9. пат̣хамакатха̄ваттхусуттам̣

69. екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена самбахула̄ бхиккхӯ паччха̄бхаттам̣ пин̣д̣апа̄тапат̣икканта̄ упат̣т̣ха̄наса̄ла̄йам̣ саннисинна̄ саннипатита̄ анекавихитам̣ тираччха̄накатхам̣ ануйутта̄ вихаранти, сеййатхидам̣ – [дӣ. ни. 1.17; ма. ни. 2.223; сам̣. ни. 5.1080; па̄чи. 508] ра̄джакатхам̣ чоракатхам̣ маха̄маттакатхам̣ сена̄катхам̣ бхайакатхам̣ йуддхакатхам̣ аннакатхам̣ па̄накатхам̣ ваттхакатхам̣ сайанакатхам̣ ма̄ла̄катхам̣ гандхакатхам̣ н̃а̄тикатхам̣ йа̄накатхам̣ га̄макатхам̣ нигамакатхам̣ нагаракатхам̣ джанападакатхам̣ иттхикатхам̣ [иттхикатхам̣ пурисакатхам̣ (ка.) ма. ни. ат̣т̣ха. 2.223 пасситаббам̣] сӯракатхам̣ висикха̄катхам̣ кумбхат̣т̣ха̄накатхам̣ пуббапетакатхам̣ на̄наттакатхам̣ локаккха̄йикам̣ самуддаккха̄йикам̣ итибхава̄бхавакатхам̣ ити ва̄ти.

атха кхо бхагава̄ са̄йанхасамайам̣ пат̣исалла̄на̄ вут̣т̣хито йена упат̣т̣ха̄наса̄ла̄ тенупасан̇ками; упасан̇камитва̄ пан̃н̃атте а̄сане нисӣди. нисаджджа кхо бхагава̄ бхиккхӯ а̄мантеси – ‘‘ка̄йа нуттха, бхиккхаве, етарахи катха̄йа саннисинна̄ саннипатита̄, ка̄ ча пана во антара̄катха̄ виппаката̄’’ти?

‘‘идха майам̣, бханте, паччха̄бхаттам̣ пин̣д̣апа̄тапат̣икканта̄ упат̣т̣ха̄наса̄ла̄йам̣ саннисинна̄ саннипатита̄ анекавихитам̣ тираччха̄накатхам̣ ануйутта̄ вихара̄ма, сеййатхидам̣ – ра̄джакатхам̣ чоракатхам̣…пе… итибхава̄бхавакатхам̣ ити ва̄’’ти. ‘‘на кхо панетам̣, бхиккхаве, тумха̄кам̣ патирӯпам̣ кулапутта̄нам̣ саддха̄йа ага̄расма̄ анага̄рийам̣ паббаджита̄нам̣, йам̣ тумхе анекавихитам̣ тираччха̄накатхам̣ ануйутта̄ вихареййа̄тха, сеййатхидам̣ – ра̄джакатхам̣ чоракатхам̣ маха̄маттакатхам̣ сена̄катхам̣ бхайакатхам̣ йуддхакатхам̣ аннакатхам̣ па̄накатхам̣ ваттхакатхам̣ сайанакатхам̣ ма̄ла̄катхам̣ гандхакатхам̣ н̃а̄тикатхам̣ йа̄накатхам̣ га̄макатхам̣ нигамакатхам̣ нагаракатхам̣ джанападакатхам̣ иттхикатхам̣ сӯракатхам̣ висикха̄катхам̣ кумбхат̣т̣ха̄накатхам̣ пуббапетакатхам̣ на̄наттакатхам̣ локаккха̄йикам̣ самуддаккха̄йикам̣ итибхава̄бхавакатхам̣ ити ва̄ти.

‘‘дасайима̄ни, бхиккхаве, катха̄ваттхӯни. катама̄ни даса? аппиччхакатха̄, сантут̣т̣хикатха̄, павивекакатха̄, асам̣саггакатха̄, вӣрийа̄рамбхакатха̄, сӣлакатха̄, сама̄дхикатха̄, пан̃н̃а̄катха̄, вимуттикатха̄, вимуттин̃а̄н̣адассанакатха̄ти – има̄ни кхо, бхиккхаве, даса катха̄ваттхӯни.

‘‘имесам̣ че тумхе, бхиккхаве, дасаннам̣ катха̄ваттхӯнам̣ упа̄да̄йупа̄да̄йа катхам̣ катхеййа̄тха, имесампи чандимасӯрийа̄нам̣ евам̣махиддхика̄нам̣ евам̣маха̄нубха̄ва̄нам̣ теджаса̄ теджам̣ парийа̄дийеййа̄тха, ко пана ва̄до ан̃н̃атиттхийа̄нам̣ парибба̄джака̄на’’нти! навамам̣.