(7) 2. йамакавагго

1. авиджджа̄суттам̣

61. ‘‘пурима̄, бхиккхаве, кот̣и на пан̃н̃а̄йати авиджджа̄йа – ‘ито пуббе авиджджа̄ на̄хоси, атха паччха̄ самабхавӣ’ти. еван̃четам̣, бхиккхаве, вуччати, атха ча пана пан̃н̃а̄йати – ‘идаппаччайа̄ авиджджа̄’ти.

‘‘авиджджампа̄хам̣ [авиджджампахам̣ (сӣ. сйа̄.)], бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро авиджджа̄йа? ‘пан̃ча нӣваран̣а̄’тисса вачанӣйам̣. пан̃чапа̄хам̣, бхиккхаве, нӣваран̣е са̄ха̄ре вада̄ми, но ана̄ха̄ре. ко ча̄ха̄ро пан̃чаннам̣ нӣваран̣а̄нам̣? ‘тӣн̣и дуччарита̄нӣ’тисса вачанӣйам̣. тӣн̣ипа̄хам̣, бхиккхаве, дуччарита̄ни са̄ха̄ра̄ни вада̄ми, но ана̄ха̄ра̄ни. ко ча̄ха̄ро тин̣н̣ам̣ дуччарита̄нам̣? ‘индрийаасам̣варо’тисса вачанӣйам̣. индрийаасам̣варампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро индрийаасам̣варасса? ‘асата̄сампаджан̃н̃а’нтисса вачанӣйам̣. асата̄сампаджан̃н̃ампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро асата̄сампаджан̃н̃асса? ‘айонисоманасика̄ро’тисса вачанӣйам̣. айонисоманасика̄рампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро айонисоманасика̄расса? ‘ассаддхийа’нтисса вачанӣйам̣. ассаддхийампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро ассаддхийасса? ‘асаддхаммассавана’нтисса вачанӣйам̣. асаддхаммассаванампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро асаддхаммассаванасса? ‘асаппурисасам̣сево’тисса вачанӣйам̣.

‘‘ити кхо, бхиккхаве, асаппурисасам̣сево парипӯро асаддхаммассаванам̣ парипӯрети, асаддхаммассаванам̣ парипӯрам̣ ассаддхийам̣ парипӯрети, ассаддхийам̣ парипӯрам̣ айонисоманасика̄рам̣ парипӯрети, айонисоманасика̄ро парипӯро асата̄сампаджан̃н̃ам̣ парипӯрети, асата̄сампаджан̃н̃ам̣ парипӯрам̣ индрийаасам̣варам̣ парипӯрети, индрийаасам̣варо парипӯро тӣн̣и дуччарита̄ни парипӯрети, тӣн̣и дуччарита̄ни парипӯра̄ни пан̃ча нӣваран̣е парипӯренти, пан̃ча нӣваран̣а̄ парипӯра̄ авиджджам̣ парипӯренти. еваметисса̄ авиджджа̄йа а̄ха̄ро хоти, еван̃ча па̄рипӯри.

‘‘сеййатха̄пи, бхиккхаве, упарипаббате тхуллапхуситаке деве вассанте ( ) [(галагала̄йанте) (сӣ.), (гал̣агал̣а̄йанте) (сйа̄.)] там̣ удакам̣ йатха̄ниннам̣ паваттама̄нам̣ паббатакандарападараса̄кха̄ парипӯрети, паббатакандарападараса̄кха̄ парипӯра̄ кусоббхе [куссуббхе (сӣ.), кусуббхе (сйа̄.), кусомбхе (ка.) а. ни. 3.96] парипӯренти. кусоббха̄ парипӯра̄ маха̄соббхе [маха̄сомбхе (ка.)] парипӯренти, маха̄соббха̄ парипӯра̄ куннадийо парипӯренти, куннадийо парипӯра̄ маха̄надийо парипӯренти, маха̄надийо парипӯра̄ маха̄самуддам̣ са̄гарам̣ парипӯренти; еваметасса маха̄самуддасса са̄гарасса а̄ха̄ро хоти, еван̃ча па̄рипӯри.

‘‘евамевам̣ кхо, бхиккхаве, асаппурисасам̣сево парипӯро асаддхаммассаванам̣ парипӯрети, асаддхаммассаванам̣ парипӯрам̣ ассаддхийам̣ парипӯрети, ассаддхийам̣ парипӯрам̣ айонисоманасика̄рам̣ парипӯрети, айонисоманасика̄ро парипӯро асата̄сампаджан̃н̃ам̣ парипӯрети, асата̄сампаджан̃н̃ам̣ парипӯрам̣ индрийаасам̣варам̣ парипӯрети, индрийаасам̣варо парипӯро тӣн̣и дуччарита̄ни парипӯрети, тӣн̣и дуччарита̄ни парипӯра̄ни пан̃ча нӣваран̣е парипӯренти, пан̃ча нӣваран̣а̄ парипӯра̄ авиджджам̣ парипӯренти; еваметисса̄ авиджджа̄йа а̄ха̄ро хоти, еван̃ча па̄рипӯри.

‘‘виджджа̄вимуттимпа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро виджджа̄вимуттийа̄? ‘сатта боджджхан̇га̄’тисса вачанӣйам̣. саттапа̄хам̣, бхиккхаве, боджджхан̇ге са̄ха̄ре вада̄ми, но ана̄ха̄ре. ко ча̄ха̄ро саттаннам̣ боджджхан̇га̄нам̣? ‘чатта̄ро сатипат̣т̣ха̄на̄’тисса вачанӣйам̣. чатта̄ропа̄хам̣, бхиккхаве, сатипат̣т̣ха̄не са̄ха̄ре вада̄ми, но ана̄ха̄ре. ко ча̄ха̄ро чатуннам̣ сатипат̣т̣ха̄на̄нам̣? ‘тӣн̣и сучарита̄нӣ’тисса вачанӣйам̣. тӣн̣ипа̄хам̣, бхиккхаве, сучарита̄ни са̄ха̄ра̄ни вада̄ми, но ана̄ха̄ра̄ни. ко ча̄ха̄ро тин̣н̣ам̣ сучарита̄нам̣? ‘индрийасам̣варо’тисса вачанӣйам̣. индрийасам̣варампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро индрийасам̣варасса? ‘сатисампаджан̃н̃а’нтисса вачанӣйам̣. сатисампаджан̃н̃ампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро сатисампаджан̃н̃асса? ‘йонисоманасика̄ро’тисса вачанӣйам̣. йонисоманасика̄рампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро йонисоманасика̄расса? ‘саддха̄’тисса вачанӣйам̣. саддхампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро саддха̄йа? ‘саддхаммассавана’нтисса вачанӣйам̣. саддхаммассаванампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро саддхаммассаванасса? ‘саппурисасам̣сево’тисса вачанӣйам̣.

