаропи кхо парибба̄джако ана̄тхапин̣д̣икам̣ гахапатим̣ етадавоча – ‘‘антава̄ локо…пе… анантава̄ локо… там̣ джӣвам̣ там̣ сарӣрам̣… ан̃н̃ам̣ джӣвам̣ ан̃н̃ам̣ сарӣрам̣… хоти татха̄гато парам̣ маран̣а̄… на хоти татха̄гато парам̣ маран̣а̄… хоти ча на ча хоти татха̄гато парам̣ маран̣а̄… нева хоти на на хоти татха̄гато парам̣ маран̣а̄, идамева саччам̣ могхаман̃н̃анти – евам̣дит̣т̣хико ахам̣, гахапатӣ’’ти.

евам̣ вутте ана̄тхапин̣д̣ико гахапати те парибба̄джаке етадавоча – ‘‘йва̄йам̣, бханте, а̄йасма̄ евама̄ха – ‘сассато локо, идамева саччам̣ могхаман̃н̃анти – евам̣дит̣т̣хико ахам̣, гахапатӣ’ти, имасса айама̄йасмато дит̣т̣хи аттано ва̄ айонисоманасика̄рахету уппанна̄ паратогхосапаччайа̄ ва̄. са̄ кхо панеса̄ дит̣т̣хи бхӯта̄ сан̇кхата̄ четайита̄ пат̣иччасамуппанна̄. йам̣ кхо пана кин̃чи бхӯтам̣ сан̇кхатам̣ четайитам̣ пат̣иччасамуппаннам̣ таданиччам̣. йаданиччам̣ там̣ дуккхам̣. йам̣ дуккхам̣ тадевесо а̄йасма̄ аллӣно, тадевесо а̄йасма̄ аджджхупагато.

‘‘йопа̄йам̣, бханте, а̄йасма̄ евама̄ха – ‘асассато локо, идамева саччам̣ могхаман̃н̃анти – евам̣дит̣т̣хико ахам̣, гахапатӣ’ти, имасса̄пи айама̄йасмато дит̣т̣хи аттано ва̄ айонисоманасика̄рахету уппанна̄ паратогхосапаччайа̄ ва̄. са̄ кхо панеса̄ дит̣т̣хи бхӯта̄ сан̇кхата̄ четайита̄ пат̣иччасамуппанна̄. йам̣ кхо пана кин̃чи бхӯтам̣ сан̇кхатам̣ четайитам̣ пат̣иччасамуппаннам̣ таданиччам̣. йаданиччам̣ там̣ дуккхам̣. йам̣ дуккхам̣ тадевесо а̄йасма̄ аллӣно, тадевесо а̄йасма̄ аджджхупагато.

‘‘йопа̄йам̣, бханте, а̄йасма̄ евама̄ха – ‘антава̄ локо …пе… анантава̄ локо… там̣ джӣвам̣ там̣ сарӣрам̣… ан̃н̃ам̣ джӣвам̣ ан̃н̃ам̣ сарӣрам̣… хоти татха̄гато парам̣ маран̣а̄… на хоти татха̄гато парам̣ маран̣а̄… хоти ча на ча хоти татха̄гато парам̣ маран̣а̄… нева хоти на на хоти татха̄гато парам̣ маран̣а̄, идамева саччам̣ могхаман̃н̃анти – евам̣дит̣т̣хико ахам̣, гахапатӣ’ти, имасса̄пи айама̄йасмато дит̣т̣хи аттано ва̄ айонисоманасика̄рахету уппанна̄ паратогхосапаччайа̄ ва̄. са̄ кхо панеса̄ дит̣т̣хи бхӯта̄ сан̇кхата̄ четайита̄ пат̣иччасамуппанна̄. йам̣ кхо пана кин̃чи бхӯтам̣ сан̇кхатам̣ четайитам̣ пат̣иччасамуппаннам̣ таданиччам̣. йаданиччам̣ там̣ дуккхам̣. йам̣ дуккхам̣ тадевесо а̄йасма̄ аллӣно, тадевесо а̄йасма̄ аджджхупагато’’ти.

