𑁭. 𑀆𑀯𑀝𑁆𑀝𑀳𑀸𑀭𑀯𑀺𑀪𑀗𑁆𑀕𑀯𑀺𑀪𑀸𑀯𑀦𑀸

𑁨𑁯. 𑀬𑁂𑀦 𑀬𑁂𑀦 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀪𑀽𑀢𑁂𑀦 𑀘𑀢𑀼𑀩𑁆𑀬𑀽𑀳𑀳𑀸𑀭𑀯𑀺𑀪𑀗𑁆𑀕𑁂𑀦 𑀦𑁂𑀭𑀼𑀢𑁆𑀢𑀸𑀤𑀬𑁄 𑀯𑀺𑀪𑀢𑁆𑀢𑀸, 𑀲𑁄…𑀧𑁂… 𑀘𑀢𑀼𑀩𑁆𑀬𑀽𑀳𑀳𑀸𑀭𑀯𑀺𑀪𑀗𑁆𑀕𑁄 𑀧𑀭𑀺𑀧𑀼𑀡𑁆𑀡𑁄, ‘‘𑀓𑀢𑀫𑁄 𑀆𑀯𑀝𑁆𑀝𑁄 𑀳𑀸𑀭𑀯𑀺𑀪𑀗𑁆𑀕𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀢𑀢𑁆𑀣 𑀓𑀢𑀫𑁄 𑀆𑀯𑀝𑁆𑀝𑁄 𑀳𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀲𑁄𑀴𑀲𑀲𑀼 𑀤𑁂𑀲𑀦𑀸𑀳𑀸𑀭𑀸𑀤𑀻𑀲𑀼 𑀓𑀢𑀫𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀆𑀯𑀝𑁆𑀝𑁄 𑀳𑀸𑀭𑁄 𑀆𑀯𑀝𑁆𑀝𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸𑀢𑀺 𑀧𑀼𑀘𑁆𑀙𑀢𑀺. ‘‘𑀏𑀓𑀫𑁆𑀳𑀺 𑀧𑀤𑀝𑁆𑀞𑀸𑀦𑁂’’𑀦𑁆𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑀲𑁆𑀲 𑀇𑀤𑀸𑀦𑀺 𑀫𑀬𑀸 𑀯𑀼𑀘𑁆𑀘𑀫𑀸𑀦𑁄 ‘‘𑀆𑀭𑀫𑁆𑀪𑀣𑀸’’𑀢𑀺𑀆𑀤𑀺𑀓𑁄 𑀯𑀺𑀢𑁆𑀣𑀸𑀭𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄 𑀆𑀯𑀝𑁆𑀝𑀳𑀸𑀭𑀯𑀺𑀪𑀗𑁆𑀕𑁄 𑀦𑀸𑀫𑀸𑀢𑀺 𑀕𑀳𑀺𑀢𑁄. ‘‘𑀢𑀢𑁆𑀣 𑀤𑁂𑀲𑀦𑀸𑀬𑀁 𑀏𑀓𑀲𑁆𑀫𑀺𑀁 𑀧𑀤𑀝𑁆𑀞𑀸𑀦𑁂 𑀤𑁂𑀲𑀦𑀸𑀭𑀼𑀴𑁆𑀳𑁂 𑀲𑁂𑀲𑀓𑀁 𑀧𑀤𑀝𑁆𑀞𑀸𑀦𑀁 𑀧𑀭𑀺𑀬𑁂𑀲𑀢𑀺, 𑀧𑀭𑀺𑀬𑁂𑀲𑀺𑀢𑁆𑀯𑀸 𑀓𑀣𑀁 𑀧𑀝𑀺𑀧𑀓𑁆𑀔𑁂 𑀆𑀯𑀝𑁆𑀝𑁂𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑁋

‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣, 𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂;

𑀥𑀼𑀦𑀸𑀣 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀦𑀴𑀸𑀕𑀸𑀭𑀁𑀯 𑀓𑀼𑀜𑁆𑀚𑀭𑁄’’𑀢𑀺. 𑁋

𑀕𑀸𑀣𑀸 𑀯𑀼𑀢𑁆𑀢𑀸. 𑀇𑀥 𑀕𑀸𑀣𑀸𑀬𑀁 𑀏𑀓𑀲𑁆𑀫𑀺𑀁 𑀧𑀤𑀝𑁆𑀞𑀸𑀦𑁂 𑀤𑁂𑀲𑀦𑀸𑀭𑀼𑀴𑁆𑀳𑁂 𑀲𑁂𑀲𑀓𑀁 𑀧𑀤𑀝𑁆𑀞𑀸𑀦𑀁 𑀧𑀭𑀺𑀬𑁂𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀕𑀸𑀣𑀸𑀢𑁆𑀣𑁄 𑀧𑀦 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁨𑁯) 𑀯𑀼𑀢𑁆𑀢𑁄.

‘‘𑀆𑀭𑀫𑁆𑀪𑀣𑀸’𑀢𑀺𑀆𑀤𑀺𑀕𑀸𑀣𑀸𑀬𑀁 𑀓𑀢𑀭𑀲𑁆𑀫𑀺𑀁 𑀧𑀤𑀝𑁆𑀞𑀸𑀦𑁂 𑀤𑁂𑀲𑀦𑀸𑀭𑀼𑀴𑁆𑀳𑁂 𑀓𑀢𑀫𑀁 𑀲𑁂𑀲𑀓𑀁 𑀧𑀤𑀝𑁆𑀞𑀸𑀦𑀁 𑀧𑀭𑀺𑀬𑁂𑀲𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣𑀸𑀢𑀺 𑀯𑀻𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀯𑀻𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑀺 𑀲𑀸𑀫𑀜𑁆𑀜𑀯𑀲𑁂𑀦 𑀯𑀼𑀢𑁆𑀢𑀫𑁆𑀧𑀺 𑀆𑀭𑀫𑁆𑀪𑀥𑀸𑀢𑀼𑀲𑀗𑁆𑀔𑀸𑀢𑀁 𑀯𑀻𑀭𑀺𑀬𑀁 𑀦𑀺𑀓𑁆𑀓𑀫𑀥𑀸𑀢𑀼𑀲𑀗𑁆𑀔𑀸𑀢𑀲𑁆𑀲 𑀯𑀻𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀦𑀺𑀓𑁆𑀓𑀫𑀥𑀸𑀢𑀼𑀲𑀗𑁆𑀔𑀸𑀢𑀁 𑀯𑀻𑀭𑀺𑀬𑀁 𑀧𑀭𑀓𑁆𑀓𑀫𑀥𑀸𑀢𑀼𑀲𑀗𑁆𑀔𑀸𑀢𑀲𑁆𑀲 𑀯𑀻𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀧𑀭𑀓𑁆𑀓𑀫𑀥𑀸𑀢𑀼𑀲𑀗𑁆𑀔𑀸𑀢𑀁 𑀯𑀻𑀭𑀺𑀬𑀁 𑀲𑀫𑀣𑀪𑀸𑀯𑀦𑀸𑀲𑀳𑀺𑀢𑀲𑁆𑀲 𑀯𑀻𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦𑀦𑁆𑀢𑀺𑀆𑀤𑀺𑀦𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀬𑀼𑀜𑁆𑀚𑀣𑀸’’𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀁 𑀲𑀫𑀣𑀪𑀸𑀯𑀦𑀸𑀲𑀳𑀺𑀢𑀁 𑀯𑀻𑀭𑀺𑀬𑀁 ‘‘𑀩𑀼𑀤𑁆𑀥𑀲𑀸𑀲𑀦𑁂’’𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀲𑁆𑀲 𑀫𑀳𑀕𑁆𑀕𑀢𑀲𑀫𑀸𑀥𑀺𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀤𑁂𑀲𑀦𑀸𑀭𑀼𑀴𑁆𑀳𑀁 𑀲𑀼𑀔𑀸𑀤𑀺𑀓𑀁 𑀲𑁂𑀲𑀓𑀫𑁆𑀧𑀺 𑀧𑀤𑀝𑁆𑀞𑀸𑀦𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. ‘‘𑀥𑀼𑀦𑀸𑀣 𑀫𑀘𑁆𑀘𑀼𑀦𑁄 𑀲𑁂𑀦’’𑀦𑁆𑀢𑀺 𑀧𑀤𑁂𑀦 𑀕𑀳𑀺𑀢𑀁 𑀯𑀺𑀧𑀲𑁆𑀲𑀦𑀸𑀲𑀳𑀺𑀢𑀁 𑀯𑀻𑀭𑀺𑀬𑀁 𑀓𑀺𑀮𑁂𑀲𑀥𑀼𑀦𑀦𑁂 𑀲𑀫𑀢𑁆𑀣𑀸𑀬 𑀧𑀜𑁆𑀜𑀸𑀬 𑀧𑀤𑀝𑁆𑀞𑀸𑀦𑀁, 𑀤𑁂𑀲𑀦𑀸𑀭𑀼𑀴𑁆𑀳𑀁 𑀲𑀫𑀸𑀥𑀺𑀆𑀤𑀺𑀓𑀁 𑀲𑁂𑀲𑀓𑀫𑁆𑀧𑀺 𑀧𑀤𑀝𑁆𑀞𑀸𑀦𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁.

‘‘𑀬𑀤𑀺 ‘𑀆𑀭𑀫𑁆𑀪𑀣𑀸’𑀢𑀺𑀆𑀤𑀺𑀓𑀁 𑀯𑀼𑀢𑁆𑀢𑀁 𑀯𑀻𑀭𑀺𑀬𑀁 𑀲𑀸𑀫𑀜𑁆𑀜𑀪𑀽𑀢𑀸𑀦𑀁 𑀯𑀻𑀭𑀺𑀬𑀲𑀫𑀸𑀥𑀺𑀧𑀜𑁆𑀜𑀸𑀦𑀁𑀬𑁂𑀯 𑀧𑀤𑀝𑁆𑀞𑀸𑀦𑀁 𑀲𑀺𑀬𑀸, 𑀏𑀯𑀁 𑀲𑀢𑀺 𑀓𑀣𑀁 𑀯𑀝𑁆𑀝𑀫𑀽𑀮𑀁 𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀯𑀝𑁆𑀝𑀁 𑀧𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀧𑀼𑀦 ‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣𑀸𑀢𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀤𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀥𑀺𑀧𑀘𑁆𑀘𑀓𑀺𑀘𑁆𑀘𑀢𑀸𑀬 𑀬𑀼𑀢𑁆𑀢𑀲𑁆𑀲𑀸𑀧𑀺 𑀯𑀻𑀭𑀺𑀬𑀸𑀥𑀺𑀓𑀲𑁆𑀲 𑀧𑀤𑀝𑁆𑀞𑀸𑀦𑀢𑁆𑀢𑀸 𑀆𑀭𑀪𑀦𑁆𑀢𑀸 𑀬𑁄𑀕𑀸𑀯𑀘𑀭𑀧𑀼𑀕𑁆𑀕𑀮𑀸 𑀯𑀝𑁆𑀝𑀫𑀽𑀮𑀁 𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀯𑀝𑁆𑀝𑀁 𑀧𑀸𑀧𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀆𑀭𑀫𑁆𑀪𑀣𑀸’’𑀢𑀺𑀆𑀤𑀺𑀓𑀸 𑀧𑀦 𑀬𑀲𑁆𑀫𑀸 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀼𑀆𑀤𑀺𑀤𑁂𑀲𑀦𑀸 𑀳𑁄𑀢𑀺, 𑀢𑀲𑁆𑀫𑀸 𑀆𑀭𑀫𑁆𑀪𑀯𑀢𑁆𑀣𑀼𑀆𑀤𑀻𑀦𑀺𑀬𑁂𑀯 𑀲𑀁𑀯𑀡𑁆𑀡𑀺𑀢𑀸𑀦𑀺 𑀧𑀤𑀝𑁆𑀞𑀸𑀦𑀦𑁆𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀇𑀫𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺 𑀤𑁂𑀲𑀦𑀸’’𑀢𑀺. ‘‘𑀆𑀭𑀫𑁆𑀪𑀣𑀸’’𑀢𑀺𑀆𑀤𑀺𑀓𑀸 𑀬𑀣𑀸𑀯𑀼𑀢𑁆𑀢𑀧𑀤𑀝𑁆𑀞𑀸𑀦𑀸𑀦𑀺 𑀤𑁂𑀲𑀦𑀸 𑀳𑁄𑀢𑀺, 𑀦 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀼𑀆𑀤𑀻𑀦𑀺, 𑀢𑀲𑁆𑀫𑀸 𑀧𑀤𑀝𑁆𑀞𑀸𑀦𑀁𑀬𑁂𑀯 𑀲𑀁𑀯𑀡𑁆𑀡𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀯𑀁 ‘‘𑀆𑀭𑀫𑁆𑀪𑀣𑀸’’𑀢𑀺𑀆𑀤𑀺𑀤𑁂𑀲𑀦𑀸𑀬 𑀧𑀤𑀝𑁆𑀞𑀸𑀦𑀯𑀲𑁂𑀦 𑀅𑀢𑁆𑀣𑁄 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀣𑀁 𑀢𑀲𑁆𑀲𑀸𑀬𑁂𑀯 𑀤𑁂𑀲𑀦𑀸𑀬 𑀧𑀝𑀺𑀧𑀓𑁆𑀔𑀯𑀲𑁂𑀦 𑀅𑀢𑁆𑀣𑁄 𑀯𑀺𑀪𑀚𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀅𑀬𑀼𑀜𑁆𑀚𑀦𑁆𑀢𑀸𑀦𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁄𑀕𑁂 𑀪𑀸𑀯𑀦𑀸𑀬𑀁 𑀅𑀬𑀼𑀜𑁆𑀚𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀅𑀧𑀭𑀺𑀧𑀓𑁆𑀓𑀜𑀸𑀡𑀸𑀦𑀁 𑀬𑁄𑀕𑁂 𑀬𑁄𑀕𑀳𑁂𑀢𑀼 𑀯𑀸𑀲𑀦𑀸𑀪𑀸𑀕𑀺𑀬𑀯𑀲𑁂𑀦 𑀆𑀬𑀢𑀺𑀁 𑀚𑀸𑀦𑀦𑀢𑁆𑀣𑀸𑀬 ‘‘𑀆𑀭𑀫𑁆𑀪𑀣𑀸’’𑀢𑀺𑀆𑀤𑀺𑀤𑁂𑀲𑀦𑀸 𑀆𑀭𑀤𑁆𑀥𑀸. 𑀬𑀼𑀜𑁆𑀚𑀦𑁆𑀢𑀸𑀦𑀁 𑀧𑀭𑀺𑀧𑀓𑁆𑀓𑀜𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀆𑀭𑀫𑁆𑀪𑁂 𑀆𑀭𑀫𑁆𑀪𑀳𑁂𑀢𑀼 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀭𑀺𑀚𑀸𑀦𑀦𑀢𑁆𑀣𑀸𑀬 ‘‘𑀆𑀭𑀫𑁆𑀪𑀣𑀸’’𑀢𑀺𑀆𑀤𑀺𑀤𑁂𑀲𑀦𑀸 𑀆𑀭𑀤𑁆𑀥𑀸.