‘‘ити кхо, бхиккхаве, саппурисасам̣сево парипӯро саддхаммассаванам̣ парипӯрети, саддхаммассаванам̣ парипӯрам̣ саддхам̣ парипӯрети, саддха̄ парипӯра̄ йонисоманасика̄рам̣ парипӯрети, йонисоманасика̄ро парипӯро сатисампаджан̃н̃ам̣ парипӯрети, сатисампаджан̃н̃ам̣ парипӯрам̣ индрийасам̣варам̣ парипӯрети, индрийасам̣варо парипӯро тӣн̣и сучарита̄ни парипӯрети, тӣн̣и сучарита̄ни парипӯра̄ни чатта̄ро сатипат̣т̣ха̄не парипӯренти, чатта̄ро сатипат̣т̣ха̄на̄ парипӯра̄ сатта боджджхан̇ге парипӯренти, сатта боджджхан̇га̄ парипӯра̄ виджджа̄вимуттим̣ парипӯренти; еваметисса̄ виджджа̄вимуттийа̄ а̄ха̄ро хоти, еван̃ча па̄рипӯри.

‘‘сеййатха̄пи, бхиккхаве, упарипаббате тхуллапхуситаке деве вассанте там̣ удакам̣ йатха̄ниннам̣ паваттама̄нам̣ паббатакандарападараса̄кха̄ парипӯрети, паббатакандарападараса̄кха̄ парипӯра̄ кусоббхе парипӯренти, кусоббха̄ парипӯра̄ маха̄соббхе парипӯренти, маха̄соббха̄ парипӯра̄ куннадийо парипӯренти, куннадийо парипӯра̄ маха̄надийо парипӯренти, маха̄надийо парипӯра̄ маха̄самуддам̣ са̄гарам̣ парипӯренти; еваметасса маха̄самуддасса са̄гарасса а̄ха̄ро хоти, еван̃ча па̄рипӯри.

‘‘евамевам̣ кхо, бхиккхаве, саппурисасам̣сево парипӯро саддхаммассаванам̣ парипӯрети, саддхаммассаванам̣ парипӯрам̣ саддхам̣ парипӯрети, саддха̄ парипӯра̄ йонисоманасика̄рам̣ парипӯрети, йонисоманасика̄ро парипӯро сатисампаджан̃н̃ам̣ парипӯрети, сатисампаджан̃н̃ам̣ парипӯрам̣ индрийасам̣варам̣ парипӯрети, индрийасам̣варо парипӯро тӣн̣и сучарита̄ни парипӯрети, тӣн̣и сучарита̄ни парипӯра̄ни чатта̄ро сатипат̣т̣ха̄не парипӯренти, чатта̄ро сатипат̣т̣ха̄на̄ парипӯра̄ сатта боджджхан̇ге парипӯренти, сатта боджджхан̇га̄ парипӯра̄ виджджа̄вимуттим̣ парипӯренти; еваметисса̄ виджджа̄вимуттийа̄ а̄ха̄ро хоти, еван̃ча па̄рипӯрӣ’’ти. пат̣хамам̣.

2. тан̣ха̄суттам̣

62. ‘‘пурима̄, бхиккхаве, кот̣и на пан̃н̃а̄йати бхаватан̣ха̄йа – ‘ито пуббе бхаватан̣ха̄ на̄хоси, атха паччха̄ самабхавӣ’ти. еван̃четам̣, бхиккхаве, вуччати, атха ча пана пан̃н̃а̄йати – ‘идаппаччайа̄ бхаватан̣ха̄’ти.

‘‘бхаватан̣ха̄мпа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро бхаватан̣ха̄йа? ‘авиджджа̄’тисса вачанӣйам̣. авиджджампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро авиджджа̄йа? ‘пан̃ча нӣваран̣а̄’тисса вачанӣйам̣. пан̃ча нӣваран̣епа̄хам̣, бхиккхаве, са̄ха̄ре вада̄ми, но ана̄ха̄ре. ко ча̄ха̄ро пан̃чаннам̣ нӣваран̣а̄нам̣? ‘тӣн̣и дуччарита̄нӣ’тисса вачанӣйам̣. тӣн̣ипа̄хам̣, бхиккхаве, дуччарита̄ни са̄ха̄ра̄ни вада̄ми, но ана̄ха̄ра̄ни. ко ча̄ха̄ро тин̣н̣аннам̣ дуччарита̄нам̣? ‘индрийаасам̣варо’тисса вачанӣйам̣. индрийаасам̣варампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро индрийаасам̣варасса? ‘асата̄сампаджан̃н̃а’нтисса вачанӣйам̣. асата̄сампаджан̃н̃ампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро асата̄ сампаджан̃н̃асса? ‘айонисоманасика̄ро’тисса вачанӣйам̣. айонисоманасика̄рампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро айонисоманасика̄расса? ‘ассаддхийа’нтисса вачанӣйам̣. ассаддхийампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро ассаддхийасса? ‘ассаддхаммассавана’нтисса вачанӣйам̣. ассаддхаммассаванампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро ассаддхаммассаванасса? ‘асаппурисасам̣сево’тисса вачанӣйам̣.

‘‘ити кхо, бхиккхаве, асаппурисасам̣сево парипӯро ассаддхаммассаванам̣ парипӯрети, ассаддхаммассаванам̣ парипӯрам̣ ассаддхийам̣ парипӯрети, ассаддхийам̣ парипӯрам̣ айонисоманасика̄рам̣ парипӯрети, айонисоманасика̄ро парипӯро асата̄сампаджан̃н̃ам̣ парипӯрети, асата̄сампаджан̃н̃ам̣ парипӯрам̣ индрийаасам̣варам̣ парипӯрети, индрийаасам̣варо парипӯро тӣн̣и дуччарита̄ни парипӯрети, тӣн̣и дуччарита̄ни парипӯра̄ни пан̃ча нӣваран̣е парипӯренти, пан̃ча нӣваран̣а̄ парипӯра̄ авиджджам̣ парипӯренти, авиджджа̄ парипӯра̄ бхаватан̣хам̣ парипӯрети; еваметисса̄ бхаватан̣ха̄йа а̄ха̄ро хоти, еван̃ча па̄рипӯри.

