1. ка̄мабхогӣсуттам̣

91. екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. атха кхо ана̄тхапин̣д̣ико гахапати йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисиннам̣ кхо ана̄тхапин̣д̣икам̣ гахапатим̣ бхагава̄ етадавоча –

‘‘дасайиме, гахапати, ка̄мабхогӣ санто сам̣виджджама̄на̄ локасмим̣. катаме даса? идха, гахапати, екаччо ка̄мабхогӣ адхаммена бхоге парийесати са̄хасена; адхаммена бхоге парийеситва̄ са̄хасена на атта̄нам̣ сукхети на пӣн̣ети [на атта̄нам̣ сукхети пӣн̣ети (сӣ. сйа̄. пӣ.) евамупарипи] на сам̣вибхаджати на пун̃н̃а̄ни кароти.

‘‘идха пана, гахапати, екаччо ка̄мабхогӣ адхаммена бхоге парийесати са̄хасена; адхаммена бхоге парийеситва̄ са̄хасена атта̄нам̣ сукхети пӣн̣ети, на сам̣вибхаджати на пун̃н̃а̄ни кароти.

‘‘идха пана, гахапати, екаччо ка̄мабхогӣ адхаммена бхоге парийесати са̄хасена; адхаммена бхоге парийеситва̄ са̄хасена атта̄нам̣ сукхети пӣн̣ети сам̣вибхаджати пун̃н̃а̄ни кароти.

‘‘идха пана, гахапати, екаччо ка̄мабхогӣ дхамма̄дхаммена бхоге парийесати са̄хасенапи аса̄хасенапи; дхамма̄дхаммена бхоге парийеситва̄ са̄хасенапи аса̄хасенапи на атта̄нам̣ сукхети на пӣн̣ети на сам̣вибхаджати на пун̃н̃а̄ни кароти.

‘‘идха пана, гахапати, екаччо ка̄мабхогӣ дхамма̄дхаммена бхоге парийесати са̄хасенапи аса̄хасенапи; дхамма̄дхаммена бхоге парийеситва̄ са̄хасенапи аса̄хасенапи атта̄нам̣ сукхети пӣн̣ети, на сам̣вибхаджати на пун̃н̃а̄ни кароти.

‘‘идха пана, гахапати, екаччо ка̄мабхогӣ дхамма̄дхаммена бхоге парийесати са̄хасенапи аса̄хасенапи; дхамма̄дхаммена бхоге парийеситва̄ са̄хасенапи аса̄хасенапи атта̄нам̣ сукхети пӣн̣ети сам̣вибхаджати пун̃н̃а̄ни кароти.

‘‘идха пана, гахапати, екаччо ка̄мабхогӣ дхаммена бхоге парийесати аса̄хасена; дхаммена бхоге парийеситва̄ аса̄хасена на атта̄нам̣ сукхети на пӣн̣ети на сам̣вибхаджати на пун̃н̃а̄ни кароти.

‘‘идха пана, гахапати, екаччо ка̄мабхогӣ дхаммена бхоге парийесати аса̄хасена; дхаммена бхоге парийеситва̄ аса̄хасена атта̄нам̣ сукхети пӣн̣ети, на сам̣вибхаджати на пун̃н̃а̄ни кароти.

‘‘идха пана, гахапати, екаччо ка̄мабхогӣ дхаммена бхоге парийесати аса̄хасена; дхаммена бхоге парийеситва̄ аса̄хасена атта̄нам̣ сукхети пӣн̣ети сам̣вибхаджати пун̃н̃а̄ни кароти. те ча бхоге гатхито [гадхито (ка.) а. ни. 3.124 пасситаббам̣] муччхито аджджхосанно [аджджха̄панно (саббаттха) а. ни. 3.124 суттаван̣н̣ана̄ т̣ӣка̄ олокетабба̄] ана̄дӣнавадасса̄вӣ аниссаран̣апан̃н̃о парибхун̃джати.

‘‘идха пана, гахапати, екаччо ка̄мабхогӣ дхаммена бхоге парийесати аса̄хасена; дхаммена бхоге парийеситва̄ аса̄хасена атта̄нам̣ сукхети пӣн̣ети сам̣вибхаджати пун̃н̃а̄ни кароти. те ча бхоге агатхито амуччхито анаджджхосанно а̄дӣнавадасса̄вӣ ниссаран̣апан̃н̃о парибхун̃джати.