𑀢𑀢𑁆𑀣 𑀢𑁂𑀲𑀼 𑀬𑀼𑀜𑁆𑀚𑀦𑁆𑀢𑀸𑀬𑀼𑀜𑁆𑀚𑀦𑁆𑀢𑁂𑀲𑀼 𑀧𑀭𑀺𑀧𑀓𑁆𑀓𑀸𑀧𑀭𑀺𑀧𑀓𑁆𑀓𑀜𑀸𑀡𑁂𑀲𑀼 𑀬𑁂 𑀅𑀧𑀭𑀺𑀧𑀓𑁆𑀓𑀜𑀸𑀡𑀸 𑀲𑀢𑁆𑀢𑀸 𑀦 𑀬𑀼𑀜𑁆𑀚𑀦𑁆𑀢𑀺, 𑀢𑁂 𑀅𑀧𑀭𑀺𑀧𑀓𑁆𑀓𑀜𑀸𑀡𑀸 𑀲𑀢𑁆𑀢𑀸 𑀧𑀫𑀸𑀤𑀫𑀽𑀮𑀓𑀸 𑀳𑀼𑀢𑁆𑀯𑀸 𑀬𑁄𑀕𑁂 𑀪𑀸𑀯𑀦𑀸𑀬𑀁 𑀬𑁂𑀦 𑀧𑀫𑀸𑀤𑁂𑀦 𑀦 𑀬𑀼𑀜𑁆𑀚𑀦𑁆𑀢𑀺, 𑀲𑁄 𑀧𑀫𑀸𑀤𑁄 𑀢𑀡𑁆𑀳𑀸𑀫𑀽𑀮𑀓𑁄 𑀧𑀫𑀸𑀤𑁄, 𑀅𑀯𑀺𑀚𑁆𑀚𑀸𑀫𑀽𑀮𑀓𑁄 𑀧𑀫𑀸𑀤𑁄𑀢𑀺 𑀤𑀼𑀩𑁆𑀩𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀢𑀲𑁆𑀫𑀺𑀁 𑀤𑀼𑀩𑁆𑀩𑀺𑀥𑁂 𑀧𑀫𑀸𑀤𑁂 𑀅𑀜𑁆𑀜𑀸𑀡𑁂𑀦 𑀦𑀺𑀯𑀼𑀢𑁄 𑀅𑀯𑀺𑀚𑁆𑀚𑀸𑀫𑀽𑀮𑀓𑁄 𑀲𑀢𑁆𑀢𑁄 𑀬𑁂𑀦 𑀧𑀫𑀸𑀤𑁂𑀦 𑀜𑁂𑀬𑁆𑀬𑀝𑁆𑀞𑀸𑀦𑀁 ‘‘𑀇𑀫𑁂 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀜𑁂𑀬𑁆𑀬𑀝𑁆𑀞𑀸𑀦𑀁 𑀦𑀸𑀫𑀸’’𑀢𑀺 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀬𑀁 𑀅𑀜𑁆𑀜𑀸𑀡𑀳𑁂𑀢𑀼𑀓𑁄 𑀧𑀫𑀸𑀤𑁄 𑀅𑀯𑀺𑀚𑁆𑀚𑀸𑀫𑀽𑀮𑀓𑁄 𑀧𑀫𑀸𑀤𑀸 𑀦𑀸𑀫. 𑀬𑁄 𑀧𑀫𑀸𑀤𑁄 𑀢𑀡𑁆𑀳𑀸𑀫𑀽𑀮𑀓𑁄, 𑀲𑁄 𑀧𑀫𑀸𑀤𑁄 𑀢𑀺𑀯𑀺𑀥𑁄 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀪𑁄𑀕𑀸𑀦𑀁 𑀉𑀧𑁆𑀧𑀸𑀤𑀸𑀬 𑀧𑀭𑀺𑀬𑁂𑀲𑀦𑁆𑀢𑁄 𑀢𑀡𑁆𑀳𑀺𑀓𑁄 𑀲𑀢𑁆𑀢𑁄 𑀬𑀁 𑀧𑀫𑀸𑀤𑀁 𑀆𑀧𑀚𑁆𑀚𑀢𑀺, 𑀅𑀬𑀁 𑀧𑀫𑀸𑀤𑁄 𑀘, 𑀉𑀧𑁆𑀧𑀦𑁆𑀦𑀸𑀦𑀁 𑀪𑁄𑀕𑀸𑀦𑀁 𑀞𑀺𑀢𑀢𑁆𑀣𑀸𑀬 𑀭𑀓𑁆𑀔𑀦𑁆𑀢𑁄 𑀢𑀡𑁆𑀳𑀺𑀓𑁄 𑀲𑀢𑁆𑀢𑁄 𑀆𑀭𑀓𑁆𑀔𑀦𑀺𑀫𑀺𑀢𑁆𑀢𑀁 𑀬𑀁 𑀧𑀫𑀸𑀤𑀁 𑀆𑀧𑀚𑁆𑀚𑀢𑀺, 𑀅𑀬𑀁 𑀧𑀫𑀸𑀤𑁄 𑀘, 𑀞𑀺𑀢𑀁 𑀪𑁄𑀕𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀢𑀡𑁆𑀳𑀺𑀓𑁄 𑀲𑀢𑁆𑀢𑁄 𑀧𑀭𑀺𑀪𑁄𑀕𑀦𑀺𑀫𑀺𑀢𑁆𑀢𑀁 𑀬𑀁 𑀧𑀫𑀸𑀤𑀁 𑀆𑀧𑀚𑁆𑀚𑀢𑀺, 𑀅𑀬𑀁 𑀧𑀫𑀸𑀤𑁄 𑀘𑀸𑀢𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀇𑀢𑀺 𑀮𑁄𑀓𑁂 𑀅𑀬𑀁 𑀧𑀫𑀸𑀤𑁄 𑀘𑀢𑀼𑀩𑁆𑀩𑀺𑀥𑁄 𑀅𑀯𑀺𑀚𑁆𑀚𑀸𑀧𑀤𑀝𑁆𑀞𑀸𑀦𑁄 𑀏𑀓𑀯𑀺𑀥𑁄 𑀧𑀫𑀸𑀤𑁄, 𑀢𑀡𑁆𑀳𑀸𑀧𑀤𑀝𑁆𑀞𑀸𑀦𑁄 𑀢𑀺𑀯𑀺𑀥𑁄 𑀧𑀫𑀸𑀤𑁄𑀢𑀺 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀢𑀸𑀲𑀼 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀲𑀼 𑀦𑀸𑀫𑀓𑀸𑀬𑁄 𑀨𑀲𑁆𑀲𑀸𑀤𑀺𑀦𑀸𑀫𑀲𑀫𑀽𑀳𑁄 𑀅𑀯𑀺𑀚𑁆𑀚𑀸𑀬 𑀧𑀤𑀝𑁆𑀞𑀸𑀦𑀁, 𑀭𑀽𑀧𑀓𑀸𑀬𑁄 𑀧𑀣𑀯𑀻𑀆𑀤𑀺𑀭𑀽𑀧𑀲𑀫𑀽𑀳𑁄 𑀢𑀡𑁆𑀳𑀸𑀬 𑀧𑀤𑀝𑁆𑀞𑀸𑀦𑀁 𑀳𑁄𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀆𑀭𑀫𑁆𑀪𑀥𑀸𑀢𑀼𑀦𑀺𑀓𑁆𑀓𑀫𑀥𑀸𑀢𑀼𑀲𑀗𑁆𑀔𑀸𑀢𑀲𑁆𑀲 𑀯𑀻𑀭𑀺𑀬𑀲𑁆𑀲 𑀧𑀝𑀺𑀧𑀓𑁆𑀔𑁄 𑀘𑀢𑀼𑀩𑁆𑀩𑀺𑀥𑁄 𑀧𑀫𑀸𑀤𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑁄, 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀏𑀓𑀯𑀺𑀥𑀲𑁆𑀲 𑀧𑀫𑀸𑀤𑀲𑁆𑀲 𑀅𑀯𑀺𑀚𑁆𑀚𑀸 𑀧𑀤𑀝𑁆𑀞𑀸𑀦𑀁, 𑀢𑀺𑀯𑀺𑀥𑀲𑁆𑀲 𑀧𑀫𑀸𑀤𑀲𑁆𑀲 𑀢𑀡𑁆𑀳𑀸 𑀧𑀤𑀝𑁆𑀞𑀸𑀦𑀁. 𑀅𑀯𑀺𑀚𑁆𑀚𑀸𑀬 𑀦𑀸𑀫𑀓𑀸𑀬𑁄 𑀧𑀤𑀝𑁆𑀞𑀸𑀦𑀁, 𑀢𑀡𑁆𑀳𑀸𑀬 𑀭𑀽𑀧𑀓𑀸𑀬𑁄 𑀧𑀤𑀝𑁆𑀞𑀸𑀦𑀦𑁆𑀢𑀺 𑀧𑀝𑀺𑀧𑀓𑁆𑀔𑁂 𑀆𑀯𑀝𑁆𑀝𑁂𑀢𑁆𑀯𑀸 𑀧𑀤𑀝𑁆𑀞𑀸𑀦𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀦𑁆𑀢𑀺.

‘‘𑀓𑀲𑁆𑀫𑀸 𑀦𑀸𑀫𑀓𑀸𑀬𑁄 𑀅𑀯𑀺𑀚𑁆𑀚𑀸𑀬 𑀧𑀤𑀝𑁆𑀞𑀸𑀦𑀁 𑀪𑀯𑀢𑀺, 𑀭𑀽𑀧𑀓𑀸𑀬𑁄 𑀢𑀡𑁆𑀳𑀸𑀬 𑀧𑀤𑀝𑁆𑀞𑀸𑀦𑀁 𑀪𑀯𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀽’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀭𑀽𑀧𑀻𑀲𑀼 𑀪𑀯𑁂𑀲𑀼 𑀅𑀚𑁆𑀛𑁄𑀲𑀸𑀦𑀁, 𑀅𑀭𑀽𑀧𑀻𑀲𑀼 𑀲𑀫𑁆𑀫𑁄𑀳𑁄’’𑀢𑀺 𑀯𑀼𑀢𑁆𑀢𑀁. 𑀭𑀽𑀧𑀻𑀲𑀼 𑀪𑀯𑁂𑀲𑀼 𑀭𑀽𑀧𑀥𑀫𑁆𑀫𑁂𑀲𑀼 𑀅𑀳𑀁𑀫𑀫𑀸𑀤𑀺𑀯𑀲𑁂𑀦 𑀅𑀚𑁆𑀛𑁄𑀲𑀸𑀦𑀁 𑀢𑀡𑁆𑀳𑀸𑀪𑀺𑀦𑀺𑀯𑁂𑀲𑁄 𑀲𑀢𑁆𑀢𑁂𑀲𑀼 𑀧𑀢𑀺𑀝𑁆𑀞𑀺𑀢𑁄 𑀬𑀲𑁆𑀫𑀸 𑀳𑁄𑀢𑀺, 𑀢𑀲𑁆𑀫𑀸 𑀭𑀽𑀧𑀓𑀸𑀬𑁄 𑀢𑀡𑁆𑀳𑀸𑀬 𑀧𑀤𑀝𑁆𑀞𑀸𑀦𑀁 𑀪𑀯𑀢𑀺. 𑀅𑀦𑀫𑀢𑀕𑁆𑀕𑁂 𑀳𑀺 𑀲𑀁𑀲𑀸𑀭𑁂 𑀇𑀢𑁆𑀣𑀺𑀧𑀼𑀭𑀺𑀲𑀸 𑀅𑀜𑁆𑀜𑀫𑀜𑁆𑀜𑀭𑀽𑀧𑀸𑀪𑀺𑀭𑀸𑀫𑀸 𑀪𑀯𑀦𑁆𑀢𑀺. 𑀅𑀭𑀽𑀧𑀻𑀲𑀼 𑀨𑀲𑁆𑀲𑀸𑀤𑀻𑀲𑀼 𑀲𑀼𑀔𑀼𑀫𑀪𑀸𑀯𑀢𑁄 𑀲𑀫𑁆𑀫𑁄𑀳𑁄 𑀲𑀢𑁆𑀢𑁂𑀲𑀼 𑀧𑀢𑀺𑀝𑁆𑀞𑀺𑀢𑁄 𑀬𑀲𑁆𑀫𑀸 𑀳𑁄𑀢𑀺, 𑀢𑀲𑁆𑀫𑀸 𑀦𑀸𑀫𑀓𑀸𑀬𑁄 𑀅𑀯𑀺𑀚𑁆𑀚𑀸𑀬 𑀧𑀤𑀝𑁆𑀞𑀸𑀦𑀁 𑀪𑀯𑀢𑀻𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀭𑀽𑀧𑀓𑀸𑀬𑀦𑀸𑀫𑀓𑀸𑀬𑁂𑀲𑀼 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀢𑀡𑁆𑀳𑀸𑀬 𑀘 𑀅𑀯𑀺𑀚𑁆𑀚𑀸𑀬 𑀘 𑀉𑀧𑁆𑀧𑀚𑁆𑀚𑀦𑀢𑁄 𑀭𑀽𑀧𑀓𑀸𑀬𑁄 𑀢𑀡𑁆𑀳𑀸𑀬 𑀧𑀤𑀝𑁆𑀞𑀸𑀦𑀁, 𑀦𑀸𑀫𑀓𑀸𑀬𑁄 𑀅𑀯𑀺𑀚𑁆𑀚𑀸𑀬 𑀧𑀤𑀝𑁆𑀞𑀸𑀦𑀦𑁆𑀢𑀺 𑀦𑀻𑀳𑀭𑀺𑀢𑀩𑁆𑀩𑀸𑀯𑀸𑀢𑀺.