‘‘евамевам̣ кхо, бхиккхаве, асаппурисасам̣сево парипӯро ассаддхаммассаванам̣ парипӯрети, ассаддхаммассаванам̣ парипӯрам̣ ассаддхийам̣ парипӯрети, ассаддхийам̣ парипӯрам̣ айонисоманасика̄рам̣ парипӯрети, айонисоманасика̄ро парипӯро асата̄сампаджан̃н̃ам̣ парипӯрети, асата̄сампаджан̃н̃ам̣ парипӯрам̣ индрийаасам̣варам̣ парипӯрети, индрийаасам̣варо парипӯро тӣн̣и дуччарита̄ни парипӯрети, тӣн̣и дуччарита̄ни парипӯра̄ни пан̃ча нӣваран̣е парипӯренти, пан̃ча нӣваран̣а̄ парипӯра̄ авиджджам̣ парипӯренти, авиджджа̄ парипӯра̄ бхаватан̣хам̣ парипӯрети; еваметисса̄ бхаватан̣ха̄йа а̄ха̄ро хоти, еван̃ча па̄рипӯри.

‘‘виджджа̄вимуттимпа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро виджджа̄вимуттийа̄? ‘сатта боджджхан̇га̄’тисса вачанӣйам̣. саттапа̄хам̣, бхиккхаве, боджджхан̇ге са̄ха̄ре вада̄ми, но ана̄ха̄ре. ко ча̄ха̄ро саттаннам̣ боджджхан̇га̄нам̣? ‘чатта̄ро сатипат̣т̣ха̄на̄’тисса вачанӣйам̣. чатта̄ропа̄хам̣, бхиккхаве, сатипат̣т̣ха̄не са̄ха̄ре вада̄ми, но ана̄ха̄ре. ко ча̄ха̄ро чатуннам̣ сатипат̣т̣ха̄на̄нам̣? ‘тӣн̣и сучарита̄нӣ’тисса вачанӣйам̣. тӣн̣ипа̄хам̣, бхиккхаве, сучарита̄ни са̄ха̄ра̄ни вада̄ми, но ана̄ха̄ра̄ни. ко ча̄ха̄ро тин̣н̣аннам̣ сучарита̄нам̣? ‘индрийасам̣варо’тисса вачанӣйам̣. индрийасам̣варампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро индрийасам̣варасса? ‘сатисампаджан̃н̃а’нтисса вачанӣйам̣. сатисампаджан̃н̃ампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро сатисампаджан̃н̃асса? ‘йонисоманасика̄ро’тисса вачанӣйам̣. йонисоманасика̄рампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро йонисоманасика̄расса? ‘саддха̄’тисса вачанӣйам̣. саддхампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро саддха̄йа? ‘саддхаммассавана’нтисса вачанӣйам̣. саддхаммассаванампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро саддхаммассаванасса? ‘саппурисасам̣сево’тисса вачанӣйам̣.

‘‘сеййатха̄пи, бхиккхаве, упарипаббате тхуллапхуситаке деве вассанте там̣ удакам̣ йатха̄ниннам̣ паваттама̄нам̣…пе… еваметасса маха̄самуддасса са̄гарасса а̄ха̄ро хоти, еван̃ча па̄рипӯри. евамевам̣ кхо, бхиккхаве, саппурисасам̣сево парипӯро саддхаммассаванам̣ парипӯрети…пе… еваметисса̄ виджджа̄вимуттийа̄ а̄ха̄ро хоти, еван̃ча па̄рипӯрӣ’’ти. дутийам̣.

3. нит̣т̣хан̇гатасуттам̣

63. ‘‘йе кечи, бхиккхаве, майи нит̣т̣хам̣ гата̄ саббе те дит̣т̣хисампанна̄. тесам̣ дит̣т̣хисампанна̄нам̣ пан̃чаннам̣ идха нит̣т̣ха̄, пан̃чаннам̣ идха виха̄йа нит̣т̣ха̄. катамесам̣ пан̃чаннам̣ идха нит̣т̣ха̄? саттаккхаттупарамасса, колам̣коласса, екабӣджисса, сакада̄га̄мисса, йо ча дит̣т̣хева дхамме араха̄ – имесам̣ пан̃чаннам̣ идха нит̣т̣ха̄. катамесам̣ пан̃чаннам̣ идха виха̄йа нит̣т̣ха̄? антара̄паринибба̄йисса, упахаччапаринибба̄йисса, асан̇кха̄рапаринибба̄йисса, сасан̇кха̄рапаринибба̄йисса, уддхам̣сотасса аканит̣т̣хага̄мино – имесам̣ пан̃чаннам̣ идха виха̄йа нит̣т̣ха̄. йе кечи, бхиккхаве, майи нит̣т̣хам̣ гата̄, саббе те дит̣т̣хисампанна̄. тесам̣ дит̣т̣хисампанна̄нам̣ имесам̣ пан̃чаннам̣ идха нит̣т̣ха̄, имесам̣ пан̃чаннам̣ идха виха̄йа нит̣т̣ха̄’’ти. татийам̣.

4. авеччаппасаннасуттам̣

64. ‘‘йе кечи, бхиккхаве, майи авеччаппасанна̄, саббе те сота̄панна̄. тесам̣ сота̄панна̄нам̣ пан̃чаннам̣ идха нит̣т̣ха̄, пан̃чаннам̣ идха виха̄йа нит̣т̣ха̄. катамесам̣ пан̃чаннам̣ идха нит̣т̣ха̄? саттаккхаттупарамасса, колам̣коласса, екабӣджисса, сакада̄га̄мисса, йо ча дит̣т̣хева дхамме араха̄ – имесам̣ пан̃чаннам̣ идха нит̣т̣ха̄. катамесам̣ пан̃чаннам̣ идха виха̄йа нит̣т̣ха̄? антара̄паринибба̄йисса, упахаччапаринибба̄йисса, асан̇кха̄рапаринибба̄йисса, сасан̇кха̄рапаринибба̄йисса, уддхам̣сотасса аканит̣т̣хага̄мино – имесам̣ пан̃чаннам̣ идха виха̄йа нит̣т̣ха̄. йе кечи, бхиккхаве, майи авеччаппасанна̄ саббе те сота̄панна̄. тесам̣ сота̄панна̄нам̣ имесам̣ пан̃чаннам̣ идха нит̣т̣ха̄, имесам̣ пан̃чаннам̣ идха виха̄йа нит̣т̣ха̄’’ти. чатуттхам̣.