‘‘татра, гахапати, йва̄йам̣ ка̄мабхогӣ адхаммена бхоге парийесати са̄хасена, адхаммена бхоге парийеситва̄ са̄хасена на атта̄нам̣ сукхети на пӣн̣ети на сам̣вибхаджати на пун̃н̃а̄ни кароти, айам̣, гахапати, ка̄мабхогӣ тӣхи т̣ха̄нехи га̄райхо. ‘адхаммена бхоге парийесати са̄хасена̄’ти, имина̄ пат̣хамена т̣ха̄нена га̄райхо. ‘на атта̄нам̣ сукхети на пӣн̣етӣ’ти, имина̄ дутийена т̣ха̄нена га̄райхо. ‘на сам̣вибхаджати на пун̃н̃а̄ни каротӣ’ти, имина̄ татийена т̣ха̄нена га̄райхо. айам̣, гахапати, ка̄мабхогӣ имехи тӣхи т̣ха̄нехи га̄райхо.

‘‘татра, гахапати, йва̄йам̣ ка̄мабхогӣ адхаммена бхоге парийесати са̄хасена, адхаммена бхоге парийеситва̄ са̄хасена атта̄нам̣ сукхети пӣн̣ети на сам̣вибхаджати на пун̃н̃а̄ни кароти, айам̣, гахапати, ка̄мабхогӣ двӣхи т̣ха̄нехи га̄райхо екена т̣ха̄нена па̄сам̣со. ‘адхаммена бхоге парийесати са̄хасена̄’ти, имина̄ пат̣хамена т̣ха̄нена га̄райхо. ‘атта̄нам̣ сукхети пӣн̣етӣ’ти, имина̄ екена т̣ха̄нена па̄сам̣со. ‘на сам̣вибхаджати на пун̃н̃а̄ни каротӣ’ти имина̄ дутийена т̣ха̄нена га̄райхо. айам̣, гахапати, ка̄мабхогӣ имехи двӣхи т̣ха̄нехи га̄райхо имина̄ екена т̣ха̄нена па̄сам̣со.

‘‘татра, гахапати, йва̄йам̣ ка̄мабхогӣ адхаммена бхоге парийесати са̄хасена, адхаммена бхоге парийеситва̄ са̄хасена атта̄нам̣ сукхети пӣн̣ети сам̣вибхаджати пун̃н̃а̄ни кароти, айам̣, гахапати, ка̄мабхогӣ екена т̣ха̄нена га̄райхо двӣхи т̣ха̄нехи па̄сам̣со. ‘адхаммена бхоге парийесати са̄хасена̄’ти, имина̄ екена т̣ха̄нена га̄райхо. ‘атта̄нам̣ сукхети пӣн̣етӣ’ти, имина̄ пат̣хамена т̣ха̄нена па̄сам̣со. ‘сам̣вибхаджати пун̃н̃а̄ни каротӣ’ти, имина̄ дутийена т̣ха̄нена па̄сам̣со. айам̣, гахапати, ка̄мабхогӣ имина̄ екена т̣ха̄нена га̄райхо, имехи двӣхи т̣ха̄нехи па̄сам̣со.

‘‘татра, гахапати, йва̄йам̣ ка̄мабхогӣ дхамма̄дхаммена бхоге парийесати са̄хасенапи аса̄хасенапи, дхамма̄дхаммена бхоге парийеситва̄ са̄хасенапи аса̄хасенапи на атта̄нам̣ сукхети на пӣн̣ети на сам̣вибхаджати на пун̃н̃а̄ни кароти, айам̣, гахапати, ка̄мабхогӣ екена т̣ха̄нена па̄сам̣со тӣхи т̣ха̄нехи га̄райхо. ‘дхаммена бхоге парийесати аса̄хасена̄’ти, имина̄ екена т̣ха̄нена па̄сам̣со. ‘адхаммена бхоге парийесати са̄хасена̄’ти, имина̄ пат̣хамена т̣ха̄нена га̄райхо. ‘на атта̄нам̣ сукхети на пӣн̣етӣ’ти, имина̄ дутийена т̣ха̄нена га̄райхо. ‘на сам̣вибхаджати на пун̃н̃а̄ни каротӣ’ти, имина̄ татийена т̣ха̄нена га̄райхо. айам̣, гахапати, ка̄мабхогӣ имина̄ екена т̣ха̄нена па̄сам̣со имехи тӣхи т̣ха̄нехи га̄райхо.