‘‘𑀓𑀢𑀫𑁄 𑀭𑀽𑀧𑀓𑀸𑀬𑁄, 𑀓𑀢𑀫𑁄 𑀦𑀸𑀫𑀓𑀸𑀬𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀭𑀽𑀧𑀓𑀸𑀬𑁄 𑀭𑀽𑀧𑀓𑁆𑀔𑀦𑁆𑀥𑁄, 𑀦𑀸𑀫𑀓𑀸𑀬𑁄 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀲𑀼 𑀭𑀽𑀧𑀓𑀸𑀬𑀦𑀸𑀫𑀓𑀸𑀬𑁂𑀲𑀼 𑀭𑀽𑀧𑀓𑀸𑀬𑁄 𑀭𑀽𑀧𑀲𑀫𑀽𑀳𑁄 𑀦𑀸𑀫 𑀭𑀽𑀧𑀓𑁆𑀔𑀦𑁆𑀥𑁄 𑀳𑁄𑀢𑀺, 𑀦𑀸𑀫𑀓𑀸𑀬𑁄 𑀦𑀸𑀫𑀲𑀫𑀽𑀳𑁄 𑀦𑀸𑀫 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸𑀢𑀺. 𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀁 𑀆𑀭𑀫𑁆𑀫𑀡𑀢𑁆𑀢𑀸 𑀲𑀉𑀧𑀸𑀤𑀸𑀦𑀸 𑀪𑀯𑁂𑀬𑁆𑀬𑀼𑀁, ‘‘𑀓𑀢𑀫𑁂𑀦 𑀉𑀧𑀸𑀤𑀸𑀦𑁂𑀦 𑀲𑀉𑀧𑀸𑀤𑀸𑀦𑀸 𑀪𑀯𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀢𑀣𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 ‘‘𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀓𑀢𑀫𑁂𑀦 𑀉𑀧𑀸𑀤𑀸𑀦𑁂𑀦 𑀲𑀉𑀧𑀸𑀤𑀸𑀦𑀸? 𑀢𑀡𑁆𑀳𑀸𑀬 𑀘 𑀅𑀯𑀺𑀚𑁆𑀚𑀸𑀬 𑀘𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀧𑀸𑀤𑀸𑀦𑀪𑀽𑀢𑀸𑀬 𑀢𑀡𑁆𑀳𑀸𑀬 𑀘 𑀉𑀧𑀸𑀤𑀸𑀦𑀪𑀽𑀢𑀸𑀬 𑀅𑀯𑀺𑀚𑁆𑀚𑀸𑀬 𑀘 𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀲𑀉𑀧𑀸𑀤𑀸𑀦𑀸 𑀦𑀸𑀫 𑀪𑀯𑀦𑁆𑀢𑀻𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

‘‘𑀓𑀺𑀢𑁆𑀢𑀓𑀸𑀦𑀺 𑀉𑀧𑀸𑀤𑀸𑀦𑀸𑀦𑀺 𑀢𑀡𑁆𑀳𑀸 𑀦𑀸𑀫 𑀪𑀯𑀦𑁆𑀢𑀺, 𑀓𑀺𑀢𑁆𑀢𑀓𑀸𑀦𑀺 𑀉𑀧𑀸𑀤𑀸𑀦𑀸𑀦𑀺 𑀅𑀯𑀺𑀚𑁆𑀚𑀸 𑀦𑀸𑀫 𑀪𑀯𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀢𑀡𑁆𑀳𑀸 𑀤𑁆𑀯𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀲𑀼. 𑀓𑀸𑀫𑀼𑀧𑀸𑀤𑀸𑀦𑀜𑁆𑀘 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀜𑁆𑀘 𑀤𑁆𑀯𑁂 𑀉𑀧𑀸𑀤𑀸𑀦𑀸𑀦𑀺 𑀢𑀡𑁆𑀳𑀸 𑀦𑀸𑀫 𑀪𑀯𑀦𑁆𑀢𑀺. 𑀢𑀡𑁆𑀳𑀸𑀯𑀲𑁂𑀦 𑀳𑀺 ‘‘𑀫𑀫 𑀲𑀻𑀮𑀁, 𑀫𑀫 𑀯𑀢’’𑀦𑁆𑀢𑀺 𑀧𑀭𑀸𑀫𑀲𑀦𑀁 𑀪𑀯𑀢𑀺. 𑀤𑀺𑀝𑁆𑀞𑀼𑀧𑀸𑀤𑀸𑀦𑀜𑁆𑀘 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀜𑁆𑀘 𑀤𑁆𑀯𑁂 𑀉𑀧𑀸𑀤𑀸𑀦𑀸𑀦𑀺 𑀅𑀯𑀺𑀚𑁆𑀚𑀸 𑀦𑀸𑀫 𑀪𑀯𑀦𑁆𑀢𑀺. 𑀅𑀯𑀺𑀚𑁆𑀚𑀸𑀯𑀲𑁂𑀦 𑀳𑀺 𑀲𑀲𑁆𑀲𑀢𑀤𑀺𑀝𑁆𑀞𑀺 𑀘𑁂𑀯 𑀅𑀳𑀁𑀫𑀫𑀸𑀤𑀺𑀤𑀺𑀝𑁆𑀞𑀺 𑀘 𑀪𑀯𑀦𑁆𑀢𑀺. ‘‘𑀇𑀫𑁂𑀳𑀺 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀲𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀓𑀺𑀢𑁆𑀢𑀓𑀁 𑀲𑀘𑁆𑀘𑀁 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀇𑀫𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑁂 𑀮𑁄𑀓𑀺𑀬𑀓𑁆𑀔𑀦𑁆𑀥𑀸 𑀲𑀉𑀧𑀸𑀤𑀸𑀦𑀸 𑀔𑀦𑁆𑀥𑀸 𑀪𑀯𑀦𑁆𑀢𑀺, 𑀉𑀧𑀸𑀤𑀸𑀦𑁂𑀦 𑀳𑀺 𑀉𑀧𑀸𑀤𑀸𑀦𑀸𑀦𑀺𑀧𑀺 𑀪𑀯𑀦𑁆𑀢𑀺, 𑀇𑀤𑀁 𑀲𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀁 𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀘𑁆𑀘𑀁 𑀦𑀸𑀫. 𑀬𑀸𑀦𑀺 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺 𑀤𑀼𑀓𑁆𑀔𑀓𑀸𑀭𑀡𑀸𑀦𑀺 𑀪𑀯𑀦𑁆𑀢𑀺, 𑀅𑀬𑀁 𑀉𑀧𑀸𑀤𑀸𑀦𑀘𑀢𑀼𑀓𑁆𑀓𑁄 𑀲𑀫𑀼𑀤𑀬𑁄 𑀲𑀫𑀼𑀤𑀬𑀲𑀘𑁆𑀘𑀁 𑀦𑀸𑀫 𑀪𑀯𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 𑀲𑀉𑀧𑀸𑀤𑀸𑀦𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀯𑀢𑁆𑀣𑀼𑀪𑀸𑀯𑀢𑁄 𑀤𑀼𑀓𑁆𑀔𑀁. 𑀢𑁂𑀲𑀦𑁆𑀢𑀺 𑀲𑀉𑀧𑀸𑀤𑀸𑀦𑀸𑀦𑀁 𑀧𑀜𑁆𑀘𑀓𑁆𑀔𑀦𑁆𑀥𑀸𑀦𑀁. 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 ‘‘𑀆𑀭𑀫𑁆𑀪𑀣𑀸’’𑀢𑀺𑀆𑀤𑀺𑀓𑀁 𑀥𑀫𑁆𑀫𑀁 𑀯𑁂𑀦𑁂𑀬𑁆𑀬𑀸𑀦𑀼𑀭𑀽𑀧𑀁 𑀪𑀕𑀯𑀸 𑀤𑁂𑀲𑁂𑀢𑀺. 𑀲𑀸𑀫𑀜𑁆𑀜𑁂𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁆𑀧𑀺 𑀅𑀢𑁆𑀣𑀯𑀲𑁂𑀦 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 ‘‘𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀬, 𑀲𑀫𑀼𑀤𑀬𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺 𑀯𑀼𑀢𑁆𑀢𑀁.

𑁩𑁦. 𑀆𑀭𑀫𑁆𑀪𑀧𑀝𑀺𑀧𑀓𑁆𑀔𑀪𑀽𑀢𑀧𑀫𑀸𑀤𑀯𑀲𑁂𑀦 𑀧𑀼𑀭𑀺𑀫𑀲𑀘𑁆𑀘𑀤𑁆𑀯𑀬𑀁 𑀆𑀘𑀭𑀺𑀬𑁂𑀦 𑀦𑀺𑀤𑁆𑀥𑀸𑀭𑀺𑀢𑀁, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑀁, ‘‘𑀇𑀢𑀭𑀲𑀘𑁆𑀘𑀤𑁆𑀯𑀬𑀁 𑀓𑀣𑀁 𑀦𑀺𑀤𑁆𑀥𑀸𑀭𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀢𑀁 𑀤𑁆𑀯𑀬𑀫𑁆𑀧𑀺 𑀧𑀫𑀸𑀤𑀫𑀼𑀔𑁂𑀦𑁂𑀯 𑀦𑀺𑀤𑁆𑀥𑀸𑀭𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀬𑁄 𑀢𑀺𑀯𑀺𑀥𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀢𑀡𑁆𑀳𑀸𑀫𑀽𑀮𑀓𑀅𑀯𑀺𑀚𑁆𑀚𑀸𑀫𑀽𑀮𑀓𑁂𑀲𑀼 𑀧𑀫𑀸𑀤𑁂𑀲𑀼. 𑀢𑀲𑁆𑀲𑀸𑀢𑀺 𑀢𑀺𑀯𑀺𑀥𑀲𑁆𑀲 𑀢𑀡𑁆𑀳𑀸𑀫𑀽𑀮𑀓𑀲𑁆𑀲 𑀧𑀫𑀸𑀤𑀲𑁆𑀲. 𑀲𑀫𑁆𑀧𑀝𑀺𑀯𑁂𑀥𑁂𑀦𑀸𑀢𑀺 𑀅𑀲𑁆𑀲𑀸𑀤𑀸𑀤𑀻𑀦𑀁 𑀧𑀭𑀺𑀚𑀸𑀦𑀦𑁂𑀦. 𑀭𑀓𑁆𑀔𑀡𑀸𑀢𑀺 𑀅𑀢𑁆𑀢𑀘𑀺𑀢𑁆𑀢𑀲𑁆𑀲 𑀭𑀓𑁆𑀔𑀡𑀲𑀗𑁆𑀔𑀸𑀢𑀸. 𑀧𑀝𑀺𑀲𑀁𑀳𑀭𑀡𑀸𑀢𑀺 ‘‘𑀢𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀲𑁆𑀲 𑀧𑀫𑀸𑀤𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑁂𑀦 𑀅𑀧𑁆𑀧𑀫𑀸𑀤𑀸𑀦𑀦𑀼𑀬𑁄𑀕𑁂𑀦 𑀲𑀁𑀳𑀭𑀡𑀸 𑀬𑀸 𑀔𑁂𑀧𑀦𑀸 𑀅𑀢𑁆𑀣𑀺, 𑀅𑀬𑀁 𑀧𑀫𑀸𑀤𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑁂𑀦 𑀅𑀧𑁆𑀧𑀫𑀸𑀤𑀸𑀦𑀼𑀬𑁄𑀕𑁂𑀦 𑀧𑀯𑀢𑁆𑀢𑀸 𑀔𑁂𑀧𑀦𑀲𑀗𑁆𑀔𑀸𑀢𑀸 𑀪𑀸𑀯𑀦𑀸 𑀲𑀫𑀣𑁄 𑀦𑀸𑀫𑀸𑀢𑀺 𑀧𑀫𑀸𑀤𑀲𑁆𑀲 𑀧𑀝𑀺𑀧𑀓𑁆𑀔𑀫𑀼𑀔𑁂𑀦 𑀧𑀼𑀦 𑀆𑀯𑀝𑁆𑀝𑁂𑀢𑁆𑀯𑀸 𑀲𑀫𑀣𑁄 𑀦𑀺𑀤𑁆𑀥𑀸𑀭𑀺𑀢𑁄𑀢𑀺.