5. пат̣хамасукхасуттам̣

65. екам̣ самайам̣ а̄йасма̄ са̄рипутто магадхесу вихарати на̄лакага̄маке. атха кхо са̄ман̣д̣ака̄ни парибба̄джако йена̄йасма̄ са̄рипутто тенупасан̇ками; упасан̇камитва̄ а̄йасмата̄ са̄рипуттена саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо са̄ман̣д̣ака̄ни парибба̄джако а̄йасмантам̣ са̄рипуттам̣ етадавоча –

‘‘ким̣ ну кхо, а̄вусо са̄рипутта, сукхам̣, ким̣ дуккха’’нти? ‘‘абхиниббатти кхо, а̄вусо, дуккха̄, анабхиниббатти сукха̄. абхиниббаттийа̄, а̄вусо, сати идам̣ дуккхам̣ па̄т̣икан̇кхам̣ – сӣтам̣ ун̣хам̣ джигхаччха̄ пипа̄са̄ учча̄ро пасса̄во аггисампхассо дан̣д̣асампхассо саттхасампхассо н̃а̄тӣпи митта̄пи сан̇гамма сама̄гамма росенти. абхиниббаттийа̄, а̄вусо, сати идам̣ дуккхам̣ па̄т̣икан̇кхам̣. анабхиниббаттийа̄, а̄вусо, сати идам̣ сукхам̣ па̄т̣икан̇кхам̣ – на сӣтам̣ на ун̣хам̣ на джигхаччха̄ на пипа̄са̄ на учча̄ро на пасса̄во на аггисампхассо на дан̣д̣асампхассо на саттхасампхассо н̃а̄тӣпи митта̄пи сан̇гамма сама̄гамма на росенти. анабхиниббаттийа̄, а̄вусо, сати идам̣ сукхам̣ па̄т̣икан̇кха’’нти. пан̃чамам̣.

6. дутийасукхасуттам̣

66. екам̣ самайам̣ а̄йасма̄ са̄рипутто магадхесу вихарати на̄лакага̄маке. атха кхо са̄ман̣д̣ака̄ни парибба̄джако йена̄йасма̄ са̄рипутто тенупасан̇ками; упасан̇камитва̄ а̄йасмата̄ са̄рипуттена саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо са̄ман̣д̣ака̄ни парибба̄джако а̄йасмантам̣ са̄рипуттам̣ етадавоча –

‘‘ким̣ ну кхо, а̄вусо, са̄рипутта, имасмим̣ дхаммавинайе сукхам̣, ким̣ дуккха’’нти? ‘‘анабхирати кхо, а̄вусо, имасмим̣ дхаммавинайе дуккха̄, абхирати сукха̄. анабхиратийа̄, а̄вусо, сати идам̣ дуккхам̣ па̄т̣икан̇кхам̣ – гаччхантопи сукхам̣ са̄там̣ на̄дхигаччхати, т̣хитопи… нисиннопи… сайа̄нопи… га̄магатопи… аран̃н̃агатопи… руккхамӯлагатопи… сун̃н̃а̄га̄рагатопи… аббхока̄сагатопи… бхиккхумаджджхагатопи сукхам̣ са̄там̣ на̄дхигаччхати. анабхиратийа̄, а̄вусо, сати идам̣ дуккхам̣ па̄т̣икан̇кхам̣.

‘‘абхиратийа̄, а̄вусо, сати идам̣ сукхам̣ па̄т̣икан̇кхам̣ – гаччхантопи сукхам̣ са̄там̣ адхигаччхати, т̣хитопи… нисиннопи… сайа̄нопи… га̄магатопи… аран̃н̃агатопи… руккхамӯлагатопи… сун̃н̃а̄га̄рагатопи… аббхока̄сагатопи… бхиккхумаджджхагатопи сукхам̣ са̄там̣ адхигаччхати. абхиратийа̄, а̄вусо, сати идам̣ сукхам̣ па̄т̣икан̇кха’’нти. чхат̣т̣хам̣.

7. пат̣хаманал̣акапа̄насуттам̣

67. екам̣ самайам̣ бхагава̄ косалесу ча̄рикам̣ чарама̄но махата̄ бхиккхусан̇гхена саддхим̣ йена нал̣акапа̄нам̣ на̄ма косала̄нам̣ нигамо тадавасари. татра судам̣ бхагава̄ нал̣акапа̄не вихарати пала̄саване. тена кхо пана самайена бхагава̄ тадахупосатхе бхиккхусан̇гхапаривуто нисинно хоти. атха кхо бхагава̄ бахудева раттим̣ бхиккхӯнам̣ дхаммийа̄ катха̄йа сандассетва̄ сама̄дапетва̄ самуттеджетва̄ сампахам̣сетва̄ тун̣хӣбхӯтам̣ тун̣хӣбхӯтам̣ бхиккхусан̇гхам̣ анувилокетва̄ а̄йасмантам̣ са̄рипуттам̣ а̄мантеси –

‘‘вигататхинамиддхо [вигататхӣнамиддхо (сӣ. сйа̄. кам̣. пӣ.)] кхо, са̄рипутта, бхиккхусан̇гхо. пат̣ибха̄ту там̣, са̄рипутта, бхиккхӯнам̣ дхаммӣ катха̄. пит̣т̣хи ме а̄гила̄йати; тамахам̣ а̄йамисса̄мӣ’’ти. ‘‘евам̣, бханте’’ти кхо а̄йасма̄ са̄рипутто бхагавато паччассоси.