евам̣ вутте те парибба̄джака̄ ана̄тхапин̣д̣икам̣ гахапатим̣ етадавочум̣ – ‘‘бйа̄ката̄ни кхо, гахапати, амхехи саббехева йатха̄сака̄ни дит̣т̣хигата̄ни. вадехи, гахапати, ким̣дит̣т̣хикоси тува’’нти? ‘‘йам̣ кхо, бханте, кин̃чи бхӯтам̣ сан̇кхатам̣ четайитам̣ пат̣иччасамуппаннам̣ таданиччам̣. йаданиччам̣ там̣ дуккхам̣. ‘йам̣ дуккхам̣ там̣ нетам̣ мама, несохамасми, на месо атта̄’ти – евам̣дит̣т̣хико ахам̣, бханте’’ти.

‘‘йам̣ кхо, гахапати, кин̃чи бхӯтам̣ сан̇кхатам̣ четайитам̣ пат̣иччасамуппаннам̣ таданиччам̣. йаданиччам̣ там̣ дуккхам̣. йам̣ дуккхам̣ тадева твам̣, гахапати, аллӣно, тадева твам̣, гахапати, аджджхупагато’’ти.

‘‘йам̣ кхо, бханте, кин̃чи бхӯтам̣ сан̇кхатам̣ четайитам̣ пат̣иччасамуппаннам̣ таданиччам̣. йаданиччам̣ там̣ дуккхам̣. ‘йам̣ дуккхам̣ там̣ нетам̣ мама, несохамасми, намесо атта̄’ти – еваметам̣ йатха̄бхӯтам̣ саммаппан̃н̃а̄йа судит̣т̣хам̣. тасса ча уттари ниссаран̣ам̣ йатха̄бхӯтам̣ паджа̄на̄мӣ’’ти.

евам̣ вутте те парибба̄джака̄ тун̣хӣбхӯта̄ ман̇кубхӯта̄ паттаккхандха̄ адхомукха̄ паджджха̄йанта̄ аппат̣ибха̄на̄ нисӣдим̣су. атха кхо ана̄тхапин̣д̣ико гахапати те парибба̄джаке тун̣хӣбхӯте ман̇кубхӯте паттаккхандхе адхомукхе паджджха̄йанте аппат̣ибха̄не видитва̄ ут̣т̣ха̄йа̄сана̄ йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо ана̄тхапин̣д̣ико гахапати йа̄ватако ахоси техи ан̃н̃атиттхийехи парибба̄джакехи саддхим̣ катха̄салла̄по там̣ саббам̣ бхагавато а̄рочеси. ‘‘са̄дху са̄дху, гахапати! евам̣ кхо те, гахапати, могхапуриса̄ ка̄лена ка̄лам̣ сахадхаммена суниггахитам̣ ниггахетабба̄’’ти.

атха кхо бхагава̄ ана̄тхапин̣д̣икам̣ гахапатим̣ дхаммийа̄ катха̄йа сандассеси сама̄дапеси самуттеджеси сампахам̣сеси. атха кхо ана̄тхапин̣д̣ико гахапати бхагавата̄ дхаммийа̄ катха̄йа сандассито сама̄дапито самуттеджито сампахам̣сито ут̣т̣ха̄йа̄сана̄ бхагавантам̣ абхива̄детва̄ падаккхин̣ам̣ катва̄ пакка̄ми.

атха кхо бхагава̄ ачирапакканте ана̄тхапин̣д̣ике гахапатимхи бхиккхӯ а̄мантеси – ‘‘йопи со, бхиккхаве, бхиккху вассасатупасампанно [бхиккху дӣгхараттам̣ аведхи дхаммо (сйа̄.)] имасмим̣ дхаммавинайе, сопи евамевам̣ ан̃н̃атиттхийе парибба̄джаке сахадхаммена суниггахитам̣ нигган̣хеййа йатха̄ там̣ ана̄тхапин̣д̣икена гахапатина̄ ниггахита̄’’ти. татийам̣.