‘‘𑀲𑁄 𑀲𑀫𑀣𑁄 𑀓𑀣𑀁 𑀓𑁂𑀦 𑀉𑀧𑀸𑀬𑁂𑀦 𑀪𑀯𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀢𑀣𑀸 𑀧𑀼𑀘𑁆𑀙𑀺𑀢𑁆𑀯𑀸 𑀉𑀧𑀸𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀓𑀣’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀣𑀦𑁆𑀢𑀺 𑀓𑁂𑀦 𑀉𑀧𑀸𑀬𑁂𑀦. ‘‘𑀓𑀸𑀫𑁂𑀦𑁆𑀢𑀻𑀢𑀺 𑀓𑀸𑀫𑀸, 𑀓𑀸𑀫𑀻𑀬𑀦𑁆𑀢𑀻𑀢𑀺 𑀯𑀸 𑀓𑀸𑀫𑀸’’𑀢𑀺 𑀯𑀼𑀢𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀓𑀸𑀫𑀸𑀦𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀫𑀸𑀦𑀁 𑀅𑀲𑁆𑀲𑀸𑀤𑀜𑁆𑀘, ‘‘𑀅𑀧𑁆𑀧𑀲𑁆𑀲𑀸𑀤𑀸 𑀓𑀸𑀫𑀸 𑀩𑀳𑀼𑀤𑀼𑀓𑁆𑀔𑀸’’𑀢𑀺𑀆𑀤𑀺 (𑀫. 𑀦𑀺. 𑁧.𑁨𑁩𑁫) 𑀯𑀘𑀦𑀢𑁄 𑀅𑀧𑁆𑀧𑀲𑁆𑀲𑀸𑀤𑀦𑀻𑀬𑀸𑀦𑀁 𑀓𑀸𑀫𑀸𑀦𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀫𑀸𑀦𑀁 𑀆𑀤𑀻𑀦𑀯𑀜𑁆𑀘. 𑀓𑀸𑀫𑀸𑀦𑀦𑁆𑀢𑀺 𑀘 𑀓𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀢𑁂𑀦 𑀯𑀼𑀢𑁆𑀢𑀁 𑁋‘‘𑀓𑀸𑀫𑁂 𑀧𑀝𑀺𑀘𑁆𑀘𑀸’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁩𑁦). ‘‘𑀓𑀸𑀫𑀸𑀦𑀫𑁂𑀢𑀁 𑀦𑀺𑀲𑁆𑀲𑀭𑀡𑀁, 𑀬𑀤𑀺𑀤𑀁 𑀦𑁂𑀓𑁆𑀔𑀫𑁆𑀫’’𑀦𑁆𑀢𑀺 (𑀇𑀢𑀺𑀯𑀼. 𑁭𑁨) 𑀯𑀘𑀦𑀢𑁄 𑀦𑀺𑀲𑁆𑀲𑀭𑀡𑀦𑁆𑀢𑀺 𑀇𑀥 𑀧𑀞𑀫𑀚𑁆𑀛𑀸𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀯𑁄𑀓𑀸𑀭𑀦𑁆𑀢𑀺 𑀏𑀢𑁆𑀣 𑀯-𑀓𑀸𑀭𑁄 𑀆𑀕𑀫𑁄, 𑀑-𑀓𑀸𑀭𑀁 𑀮𑀸𑀫𑀓𑀪𑀸𑀯𑀁. 𑀆𑀦𑀺𑀲𑀁𑀲𑀦𑁆𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀤𑀺𑀓𑀁. 𑀬𑀤𑀸 𑀚𑀸𑀦𑀸𑀢𑀺, 𑀢𑀤𑀸 𑀢𑁂𑀦 𑀉𑀧𑀸𑀬𑁂𑀦 𑀲𑀫𑀣𑁄 𑀪𑀯𑀢𑀻𑀢𑀺 𑀅𑀢𑁆𑀣𑁄.

𑀲𑀫𑀣𑁄 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑀸 𑀯𑀺𑀧𑀲𑁆𑀲𑀦𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀯𑀺𑀧𑀲𑁆𑀲𑀦𑀁 𑀯𑀺𑀪𑀚𑀺𑀢𑀼𑀁 ‘‘𑀢𑀢𑁆𑀣 𑀬𑀸 𑀯𑀻𑀫𑀁𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀓𑀸𑀫𑀸𑀦𑀁 𑀅𑀲𑁆𑀲𑀸𑀤𑀸𑀤𑀬𑁄 𑀬𑀤𑀸 𑀚𑀸𑀦𑀸𑀢𑀺, 𑀢𑀤𑀸 𑀲𑀫𑀣𑁄 𑀪𑀯𑀢𑀻𑀢𑀺 𑀯𑀼𑀢𑁆𑀢𑁄, ‘‘𑀢𑀲𑁆𑀫𑀺𑀁 𑀲𑀫𑀣𑁂 𑀪𑀯𑀫𑀸𑀦𑁂 𑀲𑀢𑀺 𑀓𑀢𑀫𑀸 𑀪𑀯𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀬𑀸 𑀯𑀻𑀫𑀁𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀲𑀫𑀣𑁂 𑀪𑀯𑀫𑀸𑀦𑁂 𑀲𑀢𑀺 𑀅𑀲𑁆𑀲𑀸𑀤𑀸𑀤𑀻𑀦𑀁 𑀬𑀸 𑀅𑀦𑀺𑀘𑁆𑀘𑀸𑀤𑀺𑀯𑀻𑀫𑀁𑀲𑀸 𑀉𑀧𑀧𑀭𑀺𑀓𑁆𑀔𑀸 𑀧𑀜𑁆𑀜𑀸 𑀪𑀯𑀢𑀺, 𑀅𑀬𑀁 𑀯𑀻𑀫𑀁𑀲𑀸 𑀉𑀧𑀧𑀭𑀺𑀓𑁆𑀔𑀸 𑀧𑀜𑁆𑀜𑀸 𑀯𑀺𑀲𑁂𑀲𑁂𑀦 𑀧𑀲𑁆𑀲𑀦𑀢𑁄 𑀯𑀺𑀧𑀲𑁆𑀲𑀦𑀸 𑀦𑀸𑀫. 𑀅𑀣 𑀯𑀸 𑀢𑀺𑀯𑀺𑀥𑀲𑁆𑀲 𑀢𑀡𑁆𑀳𑀸𑀫𑀽𑀮𑀓𑀲𑁆𑀲 𑀧𑀫𑀸𑀤𑀲𑁆𑀲 𑀲𑀫𑁆𑀧𑀝𑀺𑀯𑁂𑀥𑁂𑀦 𑀭𑀓𑁆𑀔𑀡𑀸 𑀧𑀝𑀺𑀲𑀁𑀳𑀭𑀡𑀸, 𑀅𑀬𑀁 𑀲𑀫𑀣𑁄𑀢𑀺 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑁄, ‘‘𑀓𑀢𑀫𑀸 𑀯𑀺𑀧𑀲𑁆𑀲𑀦𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀬𑀸 𑀯𑀻𑀫𑀁𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑁂 𑀲𑀫𑀣𑁂 𑀲𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀫𑀸𑀤𑀲𑁆𑀲 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀬𑀸 𑀯𑀻𑀫𑀁𑀲𑀸 𑀉𑀧𑀧𑀭𑀺𑀓𑁆𑀔𑀸 𑀧𑀜𑁆𑀜𑀸 𑀉𑀧𑁆𑀧𑀦𑁆𑀦𑀸, 𑀅𑀬𑀁 𑀯𑀻𑀫𑀁𑀲𑀸 𑀉𑀧𑀧𑀭𑀺𑀓𑁆𑀔𑀸 𑀧𑀜𑁆𑀜𑀸 𑀯𑀺𑀲𑁂𑀲𑁂𑀦 𑀧𑀲𑁆𑀲𑀦𑀢𑁄 𑀯𑀺𑀧𑀲𑁆𑀲𑀦𑀸 𑀦𑀸𑀫. 𑀯𑀻𑀫𑀁𑀲𑀸𑀯 𑀤𑀼𑀩𑁆𑀩𑀮𑀸, 𑀉𑀧𑀧𑀭𑀺𑀓𑁆𑀔𑀸 𑀩𑀮𑀯𑀢𑀻𑀢𑀺 𑀯𑀺𑀲𑁂𑀲𑁄.

𑀲𑀫𑀣𑁄 𑀘𑁂𑀯 𑀯𑀺𑀧𑀲𑁆𑀲𑀦𑀸 𑀘 𑀤𑁆𑀯𑁂 𑀥𑀫𑁆𑀫𑀸 𑀆𑀘𑀭𑀺𑀬𑁂𑀦 𑀦𑀺𑀤𑁆𑀥𑀸𑀭𑀺𑀢𑀸, ‘‘𑀇𑀫𑁂 𑀦𑀺𑀤𑁆𑀥𑀸𑀭𑀺𑀢𑀸 𑀤𑁆𑀯𑁂 𑀥𑀫𑁆𑀫𑀸 𑀓𑀺𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀇𑀫𑁂 𑀤𑁆𑀯𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑀣𑁄 𑀲𑀫𑀣𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀯𑀺𑀧𑀲𑁆𑀲𑀦𑀸 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. ‘‘𑀇𑀫𑁂𑀲𑀼 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀓𑀢𑀫𑁂 𑀬𑁄𑀕𑀸𑀯𑀘𑀭𑁂𑀦 𑀧𑀳𑀻𑀬𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀇𑀫𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑀣𑁂 𑀥𑀫𑁆𑀫𑁂 𑀪𑀸𑀯𑀺𑀬𑀫𑀸𑀦𑁂 𑀢𑀡𑁆𑀳𑀸 𑀬𑁄𑀕𑀸𑀯𑀘𑀭𑁂𑀦 𑀧𑀳𑀻𑀬𑀢𑀺, 𑀯𑀺𑀧𑀲𑁆𑀲𑀦𑀸𑀬 𑀪𑀸𑀯𑀺𑀬𑀫𑀸𑀦𑀸𑀬 𑀅𑀯𑀺𑀚𑁆𑀚𑀸 𑀬𑁄𑀕𑀸𑀯𑀘𑀭𑁂𑀦 𑀧𑀳𑀻𑀬𑀢𑀻𑀢𑀺 𑀇𑀫𑁂 𑀤𑁆𑀯𑁂 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸 𑀧𑀳𑀻𑀬𑀦𑁆𑀢𑀺 𑀢𑀡𑁆𑀳𑀸 𑀘𑁂𑀯 𑀅𑀯𑀺𑀚𑁆𑀚𑀸 𑀘. ‘‘𑀇𑀫𑁂𑀲𑀼 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀧𑀳𑀻𑀬𑀫𑀸𑀦𑁂𑀲𑀼 𑀓𑀢𑀫𑁂 𑀥𑀫𑁆𑀫𑀸 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀉𑀧𑀸𑀤𑀸𑀦𑀸𑀤𑀬𑁄𑀧𑀺 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀦𑀺𑀭𑁄𑀥𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑁂𑀲𑀼 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀧𑀳𑀻𑀦𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀡𑁆𑀳𑀸𑀬 𑀲𑀫𑀣𑀪𑀸𑀯𑀦𑀸𑀬 𑀧𑀳𑀻𑀬𑀫𑀸𑀦𑀸𑀬, 𑀅𑀯𑀺𑀚𑁆𑀚𑀸𑀬 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀬 𑀧𑀳𑀻𑀬𑀫𑀸𑀦𑀸𑀬 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀤𑁆𑀯𑀻𑀳𑀺 𑀪𑀸𑀯𑀦𑀸𑀳𑀺 𑀧𑀳𑀻𑀦𑁂𑀲𑀼 𑀓𑀸𑀫𑀼𑀧𑀸𑀤𑀸𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺 𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀦 𑀪𑀗𑁆𑀕𑀓𑁆𑀔𑀡𑀯𑀲𑁂𑀦.

𑀏𑀢𑁆𑀣𑀸𑀳 𑁋 ‘‘𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀢𑀡𑁆𑀳𑀸𑀬 𑀧𑀳𑀻𑀬𑀫𑀸𑀦𑀸𑀬 𑀉𑀧𑀸𑀤𑀸𑀦𑀸𑀦𑀺 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺 𑀯𑀘𑀦𑀁 𑀬𑀼𑀢𑁆𑀢𑀁 𑀳𑁄𑀢𑀼, 𑀓𑀣𑀁 𑀅𑀯𑀺𑀚𑁆𑀚𑀸𑀬 𑀧𑀳𑀻𑀬𑀫𑀸𑀦𑀸𑀬 𑀉𑀧𑀸𑀤𑀸𑀦𑀸𑀦𑀺 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺? ‘‘𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄’’𑀢𑀺 𑀧𑀸𑀞𑁂 𑀅𑀯𑀺𑀚𑁆𑀚𑀸𑀲𑀳𑀺𑀢𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄𑀢𑀺 𑀅𑀢𑁆𑀣𑀲𑀫𑁆𑀪𑀯𑀢𑁄. 𑀬𑀣𑀸 𑀳𑀺 𑀢𑀡𑁆𑀳𑀸𑀲𑀳𑀺𑀢𑀸𑀯 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄, 𑀏𑀯𑀁 𑀅𑀯𑀺𑀚𑁆𑀚𑀸𑀲𑀳𑀺𑀢𑀸𑀯 𑀢𑀡𑁆𑀳𑀸 𑀉𑀧𑀸𑀤𑀸𑀦𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀯𑀺𑀚𑁆𑀚𑀸𑀲𑀳𑀺𑀢𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄𑀢𑀺 𑀅𑀢𑁆𑀣𑁄 𑀲𑀫𑁆𑀪𑀯𑀢𑀻𑀢𑀺 𑀕𑀳𑁂𑀢𑀩𑁆𑀩𑁄. 𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀢𑀣𑁂𑀯 𑀪𑀯𑀦𑀺𑀭𑁄𑀥𑁄𑀢𑀺 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄𑀢𑀺 𑀏𑀢𑁆𑀣𑀸𑀧𑀺 𑀢𑀡𑁆𑀳𑀸𑀲𑀳𑀺𑀢𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄𑀢𑀺𑀆𑀤𑀺𑀓𑁄 𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀇𑀢𑀻𑀢𑀺 𑀏𑀯𑀁 𑀯𑀺𑀲𑀪𑀸𑀕𑀲𑀪𑀸𑀕𑀥𑀫𑁆𑀫𑀸𑀦𑀁 𑀆𑀯𑀝𑁆𑀝𑀦𑀯𑀲𑁂𑀦 𑀦𑀺𑀤𑁆𑀥𑀸𑀭𑀺𑀢𑀸𑀦𑀺 𑀘 𑀧𑀼𑀭𑀺𑀫𑀓𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀘, 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀫𑀕𑁆𑀕𑁄 𑀘 𑀫𑀕𑁆𑀕𑀲𑀘𑁆𑀘𑀜𑁆𑀘, 𑀯𑀝𑁆𑀝𑀦𑀺𑀭𑁄𑀥𑁄 𑀯𑀝𑁆𑀝𑀦𑀺𑀭𑁄𑀥𑀲𑀘𑁆𑀘𑀜𑁆𑀘 𑀦𑀺𑀩𑁆𑀩𑀸𑀦𑀦𑁆𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀦𑀺𑀤𑁆𑀥𑀸𑀭𑀺𑀢𑀸𑀦𑀺.