атха кхо бхагава̄ чатуггун̣ам̣ сан̇гха̄т̣им̣ пан̃н̃а̄петва̄ даккхин̣ена пассена сӣхасеййам̣ каппеси па̄де па̄дам̣ ачча̄дха̄йа сато сампаджа̄но ут̣т̣ха̄насан̃н̃ам̣ манаси каритва̄. татра кхо а̄йасма̄ са̄рипутто бхиккхӯ а̄мантеси – ‘‘а̄вусо бхиккхаве’’ти. ‘‘а̄вусо’’ти кхо те бхиккхӯ а̄йасмато са̄рипуттасса паччассосум̣. а̄йасма̄ са̄рипутто етадавоча –

‘‘йасса кассачи, а̄вусо, саддха̄ наттхи кусалесу дхаммесу, хирӣ [хири (сӣ. сйа̄. кам̣. пӣ.)] наттхи… оттаппам̣ наттхи … вӣрийам̣ [вирийам̣ (сӣ. сйа̄. кам̣. пӣ.)] наттхи… пан̃н̃а̄ наттхи кусалесу дхаммесу, тасса йа̄ ратти ва̄ дивасо ва̄ а̄гаччхати, ха̄нийева па̄т̣икан̇кха̄ кусалесу дхаммесу но вуддхи. сеййатха̄пи, а̄вусо, ка̄л̣апаккхе чандасса йа̄ ратти ва̄ дивасо ва̄ а̄гаччхати, ха̄йатева ван̣н̣ена ха̄йати ман̣д̣алена ха̄йати а̄бха̄йа ха̄йати а̄рохапарин̣а̄хена; евамевам̣ кхо, а̄вусо, йасса кассачи саддха̄ наттхи кусалесу дхаммесу, хирӣ наттхи… оттаппам̣ наттхи… вӣрийам̣ наттхи… пан̃н̃а̄ наттхи кусалесу дхаммесу, тасса йа̄ ратти ва̄ дивасо ва̄ а̄гаччхати, ха̄нийева па̄т̣икан̇кха̄ кусалесу дхаммесу но вуддхи.

‘‘ассаддхо пурисапуггало’ти, а̄вусо, париха̄наметам̣; ‘ахирико пурисапуггало’ти, а̄вусо, париха̄наметам̣; ‘аноттаппӣ пурисапуггало’ти, а̄вусо, париха̄наметам̣; ‘кусӣто пурисапуггало’ти, а̄вусо, париха̄наметам̣; ‘дуппан̃н̃о пурисапуггало’ти, а̄вусо, париха̄наметам̣; ‘кодхано пурисапуггало’ти, а̄вусо, париха̄наметам̣; ‘упана̄хӣ пурисапуггало’ти, а̄вусо, париха̄наметам̣; ‘па̄пиччхо пурисапуггало’ти, а̄вусо, париха̄наметам̣; ‘па̄памитто пурисапуггало’ти, а̄вусо, париха̄наметам̣; ‘миччха̄дит̣т̣хико пурисапуггало’ти, а̄вусо, париха̄наметам̣.

‘‘йасса кассачи, а̄вусо, саддха̄ аттхи кусалесу дхаммесу, хирӣ аттхи… оттаппам̣ аттхи… пан̃н̃а̄ аттхи кусалесу дхаммесу, тасса йа̄ ратти ва̄ дивасо ва̄ а̄гаччхати, вуддхийева па̄т̣икан̇кха̄ кусалесу дхаммесу но париха̄ни. сеййатха̄пи, а̄вусо, джун̣хапаккхе чандасса йа̄ ратти ва̄ дивасо ва̄ а̄гаччхати, вад̣д̣хатева ван̣н̣ена вад̣д̣хати ман̣д̣алена вад̣д̣хати а̄бха̄йа вад̣д̣хати а̄рохапарин̣а̄хена; евамевам̣ кхо, а̄вусо, йасса кассачи саддха̄ аттхи кусалесу дхаммесу, хирӣ аттхи… оттаппам̣ аттхи… вӣрийам̣ аттхи… пан̃н̃а̄ аттхи кусалесу дхаммесу, тасса йа̄ ратти ва̄ дивасо ва̄ а̄гаччхати, вуддхийева па̄т̣икан̇кха̄ кусалесу дхаммесу но париха̄ни.

‘‘‘саддхо пурисапуггало’ти, а̄вусо, апариха̄наметам̣; ‘хирӣма̄ пурисапуггало’ти, а̄вусо, апариха̄наметам̣; ‘оттаппӣ пурисапуггало’ти, а̄вусо, апариха̄наметам̣; ‘а̄раддхавӣрийо пурисапуггало’ти, а̄вусо, апариха̄наметам̣; ‘пан̃н̃ава̄ пурисапуггало’ти, а̄вусо, апариха̄наметам̣; ‘аккодхано пурисапуггало’ти, а̄вусо, апариха̄наметам̣; ‘анупана̄хӣ пурисапуггало’ти, а̄вусо, апариха̄наметам̣; ‘аппиччхо пурисапуггало’ти, а̄вусо, апариха̄наметам̣; ‘калйа̄н̣амитто пурисапуггало’ти, а̄вусо, апариха̄наметам̣; ‘самма̄дит̣т̣хико пурисапуггало’ти, а̄вусо, апариха̄намета’’нти.

атха кхо бхагава̄ паччут̣т̣ха̄йа а̄йасмантам̣ са̄рипуттам̣ а̄мантеси – ‘‘са̄дху са̄дху, са̄рипутта! йасса кассачи, са̄рипутта, саддха̄ наттхи кусалесу дхаммесу, хирӣ наттхи… оттаппам̣ наттхи… вӣрийам̣ наттхи… пан̃н̃а̄ наттхи кусалесу дхаммесу, тасса йа̄ ратти ва̄ дивасо ва̄ а̄гаччхати, ха̄нийева па̄т̣икан̇кха̄ кусалесу дхаммесу но вуддхи. сеййатха̄пи, са̄рипутта, ка̄л̣апаккхе чандасса йа̄ ратти ва̄ дивасо ва̄ а̄гаччхати, ха̄йатева ван̣н̣ена ха̄йати ман̣д̣алена ха̄йати а̄бха̄йа ха̄йати а̄рохапарин̣а̄хена; евамевам̣ кхо, са̄рипутта, йасса кассачи саддха̄ наттхи кусалесу дхаммесу…пе… пан̃н̃а̄ наттхи кусалесу дхаммесу, тасса йа̄ ратти ва̄ дивасо ва̄ …пе… но вуддхи.

‘‘‘ассаддхо пурисапуггало’ти, са̄рипутта, париха̄наметам̣; ахирико… аноттаппӣ… кусӣто… дуппан̃н̃о… кодхано… упана̄хӣ… па̄пиччхо… па̄памитто… ‘миччха̄дит̣т̣хико пурисапуггало’ти, са̄рипутта, париха̄наметам̣.

