4. бйа̄каран̣асуттам̣

84. татра кхо а̄йасма̄ маха̄моггалла̄но бхиккхӯ а̄мантеси – ‘‘а̄вусо бхиккхаве’’ти. ‘‘а̄вусо’’ти кхо те бхиккхӯ а̄йасмато маха̄моггалла̄насса паччассосум̣. а̄йасма̄ маха̄моггалла̄но етадавоча –

‘‘идха̄вусо, бхиккху ан̃н̃ам̣ бйа̄кароти – ‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄ти паджа̄на̄мӣ’ти. таменам̣ татха̄гато ва̄ татха̄гатаса̄вако ва̄ джха̄йӣ сама̄паттикусало парачиттакусало парачиттапарийа̄йакусало самануйун̃джати саманугга̄хати саманубха̄сати. со татха̄гатена ва̄ татха̄гатаса̄вакена ва̄ джха̄йина̄ сама̄паттикусалена парачиттакусалена парачиттапарийа̄йакусалена самануйун̃джийама̄но саманугга̄хийама̄но саманубха̄сийама̄но ирӣн̣ам̣ а̄паджджати вичинам̣ [висинам̣ (сӣ. ат̣т̣ха.)] а̄паджджати анайам̣ а̄паджджати бйасанам̣ а̄паджджати анайабйасанам̣ а̄паджджати.

‘‘таменам̣ татха̄гато ва̄ татха̄гатаса̄вако ва̄ джха̄йӣ сама̄паттикусало парачиттакусало парачиттапарийа̄йакусало евам̣ четаса̄ чето паричча манаси кароти – ‘ким̣ ну кхо айама̄йасма̄ ан̃н̃ам̣ бйа̄кароти – кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄ти паджа̄на̄мӣ’ти?

‘‘таменам̣ татха̄гато ва̄ татха̄гатаса̄вако ва̄ джха̄йӣ сама̄паттикусало парачиттакусало парачиттапарийа̄йакусало евам̣ четаса̄ чето паричча паджа̄на̄ти –

‘кодхано кхо айама̄йасма̄; кодхапарийут̣т̣хитена четаса̄ бахулам̣ вихарати. кодхапарийут̣т̣ха̄нам̣ кхо пана татха̄гатаппаведите дхаммавинайе париха̄наметам̣.

‘упана̄хӣ кхо пана айама̄йасма̄; упана̄хапарийут̣т̣хитена четаса̄ бахулам̣ вихарати. упана̄хапарийут̣т̣ха̄нам̣ кхо пана татха̄гатаппаведите дхаммавинайе париха̄наметам̣.

‘маккхӣ кхо пана айама̄йасма̄; маккхапарийут̣т̣хитена четаса̄ бахулам̣ вихарати. маккхапарийут̣т̣ха̄нам̣ кхо пана татха̄гатаппаведите дхаммавинайе париха̄наметам̣.

‘пал̣а̄сӣ кхо пана айама̄йасма̄; пал̣а̄сапарийут̣т̣хитена четаса̄ бахулам̣ вихарати. пал̣а̄сапарийут̣т̣ха̄нам̣ кхо пана татха̄гатаппаведите дхаммавинайе париха̄наметам̣.

‘иссукӣ кхо пана айама̄йасма̄; исса̄парийут̣т̣хитена четаса̄ бахулам̣ вихарати. исса̄парийут̣т̣ха̄нам̣ кхо пана татха̄гатаппаведите дхаммавинайе париха̄наметам̣.

‘маччхарӣ кхо пана айама̄йасма̄; маччхерапарийут̣т̣хитена четаса̄ бахулам̣ вихарати. маччхерапарийут̣т̣ха̄нам̣ кхо пана татха̄гатаппаведите дхаммавинайе париха̄наметам̣.

‘сат̣хо кхо пана айама̄йасма̄; са̄т̣хеййапарийут̣т̣хитена четаса̄ бахулам̣ вихарати. са̄т̣хеййапарийут̣т̣ха̄нам̣ кхо пана татха̄гатаппаведите дхаммавинайе париха̄наметам̣.

‘ма̄йа̄вӣ кхо пана айама̄йасма̄; ма̄йа̄парийут̣т̣хитена четаса̄ бахулам̣ вихарати. ма̄йа̄парийут̣т̣ха̄нам̣ кхо пана татха̄гатаппаведите дхаммавинайе париха̄наметам̣.

‘па̄пиччхо кхо пана айама̄йасма̄; иччха̄парийут̣т̣хитена четаса̄ бахулам̣ вихарати. иччха̄парийут̣т̣ха̄нам̣ кхо пана татха̄гатаппаведите дхаммавинайе париха̄наметам̣.

‘сати [мут̣т̣хассати (сӣ. сйа̄.)] кхо пана айама̄йасма̄ уттари каран̣ӣйе ораматтакена висеса̄дхигамена антара̄ воса̄нам̣ а̄панно. антара̄ воса̄нагаманам̣ кхо пана татха̄гатаппаведите дхаммавинайе париха̄наметам̣’.

‘‘со вата̄вусо, бхиккху ‘име даса дхамме аппаха̄йа имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти нетам̣ т̣ха̄нам̣ виджджати. со вата̄вусо, бхиккху ‘име даса дхамме паха̄йа имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти т̣ха̄наметам̣ виджджатӣ’’ти. чатуттхам̣.