‘‘𑀯𑀻𑀭𑀺𑀬𑀧𑀝𑀺𑀧𑀓𑁆𑀔𑀪𑀽𑀢𑀲𑁆𑀲 𑀧𑀫𑀸𑀤𑀸𑀤𑀺𑀥𑀫𑁆𑀫𑀲𑁆𑀲 𑀯𑀲𑁂𑀦 𑀯𑀸 𑀲𑀪𑀸𑀕𑀪𑀽𑀢𑀲𑁆𑀲 𑀧𑀫𑀸𑀤𑀸𑀤𑀺𑀥𑀫𑁆𑀫𑀲𑁆𑀲 𑀯𑀲𑁂𑀦 𑀯𑀸 𑀆𑀯𑀝𑁆𑀝𑁂𑀢𑁆𑀯𑀸 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀦𑀺𑀤𑁆𑀥𑀸𑀭𑀺𑀢𑀩𑁆𑀩𑀪𑀸𑀯𑁄 𑀅𑀫𑁆𑀳𑁂𑀳𑀺 𑀓𑁂𑀦 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀢𑀣𑀸 𑀦𑀺𑀤𑁆𑀥𑀸𑀭𑀺𑀢𑀩𑁆𑀩𑀪𑀸𑀯𑁂𑀦 𑀪𑀕𑀯𑀸 ‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣𑀸’’𑀢𑀺𑀆𑀤𑀺𑀕𑀸𑀣𑀸𑀯𑀘𑀦𑀁 𑀆𑀳, 𑀢𑁂𑀦 ‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣𑀸’’𑀢𑀺𑀆𑀤𑀺𑀕𑀸𑀣𑀸𑀯𑀘𑀦𑁂𑀦 𑀢𑀣𑀸 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀦𑀺𑀤𑁆𑀥𑀸𑀭𑀺𑀢𑀩𑁆𑀩𑀪𑀸𑀯𑁄 𑀢𑀼𑀫𑁆𑀳𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣𑀸’𑀢𑀺𑀆𑀤𑀺𑀦𑀸 𑀯𑁄𑀤𑀸𑀦𑀧𑀓𑁆𑀔𑀁𑀬𑁂𑀯 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲𑁂𑀯 𑀯𑁄𑀤𑀸𑀦𑀧𑀓𑁆𑀔𑀲𑁆𑀲 𑀯𑀺𑀲𑀪𑀸𑀕𑀥𑀫𑁆𑀫𑀲𑀪𑀸𑀕𑀥𑀫𑁆𑀫𑀯𑀲𑁂𑀦𑁂𑀯 𑀆𑀯𑀝𑁆𑀝𑁂𑀢𑁆𑀯𑀸 𑀘𑀢𑀼𑀲𑀘𑁆𑀘𑀦𑀺𑀤𑁆𑀥𑀸𑀭𑀡𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀲𑀁𑀓𑀺𑀮𑁂𑀲𑀧𑀓𑁆𑀔𑀫𑁆𑀧𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲𑁂𑀯 𑀲𑀁𑀓𑀺𑀮𑁂𑀲𑀲𑁆𑀲 𑀯𑀺𑀲𑀪𑀸𑀕𑀥𑀫𑁆𑀫𑀲𑀪𑀸𑀕𑀥𑀫𑁆𑀫𑀯𑀲𑁂𑀦𑀧𑀺 𑀆𑀯𑀝𑁆𑀝𑁂𑀢𑁆𑀯𑀸 𑀘𑀢𑀼𑀲𑀘𑁆𑀘𑀦𑀺𑀤𑁆𑀥𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸𑀧𑀺 𑀫𑀽𑀮𑁂’’𑀢𑀺𑀆𑀤𑀺𑀕𑀸𑀣𑀸𑀯𑀘𑀦𑀫𑀸𑀳. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑁋

‘‘𑀏𑀯𑀁 𑀯𑁄𑀤𑀸𑀦𑀧𑀓𑁆𑀔𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀯𑀺𑀲𑀪𑀸𑀕𑀥𑀫𑁆𑀫𑀯𑀲𑁂𑀦, 𑀲𑀪𑀸𑀕𑀥𑀫𑁆𑀫𑀯𑀲𑁂𑀦 𑀘 𑀆𑀯𑀝𑁆𑀝𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀯𑀺𑀲𑀪𑀸𑀕𑀥𑀫𑁆𑀫𑀯𑀲𑁂𑀦, 𑀲𑀪𑀸𑀕𑀥𑀫𑁆𑀫𑀯𑀲𑁂𑀦 𑀘 𑀆𑀯𑀝𑁆𑀝𑀦𑀁 𑀤𑀲𑁆𑀲𑁂𑀢𑀼𑀁 ‘𑀬𑀣𑀸𑀧𑀺 𑀫𑀽𑀮𑁂’𑀢𑀺 𑀕𑀸𑀣𑀫𑀸𑀳𑀸’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁩𑁦) 𑁋

𑀯𑀼𑀢𑁆𑀢𑀁. 𑀕𑀸𑀣𑀸𑀢𑁆𑀣𑁄𑀧𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄. 𑀢𑀣𑀸𑀧𑀺 𑀬𑀢𑀺𑀧𑁄𑀢𑀸𑀦𑀁 𑀅𑀢𑁆𑀣𑀸𑀬 𑀅𑀝𑁆𑀞𑀓𑀣𑀸𑀦𑀼𑀲𑀸𑀭𑁂𑀦𑁂𑀯 𑀓𑀣𑀬𑀺𑀲𑁆𑀲𑀸𑀫.

𑀲𑀫𑀽𑀳𑁄 𑀭𑀼𑀓𑁆𑀔𑁄 𑀫𑀽𑀮𑀢𑀺 𑀧𑀢𑀺𑀝𑁆𑀞𑀸𑀢𑀺 𑀏𑀢𑁂𑀦 𑀅𑀯𑀬𑀯𑁂𑀦 𑀪𑀽𑀫𑀺𑀪𑀸𑀕𑁂 𑀞𑀺𑀢𑁂𑀦𑀸𑀢𑀺 𑀫𑀽𑀮𑀁, 𑀓𑀺𑀁 𑀢𑀁? 𑀪𑀽𑀫𑀺𑀪𑀸𑀕𑁂 𑀞𑀺𑀢𑁄 𑀫𑀽𑀮𑀲𑀗𑁆𑀔𑀸𑀢𑁄 𑀭𑀼𑀓𑁆𑀔𑀸𑀯𑀬𑀯𑁄, 𑀢𑀲𑁆𑀫𑀺𑀁 𑀫𑀽𑀮𑁂. 𑀦𑀢𑁆𑀣𑀺 𑀉𑀧𑀤𑁆𑀤𑀯𑁄 𑀨𑀭𑀲𑀼𑀙𑁂𑀤𑀸𑀤𑀺𑀅𑀦𑁆𑀢𑀭𑀸𑀬𑁄 𑀅𑀲𑁆𑀲 𑀫𑀽𑀮𑀲𑁆𑀲𑀸𑀢𑀺 𑀅𑀦𑀼𑀧𑀤𑁆𑀤𑀯𑁄. 𑀤𑀴𑁆𑀳𑁂𑀢𑀺 𑀉𑀧𑀤𑁆𑀤𑀯𑀸𑀪𑀸𑀯𑁂𑀦 𑀲𑀪𑀸𑀯𑀢𑁄 𑀣𑀺𑀭𑁂 𑀲𑀢𑀺. 𑀙𑀺𑀦𑁆𑀤𑀻𑀬𑀢𑀻𑀢𑀺 𑀙𑀺𑀦𑁆𑀦𑁄, 𑀓𑁄 𑀲𑁄? 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀺𑀢𑀫𑀽𑀮𑀲𑀳𑀺𑀢𑁄 𑀭𑀼𑀓𑁆𑀔𑀸𑀯𑀬𑀯𑁄, 𑀦 𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑁄 𑀭𑀼𑀓𑁆𑀔𑀸𑀯𑀬𑀯𑁄. 𑀭𑀼𑀳𑀢𑀺 𑀯𑀟𑁆𑀠𑀢𑀻𑀢𑀺 𑀭𑀼𑀓𑁆𑀔𑁄. 𑀲𑁄 𑀘 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀺𑀢𑀫𑀽𑀮𑀲𑀳𑀺𑀢𑁄 𑀭𑀼𑀓𑁆𑀔𑀸𑀯𑀬𑀯𑁄 𑀭𑀼𑀓𑁆𑀔𑁄𑀢𑀺 𑀯𑀼𑀢𑁆𑀢𑁄 𑀬𑀣𑀸 ‘‘𑀲𑀫𑀼𑀤𑁆𑀤𑁄 𑀤𑀺𑀝𑁆𑀞𑁄’’𑀢𑀺. 𑀧𑀼𑀦𑀭𑁂𑀯 𑀭𑀽𑀳𑀢𑀻𑀢𑀺 𑀧𑀼𑀦 𑀅𑀗𑁆𑀓𑀼𑀭𑀼𑀧𑁆𑀧𑀸𑀤𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀡𑁆𑀳𑀸𑀦𑀼𑀲𑀬𑁂𑀢𑀺 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀫𑀽𑀮𑁂. 𑀅𑀦𑀽𑀳𑀢𑁂𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂𑀦 𑀅𑀦𑀼𑀧𑀘𑁆𑀙𑀺𑀦𑁆𑀦𑁂 𑀲𑀢𑀺 𑀇𑀤𑀁 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁 𑀤𑀼𑀓𑁆𑀔𑀁 𑀤𑀼𑀓𑁆𑀔𑀳𑁂𑀢𑀼 𑀧𑀼𑀦𑀧𑁆𑀧𑀼𑀦𑀁 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀦𑀺𑀩𑁆𑀩𑀢𑁆𑀢𑀢𑀺 𑀦 𑀦𑀺𑀭𑀼𑀚𑁆𑀛𑀢𑀺𑀬𑁂𑀯𑀸𑀢𑀺 𑀕𑀸𑀣𑀸𑀢𑁆𑀣𑁄.

‘‘𑀇𑀥 𑀕𑀸𑀣𑀸𑀬𑀁 𑀬𑁄 𑀢𑀡𑁆𑀳𑀸𑀦𑀼𑀲𑀬𑁄 𑀅𑀦𑀽𑀳𑀢𑀪𑀸𑀯𑁂𑀦 𑀤𑀼𑀓𑁆𑀔𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀲𑁆𑀲 𑀫𑀽𑀮𑀦𑁆𑀢𑀺 𑀯𑀼𑀢𑁆𑀢𑁄, 𑀅𑀬𑀁 𑀢𑀡𑁆𑀳𑀸𑀦𑀼𑀲𑀬𑁄 𑀓𑀢𑀫𑀲𑁆𑀲𑀸 𑀢𑀡𑁆𑀳𑀸𑀬 𑀅𑀦𑀼𑀲𑀬𑁄’’𑀢𑀺 𑀧𑀼𑀘𑁆𑀙𑀢𑀺, ‘‘𑀢𑀡𑁆𑀳𑀸𑀬 𑀓𑀸𑀫𑀢𑀡𑁆𑀳𑀸𑀤𑀺𑀯𑀲𑁂𑀦 𑀩𑀳𑀼𑀯𑀺𑀥𑀢𑁆𑀢𑀸 𑀪𑀯𑀢𑀡𑁆𑀳𑀸𑀬 𑀅𑀦𑀼𑀲𑀬𑁄’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺 𑀪𑀯𑀲𑁆𑀲𑀸𑀤𑀢𑀡𑁆𑀳𑀸𑀪𑀸𑀯𑀢𑁄. 𑀬𑁄 𑀅𑀦𑀼𑀲𑀬𑁄 𑀏𑀢𑀲𑁆𑀲 𑀪𑀯𑀢𑀡𑁆𑀳𑀸𑀲𑀗𑁆𑀔𑀸𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀬𑀁 𑀅𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀳𑁄𑀢𑀺. ‘‘𑀅𑀦𑀼𑀲𑀬𑁄 𑀩𑀳𑀼𑀯𑀺𑀥𑁄, 𑀓𑀲𑁆𑀫𑀸 𑀅𑀯𑀺𑀚𑁆𑀚𑀸𑀦𑀼𑀲𑀬𑁄𑀢𑀺 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀳𑀺 𑀪𑀯𑀢𑀡𑁆𑀳𑀸’’𑀢𑀺 𑀯𑀼𑀢𑁆𑀢𑀁. 𑀅𑀯𑀺𑀚𑁆𑀚𑀸𑀬 𑀪𑀯𑀢𑀡𑁆𑀳𑀸𑀬 𑀧𑀘𑁆𑀘𑀬𑀢𑁆𑀢𑀸 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀲𑀤𑁆𑀤𑀳𑀺𑀢𑀩𑁆𑀩𑁄. 𑀅𑀯𑀺𑀚𑁆𑀚𑀸𑀬 𑀳𑀺 𑀪𑀯𑁂𑀲𑀼 𑀆𑀤𑀻𑀦𑀯𑀲𑁆𑀲 𑀅𑀤𑀲𑁆𑀲𑀦𑀯𑀲𑁂𑀦 𑀪𑀯𑀲𑁆𑀲𑀸𑀤𑀢𑀡𑁆𑀳𑀸 𑀪𑀯𑀢𑀻𑀢𑀺. 𑀇𑀫𑁂 𑀤𑁆𑀯𑁂 𑀓𑀺𑀮𑁂𑀲𑀸𑀢𑀺𑀆𑀤𑀺𑀫𑁆𑀳𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀺𑀲𑀪𑀸𑀕𑀲𑀪𑀸𑀕𑀥𑀫𑁆𑀫𑀸𑀯𑀝𑁆𑀝𑀦𑀁 𑀯𑀺𑀜𑁆𑀜𑀸𑀢𑀩𑁆𑀩𑀁, 𑀲𑀫𑀣𑀯𑀺𑀧𑀲𑁆𑀲𑀦𑀸 𑀧𑀦 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀯 𑀕𑀳𑁂𑀢𑀩𑁆𑀩𑀸.