‘‘йасса кассачи, са̄рипутта, саддха̄ аттхи кусалесу дхаммесу, хирӣ аттхи… оттаппам̣ аттхи… вӣрийам̣ аттхи… пан̃н̃а̄ аттхи кусалесу дхаммесу, тасса йа̄ ратти ва̄ дивасо ва̄ а̄гаччхати, вуддхийева па̄т̣икан̇кха̄ кусалесу дхаммесу но париха̄ни. сеййатха̄пи, са̄рипутта, джун̣хапаккхе чандасса йа̄ ратти ва̄ дивасо ва̄ а̄гаччхати, вад̣д̣хатева ван̣н̣ена вад̣д̣хати ман̣д̣алена вад̣д̣хати а̄бха̄йа вад̣д̣хати а̄рохапарин̣а̄хена; евамевам̣ кхо, са̄рипутта, йасса кассачи саддха̄ аттхи кусалесу дхаммесу, хирӣ аттхи… оттаппам̣ аттхи… вӣрийам̣ аттхи… пан̃н̃а̄ аттхи кусалесу дхаммесу, тасса йа̄ ратти ва̄ дивасо ва̄ а̄гаччхати, вуддхийева па̄т̣икан̇кха̄ кусалесу дхаммесу но париха̄ни.

‘‘‘саддхо пурисапуггало’ти, са̄рипутта, апариха̄наметам̣; хирӣма̄… оттаппӣ… а̄раддхавӣрийо… пан̃н̃ава̄… аккодхано… анупана̄хӣ… аппиччхо… калйа̄н̣амитто… ‘самма̄дит̣т̣хико пурисапуггало’ти, са̄рипутта, апариха̄намета’’нти. саттамам̣.

8. дутийанал̣акапа̄насуттам̣

68. екам̣ самайам̣ бхагава̄ нал̣акапа̄не вихарати пала̄саване. тена кхо пана самайена бхагава̄ тадахупосатхе бхиккхусан̇гхапаривуто нисинно хоти. атха кхо бхагава̄ бахудева раттим̣ бхиккхӯнам̣ дхаммийа̄ катха̄йа сандассетва̄ сама̄дапетва̄ самуттеджетва̄ сампахам̣сетва̄ тун̣хӣбхӯтам̣ тун̣хӣбхӯтам̣ бхиккхусан̇гхам̣ анувилокетва̄ а̄йасмантам̣ са̄рипуттам̣ а̄мантеси –

‘‘вигататхинамиддхо кхо, са̄рипутта, бхиккхусан̇гхо. пат̣ибха̄ту там̣, са̄рипутта, бхиккхӯнам̣ дхаммӣ катха̄. пит̣т̣хи ме а̄гила̄йати; тамахам̣ а̄йамисса̄мӣ’’ти. ‘‘евам̣, бханте’’ти кхо а̄йасма̄ са̄рипутто бхагавато паччассоси.

атха кхо бхагава̄ чатуггун̣ам̣ сан̇гха̄т̣им̣ пан̃н̃а̄петва̄ даккхин̣ена пассена сӣхасеййам̣ каппеси па̄де па̄дам̣ ачча̄дха̄йа сато сампаджа̄но ут̣т̣ха̄насан̃н̃ам̣ манаси каритва̄. татра кхо а̄йасма̄ са̄рипутто бхиккхӯ а̄мантеси – ‘‘а̄вусо, бхиккхаве’’ти! ‘‘а̄вусо’’ти кхо те бхиккхӯ а̄йасмато са̄рипуттасса паччассосум̣. а̄йасма̄ са̄рипутто етадавоча –

‘‘йасса кассачи, а̄вусо, саддха̄ наттхи кусалесу дхаммесу, хирӣ наттхи… оттаппам̣ наттхи… вӣрийам̣ наттхи… пан̃н̃а̄ наттхи… сота̄вадха̄нам̣ наттхи… дхаммадха̄ран̣а̄ наттхи… аттхӯпапариккха̄ наттхи… дхамма̄нудхаммаппат̣ипатти наттхи… аппама̄до наттхи кусалесу дхаммесу, тасса йа̄ ратти ва̄ дивасо ва̄ а̄гаччхати, ха̄нийева па̄т̣икан̇кха̄ кусалесу дхаммесу но вуддхи. сеййатха̄пи, а̄вусо, ка̄л̣апаккхе чандасса йа̄ ратти ва̄ дивасо ва̄ а̄гаччхати, ха̄йатева ван̣н̣ена ха̄йати ман̣д̣алена ха̄йати а̄бха̄йа ха̄йати а̄рохапарин̣а̄хена; евамевам̣ кхо, а̄вусо, йасса кассачи саддха̄ наттхи кусалесу дхаммесу, хирӣ наттхи… оттаппам̣ наттхи… вӣрийам̣ наттхи… пан̃н̃а̄ наттхи… сота̄вадха̄нам̣ наттхи… дхаммадха̄ран̣а̄ наттхи… аттхӯпапариккха̄ наттхи… дхамма̄нудхаммаппат̣ипатти наттхи… аппама̄до наттхи кусалесу дхаммесу, тасса йа̄ ратти ва̄ дивасо ва̄ а̄гаччхати, ха̄нийева па̄т̣икан̇кха̄ кусалесу дхаммесу но вуддхи.

‘‘йасса кассачи, а̄вусо, саддха̄ аттхи кусалесу дхаммесу, хирӣ аттхи… оттаппам̣ аттхи… вӣрийам̣ аттхи… пан̃н̃а̄ аттхи… сота̄вадха̄нам̣ аттхи… дхаммадха̄ран̣а̄ аттхи… аттхӯпапариккха̄ аттхи… дхамма̄нудхаммаппат̣ипатти аттхи… аппама̄до аттхи кусалесу дхаммесу, тасса йа̄ ратти ва̄ дивасо ва̄ а̄гаччхати, вуддхийева па̄т̣икан̇кха̄ кусалесу дхаммесу но париха̄ни. сеййатха̄пи, а̄вусо, джун̣хапаккхе чандасса йа̄ ратти ва̄ дивасо ва̄ а̄гаччхати, вад̣д̣хатева ван̣н̣ена вад̣д̣хати ман̣д̣алена вад̣д̣хати а̄бха̄йа вад̣д̣хати а̄рохапарин̣а̄хена; евамевам̣ кхо, а̄вусо, йасса кассачи саддха̄ аттхи кусалесу дхаммесу…пе… аппама̄до аттхи кусалесу дхаммесу, тасса йа̄ ратти ва̄ дивасо ва̄ а̄гаччхати, вуддхийева па̄т̣икан̇кха̄ кусалесу дхаммесу но париха̄нӣ’’ти.