‘‘татра, гахапати, йва̄йам̣ ка̄мабхогӣ дхамма̄дхаммена бхоге парийесати са̄хасенапи аса̄хасенапи, дхамма̄дхаммена бхоге парийеситва̄ са̄хасенапи аса̄хасенапи атта̄нам̣ сукхети пӣн̣ети на сам̣вибхаджати на пун̃н̃а̄ни кароти, айам̣, гахапати, ка̄мабхогӣ двӣхи т̣ха̄нехи па̄сам̣со двӣхи т̣ха̄нехи га̄райхо. ‘дхаммена бхоге парийесати аса̄хасена̄’ти, имина̄ пат̣хамена т̣ха̄нена па̄сам̣со. ‘адхаммена бхоге парийесати са̄хасена̄’ти, имина̄ пат̣хамена т̣ха̄нена га̄райхо. ‘атта̄нам̣ сукхети пӣн̣етӣ’ти, имина̄ дутийена т̣ха̄нена па̄сам̣со. ‘на сам̣вибхаджати на пун̃н̃а̄ни каротӣ’ти, имина̄ дутийена т̣ха̄нена га̄райхо. айам̣, гахапати, ка̄мабхогӣ имехи двӣхи т̣ха̄нехи па̄сам̣со имехи двӣхи т̣ха̄нехи га̄райхо.

‘‘татра, гахапати, йва̄йам̣ ка̄мабхогӣ дхамма̄дхаммена бхоге парийесати са̄хасенапи аса̄хасенапи, дхамма̄дхаммена бхоге парийеситва̄ са̄хасенапи аса̄хасенапи атта̄нам̣ сукхети пӣн̣ети сам̣вибхаджати пун̃н̃а̄ни кароти, айам̣, гахапати, ка̄мабхогӣ тӣхи т̣ха̄нехи па̄сам̣со екена т̣ха̄нена га̄райхо. ‘дхаммена бхоге парийесати аса̄хасена̄’ти, имина̄ пат̣хамена т̣ха̄нена па̄сам̣со. ‘адхаммена бхоге парийесати са̄хасена̄’ти, имина̄ екена т̣ха̄нена га̄райхо. ‘атта̄нам̣ сукхети пӣн̣етӣ’ти, имина̄ дутийена т̣ха̄нена па̄сам̣со. ‘сам̣вибхаджати пун̃н̃а̄ни каротӣ’ти, имина̄ татийена т̣ха̄нена па̄сам̣со. айам̣, гахапати, ка̄мабхогӣ имехи тӣхи т̣ха̄нехи па̄сам̣со имина̄ екена т̣ха̄нена га̄райхо.

‘‘татра, гахапати, йва̄йам̣ ка̄мабхогӣ дхаммена бхоге парийесати аса̄хасена, дхаммена бхоге парийеситва̄ аса̄хасена на атта̄нам̣ сукхети на пӣн̣ети на сам̣вибхаджати на пун̃н̃а̄ни кароти, айам̣, гахапати, ка̄мабхогӣ екена т̣ха̄нена па̄сам̣со двӣхи т̣ха̄нехи га̄райхо. дхаммена бхоге парийесати аса̄хасена̄’ти, имина̄ екена т̣ха̄нена па̄сам̣со. ‘на атта̄нам̣ сукхети на пӣн̣етӣ’ти, имина̄ пат̣хамена т̣ха̄нена га̄райхо. ‘на сам̣вибхаджати на пун̃н̃а̄ни каротӣ’ти, имина̄ дутийена т̣ха̄нена га̄райхо. айам̣, гахапати, ка̄мабхогӣ имина̄ екена т̣ха̄нена па̄сам̣со имехи двӣхи т̣ха̄нехи га̄райхо.

‘‘татра, гахапати, йва̄йам̣ ка̄мабхогӣ дхаммена бхоге парийесати аса̄хасена, дхаммена бхоге парийеситва̄ аса̄хасена атта̄нам̣ сукхети пӣн̣ети на сам̣вибхаджати на пун̃н̃а̄ни кароти, айам̣, гахапати, ка̄мабхогӣ двӣхи т̣ха̄нехи па̄сам̣со екена т̣ха̄нена га̄райхо. ‘дхаммена бхоге парийесати аса̄хасена̄’ти, имина̄ пат̣хамена т̣ха̄нена па̄сам̣со. ‘атта̄нам̣ сукхети пӣн̣етӣ’ти, имина̄ дутийена т̣ха̄нена па̄сам̣со. ‘на сам̣вибхаджати на пун̃н̃а̄ни каротӣ’ти имина̄ екена т̣ха̄нена га̄райхо. айам̣, гахапати, ка̄мабхогӣ имехи двӣхи т̣ха̄нехи па̄сам̣со имина̄ екена т̣ха̄нена га̄райхо.