‘‘𑀲𑀩𑁆𑀩𑀧𑀸𑀧𑀲𑁆𑀲𑀸’’𑀢𑀺𑀆𑀤𑀺𑀓𑀲𑁆𑀲 𑀅𑀦𑀼𑀲𑀦𑁆𑀥𑁆𑀬𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁩𑁦) 𑀯𑀼𑀢𑁆𑀢𑁄. 𑀲𑀩𑁆𑀩𑀧𑀸𑀧𑀲𑁆𑀲𑀸𑀢𑀺 𑀓𑀫𑁆𑀫𑀧𑀣𑀪𑀸𑀯𑀧𑁆𑀧𑀢𑁆𑀢𑀸𑀧𑀢𑁆𑀢𑀲𑁆𑀲 𑀦𑀺𑀭𑀯𑀲𑁂𑀲𑀲𑁆𑀲 𑀅𑀓𑀼𑀲𑀮𑀲𑁆𑀲. 𑀅𑀓𑀭𑀡𑀦𑁆𑀢𑀺 𑀲𑀧𑀭𑀲𑀦𑁆𑀢𑀸𑀦𑁂𑀲𑀼 𑀅𑀦𑀼𑀧𑁆𑀧𑀸𑀤𑀦𑀁. 𑀓𑀼𑀲𑀮𑀲𑁆𑀲𑀸𑀢𑀺 𑀓𑀫𑁆𑀫𑀧𑀣𑀪𑀸𑀯𑀧𑁆𑀧𑀢𑁆𑀢𑀸𑀧𑀢𑁆𑀢𑀲𑁆𑀲 𑀢𑁂𑀪𑀽𑀫𑀓𑀓𑀼𑀲𑀮𑀲𑁆𑀲 𑀘𑁂𑀯 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀲𑁆𑀲 𑀘. 𑀉𑀧𑀲𑀫𑁆𑀧𑀤𑀸𑀢𑀺 𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑀦𑀯𑀲𑁂𑀦 𑀲𑀫𑁆𑀧𑀤𑀸. 𑀲𑀲𑁆𑀲 𑀅𑀢𑁆𑀢𑀦𑁄 𑀘𑀺𑀢𑁆𑀢𑀦𑁆𑀢𑀺 𑀲𑀘𑀺𑀢𑁆𑀢𑀁, 𑀲𑀘𑀺𑀢𑁆𑀢𑀲𑁆𑀲 𑀧𑀭𑀺𑀬𑁄𑀤𑀸𑀧𑀦𑀁 𑀯𑁄𑀤𑀸𑀦𑀁 𑀅𑀭𑀳𑀢𑁆𑀢𑀨𑀮𑀼𑀧𑁆𑀧𑀢𑁆𑀢𑀺𑀬𑀸𑀢𑀺 𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀸𑀧𑀦𑀁. 𑀅𑀭𑀳𑀢𑁆𑀢𑀫𑀕𑁆𑀕𑀼𑀧𑁆𑀧𑀸𑀤𑁄 𑀧𑀦 ‘‘𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸’’𑀢𑀺 𑀧𑀤𑁂𑀦 𑀕𑀳𑀺𑀢𑁄. 𑀏𑀢𑀁 𑀅𑀓𑀭𑀡𑀸𑀤𑀺𑀢𑁆𑀢𑀬𑀤𑀻𑀧𑀦𑀁 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀑𑀯𑀸𑀤𑁄𑀢𑀺 𑀕𑀸𑀣𑀸𑀢𑁆𑀣𑁄.

𑀕𑀸𑀣𑀸𑀬𑀁 𑀬𑀲𑁆𑀲 𑀧𑀸𑀧𑀲𑁆𑀲 𑀅𑀓𑀭𑀡𑀁 𑀯𑀼𑀢𑁆𑀢𑀁, 𑀢𑀁 𑀧𑀸𑀧𑀁 𑀤𑀼𑀘𑁆𑀘𑀭𑀺𑀢𑀓𑀫𑁆𑀫𑀧𑀣𑀯𑀲𑁂𑀦 𑀯𑀺𑀪𑀚𑀺𑀢𑀼𑀁 ‘‘𑀲𑀩𑁆𑀩𑀧𑀸𑀧𑀁 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑁄𑀲𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁, 𑀮𑁄𑀪𑀲𑀫𑀼𑀝𑁆𑀞𑀸𑀦𑀫𑁆𑀧𑀺 𑀪𑀯𑀢𑀺. 𑀮𑁄𑀪𑀲𑀫𑀼𑀝𑁆𑀞𑀸𑀦𑀦𑁆𑀢𑀺𑀧𑀺 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁, 𑀤𑁄𑀲𑀲𑀫𑀼𑀝𑁆𑀞𑀸𑀦𑀫𑁆𑀧𑀺 𑀪𑀯𑀢𑀺. 𑀫𑁄𑀳𑀲𑀫𑀼𑀝𑁆𑀞𑀸𑀦𑀫𑁆𑀧𑀺 𑀢𑀣𑁂𑀯 𑀯𑀼𑀢𑁆𑀢𑀁. 𑀮𑁄𑀪𑀲𑀫𑀼𑀝𑁆𑀞𑀸𑀦𑀤𑁄𑀲𑀲𑀫𑀼𑀝𑁆𑀞𑀸𑀦𑀫𑁆𑀧𑀺 𑀲𑀫𑁆𑀪𑀯𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑀧𑀸𑀧𑁄 𑀤𑀼𑀘𑁆𑀘𑀭𑀺𑀢𑀓𑀫𑁆𑀫𑀧𑀣𑀧𑁆𑀧𑀪𑁂𑀤𑁂𑀦 𑀯𑀺𑀪𑀢𑁆𑀢𑁄, ‘‘𑀏𑀢𑁆𑀢𑀓𑁂𑀦𑁂𑀯 𑀯𑀺𑀪𑀚𑀺𑀢𑀩𑁆𑀩𑁄, 𑀉𑀤𑀸𑀳𑀼 𑀅𑀜𑁆𑀜𑁂𑀦 𑀯𑀺𑀪𑀚𑀺𑀢𑀩𑁆𑀩𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀅𑀜𑁆𑀜𑁂𑀦 𑀅𑀓𑀼𑀲𑀮𑀫𑀽𑀮𑀅𑀕𑀢𑀺𑀕𑀫𑀦𑀪𑁂𑀤𑁂𑀦𑀧𑀺 𑀯𑀺𑀪𑀚𑀺𑀢𑀼𑀁 ‘‘𑀬𑀸 𑀅𑀪𑀺𑀚𑁆𑀛𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀏𑀯𑀁 𑀤𑀼𑀘𑁆𑀘𑀭𑀺𑀢𑀅𑀓𑀼𑀲𑀮𑀓𑀫𑁆𑀫𑀧𑀣𑀓𑀫𑁆𑀫𑀯𑀺𑀪𑀸𑀕𑁂𑀦 ‘𑀲𑀩𑁆𑀩𑀧𑀸𑀧’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑀸𑀧𑀁 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺𑀲𑁆𑀲 𑀅𑀓𑀼𑀲𑀮𑀫𑀽𑀮𑀯𑀲𑁂𑀦 𑀅𑀕𑀢𑀺𑀕𑀫𑀦𑀯𑀺𑀪𑀸𑀕𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 ‘𑀅𑀓𑀼𑀲𑀮𑀫𑀽𑀮’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁩𑁦) 𑀅𑀦𑀼𑀲𑀦𑁆𑀥𑁆𑀬𑀢𑁆𑀣𑁄 𑀯𑀼𑀢𑁆𑀢𑁄. 𑀫𑁄𑀳𑀯𑀲𑁂𑀦 𑀲𑀪𑀸𑀯𑀁 𑀅𑀚𑀸𑀦𑀦𑁆𑀢𑀲𑁆𑀲 𑀪𑀬𑀲𑀫𑁆𑀪𑀯𑀢𑁄 𑀬𑀁 𑀪𑀬𑀸 𑀘 𑀫𑁄𑀳𑀸 𑀘 𑀅𑀕𑀢𑀺𑀁 𑀕𑀘𑁆𑀙𑀢𑀺, 𑀇𑀤𑀁 𑀫𑁄𑀳𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁.

𑀲𑀩𑁆𑀩𑀧𑀸𑀧𑁄 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀜𑀸𑀢𑁄, ‘‘𑀓𑀢𑀫𑀁 𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀢𑀢𑁆𑀣 𑀮𑁄𑀪𑁄 𑀅𑀲𑀼𑀪𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑁋

‘‘𑀏𑀢𑁆𑀢𑀸𑀯𑀢𑀸 ‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡’𑀦𑁆𑀢𑀺 𑀏𑀢𑁆𑀣 𑀧𑀸𑀧𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲 𑀅𑀓𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘𑀮𑁄𑀪𑁄…𑀧𑁂… 𑀧𑀜𑁆𑀜𑀸𑀬𑀸’𑀢𑀺 𑀢𑀻𑀳𑀺 𑀓𑀼𑀲𑀮𑀫𑀽𑀮𑁂𑀳𑀺 𑀢𑀺𑀡𑁆𑀡𑀁 𑀅𑀓𑀼𑀲𑀮𑀫𑀽𑀮𑀸𑀦𑀁 𑀧𑀳𑀸𑀦𑀯𑀲𑁂𑀦 𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁 𑀅𑀦𑀼𑀧𑁆𑀧𑀸𑀤𑀦𑀫𑀸𑀳𑀸’’𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁩𑁦) 𑁋

𑀯𑀼𑀢𑁆𑀢𑀁. 𑀲𑀼𑀪𑀸𑀥𑀺𑀫𑀼𑀢𑁆𑀢𑀯𑀲𑁂𑀦 𑀧𑀯𑀢𑁆𑀢𑁄 𑀮𑁄𑀪𑁄 𑀅𑀲𑀼𑀪𑀸𑀬 𑀅𑀲𑀼𑀪𑀪𑀸𑀯𑀦𑀸𑀬 𑀢𑀣𑀸𑀧𑀯𑀢𑁆𑀢𑁂𑀦 𑀅𑀮𑁄𑀪𑁂𑀦 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑁂𑀦 𑀧𑀳𑀻𑀬𑀢𑀺, 𑀲𑀢𑁆𑀢𑁂𑀲𑀼 𑀓𑀼𑀚𑁆𑀛𑀦𑀤𑀼𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑁄 𑀤𑁄𑀲𑁄 𑀫𑁂𑀢𑁆𑀢𑀸𑀬 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀢𑀣𑀸𑀧𑀯𑀢𑁆𑀢𑁂𑀦 𑀅𑀤𑁄𑀲𑁂𑀦 𑀘 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑁂𑀦 𑀧𑀳𑀻𑀬𑀢𑀺, 𑀲𑀢𑁆𑀢𑁂𑀲𑀼 𑀘𑁂𑀯 𑀲𑀗𑁆𑀔𑀸𑀭𑁂𑀲𑀼 𑀘 𑀫𑀼𑀬𑁆𑀳𑀦𑀯𑀲𑁂𑀦 𑀧𑀯𑀢𑁆𑀢𑁄 𑀫𑁄𑀳𑁄 𑀧𑀜𑁆𑀜𑀸𑀬 𑀯𑀺𑀘𑀸𑀭𑀡𑀧𑀜𑁆𑀜𑀸𑀬 𑀘 𑀪𑀸𑀯𑀦𑀸𑀫𑀕𑁆𑀕𑀧𑀜𑁆𑀜𑀸𑀬 𑀘 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂𑀦 𑀧𑀳𑀻𑀬𑀢𑀺.