атха кхо бхагава̄ паччут̣т̣ха̄йа а̄йасмантам̣ са̄рипуттам̣ а̄мантеси – ‘‘са̄дху са̄дху, са̄рипутта! йасса кассачи, са̄рипутта, саддха̄ наттхи кусалесу дхаммесу хирӣ наттхи… оттаппам̣ наттхи… пан̃н̃а̄ наттхи… вӣрийам̣ наттхи… сота̄вадха̄нам̣ наттхи… дхаммадха̄ран̣а̄ наттхи… аттхӯпапариккха̄ наттхи… дхамма̄нудхаммаппат̣ипатти наттхи… аппама̄до наттхи кусалесу дхаммесу тасса йа̄ ратти ва̄ дивасо ва̄ а̄гаччхати, ха̄нийева па̄т̣икан̇кха̄ кусалесу дхаммесу но вуддхи. сеййатха̄пи, са̄рипутта, ка̄л̣апаккхе чандасса йа̄ ратти ва̄ дивасо ва̄ а̄гаччхати, ха̄йатева ван̣н̣ена ха̄йати ман̣д̣алена ха̄йати а̄бха̄йа ха̄йати а̄рохапарин̣а̄хена; евамевам̣ кхо, са̄рипутта, йасса кассачи саддха̄ наттхи кусалесу дхаммесу…пе… аппама̄до наттхи кусалесу дхаммесу, тасса йа̄ ратти ва̄ дивасо ва̄ а̄гаччхати, ха̄нийева па̄т̣икан̇кха̄ кусалесу дхаммесу но вуддхи.

‘‘йасса кассачи, са̄рипутта, саддха̄ аттхи кусалесу дхаммесу хирӣ аттхи… оттаппам̣ аттхи… вӣрийам̣ аттхи… пан̃н̃а̄ аттхи… сота̄вадха̄нам̣ аттхи… дхаммадха̄ран̣а̄ аттхи… аттхӯпапариккха̄ аттхи… дхамма̄нудхаммаппат̣ипатти аттхи… аппама̄до аттхи кусалесу дхаммесу, тасса йа̄ ратти ва̄ дивасо ва̄ а̄гаччхати, вуддхийева па̄т̣икан̇кха̄ кусалесу дхаммесу но париха̄ни. сеййатха̄пи, са̄рипутта, джун̣хапаккхе чандасса йа̄ ратти ва̄ дивасо ва̄ а̄гаччхати, вад̣д̣хатева ван̣н̣ена вад̣д̣хати ман̣д̣алена вад̣д̣хати а̄бха̄йа вад̣д̣хати а̄рохапарин̣а̄хена; евамевам̣ кхо, са̄рипутта, йасса кассачи саддха̄ аттхи кусалесу дхаммесу…пе… аппама̄до аттхи кусалесу дхаммесу, тасса йа̄ ратти ва̄ дивасо ва̄ а̄гаччхати, вуддхийева па̄т̣икан̇кха̄ кусалесу дхаммесу но париха̄нӣ’’ти. ат̣т̣хамам̣.

9. пат̣хамакатха̄ваттхусуттам̣

69. екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена самбахула̄ бхиккхӯ паччха̄бхаттам̣ пин̣д̣апа̄тапат̣икканта̄ упат̣т̣ха̄наса̄ла̄йам̣ саннисинна̄ саннипатита̄ анекавихитам̣ тираччха̄накатхам̣ ануйутта̄ вихаранти, сеййатхидам̣ – [дӣ. ни. 1.17; ма. ни. 2.223; сам̣. ни. 5.1080; па̄чи. 508] ра̄джакатхам̣ чоракатхам̣ маха̄маттакатхам̣ сена̄катхам̣ бхайакатхам̣ йуддхакатхам̣ аннакатхам̣ па̄накатхам̣ ваттхакатхам̣ сайанакатхам̣ ма̄ла̄катхам̣ гандхакатхам̣ н̃а̄тикатхам̣ йа̄накатхам̣ га̄макатхам̣ нигамакатхам̣ нагаракатхам̣ джанападакатхам̣ иттхикатхам̣ [иттхикатхам̣ пурисакатхам̣ (ка.) ма. ни. ат̣т̣ха. 2.223 пасситаббам̣] сӯракатхам̣ висикха̄катхам̣ кумбхат̣т̣ха̄накатхам̣ пуббапетакатхам̣ на̄наттакатхам̣ локаккха̄йикам̣ самуддаккха̄йикам̣ итибхава̄бхавакатхам̣ ити ва̄ти.

атха кхо бхагава̄ са̄йанхасамайам̣ пат̣исалла̄на̄ вут̣т̣хито йена упат̣т̣ха̄наса̄ла̄ тенупасан̇ками; упасан̇камитва̄ пан̃н̃атте а̄сане нисӣди. нисаджджа кхо бхагава̄ бхиккхӯ а̄мантеси – ‘‘ка̄йа нуттха, бхиккхаве, етарахи катха̄йа саннисинна̄ саннипатита̄, ка̄ ча пана во антара̄катха̄ виппаката̄’’ти?

‘‘идха майам̣, бханте, паччха̄бхаттам̣ пин̣д̣апа̄тапат̣икканта̄ упат̣т̣ха̄наса̄ла̄йам̣ саннисинна̄ саннипатита̄ анекавихитам̣ тираччха̄накатхам̣ ануйутта̄ вихара̄ма, сеййатхидам̣ – ра̄джакатхам̣ чоракатхам̣…пе… итибхава̄бхавакатхам̣ ити ва̄’’ти. ‘‘на кхо панетам̣, бхиккхаве, тумха̄кам̣ патирӯпам̣ кулапутта̄нам̣ саддха̄йа ага̄расма̄ анага̄рийам̣ паббаджита̄нам̣, йам̣ тумхе анекавихитам̣ тираччха̄накатхам̣ ануйутта̄ вихареййа̄тха, сеййатхидам̣ – ра̄джакатхам̣ чоракатхам̣ маха̄маттакатхам̣ сена̄катхам̣ бхайакатхам̣ йуддхакатхам̣ аннакатхам̣ па̄накатхам̣ ваттхакатхам̣ сайанакатхам̣ ма̄ла̄катхам̣ гандхакатхам̣ н̃а̄тикатхам̣ йа̄накатхам̣ га̄макатхам̣ нигамакатхам̣ нагаракатхам̣ джанападакатхам̣ иттхикатхам̣ сӯракатхам̣ висикха̄катхам̣ кумбхат̣т̣ха̄накатхам̣ пуббапетакатхам̣ на̄наттакатхам̣ локаккха̄йикам̣ самуддаккха̄йикам̣ итибхава̄бхавакатхам̣ ити ва̄ти.