‘‘татра, гахапати йва̄йам̣ ка̄мабхогӣ дхаммена бхоге парийесати аса̄хасена, дхаммена бхоге парийеситва̄ аса̄хасена атта̄нам̣ сукхети пӣн̣ети сам̣вибхаджати пун̃н̃а̄ни кароти, те ча бхоге гатхито муччхито аджджхосанно ана̄дӣнавадасса̄вӣ аниссаран̣апан̃н̃о парибхун̃джати, айам̣, гахапати, ка̄мабхогӣ тӣхи т̣ха̄нехи па̄сам̣со екена т̣ха̄нена га̄райхо. ‘дхаммена бхоге парийесати аса̄хасена̄’ти, имина̄ пат̣хамена т̣ха̄нена па̄сам̣со. ‘атта̄нам̣ сукхети пӣн̣етӣ’ти, имина̄ дутийена т̣ха̄нена па̄сам̣со. ‘сам̣вибхаджати пун̃н̃а̄ни каротӣ’ти, имина̄ татийена т̣ха̄нена па̄сам̣со. ‘те ча бхоге гатхито муччхито аджджхосанно ана̄дӣнавадасса̄вӣ аниссаран̣апан̃н̃о парибхун̃джатӣ’ти, имина̄ екена т̣ха̄нена га̄райхо. айам̣, гахапати, ка̄мабхогӣ имехи тӣхи т̣ха̄нехи па̄сам̣со имина̄ екена т̣ха̄нена га̄райхо.

‘‘татра, гахапати, йва̄йам̣ ка̄мабхогӣ дхаммена бхоге парийесати аса̄хасена, дхаммена бхоге парийеситва̄ аса̄хасена атта̄нам̣ сукхети пӣн̣ети сам̣вибхаджати пун̃н̃а̄ни кароти, те ча бхоге агатхито амуччхито анаджджхосанно а̄дӣнавадасса̄вӣ ниссаран̣апан̃н̃о парибхун̃джати, айам̣, гахапати, ка̄мабхогӣ чатӯхи т̣ха̄нехи па̄сам̣со. ‘дхаммена бхоге парийесати аса̄хасена̄’ти, имина̄ пат̣хамена т̣ха̄нена па̄сам̣со. ‘атта̄нам̣ сукхети пӣн̣етӣ’ти, имина̄ дутийена т̣ха̄нена па̄сам̣со. ‘сам̣вибхаджати пун̃н̃а̄ни каротӣ’ти, имина̄ татийена т̣ха̄нена па̄сам̣со. ‘те ча бхоге агатхито амуччхито анаджджхосанно а̄дӣнавадасса̄вӣ ниссаран̣апан̃н̃о парибхун̃джатӣ’ти, имина̄ чатуттхена т̣ха̄нена па̄сам̣со. айам̣, гахапати, ка̄мабхогӣ имехи чатӯхи т̣ха̄нехи па̄сам̣со.

‘‘име кхо, гахапати, даса ка̄мабхогӣ санто сам̣виджджама̄на̄ локасмим̣. имесам̣ кхо, гахапати, дасаннам̣ ка̄мабхогӣнам̣ йва̄йам̣ ка̄мабхогӣ дхаммена бхоге парийесати аса̄хасена, дхаммена бхоге парийеситва̄ аса̄хасена атта̄нам̣ сукхети пӣн̣ети сам̣вибхаджати пун̃н̃а̄ни кароти, те ча бхоге агатхито амуччхито анаджджхосанно а̄дӣнавадасса̄вӣ ниссаран̣апан̃н̃о парибхун̃джати, айам̣ имесам̣ дасаннам̣ ка̄мабхогӣнам̣ агго ча сет̣т̣хо ча па̄моккхо [моккхо (ка. сӣ.) а. ни. 4.95; 5.181; сам̣. ни. 3.662] ча уттамо ча паваро ча. сеййатха̄пи, гахапати, гава̄ кхӣрам̣, кхӣрамха̄ дадхи, дадхимха̄ наванӣтам̣, наванӣтамха̄ саппи, саппимха̄ саппиман̣д̣о. саппиман̣д̣о таттха аггамаккха̄йати.

евамевам̣ кхо, гахапати, имесам̣ дасаннам̣ ка̄мабхогӣнам̣ йва̄йам̣ ка̄мабхогӣ дхаммена бхоге парийесати аса̄хасена, дхаммена бхоге парийеситва̄ аса̄хасена атта̄нам̣ сукхети пӣн̣ети сам̣вибхаджати пун̃н̃а̄ни кароти, те ча бхоге агатхито амуччхито анаджджхосанно а̄дӣнавадасса̄вӣ ниссаран̣апан̃н̃о парибхун̃джати, айам̣ имесам̣ дасаннам̣ ка̄мабхогӣнам̣ агго ча сет̣т̣хо ча па̄моккхо [моккхо (ка. сӣ.) а. ни. 5.181] ча уттамо ча паваро ча̄’’ти. пат̣хамам̣.