‘‘𑀬𑀤𑀺 𑀢𑀻𑀳𑀺 𑀓𑀼𑀲𑀮𑀫𑀽𑀮𑁂𑀳𑁂𑀯 𑀅𑀓𑀼𑀲𑀮𑀫𑀽𑀮𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀏𑀯𑀁 𑀲𑀢𑀺 𑀉𑀧𑁂𑀓𑁆𑀔𑀸𑀓𑀭𑀼𑀡𑀸𑀫𑀼𑀤𑀺𑀢𑀸 𑀦𑀺𑀭𑀢𑁆𑀣𑀓𑀸 𑀪𑀯𑁂𑀬𑁆𑀬𑀼’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑀣𑀸 𑀮𑁄𑀪𑁄 𑀉𑀧𑁂𑀓𑁆𑀔𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀧𑁂𑀓𑁆𑀔𑀸𑀬𑀸𑀢𑀺 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀓𑀫𑁆𑀫𑀲𑁆𑀲𑀓𑀸’’𑀢𑀺𑀆𑀤𑀺𑀦𑀸 𑀪𑀸𑀯𑀺𑀢𑀸𑀬 𑀉𑀧𑁂𑀓𑁆𑀔𑀸𑀬. 𑀫𑀼𑀤𑀺𑀢𑀸 𑀅𑀭𑀢𑀺𑀁 𑀯𑀽𑀧𑀲𑀫𑁂𑀢𑁆𑀯𑀸 𑀅𑀭𑀢𑀺𑀬𑀸 𑀫𑀽𑀮𑀪𑀽𑀢𑀁 𑀫𑁄𑀳𑀫𑁆𑀧𑀺 𑀧𑀚𑀳𑀢𑀻𑀢𑀺 𑀫𑀦𑀲𑀺 𑀓𑀢𑁆𑀯𑀸 ‘‘𑀫𑁄𑀳𑁄 𑀫𑀼𑀤𑀺𑀢𑀸𑀬 𑀧𑀳𑀸𑀦𑀁 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀅𑀓𑀼𑀲𑀮𑀫𑀽𑀮𑀸𑀦𑀁 𑀓𑀼𑀲𑀮𑀫𑀽𑀮𑀸𑀤𑀻𑀳𑀺 𑀧𑀳𑀸𑀢𑀩𑁆𑀩𑀢𑁆𑀢𑀁 𑀓𑁂𑀦 𑀅𑀫𑁆𑀳𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀢𑀣𑀸 𑀧𑀳𑀸𑀢𑀩𑁆𑀩𑀢𑁆𑀢𑁂𑀦 𑀪𑀕𑀯𑀸 ‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡’’𑀦𑁆𑀢𑀺 𑀯𑀘𑀦𑀁 𑀆𑀳, 𑀢𑁂𑀦 ‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡’’𑀦𑁆𑀢𑀺 𑀯𑀘𑀦𑁂𑀦 𑀢𑀣𑀸 𑀧𑀳𑀸𑀢𑀩𑁆𑀩𑀢𑁆𑀢𑀁 𑀢𑀼𑀫𑁆𑀳𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁧. ‘‘𑀏𑀢𑁆𑀢𑀸𑀯𑀢𑀸 𑀘 𑀲𑀩𑁆𑀩𑀧𑀸𑀧𑁄 𑀯𑀺𑀪𑀢𑁆𑀢𑁄, 𑀢𑀲𑁆𑀲 𑀅𑀓𑀭𑀡𑀜𑁆𑀘 𑀯𑀺𑀪𑀢𑁆𑀢𑀁 𑀲𑀺𑀬𑀸, 𑀏𑀯𑀁 𑀲𑀢𑀺 𑀅𑀝𑁆𑀞𑀫𑀺𑀘𑁆𑀙𑀢𑁆𑀢𑀸𑀦𑀁 𑀅𑀓𑀭𑀡𑀁 𑀅𑀦𑀺𑀯𑀸𑀭𑀺𑀢𑀁 𑀲𑀺𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀲𑀩𑁆𑀩𑀧𑀸𑀧𑀁 𑀦𑀸𑀫 𑀅𑀝𑁆𑀞 𑀫𑀺𑀘𑁆𑀙𑀢𑁆𑀢𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀺𑀘𑁆𑀙𑀸𑀲𑀢𑀻𑀢𑀺 𑀅𑀦𑀺𑀘𑁆𑀘𑀸𑀤𑀻𑀲𑀼 ‘‘𑀦𑀺𑀘𑁆𑀘’’𑀦𑁆𑀢𑀺 𑀅𑀦𑀼𑀲𑁆𑀲𑀭𑀡𑀘𑀺𑀦𑁆𑀢𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀅𑀓𑀼𑀲𑀮𑀧𑁆𑀧𑀯𑀢𑁆𑀢𑀺.

𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁 𑀩𑀳𑀼𑀥𑀸 𑀆𑀘𑀭𑀺𑀬𑁂𑀦 𑀯𑀺𑀪𑀢𑁆𑀢𑀁, 𑀅𑀫𑁆𑀳𑁂𑀳𑀺 𑀘 𑀯𑀺𑀜𑁆𑀜𑀸𑀢𑀁, ‘‘𑀓𑀣𑀁 𑀓𑀼𑀲𑀮𑀲𑁆𑀲 𑀲𑀫𑁆𑀧𑀤𑀸 𑀯𑀺𑀪𑀚𑀺𑀢𑀩𑁆𑀩𑀸 𑀯𑀺𑀜𑁆𑀜𑀸𑀢𑀩𑁆𑀩𑀸’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀓𑀼𑀲𑀮𑀲𑁆𑀲 𑀲𑀫𑁆𑀧𑀤𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀝𑁆𑀞𑀲𑀼 𑀫𑀺𑀘𑁆𑀙𑀢𑁆𑀢𑁂𑀲𑀼 𑀧𑀳𑀻𑀦𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀅𑀝𑁆𑀞 𑀲𑀫𑁆𑀫𑀢𑁆𑀢𑀸𑀦𑀻𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑀅𑀝𑁆𑀞𑀲𑀫𑁆𑀫𑀢𑁆𑀢𑀸𑀦𑀺 𑀯𑀺𑀲𑀪𑀸𑀕𑀧𑀭𑀺𑀯𑀢𑁆𑀢𑀦𑀥𑀫𑁆𑀫𑀯𑀲𑁂𑀦 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀅𑀢𑀻𑀢𑀲𑁆𑀲𑀸𑀢𑀺 𑀅𑀢𑀻𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀲𑁆𑀲. 𑀯𑀺𑀧𑀲𑁆𑀲𑀺𑀦𑁄 𑀳𑀺 𑀪𑀕𑀯𑀢𑁄 𑀅𑀬𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀕𑀸𑀣𑀸. 𑀘𑀺𑀢𑁆𑀢𑁂 𑀧𑀭𑀺𑀬𑁄𑀤𑀸𑀧𑀺𑀢𑁂𑀢𑀺 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀸 𑀧𑀜𑁆𑀘𑀓𑁆𑀔𑀦𑁆𑀥𑀸𑀧𑀺 𑀧𑀭𑀺𑀬𑁄𑀤𑀸𑀧𑀺𑀢𑀸 𑀪𑀯𑀦𑁆𑀢𑀺. ‘‘𑀘𑀺𑀢𑁆𑀢𑀧𑀭𑀺𑀬𑁄𑀤𑀸𑀧𑀺𑀢𑁂𑀦 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀧𑀭𑀺𑀬𑁄𑀤𑀸𑀧𑀺𑀢𑀪𑀸𑀯𑁄 𑀓𑀣𑀁 𑀅𑀫𑁆𑀳𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀏𑀯𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀪𑀕𑀯𑀸 𑀬𑀁 ‘‘𑀘𑁂𑀢𑁄𑀯𑀺𑀲𑀼𑀤𑁆𑀥𑀢𑁆𑀣𑀁 𑀪𑀺𑀓𑁆𑀔𑀯𑁂 𑀢𑀣𑀸𑀕𑀢𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺 𑀯𑀘𑀦𑀁 𑀆𑀳, 𑀢𑁂𑀦 ‘‘𑀘𑁂𑀢𑁄…𑀧𑁂… 𑀯𑀼𑀲𑁆𑀲𑀢𑀻’’𑀢𑀺 𑀯𑀘𑀦𑁂𑀦 𑀢𑀼𑀫𑁆𑀳𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀧𑀭𑀺𑀬𑁄𑀤𑀸𑀧𑀦𑀸 𑀓𑀢𑀺𑀯𑀺𑀥𑀸 𑀪𑀯𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀤𑀼𑀯𑀺𑀥𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑀣𑀯𑀺𑀧𑀲𑁆𑀲𑀦𑀸𑀬 𑀦𑀻𑀯𑀭𑀡𑀧𑁆𑀧𑀳𑀸𑀦𑀜𑁆𑀘 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀬 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑁄 𑀘𑀸𑀢𑀺 𑀧𑀭𑀺𑀬𑁄𑀤𑀸𑀧𑀦𑀲𑁆𑀲 𑀤𑀼𑀯𑀺𑀥𑀢𑁆𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀬𑁄𑀤𑀸𑀧𑀺𑀢𑀸 𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀳𑀻𑀦𑀦𑀻𑀯𑀭𑀡𑀸𑀦𑀼𑀲𑀬𑀸 𑀳𑀺 𑀧𑀼𑀕𑁆𑀕𑀮𑀸 𑀧𑀲𑀸𑀤𑀦𑀻𑀬𑀯𑀡𑁆𑀡𑀸 𑀳𑁄𑀦𑁆𑀢𑀺.

‘‘𑀧𑀭𑀺𑀬𑁄𑀤𑀸𑀧𑀦𑀲𑁆𑀲 𑀓𑀺𑀢𑁆𑀢𑀺𑀓𑀸 𑀪𑀽𑀫𑀺𑀬𑁄’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀤𑁆𑀯𑁂 𑀧𑀭𑀺𑀬𑁄𑀤𑀸𑀧𑀦𑀪𑀽𑀫𑀺𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡’𑀦𑁆𑀢𑀺𑀆𑀤𑀺𑀕𑀸𑀣𑀸𑀬 𑀤𑁂𑀲𑀺𑀢𑁂𑀲𑀼 𑀥𑀫𑁆𑀫𑁂𑀲𑀼 𑀓𑀢𑀫𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀓𑀢𑀫𑀁 𑀲𑀫𑀼𑀤𑀬𑀲𑀘𑁆𑀘𑀁, 𑀓𑀢𑀫𑀁 𑀫𑀕𑁆𑀕𑀲𑀘𑁆𑀘𑀁, 𑀓𑀢𑀫𑀁 𑀦𑀺𑀭𑁄𑀥𑀲𑀘𑁆𑀘’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀬𑀁 𑀧𑀝𑀺𑀯𑁂𑀥𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀕𑀸𑀣𑀸𑀬 𑀤𑁂𑀲𑀺𑀢𑁂𑀲𑀼 𑀥𑀫𑁆𑀫𑁂𑀲𑀼 𑀬𑀁 𑀔𑀦𑁆𑀥𑀧𑀜𑁆𑀘𑀓𑀁 𑀧𑀝𑀺𑀯𑁂𑀥𑁂𑀦 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦 𑀧𑀭𑀺𑀬𑁄𑀤𑀸𑀧𑁂𑀢𑀺, 𑀇𑀤𑀁 𑀔𑀦𑁆𑀥𑀧𑀜𑁆𑀘𑀓𑀁 𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀘𑁆𑀘𑀁 𑀪𑀯𑁂. 𑀬𑀢𑁄 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀢𑁄 𑀔𑀦𑁆𑀥𑀧𑀜𑁆𑀘𑀓𑀁 𑀧𑀭𑀺𑀬𑁄𑀤𑀸𑀧𑁂𑀢𑀺, 𑀅𑀬𑀁 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀲𑀫𑀼𑀤𑀬𑁄 𑀲𑀫𑀼𑀤𑀬𑀲𑀘𑁆𑀘𑀁. 𑀬𑁂𑀦 𑀅𑀭𑀺𑀬𑀫𑀕𑁆𑀕𑀗𑁆𑀕𑁂𑀦 𑀧𑀭𑀺𑀬𑁄𑀤𑀸𑀧𑁂𑀢𑀺, 𑀅𑀬𑀁 𑀅𑀭𑀺𑀬𑀫𑀕𑁆𑀕𑁄 𑀫𑀕𑁆𑀕𑀲𑀘𑁆𑀘𑀁. 𑀬𑀁 𑀅𑀲𑀗𑁆𑀔𑀢𑀥𑀸𑀢𑀼𑀁 𑀅𑀥𑀺𑀕𑀢𑁂𑀦 𑀧𑀼𑀕𑁆𑀕𑀮𑁂𑀦 𑀧𑀭𑀺𑀬𑁄𑀤𑀸𑀧𑀺𑀢𑀁, 𑀅𑀬𑀁 𑀅𑀲𑀗𑁆𑀔𑀢𑀥𑀸𑀢𑀼𑀥𑀫𑁆𑀫𑁄 𑀦𑀺𑀭𑁄𑀥𑁄 𑀦𑀺𑀭𑁄𑀥𑀲𑀘𑁆𑀘𑀁 𑀪𑀯𑁂. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀕𑀸𑀣𑀸𑀬 𑀤𑁂𑀲𑀺𑀢𑀥𑀫𑁆𑀫𑀸𑀦𑀁 𑀲𑀪𑀸𑀕𑀯𑀺𑀲𑀪𑀸𑀕𑀥𑀫𑁆𑀫𑀸𑀯𑀝𑁆𑀝𑀦𑀯𑀲𑁂𑀦 𑀦𑀺𑀤𑁆𑀥𑀸𑀭𑀺𑀢𑀸𑀦𑀺. ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺𑀓𑀲𑁆𑀲 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡’’𑀦𑁆𑀢𑀺𑀆𑀤𑀺𑀕𑀸𑀣𑀸𑀬 𑀤𑁂𑀲𑀺𑀢𑀸𑀦𑀁 𑀥𑀫𑁆𑀫𑀸𑀦𑀁 𑀲𑀪𑀸𑀕𑀯𑀺𑀲𑀪𑀸𑀕𑀥𑀫𑁆𑀫𑀸𑀯𑀝𑁆𑀝𑀦𑀯𑀲𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀆𑀘𑀭𑀺𑀬𑁂𑀦 𑀦𑀺𑀤𑁆𑀥𑀸𑀭𑀺𑀢𑀸𑀦𑀺, 𑀅𑀫𑁆𑀳𑁂𑀳𑀺 𑀘 𑀯𑀺𑀜𑁆𑀜𑀸𑀢𑀸𑀦𑀺.