‘‘дасайима̄ни, бхиккхаве, катха̄ваттхӯни. катама̄ни даса? аппиччхакатха̄, сантут̣т̣хикатха̄, павивекакатха̄, асам̣саггакатха̄, вӣрийа̄рамбхакатха̄, сӣлакатха̄, сама̄дхикатха̄, пан̃н̃а̄катха̄, вимуттикатха̄, вимуттин̃а̄н̣адассанакатха̄ти – има̄ни кхо, бхиккхаве, даса катха̄ваттхӯни.

‘‘имесам̣ че тумхе, бхиккхаве, дасаннам̣ катха̄ваттхӯнам̣ упа̄да̄йупа̄да̄йа катхам̣ катхеййа̄тха, имесампи чандимасӯрийа̄нам̣ евам̣махиддхика̄нам̣ евам̣маха̄нубха̄ва̄нам̣ теджаса̄ теджам̣ парийа̄дийеййа̄тха, ко пана ва̄до ан̃н̃атиттхийа̄нам̣ парибба̄джака̄на’’нти! навамам̣.

10. дутийакатха̄ваттхусуттам̣

70. екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена самбахула̄ бхиккхӯ паччха̄бхаттам̣ пин̣д̣апа̄тапат̣икканта̄ упат̣т̣ха̄наса̄ла̄йам̣ саннисинна̄ саннипатита̄ анекавихитам̣ тираччха̄накатхам̣ ануйутта̄ вихаранти, сеййатхидам̣ – ра̄джакатхам̣ чоракатхам̣ маха̄маттакатхам̣…пе… итибхава̄бхавакатхам̣ ити ва̄ти.

‘‘дасайима̄ни, бхиккхаве, па̄сам̣са̄ни т̣ха̄на̄ни. катама̄ни даса? идха, бхиккхаве, бхиккху аттана̄ ча аппиччхо хоти, аппиччхакатхан̃ча бхиккхӯнам̣ катта̄ хоти. ‘аппиччхо бхиккху аппиччхакатхан̃ча бхиккхӯнам̣ катта̄’ти па̄сам̣саметам̣ т̣ха̄нам̣.

‘‘аттана̄ ча сантут̣т̣хо хоти, сантут̣т̣хикатхан̃ча бхиккхӯнам̣ катта̄ хоти. ‘сантут̣т̣хо бхиккху сантут̣т̣хикатхан̃ча бхиккхӯнам̣ катта̄’ти па̄сам̣саметам̣ т̣ха̄нам̣.

‘‘аттана̄ ча павивитто хоти, павивекакатхан̃ча бхиккхӯнам̣ катта̄ хоти. ‘павивитто бхиккху павивекакатхан̃ча бхиккхӯнам̣ катта̄’ти па̄сам̣саметам̣ т̣ха̄нам̣.

‘‘аттана̄ ча асам̣сат̣т̣хо хоти, асам̣сат̣т̣хакатхан̃ча бхиккхӯнам̣ катта̄ хоти. ‘асам̣сат̣т̣хо бхиккху асам̣сат̣т̣хакатхан̃ча бхиккхӯнам̣ катта̄’ти па̄сам̣саметам̣ т̣ха̄нам̣.

‘‘аттана̄ ча а̄раддхавӣрийо хоти, вӣрийа̄рамбхакатхан̃ча бхиккхӯнам̣ катта̄ хоти. ‘а̄раддхавӣрийо бхиккху вӣрийа̄рамбхакатхан̃ча бхиккхӯнам̣ катта̄’ти па̄сам̣саметам̣ т̣ха̄нам̣.

‘‘аттана̄ ча сӣласампанно хоти, сӣласампада̄катхан̃ча бхиккхӯнам̣ катта̄ хоти. ‘сӣласампанно бхиккху сӣласампада̄катхан̃ча бхиккхӯнам̣ катта̄’ти па̄сам̣саметам̣ т̣ха̄нам̣.

‘‘аттана̄ ча сама̄дхисампанно хоти, сама̄дхисампада̄катхан̃ча бхиккхӯнам̣ катта̄ хоти. ‘сама̄дхисампанно бхиккху сама̄дхисампада̄катхан̃ча бхиккхӯнам̣ катта̄’ти па̄сам̣саметам̣ т̣ха̄нам̣.

‘‘аттана̄ ча пан̃н̃а̄сампанно хоти, пан̃н̃а̄сампада̄катхан̃ча бхиккхӯнам̣ катта̄ хоти. ‘пан̃н̃а̄сампанно бхиккху пан̃н̃а̄сампада̄катхан̃ча бхиккхӯнам̣ катта̄’ти па̄сам̣саметам̣ т̣ха̄нам̣.

‘‘аттана̄ ча вимуттисампанно хоти, вимуттисампада̄катхан̃ча бхиккхӯнам̣ катта̄ хоти. ‘вимуттисампанно бхиккху вимуттисампада̄катхан̃ча бхиккхӯнам̣ катта̄’ти па̄сам̣саметам̣ т̣ха̄нам̣.

‘‘аттана̄ ча вимуттин̃а̄н̣адассанасампанно хоти, вимуттин̃а̄н̣адассанасампада̄катхан̃ча бхиккхӯнам̣ катта̄ хоти. ‘вимуттин̃а̄н̣адассанасампанно бхиккху вимуттин̃а̄н̣адассанасампада̄катхан̃ча бхиккхӯнам̣ катта̄’ти па̄сам̣саметам̣ т̣ха̄нам̣. има̄ни кхо, бхиккхаве, даса па̄сам̣са̄ни т̣ха̄на̄нӣ’’ти. дасамам̣.

йамакавагго дутийо.