‘‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀁, 𑀙𑀢𑁆𑀢𑀁 𑀫𑀳𑀦𑁆𑀢𑀁 𑀬𑀣 𑀯𑀲𑁆𑀲𑀓𑀸𑀮𑁂;

𑀏𑀲𑀸𑀦𑀺𑀲𑀁𑀲𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂, 𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀺 𑀥𑀫𑁆𑀫𑀘𑀸𑀭𑀻’𑀢𑀺 𑁋

𑀕𑀸𑀣𑀸𑀬 𑀤𑁂𑀲𑀺𑀢𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀲𑀪𑀸𑀕𑀲𑀪𑀸𑀕𑀥𑀫𑁆𑀫𑀸𑀦𑀁 𑀆𑀯𑀝𑁆𑀝𑀦𑀯𑀲𑁂𑀦 𑀓𑀣𑀁 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀦𑀺𑀤𑁆𑀥𑀸𑀭𑀺𑀢𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀥𑀫𑁆𑀫𑁄 𑀳𑀯𑁂’’𑀢𑀺𑀆𑀤𑀺𑀫𑀸𑀳. 𑀢𑀸𑀬 𑀕𑀸𑀣𑀸𑀬 𑀤𑁂𑀲𑀺𑀢𑁂 𑀥𑀫𑁆𑀫𑁂 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀥𑀫𑁆𑀫𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀥𑀫𑁆𑀫𑁄 𑀦𑀸𑀫𑀸𑀢𑀺 𑀧𑀼𑀜𑁆𑀜𑀥𑀫𑁆𑀫𑁄 𑀦𑀸𑀫. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄𑀢𑀺 𑀫𑀦𑀘𑁆𑀙𑀝𑁆𑀞𑀺𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀸𑀤𑀺𑀓𑁄 𑀲𑀩𑁆𑀩𑁄 𑀲𑀁𑀯𑀭𑁄. 𑀢𑁂𑀦 𑀯𑀼𑀢𑁆𑀢𑀁 𑁋‘‘𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀲𑁂𑀦 𑀘𑁂𑀢𑁆𑀣 𑀲𑀩𑁆𑀩𑀫𑁆𑀧𑀺 𑀲𑀻𑀮𑀁 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺 (𑀦𑁂𑀢𑁆𑀢𑀺. 𑀅𑀝𑁆𑀞. 𑁩𑁧). 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀻𑀦𑀁 𑀕𑀢𑀺𑀪𑀽𑀢𑀢𑁆𑀢𑀸 𑀤𑀼𑀕𑁆𑀕𑀢𑀺. 𑀲𑀩𑁆𑀩𑀸 𑀉𑀧𑀧𑀢𑁆𑀢𑀺𑀬𑁄 𑀧𑀦 𑀤𑀼𑀓𑁆𑀔𑀤𑀼𑀓𑁆𑀔𑀲𑀗𑁆𑀔𑀸𑀭𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀲𑀫𑀗𑁆𑀕𑀻𑀦𑀁 𑀕𑀢𑀺𑀪𑀽𑀢𑀢𑁆𑀢𑀸 𑀤𑀼𑀕𑁆𑀕𑀢𑀺 𑀦𑀸𑀫.

‘‘𑀢𑀲𑁆𑀫𑀺𑀁 𑀤𑀼𑀯𑀺𑀥𑁂 𑀥𑀫𑁆𑀫𑁂 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀥𑀫𑁆𑀫𑁄 𑀓𑀢𑁆𑀣 𑀞𑀺𑀢𑁄, 𑀓𑀣𑀁 𑀲𑀼𑀘𑀺𑀡𑁆𑀡𑁄, 𑀓𑀼𑀢𑁄 𑀭𑀓𑁆𑀔𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀢𑀸 ‘‘𑀢𑀢𑁆𑀣 𑀬𑀸 𑀲𑀁𑀯𑀭𑀲𑀻𑀮𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀤𑀼𑀯𑀺𑀥𑁂 𑀥𑀫𑁆𑀫𑁂. 𑀲𑀁𑀯𑀭𑀲𑀻𑀮𑁂 𑀞𑀺𑀢𑀸 𑀬𑀸 𑀅𑀔𑀡𑁆𑀟𑀓𑀸𑀭𑀺𑀢𑀸 𑀳𑁄𑀢𑀺, 𑀅𑀬𑀁 𑀅𑀔𑀡𑁆𑀟𑀯𑀲𑁂𑀦 𑀓𑀸𑀢𑀩𑁆𑀩𑁄 𑀲𑀁𑀯𑀭𑀲𑀻𑀮𑁂 𑀞𑀺𑀢𑁄 𑀲𑀼𑀝𑁆𑀞𑀼 𑀆𑀘𑀺𑀡𑁆𑀡𑀧𑀭𑀺𑀘𑀺𑀡𑁆𑀡𑁄 𑀧𑀼𑀜𑁆𑀜𑀥𑀫𑁆𑀫𑁄 𑀘𑀢𑀽𑀳𑀺 𑀅𑀧𑀸𑀬𑁂𑀳𑀺 𑀅𑀢𑁆𑀢𑀦𑁄 𑀆𑀥𑀸𑀭𑀁 𑀅𑀢𑁆𑀢𑀸𑀦𑀁 𑀭𑀓𑁆𑀔𑀦𑁆𑀢𑀁 𑀧𑀼𑀕𑁆𑀕𑀮𑀁 𑀏𑀓𑀦𑁆𑀢𑀺𑀓𑀪𑀸𑀯𑁂𑀦 𑀭𑀓𑁆𑀔𑀢𑀺, 𑀅𑀦𑁂𑀓𑀦𑁆𑀢𑀺𑀓𑀪𑀸𑀯𑁂𑀦 𑀧𑀦 𑀭𑀓𑁆𑀔𑀺𑀢𑀫𑀢𑁆𑀢𑁄 𑀧𑀼𑀜𑁆𑀜𑀥𑀫𑁆𑀫𑁄𑀧𑀺 𑀭𑀓𑁆𑀔𑀢𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀧𑀸𑀬𑁂𑀳𑀻𑀢𑀺 𑀘 𑀧𑀥𑀸𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀭𑁄𑀕𑀸𑀤𑀺𑀅𑀦𑁆𑀢𑀭𑀸𑀬𑀢𑁄𑀧𑀺 𑀭𑀓𑁆𑀔𑀢𑀺. 𑀭𑁄𑀕𑀸𑀤𑀺𑀅𑀦𑁆𑀢𑀭𑀸𑀬𑁄 𑀯𑀸 𑀅𑀬𑀢𑁄 𑀅𑀧𑀕𑀢𑀢𑁆𑀢𑀸 𑀅𑀧𑀸𑀬𑀦𑁆𑀢𑁄𑀕𑀥𑁄𑀢𑀺 𑀤𑀝𑁆𑀞𑀩𑁆𑀩𑁄.

‘‘𑀢𑀣𑀸 𑀭𑀓𑁆𑀔𑀢𑀻𑀢𑀺 𑀓𑁂𑀦 𑀅𑀫𑁆𑀳𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀏𑀯𑀁 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀮𑀓𑁆𑀔𑀡𑀧𑀓𑀸𑀭𑀤𑀲𑁆𑀲𑀦𑀁 𑀪𑀕𑀯𑀸 ‘‘𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀲𑀻𑀮𑀯𑀢𑁄 𑀕𑀢𑀺𑀬𑁄 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘𑀸’’𑀢𑀺 𑀬𑀁 𑀯𑀘𑀦𑀁 𑀆𑀳, 𑀢𑁂𑀦 ‘‘𑀤𑁆𑀯𑁂𑀫𑀸…𑀧𑁂… 𑀫𑀦𑀼𑀲𑁆𑀲𑀸 𑀘𑀸’’𑀢𑀺 𑀯𑀘𑀦𑁂𑀦 𑀢𑀼𑀫𑁆𑀳𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑀁𑀯𑀭𑀲𑀻𑀮𑁂 𑀞𑀺𑀢𑀲𑁆𑀲 𑀅𑀔𑀡𑁆𑀟𑀓𑀸𑀢𑀩𑁆𑀩𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀧𑀼𑀜𑁆𑀜𑀥𑀫𑁆𑀫𑀲𑁆𑀲 𑀅𑀧𑀸𑀬𑁂𑀳𑀺 𑀭𑀓𑁆𑀔𑀡𑁂 𑀏𑀓𑀦𑁆𑀢𑀺𑀓𑀪𑀸𑀯𑁄 𑀓𑁂𑀦 𑀲𑀼𑀢𑁆𑀢𑁂𑀦 𑀤𑀻𑀧𑁂𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀏𑀯𑀜𑁆𑀘 𑀦𑀸𑀴𑀦𑁆𑀤𑀸𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀯𑀜𑁆𑀘𑀸𑀢𑀺 𑀇𑀫𑀺𑀦𑀸 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁂𑀦 𑀧𑀓𑀸𑀭𑁂𑀦𑀧𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀸𑀴𑀦𑁆𑀤𑀸𑀬𑀦𑁆𑀢𑀺 𑀦𑀸𑀴𑀦𑁆𑀤𑀦𑀸𑀫𑀓𑁂 𑀦𑀺𑀕𑀫𑁂 𑀦𑀺𑀲𑀺𑀦𑁆𑀦𑁄 𑀅𑀲𑀺𑀩𑀦𑁆𑀥𑀓𑀦𑀸𑀫𑀲𑁆𑀲 𑀧𑀼𑀢𑁆𑀢𑁄 𑀕𑀸𑀫𑀡𑀺 𑀕𑀸𑀫𑀚𑁂𑀝𑁆𑀞𑀓𑁄 𑀪𑀕𑀯𑀦𑁆𑀢𑀁 𑀏𑀢𑀁 𑀯𑀼𑀘𑁆𑀘𑀫𑀸𑀦𑀁 ‘‘𑀩𑁆𑀭𑀸𑀳𑁆𑀫𑀡𑀸, 𑀪𑀦𑁆𑀢𑁂’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘.

𑀩𑁆𑀭𑀸𑀳𑁆𑀫𑀡𑀸𑀢𑀺 𑀩𑀸𑀳𑀺𑀭𑀓𑀸 𑀩𑁆𑀭𑀸𑀳𑁆𑀫𑀡𑀸. 𑀪𑀦𑁆𑀢𑁂𑀢𑀺 𑀪𑀕𑀯𑀦𑁆𑀢𑀁 𑀕𑀸𑀫𑀡𑀺 𑀆𑀮𑀧𑀢𑀺. 𑀧𑀘𑁆𑀙𑀸𑀪𑀽𑀫𑀓𑀸𑀢𑀺 𑀧𑀘𑁆𑀙𑀺𑀫𑀤𑀺𑀲𑀸𑀬 𑀦𑀺𑀲𑀺𑀦𑁆𑀦𑀓𑀸. 𑀉𑀬𑁆𑀬𑀸𑀧𑁂𑀦𑁆𑀢𑀻𑀢𑀺 𑀫𑀦𑀼𑀲𑁆𑀲𑀮𑁄𑀓𑀢𑁄 𑀉𑀤𑁆𑀥𑀁 𑀤𑁂𑀯𑀮𑁄𑀓𑀁 𑀬𑀸𑀧𑁂𑀦𑁆𑀢𑀺 𑀧𑀸𑀧𑁂𑀦𑁆𑀢𑀺.

𑀇𑀥𑀲𑁆𑀲𑀸𑀢𑀺 𑀇𑀥𑀮𑁄𑀓𑁂 𑀅𑀲𑁆𑀲 𑀪𑀯𑁂𑀬𑁆𑀬. 𑀧𑀼𑀭𑀺𑀲𑁄 𑀧𑀸𑀡𑀸𑀢𑀺𑀧𑀸𑀢𑀻…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀅𑀲𑁆𑀲 𑀪𑀯𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀲𑁂𑀲𑀁 𑀧𑀸𑀴𑀺𑀢𑁄 𑀘𑁂𑀯 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀘 𑀜𑁂𑀬𑁆𑀬𑀁.

𑁩𑁨. ‘‘𑀯𑀺𑀲𑀪𑀸𑀕𑀥𑀫𑁆𑀫𑀲𑀪𑀸𑀕𑀥𑀫𑁆𑀫𑀸𑀯𑀝𑁆𑀝𑀦𑀯𑀲𑁂𑀦 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀦𑀺𑀤𑁆𑀥𑀸𑀭𑀺𑀢𑀪𑀸𑀯𑁄 𑀓𑁂𑀦 𑀅𑀫𑁆𑀳𑁂𑀳𑀺 𑀲𑀤𑁆𑀤𑀳𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀢𑁂𑀦𑀸𑀳 𑀫𑀳𑀸𑀓𑀘𑁆𑀘𑀸𑀦𑁄 𑀏𑀓𑀫𑁆𑀳𑀺 𑀧𑀤𑀝𑁆𑀞𑀸𑀦𑁂’’𑀢𑀺 𑀯𑀼𑀢𑁆𑀢𑀁.

‘‘𑀏𑀢𑁆𑀢𑀸𑀯𑀢𑀸 𑀘 𑀆𑀯𑀝𑁆𑀝𑁄 𑀳𑀸𑀭𑁄 𑀧𑀭𑀺𑀧𑀼𑀡𑁆𑀡𑁄, 𑀅𑀜𑁆𑀜𑁄 𑀦𑀺𑀬𑀼𑀢𑁆𑀢𑁄 𑀦𑀢𑁆𑀣𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 ‘‘𑀦𑀺𑀬𑀼𑀢𑁆𑀢𑁄 𑀆𑀯𑀝𑁆𑀝𑁄 𑀳𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀲𑀁 𑀬𑀲𑁆𑀲𑀁 𑀧𑀸𑀴𑀺𑀬𑀁 𑀬𑁄 𑀬𑁄 𑀆𑀯𑀝𑁆𑀝𑁄 𑀳𑀸𑀭𑁄 𑀬𑀣𑀸𑀮𑀸𑀪𑀯𑀲𑁂𑀦 𑀬𑁄𑀚𑀺𑀢𑁄, 𑀢𑀲𑁆𑀲𑀁 𑀢𑀲𑁆𑀲𑀁 𑀧𑀸𑀴𑀺𑀬𑀁 𑀲𑁄 𑀲𑁄 𑀆𑀯𑀝𑁆𑀝𑁄 𑀳𑀸𑀭𑁄 𑀢𑀣𑀸 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑀼𑀢𑁆𑀢𑁄 𑀬𑁄𑀚𑀺𑀢𑁄𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀇𑀢𑀺 𑀆𑀯𑀝𑁆𑀝𑀳𑀸𑀭𑀯𑀺𑀪𑀗𑁆𑀕𑁂 𑀲𑀢𑁆𑀢𑀺𑀩𑀮𑀸𑀦𑀼𑀭𑀽𑀧𑀸 𑀭𑀘𑀺𑀢𑀸

𑀯𑀺𑀪𑀸𑀯𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀡𑁆𑀟𑀺𑀢𑁂𑀳𑀺 𑀧𑀦 𑀅𑀝𑁆𑀞𑀓𑀣𑀸𑀝𑀻𑀓𑀸𑀦𑀼𑀲𑀸𑀭𑁂𑀦𑁂𑀯 𑀕𑀫𑁆𑀪𑀻𑀭𑀢𑁆𑀣𑁄 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄𑀢𑀺.